Ѡ҆ чи́нѣ, ка́кѡ навыка́ти добродѣ́тел́ємъ.

Бг҃оꙋго́днѣ, спасе́ннѡ и҆ чи́ннѡ, ́є҆ще́ же и҆ съ нꙋ́жнымъ доволствіем хотя́й жи́телствовати жи́знь настоя́щꙋю. Да и҆ ѻ҆́нꙋю же бл҃же́ннꙋю и҆ бесме́ртнꙋю ѹ҆лꙋчи́ти возмо́жетъ: Вѣ́рꙋ пра́вꙋю, и҆ дѣла̀ до́брые до́лженствꙋетъ стяжа́ти, без̾ вѣ́ры бо невозмо́жно ѹ҆годи́ти бг҃ꙋ. без̾ дѣ́лъ же до́брых вѣ́ра мертва̀́є҆́сть.[1] Тѣ́мже воспи́танным в̾ вѣ́рѣ правосла́вной, ꙗ҆̀же да не бꙋ́детъ мертва̀, но дѣ́йственна, подоба́етъ, и҆ должно ́є҆́сть соверше́нство добродѣ́телей стяжа́ти, с̾ ни́ми же и҆ вся́кая бл҃га̑я пріи́дꙋтъ к̾ на́мъ. и҆́же бо в̾ добродѣ́тели богат, ничесогѡ́же к̾ до́бромꙋ по житію̀ лиша́ется. занѐ боя́щіися Гдⷭ҇а, и҆ творя́щіи во́лю ́є҆гѡ̀, нелиша́ются вся́кагѡ бл҃га.[2] л. с҃ѳ ѡ҆б. На таково́е же соверше́ніе, а҆́ки пе́рна[3] съ ни́зꙋ на гѡ́рняя и҆лѝ пꙋтехо́децъ степе́нми на го́рꙋ восходи́ти да навыка́етъ. ниже́ бо и҆ дѣ́лаяй зе́млю, а҆́біе и҆зора́етъ всю̀, но на ча́сти раздѣля́етъ ю҆̀, и҆, вся́кое зда́ніе ѿ ѡ҆снова́нія и҆зводи́мо и҆ зи́ждемо быва́етъ. Нн҃ѣ ѹ҆́бѡ ́є҆ди́ной, и҆ногда́ же дрꙋго́й, та́же тре́тіей, по се́й четве́ртой и҆ про́чіимъ по ́є҆ди́ной добродѣ́тел́ємъ навы́кнем. Навы́кнем в̾ се́мъ мцⷭ҇ѣ, не ѹ҆каря́ти, не досади́ти, не гнѣ́ватися, и҆ поло́жим себѣ̀ завѣт и҆ тща́ніе, дабы̀ всеконе́чнѡ навыкнꙋти сегѡ̀ в̾ мцⷭ҇ѣ настоя́щем, а҆ в̾ надходя́щемъ терпѣ́нію да нака́жем себѐ, в̾ и҆́ном же и҆́ной добродѣ́тели, каково́й навыкше, на предлежа́щꙋю простира́тися. и҆стребим кривоприсяжство, неправ́єⷣная л. с҃і ротѣ́нія, кля̑твы ча̑стыя, и҆ тѣ́хъ престꙋпл́є́нія. скверносло́віе, и҆ бꙋесло́віе, и҆ кощꙋ́ны да нижѐ и҆менꙋ́ются в̾ на́съ. сія̀ и҆ си̑мъ подѡбная пре́жде всегѡ̀ да и҆спра́вимъ, не тре́бѣ здѣ̀ и҆ждиве́нія, ни трꙋдѡ́въ, ни по́тѡⷡ҇: довлѣ́етъ то́кмѡ хотѣ́ти, и҆ потща́тися ѹ҆се́рднѡ. Ѹ҆здꙋ̀ вложи́ти я҆зы́кꙋ, гнѣ́въ, по́хоть безвре́меннꙋю, пресыще́ніе, піа́нство, дра́гость, и҆ многоцѣ́ніе, ѹ҆краш́є́нія же и҆ храни̑лища домѡⷡ҇ная, ѿри́немъ. Та́же ѹ҆де́ржимъ рꙋ́ки на́шя ѿ лихои́мства, хище́нія, грабле́нія, татбы̀, и҆ ѕлоприбы́тчества. ѿ сицевых пе́рвѣе ѹ҆де́ржим рꙋ́ки на́шя, и҆ тогда̀ млⷭ҇тыню тре́бꙋющымъ подади́мъ: а҆ не всѐ ́є҆ди́ною, сі́есть, тѣ́ми же рꙋка́ми и҆ похища́юще, и҆ татбꙋ̀ дѣ́юще, и҆ в̾ кꙋпе́четсвѣ л. с҃і ѡ҆б. прелща́юще, и҆ млⷭ҇тыню подава́юще. ꙗ҆́коже бо кто̀ ѹ҆би́въ бра́та цр҃е́ва и҆мѣ́яй ́є҆щѐ и҆ рꙋ́цѣ ѡ҆крова́влены, прино́сит да́ръ цр҃е́ви: та́кѡ ѡ҆би́дящій и҆ подава́ющій млⷭ҇тыню, ка́знь и҆ мꙋ́кꙋ вмѣ́стѡ воздая́нія пріи́метъ. Си́це же и҆ принося́щіи же́ртвꙋ хвале́нія Бг҃ꙋ, си́рѣчь пло́дъ ѹ҆сте́н, (ꙗ҆́коже а҆пⷭ҇лъ гл҃етъ) и҆сповѣ́дающіися и҆́мени ́є҆гѡ̀, до́лженствꙋютъ пре́жде ѡ҆бꙋзда́ти я҆зы́къ сво́й, [4] положи́ти ѹ҆стѡ́мъ свои́мъ хране́ніе, ѻ҆́рганъ тѣлесѐ своегѡ̀ чи́стъ соблюстѝ пред̾ Бг҃омъ, и҆ по се́мъ принестѝ же́ртвꙋ хвалы̀.[5] Нѣ́сть красна̀ пѣ́снь во ѹ҆стѣ́хъ грѣ́шника, ꙗ҆́кѡ не ѿ Гдⷭ҇а послана̀ бы́сть, но со гнѣ́вомъ къ коемꙋ́ждо вѣща́етъ:[6] вскꙋ́ю ты̀ повѣ́даеши л. са҃і ѡ҆правда́нія моя̀, воспріемлеши завѣт мо́й ѹ҆сты̀ твои́ми; Вѣ́дꙋще ѹ҆̀бо,[7] ꙗ҆́кѡ вся́кꙋ мерзость возненави́дѣ Гдⷭ҇ь, да не бꙋ́детъ и҆ на́мъ люба̀ боя́щымся ́є҆го̀. и҆стребим те́рніе ѕлоб, и҆ прорасти́мъ Гдⷭ҇ви добродѣ́телны плоды̀.