Ѡ҆ любвѝ къ бг҃ꙋ.

Мнѡ́гія, па́че же неисч́є́тныя бг҃ъ чл҃вѣколюби́вый подава́я щедрѡ́ты своя̀: ничто́же и҆́но ѿ на́съ тре́бꙋетъ, ра́звѣ ́є҆́же то́кмѡ люби́ти ́є҆го̀. люби́ти же па́че всегѡ̀, и҆ па́че себѐ сама́гѡ.[1] Возлю́биши, речѐ: гдⷭ҇а бг҃а твоего̀ всѣ́мъ се́рдцемъ твои́мъ, все́ю дꙋше́ю твое́ю, и҆ все́ю мы́слію твое́ю. да то́й всегда̀ пребꙋ́детъ въ на́съ, и҆ мы̀ въ не́мъ. А҆ сіѐ и҆́стое не па́че ли ́є҆́сть да́ръ ́є҆гѡ̀ превели́кій; л. д҃і ѡ҆б. Бл҃же́нна вои́стиннꙋ со́вѣсть такова́я, бл҃же́нна ́є҆́сть дꙋша̀ ѻ҆́ная, красна̀ та̀ и҆ прія́тна ю҆́ность, в̾ ́є҆я́же се́рдцѣ, кромѣ̀ любвѐ хрⷭ҇то́вы, (ꙗ҆́же ́є҆́сть кꙋ́пнѡ и҆ премⷣрость, и҆ чистота̀, и҆ терпѣ́ніе, и҆ пра́вда. да сокраще́ннѣ рекꙋ̀: всѣ́хъ добродѣ́телей собра́ніе.) ни ́є҆ди́на ѡ҆брѣта́ется скве́рна. занѐ, всѣ́мъ срⷣцемъ, все́ю дꙋше́ю, и҆ всѣ́мъ помышле́ніем лю́бящій бг҃а, мѣ́ста ѕло́бѣ не ѡ҆ставля́етъ. не бо̀ вхо́дит та́мѡ пе́рвѣйшій ѿврати́тель ѿ[2] любвѐ бж҃ія діа́волъ: и҆дѣ́же прⷭ҇нѡ ве́сь ѹ҆́мъ ѹ҆праждня́ется въ бз҃ѣ, ꙗ҆́коже и҆ перна́тъ горѣ̀ возлѣтѣ́въ безпеча́лен ́є҆́сть, лови́телей и҆ бе́стій вредя́щих ни ма́лѡ бои́тся: поне́же л. ́є҃і превы́шше всѣ́хъ ́є҆́сть, и҆ вся̑ ́є҆мꙋ̀ посмѣ́янна сꙋ́ть. дꙋша̀ крылѣ̀ бл҃года́ти пріе́мши, и҆ нбⷭ҇ныхъ высоты̀ дости́гши, земна̑я презира́етъ, и҆ рꙋга́ется мі́рови. Но Ѽ ко́ль мнѡ́гая сꙋ́ть ѿвраща́ющая[3] ѿ любвѐ таковы́я! ко́ль разли́чныя ѿтꙋ́дꙋ низводя́щыя бла́зни! а҆ пе́рвѣе всегѡ̀ ѕло́ба, и҆ по́хоть мамо́ны. ꙗ҆́же а҆́ки нѣ́кія безстꙋ́дныя рꙋ́цѣ впꙋсти́вши в̾ дꙋ́шꙋ на́шꙋ: и҆ крѣ́пкѡ пое́мши, влече́тъ и҆ потяза́етъ ѿтꙋ́дꙋ. а҆́ще же и҆ возмога́ти, и҆ па́ки на пе́рвый чи́нъ любвѐ восходи́ти понꙋжда́ются сі́и, ѕлы́хъ же не бѣ́гаютъ: пра́зденъ ́є҆́сть трꙋ́дъ ѻ҆́нъ, и҆ крилѣ̀ ме́рзки къ томꙋ̀. л. ́є҃і ѡ҆б. [4] Ѹ҆вѣщева́я таковꙋ́ю, бл҃госты́нный гдⷭ҇ь, дꙋ́шꙋ и҆ногда̀, вне́млемъ, что̀ бесѣ́дꙋетъ къ не́й: что̀ си́лꙋешися бл҃гъ показа́ти пꙋ́ть тво́й на и҆ска́ніе любвѐ; ꙗ҆̀же наипа́че лꙋка́вствъ твои́хъ наꙋчи́ла ́є҆сѝ пꙋтѝ твоя̀, и҆ въ крилѣ́хъ твои́хъ ѡ҆брѣ́тена ́є҆́сть кро́вь дꙋ́шъ ѹ҆бо́гихъ и҆ непови́нныхъ. и҆ рекла̀ ́є҆сѝ: безгрѣ́шна и҆ непови́нна ́є҆́смь.

Сегѡ̀ ра́ди, ꙗ҆́коже нѣ́коегѡ дх҃а, бж҃ія по́мощи тре́бꙋемъ, да на́мъ а҆́ки вѣ́тръ бл҃госты́нный возвѣ́явъ, и҆спра́витъ срⷣца̀ на́ша в̾ любо́вь бж҃ію. [5] И҆ не рече́ши мѝ: (гл҃ет златоꙋ́сты́й) ꙗ҆́кѡ люблю̀ бг҃а, и҆ па́че себѐ. сія̀ гл҃ы сꙋ́ть: дѣ́лы покажѝ, а҆́ще лю́биши ́є҆го̀ па́че себѐ, па́че сребра̀ л. ѕ҃і возлюбѝ, и҆ тогда̀ вѣ́рꙋю, ꙗ҆́кѡ и҆на́че себѐ лю́биши. а҆́ще же кто̀ и҆мѣ́ній бг҃а ра́ди не пре́зритъ: что̀ гл҃ю и҆мѣ́ній свои́хъ! а҆́ще кто̀ хище́нія и҆ лихои́мства не презира́ет, ́є҆́же и҆ кромѣ̀ за́пѡвѣдей бж҃іихъ твори́ти не подоба́ет, ка́кѡ сицевы́й пре́зритъ себѐ ѹ҆̀бо вся́къ хотя́й себѐ и҆зꙋчи́ти в̾ бжⷭ҇твеннꙋю любо́вь, а҆́ки и҆звѣ́стнѣйшее нача́ло полага́я: до́лженъ ́є҆́сть пе́рвѣе люби́ти бли́жняго, и҆ не ѡ҆би́дѣти никого́же. и҆́накѡ же творя́й, себѐ лсти́тъ, и҆ никогда́же возмо́жетъ бг҃а люби́ти.

л. ѕ҃і ѡ҆б.