СЛО́ВО з҃. Ѡ҆ радостотво́рнѣмъ пла́чи.

Пла́чь по бг҃ꙋ, є҆́сть сѣ̑тованїе дꙋшѝ, болѣ̑зненна се́рдца завѣща́нїе, при́снѡ жажда́емое неи́стовнѣ и҆́щꙋщо: и҆ въ погрѣше́нїи тогѡ̀ съ трꙋдо́мъ гонѧ́що, и҆ созадѝ тогѡ̀ си́лнѣ рыда́ющо. И҆лѝ та́кѡ: пла́чь є҆́сть ѻ҆сте́нъ зла́тъ дꙋшѝ всѧ́кагѡ пригвожде́нїѧ и҆ ѹ҆свое́нїѧ ѡ҆бнаже́нъ: и҆ въ назира́нїи се́рдца ѿ прпⷣбныѧ печа́ли водрꙋже́нъ.

в҃. Ѹ҆миле́нїе є҆́сть, непреста́нно со́вѣсти мꙋче́нїе, ѹ҆́мною и҆́сповѣдїю, прохлажде́нїе ѻ҆гнѧ̀ серде́чнагѡ содѣ̑ловающо. И҆сповѣ̑данїе є҆́сть, забве́нїе є҆стества̀, є҆лма̀ забы̀ нѣ̑кто снѣ̑сти хлѣ̑бъ сво́й.

г҃. Покаѧ́нїе є҆́сть безско́рбно лише́нїе, всѧ́кагѡ ѹ҆тѣше́нїѧ тѣле́сна.

д҃. Пред̾ꙋспѣва́ющихъ ѹ҆́бѡ є҆щѐ во бл҃же́ннѣмъ пла́чи сво́йство є҆́сть, воздержа́нїе, и҆ молча́нїе ѹ҆сте́нъ: пред̾ꙋспѣ̑вшихъ же, безгнѣ̑вїе, и҆ непамѧтоѕло́бїе: соверше́нныхъ же бы́вшихъ, смиренномꙋ́дрїе, безче́стїй жа́жда, скорбе́й нево́льныхъ, а҆́лчба во́льна: неѡсꙋжде́нїе согрѣша́ющихъ, милосе́рдїе па́че си́лы. Достопрїѧ́тни сꙋ́ть, пе́рвїи: достохва́лни, вторі́и: бл҃же́ни же сꙋ́ть а҆́лчꙋщїи ско́рби, и҆ жа́ждꙋщїи безче́стїѧ: ꙗ҆́кѡ ті́и насы́тѧтсѧ пи́щи ненасы́тимыѧ.

є҃. Держа́тель пла́ча бы́въ, все́ю крѣ̑постїю держѝ: пре́жде бо ѹ҆ка́чествованїѧ ѹ҆добоѿе́млемь ѕѣлѡ̀ бы́ти ѡ҆бы́че: и҆ ѿ мо́лвъ и҆ попече́нїй тѣле́сныхъ и҆ наслажде́нїѧ, и҆ па́че же многосло́вїѧ и҆ кощꙋ́нства, ꙗ҆́кѡ во́скъ ѿ ѻ҆гнѧ̀ ѹ҆до́бнѣ разорѧ́емь.

ѕ҃. Бо́лшїй кр҃ще́нїѧ по кр҃ще́нїи и҆сто́чникъ сле́зъ є҆́сть, а҆́ще и҆ де́рзостно нѣ̑какѡ є҆́сть гл҃емое: зане́же ѻ҆́но ѹ҆́бѡ, преждебы́вшихъ въ на́съ ѕѡ́лъ є҆́сть ѡ҆чисти́телно: се́й (пла́чь) же, по́слѣжде бы́вшихъ: и҆ ѻ҆́но ѹ҆́бѡ младе́нцы всѝ прїе́млюще, ѡ҆скверни́хомъ: си́мъ же и҆ ѻ҆́но воз̾ѡчища́емъ: и҆́же а҆́ще не бы̀ дарова́лсѧ чл҃вѣколю́бнѣ ѿ бг҃а человѣ̑кѡмъ, то̀ ма́ли бы бы́ли вои́стиннꙋ и҆ неꙋдобоѡбрѣта́еми спаса́емїи.

з҃. Воздыха̑нїѧ ѹ҆́бѡ и҆ сѣ̑тованїе вопїю́тъ ко гдⷭ҇ꙋ. Сле́зы же ꙗ҆̀же ѿ стра́ха, моли́твєнницы сꙋ́ть: а҆ ꙗ҆̀же ѿ всест҃ы́ѧ любвѐ, моле́нїе прїѧ́то бы́вше, на́мъ ꙗ҆влѧ́ютъ.

и҃. А҆́ще ничто́же та́кѡ со смиренномꙋ́дрїемъ ꙗ҆́коже пла́чь схо́дитсѧ, то̀ ничто́же ѿню́дъ томꙋ̀ ꙗ҆́коже смѣ̑хъ сопротивлѧ́етсѧ.

ѳ҃. Держа̀ держѝ бл҃же́нное прпⷣбнагѡ ѹ҆миле́нїѧ радостопеча́лїе, и҆ да не преста́неши ѿ є҆́же въ не́мъ дѣ̑ланїѧ, до́ндеже высо́ка ѿ здѣ̑шнихъ хрⷭ҇то́ви чи́ста предста́витъ тѧ̀.

і҃. Воѡбража́ѧ въ себѣ̀ да не преста́неши и҆ и҆спытꙋ́ѧ ѻ҆гнѧ̀ те́мна бе́зднꙋ: и҆ неми́лѡстивы слꙋги̑, немилосе́рда сꙋдїю̀ и҆ непрости́телна, и҆ про́пасть безконе́чнꙋ преиспо́днѧ пла́мене, и҆ подзе́мныхъ и҆ стра́шныхъ мѣ̑стъ и҆ про́пастей ѹ҆тѣснє́нна низхождє́нїѧ, и҆ таковы́хъ всѣ̑хъ ѻ҆́бразы ꙗ҆́кѡ да мно́гимъ тре́петомъ востѧгнове́нъ бы́въ сꙋ́щїй въ дꙋшѝ на́шей блꙋ́дъ, совокꙋпи́тсѧ съ нетлѣ̑нною чистото́ю: и҆ свѣ̑та невеще́ственна мно́жае всѧ́кагѡ ѻ҆гнѧ̀ возсїѧва́юща въ себѣ̀ прїи́метъ свѣ̑тлость.

а҃і. Ста́ни на моле́нїи мл҃и́твы съ тре́петомъ, ꙗ҆́кѡ ѡ҆сꙋжде́нникъ предстоѧ̀ сꙋдїѝ: да (и҆) внѣ̑шнимъ ви́домъ и҆ внꙋ́треннимъ нра́вомъ ѹ҆гаси́ши ꙗ҆́рость првⷣна сꙋдїѝ: не терпи́тъ бо презира́ти дꙋ́шꙋ вдови́цꙋ болѣ̑зненнѣ томꙋ̀ предстоѧ́щꙋ, и҆ трꙋды̀ неꙋтрꙋжда́емомꙋ творѧ́щꙋ.

в҃і. А҆́ще кто̀ слезꙋ̀ дꙋше́внꙋ стѧжа́лъ є҆́сть, то̀ семꙋ̀ всѧ́ко мѣ̑сто на пла́чь прили́чно є҆́сть: а҆́ще ли же то́чїю чрез̾ внѣ̑шнее дѣ̑лаетъ, то̀ мѣ́ста и҆ ѻ҆́бразы и҆стѧзꙋ́ѧ (да) не преста́нетъ. Ꙗ҆коже сокрове́нное сокро́вище, ѿ на то́ржищи предлежа́щагѡ некрадо́мше є҆́сть, та́кѡ и҆ предречє́ннаѧ разꙋмѣ̑имъ.

г҃і. Не быва́й ꙗ҆́коже ме́ртвыхъ погре́бшїи, ѻ҆вогда̀ ѹ҆́бѡ ѡ҆ ни́хъ пла́чꙋщїи, ѻ҆вогда́ же тѣ̑хъ ра́ди ѹ҆пива́ющїисѧ. Но бꙋ́ди ꙗ҆́коже въ рꙋда́хъ ѹ҆́зницы, на всѧ́къ ча́съ ѿ мꙋчи́тєль бїе́мїи.

д҃і. И҆́же ѻ҆вогда̀ ѹ҆́бѡ пла́четъ, ѻ҆вогда́ же наслажда́етсѧ и҆ смѣхѡ́вна глаго́летъ, подо́бенъ є҆́сть хлѣ̑бомъ на пса̀ сластолю́бїѧ вмѣ̑стѡ ка́мене ме́щꙋщемꙋ: и҆́же ѻ҆́бразомъ ѹ҆́бѡ си́мъ того̀ ѿгонѧ́етъ, дѣ̑ломъ же присѣдѣ̑ти того̀ побꙋжда́етъ.

є҃і. Быва́й сѣ̑тованенъ нелюбопоказа́теленъ, къ се́рдцꙋ своемꙋ̀ и҆зстꙋпи́въ: боѧ́тсѧ бо сѣ̑тованїѧ бѣ̑сове, ꙗ҆́коже та́тїе псѡ́въ.

ѕ҃і. Нѣ̑сть на́мъ ѽ дрꙋ́зи, здѣ̀ зва́нїѧ бра́ка ѻ҆́нагѡ, нѣ̑сть, ѿню́дъ на пла́чь ѡ҆ са́мѣхъ себѣ̀ позва́вый ны̀ здѣ̀ призва̀.

[Статия 2]

з҃і. Нѣ̑цыи слезѧ́ще, ничто́же ѿню́дъ во вре́мѧ ѻ҆́но бл҃же́нное помышлѧ́ти, себѐ безвре́меннѣ понꙋжда́ютъ: не помышлѧ́юще, ꙗ҆́кѡ слеза̀ без̾ помышле́нїѧ, безслове́сна є҆стества̀ сво́йственна є҆́сть, а҆ не слове́сна. Рожде́нїе помышле́нїй є҆́сть, слеза̀: ѻ҆те́цъ же помышле́нїѧ є҆́сть, слове́сство и҆ ѹ҆́мъ.

и҃і. Да быва́етъ тѝ є҆́же на ѻ҆дрѣ̀ твое́мъ возлежа́нїе, є҆́же во гро́бѣ твое́мъ низлежа́нїѧ ѻ҆́бразъ, и҆ мнѣ̑е спа́ти и҆́маши: и҆ са́мое тебѣ̀ трапе́зы (твоеѧ̀) наслажде́нїе, че́рвїй ѻ҆́нѣхъ болѣ̑зненны трапе́зы да бꙋ́детъ воспомина́нїе, и҆ мнѣ̑е наслажда́тисѧ и҆́маши: нижѐ питїѧ̀ водна́гѡ вкꙋша́ѧ, жа́ждꙋ пла́мене ѻ҆́нагѡ не помѧне́ши, и҆ ѿню́дъ понꙋ́диши є҆стество̀ сїѐ.

ѳ҃і. Ѿ настоѧ́телствꙋющагѡ же на́ми ѡ҆ честнѣ̑мъ безче́стїи и҆ досажде́нїи и҆ запреще́нїи, стра́шное сꙋдїѝ ѻ҆́нагѡ помы́слимъ и҆зрече́нїе: и҆ ѿню́дъ, всѣва́емꙋю (въ ны̀) безслове́снꙋю печа́ль и҆ го́ресть, кро́тостїю и҆ терпѣ̑нїемъ, ꙗ҆́кѡ ѻ҆бою́дꙋ ѻ҆́стрымъ мече́мъ зако́лемъ.

к҃. Вре́менемъ ѡ҆скꙋдѣва́етъ мо́ре, ꙗ҆́коже гл҃етъ і҆́ѡвъ, и҆ вре́менемъ и҆ терпѣ̑нїемъ пома́лꙋ речє́ннаѧ въ на́съ прибыва́ютъ и҆ соверша́ютсѧ.

к҃а. Ѻ҆гнѧ̀ вѣ̑чнагѡ па́мѧть по всѧ́къ ве́черъ да ѹ҆́снетъ съ тобо́ю, и҆ съ тобо́ю да совоста́нетъ: и҆ никогда́же тобо́ю лѣ̑ность во вре́мѧ ѱалмопѣ̑нїѧ ѡ҆блада́ти и҆́мать.

к҃в. Да ѹ҆вѣща́етъ тѧ̀ къ дѣ̑ланїю пла́ча, понѐ са́мое то̀ ѡ҆дѣѧ́нїе твоѐ: вси́ бо ме́ртвыхъ пла́чꙋщїи, въ чє́рна ѡ҆дѣва́ютсѧ. А҆́ще ѹ҆́бѡ не пла́чеши, то̀ сегѡ̀ ра́ди пла́чи: а҆́ще ли же пла́чеши, то̀ сегѡ̀ ра́ди па́че пла́чи, ꙗ҆́кѡ ѿ безтрꙋ́дна чи́на въ притрꙋ́денъ са́мъ себѐ све́лъ є҆сѝ чрез̾ твоѧ̑ согрѣшє́нїѧ.

к҃г. Сꙋ́дитсѧ ѿню́дъ ѿ до́брагѡ и҆ првⷣнагѡ на́шегѡ сꙋдїѝ, ꙗ҆́коже во всѣ̑хъ, и҆ во слеза́хъ є҆сте́ственна си́ла. Ви́дѣхъ бо ма̑лы ка̑пли а҆́ки кро́вь съ трꙋдо́мъ и҆злива́ємы: и҆ ви́дѣхъ и҆сто́чники безтрꙋ́днѣ и҆злива́ємы, а҆́ще а҆́зъ и҆ по трꙋдꙋ̀ па́че, а҆ не по слезѣ̀ трꙋжда́ющыѧсѧ сꙋди́хъ: непщꙋ́ю же и҆ бг҃ъ.

к҃д. Не прили́чествꙋетъ пла́чꙋщымъ бг҃осло́вїе, разорѧ́ти бо пла́чь и҆́хъ ѡ҆бы́че. занѐ то́й ѹ҆́бѡ на прⷭ҇то́лѣ ѹ҆чи́телстѣ сѣдѧ́щемꙋ подо́бенъ є҆́сть: се́й же, на гно́ищи и҆ вре́тищи пребыва́ющемꙋ. И҆ сїѐ є҆́сть, ꙗ҆́коже непщꙋ́ю, є҆́же и҆ дв҃дъ, а҆́ще и҆ ѹ҆чи́тель и҆ премꙋ́дръ бѣ̀, внегда̀ пла́каше, къ вопроша́ющымъ ѿвѣща̀: ка́кѡ воспою̀ пѣ̑снь гдⷭ҇ню на землѝ чꙋждѣ̑й; си́рѣчь, встра́стїи.

к҃є. И҆ въ созда́нїи се́мъ, и҆ во ѹ҆миле́нїи, є҆́сть самодви́жно и҆ и҆нодви́жно: є҆гда̀ дꙋша̀, и҆ на́мъ непотща́вшымсѧ, нижѐ наро́чнѣ (что̀) содѣ̑ѧвшымъ, слезли́ва и҆ мокро́тна и҆ мѧ́гка бꙋ́детъ, то̀ потецы́мъ, гдⷭ҇ь бо незва́н-нѣ прїи́де: гꙋ́бꙋ на́мъ даѧ̀ печа́ли бг҃олюбе́зны, и҆ во́дꙋ прохлажде́нїѧ сле́зъ бг҃очести́выхъ на и҆зглажде́нїе сꙋ́щихъ на хартїѝ ѻ҆́нѣй согрѣше́нїй: сохранѝ сїю̀ ꙗ҆́кѡ зѣ̑ницꙋ ѻ҆́ка до́ндеже пома́лꙋ ѿи́детъ: мно́га бо є҆́сть крѣ̑пость тоѧ̀ ве́щи (си́рѣчь ѹ҆миле́нїѧ, печа́ли бг҃олюбе́зны и҆ воды̀ прохлажде́нїѧ), па́че ѻ҆́ныѧ ѿ на́шегѡ тща́нїѧ и҆ примышле́нїѧ приходѧ́щїѧ.

к҃ѕ. Не є҆гда̀ хо́щетъ, пла́чай, то́й добро́тꙋ дости́же пла́ча: но и҆́же ѡ҆ ни́хже либо хо́щетъ: и҆ нижѐ и҆́же ѡ҆ ни́хже либо хо́щетъ, но и҆́же ꙗ҆́коже бг҃ъ хо́щетъ. Мно́жицею съ пла́чемъ и҆́же по бг҃ꙋ гнꙋ́снѣйшаѧ тщесла́вїѧ сплета́етсѧ слеза̀: сїе́ же со и҆скꙋ́сомъ и҆ бл҃гоче́стнѣ позна́емъ, внегда̀ пла́чꙋщихъ и҆ лꙋка́внꙋющихъ са́мѣхъ себѐ ѹ҆ви́димъ.

к҃з. Ѹ҆миле́нїе сво́йственно є҆́сть, невы́сима болѣ̑знь дꙋшѝ: ниеди́но себѣ̀ ѹ҆тѣше́нїе подаю́щїѧ: но є҆ди́но ѿше́ствїе своѐ на всѧ́къ ча́съ мечта́ющїѧ: и҆ ѹ҆тѣше́нїѧ бг҃а ѹ҆тѣша́ющагѡ смирє́нныѧ и҆́ноки ꙗ҆́кѡ воды̀ стꙋдены̀ ѡ҆жида́ющїѧ.

к҃и. Є҆ли́цы въ чꙋ́вствѣ се́рдца пла́чь стѧжа́ша, ті́и и҆ са́мꙋю жи́знь свою̀ возненави́дѣша, (ꙗ҆́кѡ притрꙋ́днꙋ нѣ̑кꙋю и҆ сле́зъ и҆ болѣ̑зней сꙋ́щꙋ вино́внꙋ): тѣ̑ла же своегѡ̀, ꙗ҆́кѡ врага̀ ѿврати́шасѧ.

к҃ѳ. Внегда̀ во мнѧ́щихсѧ по бг҃ꙋ пла́кати гнѣ̑въ и҆ горды́ню ѹ҆́зримъ, то̀ сле́зы си́хъ сопроти̑вны бы́ти вознепщꙋ́имъ: ко́е бо ѻ҆бще́нїе свѣ̑тꙋ ко тмѣ̀;

л҃. Рожде́нїе ѹ҆́бѡ растлѣ̑нна ѹ҆миле́нїѧ є҆́сть, возноше́нїе: похвалѧ́ема же, ѹ҆тѣше́нїе.

л҃а. Ꙗ҆коже ѻ҆́гнь се́й потреби́теленъ є҆́сть тро́стїѧ, та́кѡ слеза̀ ѻ҆́на чи́стаѧ, всѧ́кїѧ ви́димыѧ, и҆ разꙋмѣва́емыѧ скве́рны.

л҃в. Є҆́же ѡ҆ слеза́хъ сло́во, ѹ҆ мно́зѣхъ и҆з̾ ѻ҆ц҃є́въ те́мно нѣ̑кое и҆ неꙋдобоѡбрѣта́емо, па́че же въ новонача́лныхъ бы́ти ѡ҆предѣлѧ́етсѧ, и҆ ѿ мно́гихъ и҆ разли́чныхъ ѻ҆́бразъ си̑мъ ражда́тисѧ: гл҃ю же ѿ є҆стества̀, ѿ бг҃а, ѿ ско́рби сопроти́вны, ѿ похвалѧ́емы, ѿ тщесла́вїѧ, ѿ блꙋда̀, ѿ любвѐ, ѿ па́мѧти сме́рти, и҆ и҆ны́хъ мно́гихъ.

л҃г. Си́хъ же всѣ̑хъ ѻ҆́бразѡмъ стра́хомъ бж҃їимъ ѡ҆бꙋчи́вшесѧ, чи̑стыѧ и҆ нелє́стныѧ ѿше́ствїѧ на́шегѡ стѧжи́мъ сле́зы: нѣ̑сть бо въ ни́хъ краде́нїѧ, и҆лѝ возноше́нїѧ: но па́че ѡ҆чище́нїе, и҆ любвѐ ꙗ҆́же къ бг҃ꙋ пред̾ꙋспѣ̑ѧнїе, и҆ грѣха̀ ѿмы́тїе, и҆ страсте́й безстра́стїе.

[Статия 3]

л҃д. занѐ є҆́же ѹ҆́бѡ ѿ благи́хъ нача́ти пла́ча сле́зъ, и҆ на лꙋка̑вы ѡ҆ко́нчити, нѣ̑сть чꙋ́до: а҆ є҆́же ѿ сопроти́вныхъ, и҆лѝ є҆сте́ственныхъ на дх҃ѡ́вны прецѣпи́ти, достохва́лно є҆́сть. Сїе́ же гада́нїе приклонѧ́ющїисѧ къ тщесла́вїю, ꙗ҆́вѣ вѣ̑дѧтъ.

л҃є. Не вѣ̑рꙋй и҆сто́чникѡмъ твои̑мъ, пре́жде соверше́нна ѡ҆чище́нїѧ: не и҆́мать бо вѣ̑ры вїно̀, а҆́бїе ѿ точи́лъ затворѧ́емо.

л҃ѕ. Ꙗ҆кѡ всѧ̑ ѹ҆́бѡ ꙗ҆̀же по бг҃ꙋ сле́зы на́шѧ полє́зны сꙋ́ть, противоглаго́лѧй никто́же є҆́сть: ка́ѧ же є҆́сть ѿ си́хъ прибыва́ющаѧ по́льза, во вре́мѧ и҆схо́да позна́емъ.

л҃з. И҆́же во пла́чи всегда́шнѣ по бг҃ꙋ хо́дитъ, то́й на всѧ́къ де́нь пра́зднꙋѧ не престае́тъ: а҆ и҆́же тѣле́снѣ пра́зднꙋѧ не престае́тъ, того̀ пла́чь вѣ̑ченъ и҆́мать наслѣ̑довати.

л҃и. Нѣ̑сть ѡ҆сꙋжде́нникѡмъ въ темни́цѣ ра́дости, и҆ нѣ̑сть мона́хѡмъ и҆́стиннымъ на землѝ пра́здника: и҆ сегѡ̀ ра́ди ѻ҆́нъ краснѣпла́чный воздыха́ѧ (стенѧ̀) гл҃аше, и҆зведѝ и҆з̾ темни́цы дꙋ́шꙋ мою̀, возра́доватисѧ про́чее въ неизрече́ннѣмъ свѣ̑тѣ твое́мъ.

л҃ѳ. Бꙋ́ди ꙗ҆́кѡ цр҃ь въ се́рдцѣ твое́мъ, высо́къ во смире́нїи сѣдѧ̀, и҆ повелѣва́ѧ смѣ̑хови, и҆дѝ, и҆ и҆́детъ: и҆ пла́чеви сла́дкомꙋ, прїидѝ, и҆ прихо́дитъ: и҆ рабꙋ̀ на́шемꙋ и҆ мꙋчи́телю тѣ̑лꙋ, сотворѝ сїѐ, и҆ твори́тъ.

м҃. А҆́ще кто̀ во бл҃же́нный ѻ҆́нъ и҆ ѡ҆бл҃года́тствованный пла́чь ꙗ҆́коже во ѻ҆де́ждꙋ бра́чнꙋ ѡ҆блече́сѧ, то́й дх҃о́вный дꙋшѝ позна̀ смѣ̑хъ.

м҃а. Кто̀ ѹ҆̀бо тако́въ є҆́сть, и҆́же всѐ вре́мѧ своѐ є҆́же въ мона́шестѣмъ жи́телствѣ та́кѡ и҆ждивѐ бл҃гоче́стнѣ, ꙗ҆́кѡ ни днѐ, ни часа̀, ни мгнове́нїѧ ѿтщети́сѧ когда̀, но гдⷭ҇еви сїѧ̑ и҆знꙋри́лъ є҆́сть: помышлѧ́ѧ, ꙗ҆́кѡ невозмо́жно є҆́сть то́йжде де́нь два́жды въ житїѝ се́мъ ѹ҆ви́дѣти.

м҃в. Бл҃же́нъ ѹ҆̀бо є҆́сть и҆́нокъ, и҆́же дꙋшѝ (своеѧ̀) ѻ҆чи́ма на ѹ҆́мныѧ си̑лы взира́ти могі́й: непа́дателенъ же вои́стиннꙋ, и҆́же лани̑тѣ своѝ чꙋ́вственныма ѻ҆чи́ма, ѿ па́мѧти сме́рти и҆ согрѣше́нїй, вы́нꙋ ѡ҆моча́ѧй живы́ми слеза́ми (вода́ми). Трꙋ́дно мѝ є҆́сть вѣ̑ровати, ꙗ҆́кѡ без̾ втора́гѡ ѹ҆строе́нїѧ (не трꙋ́дно мѝ є҆́сть вѣ̑ровати, ꙗ҆́кѡ чрез̾ второ́е ѹ҆строе́нїе), пе́рвшее и҆́де.

м҃г. Ви́дѣхъ а҆́зъ проси́тєль и҆ ни́щихъ безстꙋ́дныхъ, краснорѣчи́выми нѣ̑кими глаго́лы, и҆ са̑маѧ та̑ цр҃е́й сердца̀ на милосе́рдїе вско́рѣ преклони́вшихъ. И҆ ви́дѣхъ ни́щихъ и҆ ѹ҆бо́гихъ ѿ добродѣ̑телей, не красноречи́выми, но па́че смире́нными нѣ̑кими и҆ те́мными и҆ недоꙋмѣ̑нными глаго́лы, и҆з̾ глꙋбо́ка и҆ ѿча́ѧна се́рдца, къ нбⷭ҇номꙋ цр҃ю̀ безстꙋ́днѣ и҆ пребы́тнѣ взыва́ющихъ: и҆ свое́ю нꙋ́ждею, ненꙋ́димое є҆гѡ̀ понꙋ́дившихъ милосе́рдїе и҆ є҆стество̀.

м҃д. И҆́же ѡ҆ слеза́хъ свои́хъ дꙋше́внѣ напыщава́ѧйсѧ (гордѧ́йсѧ), и҆ не слезѧ́щихъ въ себѣ̀ ѡ҆сꙋжда́ѧй, подо́бенъ є҆́сть ѻ҆рꙋ́жїе на врага̀ своего̀ ѿ цр҃ѧ̀ и҆спроси́вшемꙋ, самого́ же себѐ тѣ̑мъ ѹ҆би́вшемꙋ.

м҃є. Не тре́бꙋетъ, ѽ дрꙋ́зи, нижѐ хо́щетъ бг҃ъ, человѣ̑кꙋ ѿ болѣ̑зни се́рдца пла́кати: но па́че ѿ любвѐ ꙗ҆́же къ немꙋ̀ смѣ̑хомъ дꙋше́внымъ ра́доватисѧ. Ѿимѝ грѣ̑хъ, и҆ и҆зли́шнѧ бꙋ́детъ болѣ̑зненнаѧ слеза̀ чꙋ́вственныма ѻ҆чи́ма: ничто́же бо є҆́сть ѿ врачбы̀, не присꙋ́тствꙋющей ꙗ҆́звѣ. Не бѣ̀ во а҆да́мѣ пре́жде престꙋпле́нїѧ слеза̀, ꙗ҆́коже ни по воскресе́нїи бꙋ́детъ: про́чее и҆спразднѧ́емꙋ грѣхꙋ̀: поне́же ѿбѣжѐ болѣ̑знь тогда̀, (и҆) печа́ль и҆ воздыха́нїе.

м҃ѕ. Ви́дѣхъ въ нѣ̑кихъ пла́чь, и҆ ви́дѣхъ во и҆нѣ̑хъ скꙋ́дости ра́ди пла́ча, пла́чь: и҆́же а҆́ще и҆ и҆мꙋ́ще, ꙗ҆́кѡ не содержа́ще сꙋ́ть: и҆ до́брымъ си́мъ невѣ̑дѣнїемъ некра́доми пребыва́ютъ: и҆ сі́и сꙋ́ть, ѡ҆ ни́хже рече́но є҆́сть: гдⷭ҇ь ѹ҆мꙋдрѧ́етъ слѣпцы̀.

м҃з. Ѻ҆бы́че мно́жицею ле́гшихъ и҆ слеза̀ возвыша́ти: тѣ̑мже нѣ́кимъ и҆ недае́тсѧ: и҆́же ѡ҆ взыска́нїи сеѧ̀ себѐ ѡ҆каѧва́ютъ, и҆ ѡ҆сꙋжда́ютъ, воздыха́нми и҆ сѣ̑тованїемъ и҆ печа́лїю дꙋшѝ, и҆ глꙋбо́кимъ посꙋпле́нїемъ и҆ недоꙋмѣ̑нїемъ: ꙗ҆̀же наполнѧ́ти мѣ̑сто слезы̀ безбѣ̑днѣ ѡ҆быко́ша, а҆́ще и҆ нивочто́же ѿ ни́хъ поле́знѣ непщꙋ́єма сꙋ́ть.

м҃и. Наблю́дше мно́жицею ѡ҆брѧ́щемъ посмѣ̑хъ го́рекъ ѿ са́михъ бѣсѡ́въ на ны̀ быва́ющъ: насыще́нныхъ бо на́съ ѹ҆милѧ́ютъ, и҆ постѧ́щихсѧ ѡ҆жесточа́ютъ: да подло́жными слеза́ми прелсти́вшесѧ, ма́тери страсте́й наслажде́нїю себѐ преда́мы: и҆́мже покарѧ́тисѧ не подоба́етъ, па́че же сопроти́вное твори́ти.

м҃ѳ. А҆́зъ же и҆ са́мое то̀ ѹ҆миле́нїѧ ка́чество помышлѧ́ѧ ѹ҆жаса́юсѧ: ка́кѡ же пла́чь и҆ печа́ль нарица́ема, ра́дость и҆ весе́лїе внꙋ́трьꙋдꙋ, ꙗ҆́кѡ ме́дъ съ со́томъ сплетє́на и҆́мать: чесомꙋ́ же ѿ сегѡ̀ наꙋча́емсѧ; ꙗ҆́кѡ сво́йственнѣ гдⷭ҇нь да́ръ є҆́сть таково́е ѹ҆миле́нїе. Нѣ̑сть въ дꙋшѝ тогда̀ безсла́достны сла́дости, бг҃ꙋ ѡ҆́тай ѹ҆тѣша́ющꙋ сокрꙋшє́нныѧ се́рдцемъ. Къ вои́стиннꙋ же пла́ча ꙗ҆́вственнѣйша, и҆ болѣ̑зни пользоно́сны винѣ̀, ѹ҆слы́шимъ дꙋшеполе́знꙋ и҆ ѡ҆ми́лованнѣйшꙋ по́вѣсть.

[Статия 4]

н҃. Стефа́нъ нѣ̑кїй живѧ̀ здѣ̀, пꙋсты́нное и҆ безмо́лвное любѧ̀ житїѐ, и҆ лѣ́та довѡ́лна въ мона́шестѣмъ пребы́въ боре́нїи, поще́нми же наипа́че и҆ слеза́ми ѹ҆кра-ше́нъ, и҆ и҆нѣ̑ми бл҃ги́ми преимꙋ́ществы процвѣты́й: стѧжа́лъ бѣ̀ ке́ллїю при низхожде́нїи ст҃а́гѡ и҆ бг҃ови́дца и҆лїѝ, во ст҃ѣ̑й се́й горѣ̀. Се́й ѹ҆̀бо, се́й приснопомина́емый, дости́же ра́зꙋмомъ по намѣ̑ренїю дѣйстви́телнша и҆ тѣ̑сн̾ша и҆ притрꙋ́дна покаѧ́нїѧ, мѣ̑ста ѿше́лническагѡ нарица́емагѡ сі́ддинъ. Сотвори́въ же та́мѡ въ тѣснѣ̑йшемъ и҆ ѹ҆чине́ннѣмъ пребыва́нїи лѣ́та нѣ́каѧ: поне́же без̾ ѹ҆тѣше́нїѧ бѣ̀ мѣ̑сто ѻ҆́но, и҆ всѧ́кагѡ человѣ̑ча прохо́да непристꙋ́пно, ꙗ҆́кѡ ѿстоѧ́ше се́дмьдесѧтъ по́прищъ ѿ ѡ҆гра́ды, восхо́дитъ въ послѣ̑днихъ свои́хъ въ ке́ллїю свою̀ на ст҃ы́й ве́рхъ ста́рецъ се́й. И҆мѣ̑ѧше же та́мѡ и҆ два̀ ѹ҆ченика̀ палести́нѧны бл҃гоговѣ́йна ѕѣлѡ̀: и҆́же хранѧ́хꙋ и҆ ке́ллїю ста́рчꙋ. Сотвори́въ ѹ҆̀бо ма́лѡ дне́й ста́рецъ се́й, вознедꙋ́гова недꙋ́гомъ, и҆́мже и҆ сконча́сѧ. Пре́жде ѹ҆̀бо є҆ди́нагѡ днѐ ѿше́ствїѧ (своегѡ̀) и҆зстꙋпа́етъ ѹ҆мо́мъ: и҆ ѻ҆чи́ма ѿве́рстыма сꙋ́щема, смотрѧ́етъ на дєсны́ѧ и҆ на шꙋ̑їѧ страны̑ ѻ҆дра̀ (своегѡ̀): и҆ ꙗ҆́коже ѿ нѣ̑кихъ словоистѧзꙋ́емь, гл҃аше всѣ́мъ слы́шающымъ предстоѧ́вшымъ: ѻ҆вогда̀ ѹ҆̀бо, є҆́й: вои́стиннꙋ, и҆́стина є҆́сть: но пости́хсѧ толи̑ка лѣ́та ѡ҆ се́мъ: та́же па́ки: нѝ, вои́стиннꙋ лже́те, сегѡ̀ не сотвори́хъ: и҆ па́ки, є҆́й, вои́стиннꙋ сїѐ, є҆́й: но пла́кахъ, но послꙋжи́хъ: и҆ па́ки, нѝ ѿню́дъ клеве́щете на мѧ̀. Ѻ҆вогда́ же на нѣ́каѧ гл҃аше: є҆́й, вои́стиннꙋ є҆́й: и҆ на сїѐ что̀ рещѝ не вѣ̑мъ: ѹ҆ бг҃а є҆́сть ми́лость: и҆ бѣ̀ вои́стиннꙋ позо́ръ тре́петенъ и҆ стра́шенъ, неви́димо и҆ непослаблѧ́емо словоистѧза́нїе: и҆ є҆́же стра́шнѣйше бѣ̀, ꙗ҆́кѡ и҆ ꙗ҆̀же не сотворѝ клевета́хꙋ на́нь. Ѽле, безмо́лвникъ се́й и҆ ѿше́лникъ гл҃аше ѡ҆ нѣ̑кихъ и҆з̾ свои́хъ согрѣше́нїй, ꙗ҆́кѡ на сїѧ̑ рещѝ не вѣ̑мъ, сы́й про́чее ꙗ҆́кѡ ѻ҆́колѡ четы́редесѧтихъ лѣ̑тъ мона́хъ, и҆ и҆мѣ̑ѧ сле́зы: ѹ҆вы̀ мнѣ̀, ѹ҆вы̀ мнѣ̀: гдѣ̀ бѣ̀ тогда̀ гла́съ ѻ҆́нъ і҆езекїи́левъ да рече́тъ проти́вꙋ тѣ́мъ, ꙗ҆́кѡ въ не́мже ѡ҆брѧ́щꙋ тѧ̀, въ то́мъ и҆ сꙋди́ти тѧ̀ и҆́мамъ, речѐ бг҃ъ. Вои́стиннꙋ ничто́же таково̀ рещѝ возмо́же: чесогѡ̀ ра́ди, сла́-ва є҆ди́номꙋ вѣ̑дꙋщемꙋ. Нѣ̑цыи же мѝ, ꙗ҆́кѡ пред̾ гдⷭ҇емъ повѣ̑даша, ꙗ҆́кѡ и҆ леопа́рда и҆з̾ рꙋкѝ пита́ше се́й въ пꙋсты́ни. И҆ та́кѡ словоистѧзꙋ́емь ѿ тѣ̑ла разлꙋчи́сѧ, кі́й сꙋ́дъ ѻ҆́нъ, и҆лѝ коне́цъ, и҆лѝ и҆зрече́нїе є҆гѡ̀, и҆лѝ коне́цъ словоистѧза́нїѧ сегѡ̀, ꙗ҆́вствєнна не сотворѝ.

н҃а. Ꙗ҆коже вдова̀ мꙋ́жа своегѡ̀ лиши́вшисѧ, и҆ є҆диноро́дна сы́на и҆мꙋ́щи, по гдⷭ҇ѣ ѻ҆́наго є҆ди́наго ѹ҆тѣше́нїе и҆́мать: та́кѡ и҆ дꙋшѝ па́дшей, нѣ̑сть и҆но́гѡ коегѡ̀ ѹ҆тѣше́нїѧ во вре́мѧ и҆схо́да, ꙗ҆́коже трꙋдѝ горта́ни сеѧ̀ и҆ сле́зы.

н҃в. Не воспою́тъ такові́и когда̀, нижѐ воскли́кнꙋтъ въ пѣ̑снехъ къ себѣ̀: гꙋби́тєлна бо пла́чꙋ такѡва́ѧ сꙋ́ть. А҆́ще си́ми призыва́ти то́й тщи́шисѧ, то̀ є҆щѐ дале́че ѿ тебѐ ѿстои́тъ дѣ̑ло сїѐ: пла́чь бо є҆́сть ѹ҆сво́йствована болѣ̑знь дꙋшѝ ѻ҆́гнь бжⷭ҇твенъ въ себѣ̀ и҆мꙋ́щїѧ.

н҃г. Предте́ча во мно́зѣхъ бл҃же́ннагѡ безстра́стїѧ пла́чь бы́сть, пред̾ꙋкраси́въ и҆ предпоме́тъ, и҆ потреби́въ вещество̀ стра̑сти.

н҃д. Повѣ̑да мѝ нѣ̑кїй сегѡ̀ добра̀ дѣ̑латель и҆скꙋ́сенъ, ꙗ҆́кѡ тща́щꙋсѧ мѝ къ тщесла́вїю, и҆лѝ гнѣ̑вꙋ, и҆лѝ чре́ва насыще́нїю ѹ҆стремлѧ́тисѧ: то̀ пла́ча сегѡ̀ внꙋ́трьꙋдꙋ засвидѣ̑телствоваше мѝ по́мыслъ, и҆ гл҃етъ: да не возтщесла́вишисѧ: занѐ ѿхождꙋ̀ ѿ тебѐ: подо́бнѣ и҆ ѡ҆ и҆ны́хъ страсте́хъ. А҆́зъ же къ немꙋ̀ гл҃ахъ: никогда́же тѧ̀ преслꙋ́шаю, до́ндеже хрⷭ҇тꙋ́ мѧ предста́виши.

[Статия 5]

н҃є. Бе́здна ѹ҆́бѡ пла́ча, ѹ҆тѣше́нїе ѹ҆зрѣ̀: чистота́ же се́рдца, прїѧ́тъ просвѣще́нїе. Просвѣще́нїе є҆́сть, неизрече́нно дѣ̑йство: разꙋмѣва́емо невѣ̑домѡ, и҆ ви́димо неви́димѡ. Ѹ҆тѣше́нїе є҆́сть, ѡ҆болѣ̑зненны дꙋшѝ прохлажде́нїе, по подо́бїю младе́нца въ себѣ̀ само́мъ пла́чꙋщагѡсѧ, кꙋ́пнѡ и҆ свѣ̑тлѣ ѡ҆склаблѧ́ющагѡсѧ. застꙋпле́нїе є҆́сть, дꙋшѝ ѡ҆бновле́нїе, низпа́дшїѧ въ печа́ль: болѣ̑зненнꙋ слезꙋ̀ въ неболѣ̑зненнꙋ чꙋ́днѣ претвори́вшо.

н҃ѕ. Сле́зы и҆схо́да, породи́ша стра́хъ: стра́хꙋ же ро́ждшꙋ безстра́шїе, ꙗ҆ви́сѧ ра́дость: ра́дости же непреста́ннѣй преста́вшей, прпⷣбныѧ любвѐ процвѣтѐ цвѣ̑тъ.

н҃з. Ѿрѣва́й ꙗ҆́кѡ не сы́й досто́инъ рꙋко́ю смире́нїѧ приходѧ́щꙋ ра́дость, да не ѹ҆добопрїѧ́теленъ сы́й, прїи́меши во́лка вмѣ̑стѡ па́стырѧ.

н҃и. Не притека́й къ видѣ̑нїю въ не вре́мѧ видѣ̑нїѧ, да добро́ты ра́ди смире́нїѧ твоегѡ̀ пожене́тъ, и҆ пости́гнетъ и҆ во вѣ̑къ вѣ̑ка совокꙋпи́тсѧ съ тобо́ю всечи́стымъ бра́комъ.

н҃ѳ. Въ нача́лѣхъ ѹ҆́бѡ самѣ̑хъ познава́ѧ младе́нецъ ѻ҆тца̀ (своего̀), ра́дости ве́сь и҆спо́лненъ быва́етъ: томꙋ́ же на вре́мѧ смотри́телнѣ ѿходѧ́щꙋ, та́же па́ки приходѧ́щꙋ, ра́дости ѻ҆́трокъ се́й и҆ печа́ли и҆спо́лненъ быва́етъ: ра́дости ѹ҆́бѡ, ꙗ҆́кѡ вожделѣва́емаго ѹ҆ви́дѣвъ: печа́ли же, за въ толи́кое вре́мѧ кра́сныѧ сеѧ̀ добро́ты лише́нїе. Сокрыва́етъ ма́ти себѐ ѿ младе́нца и҆ семꙋ̀ болѣ̑зненнѣ взыскꙋ́ющꙋ тꙋ̀ зрѧ́щи, весели́тсѧ, наказꙋ́ющи є҆го̀ вы́нꙋ прилѣплѧ́тисѧ къ не́й: и҆ любо́вь є҆гѡ̀ ѻ҆́нꙋ къ себѣ̀ ѕѣ̑лнѣ воспалѧ́ющи: и҆мѣ̑ѧй ѹ҆́ши слы́шати, да слы́шитъ, гл҃етъ гдⷭ҇ь.

ѯ҃. Не попече́тсѧ и҆зрече́нїе прїе́мый ѡ҆сꙋжде́нникъ, ѡ҆ ѹ҆правле́нїихъ позо́рищъ: и҆ не и҆́мать внима́ти ꙗ҆́вственнѣ пла́чай, ѡ҆ наслажде́нїи, и҆лѝ сла́вѣ, и҆лѝ гнѣ̑вѣ, и҆лѝ скороѧ́ростїи когда̀. Пла́чь є҆́сть, ѹ҆сво́йствована болѣ̑знь ка́ющїѧсѧ дꙋшѝ, на всѧ́къ де́нь болѣ́зни къ болѣ̑знемъ прилага́ющи, ꙗ҆́коже ражда́ющаѧ и҆ болѧ́щаѧ.

ѯ҃а. Првⷣнъ и҆ прпⷣбенъ гдⷭ҇ь: и҆ со сло́вомъ безмо́лвствꙋющаго со сло́вомъ ѹ҆милѧ́ѧй: и҆ со сло́вомъ повинꙋ́ющагосѧ, на всѧ́къ де́нь веселѧ́й. И҆́же и҆ є҆ди́нъ и҆ дрꙋгі́й ѻ҆́бразъ непритво́рнѣ не проходѧ́й, (то́й) пла́ча лише́нъ є҆́сть.

ѯ҃в. Ѿрѣва́й пса̀ ѻ҆́наго, во вре́мѧ пла́ча глꙋбоча́йшагѡ приходѧ́щаго, и҆ бг҃а неми́лостива и҆ немилосе́рдна бы́ти предлага́ющаго: наблю́дъ бо є҆го̀ ѡ҆брѧ́щеши пре́жде грѣха̀ чл҃вѣколюби́ва и҆ милосе́рдна бг҃а и҆ прости́телна нарица́юща.

ѯ҃г. При́сное ѡ҆бꙋче́нїе, ражда́етъ ча́стость: та́ же ѡ҆кончава́етсѧ въ чꙋ́вство: въ чꙋ́вствѣ же твори́мое, неꙋдобоѿе́млемо быва́етъ.

ѯ҃д. А҆́ще и҆ какѡва́ либо вєли́ка жи́тєлства на̑ша прохо́димъ, се́рдца же вболѣ̑зненна не стѧжа́хомъ, то̀ притвѡ́рна та̑ и҆ сꙋ́єтна сꙋ́ть: подоба́етъ бо вои́стиннꙋ подоба́етъ, да та́кѡ рекꙋ̀, по ба́ни ѻ҆́нѣй па́ки ѡ҆скве́рншымсѧ, ѻ҆гне́мъ се́рдца непослаблѧ́емымъ, и҆ ми́лостїю бж҃їею своѧ̑ ѡ҆чи́стити рꙋ́ки.

ѯ҃є. Ви́дѣхъ а҆́зъ въ нѣ̑кихъ предѣ̑лъ пла́ча кра́йнѣйшїй: кро́вь бо, тѣ̑хъ чꙋ́вственнѣ ѿ болѣ̑зненнагѡ и҆ ѹ҆ѧ́звленнагѡ се́рдца ви́дѣхъ и҆злива́ющихъ и҆з̾ ѹ҆́стъ: и҆ воспомѧнꙋ́хъ ре́кшаго: ѹ҆ѧ́звенъ бы́хъ ꙗ҆́кѡ трава̀, и҆ и҆́зсше се́рдце моѐ.

ѯ҃ѕ. Сле́зы ѹ҆́бѡ ꙗ҆̀же ѿ стра́ха, са̑мы въ себѣ̀ тре́петъ и҆ хране́нїе и҆́мꙋтъ: а҆ ꙗ҆̀же ѿ любвѐ, пре́жде соверше́нныѧ любвѐ, не́гли и҆ ѹ҆до́бь ѡ҆крада́ємы въ нѣ̑кихъ быва́ютъ: не вѣ̑мъ, а҆́ще мно́гъ ѻ҆́нъ приснопа́мѧтный ѻ҆́гнь во вре́мѧ дѣ̑йствїѧ се́рдце не возже́глъ бы: и҆ чꙋ́до є҆́сть рещѝ, ка́кѡ смире́ншее, тве́рждше є҆́сть во вре́мѧ своѐ.

ѯ҃з. Сꙋ́ть вещєства̀ и҆сто́чники на́шѧ и҆зсꙋша̑юща: и҆ сꙋ́ть и҆́на и҆ ти́нꙋ въ ни́хъ и҆ ѕвѣре́й и҆зражда̑юща: и҆ пе́рвшими ѹ҆́бѡ лѡ́тъ со дще́рма законопрестꙋ́пнѣ смѣси́сѧ: вторы́ми же дїа́волъ съ нб҃сѐ падѐ.

ѯ҃и. Мно́га є҆́сть въ тѣ̑хъ вразѣ̑хъ на́шихъ ѕло́ба, ка́кѡ ма́терей добродѣ̑телей, ма́терей ѕло́бъ содѣ̑ловаютъ: и҆ твори́тєлнаѧ смире́нїй вещества̀, горды́ни содѣ̑телей показꙋ́ютъ. Ѡ҆быко́ша мно́жицею и҆ са̑маѧ та̑ жили́щъ на́шихъ пребыва̑нїѧ и҆ видѣ́нїѧ ѹ҆́мъ на́шъ ко ѹ҆миле́нїю побꙋжда́ти и҆ да ѹ҆вѣ̑рѧтъ (тѧ̀) і҆и҃съ, и҆ и҆лїа̀, и҆ і҆ѡа́ннъ ѻ҆со́бь молѧ́щесѧ. Ви́дѣхъ во градѣ̑хъ и҆ молва́хъ мно́жицею подви́гшѧсѧ сле́зы, да ꙗ҆́кѡ ничи́мже ѿ мо́лвъ тѣ̑хъ вреди́тисѧ непщꙋ́юще, къ мі́рꙋ прибли́жимсѧ: намѣ̑ренїе бо сїѐ є҆́сть лꙋка̑вымъ бѣсѡ́мъ.

ѯ҃ѳ. Є҆ди́но ѹ҆́бѡ сло́во, мно́жицею пла́чь разорѝ: чꙋ́до же, а҆́ще є҆ди́но то́й и҆ собра̀.

ѻ҃. Не бꙋ́демъ ѡ҆бвине́ни, ѽ сі́и, не бꙋ́демъ ѡ҆бвине́ни во и҆схо́дѣ дꙋшѝ, зане́же не чꙋдодѣ̑йствовахомъ: нижѐ ꙗ҆́кѡ не бг҃осло́вихомъ: нижѐ ꙗ҆́кѡ зри́телни не бы́хомъ: но сло́во ѿню́дъ да́мы бг҃ови, зане́же непреста́ннѡ не пла́кахомъ.

Степе́нь є҆́сть седмы́й: сподо́бивыйсѧ, и҆ мнѣ̀ да помога́етъ: то́й бо ѹ҆жѐ поможе́нъ бы́сть, седмы́мъ степе́немъ сквє́рны вѣ̑ка сегѡ̀ ѿмы́въ.