СЛО́ВО И҃. Ѡ҆ безгнѣ̑вїи и҆ кро́тости.
Ꙗ҆́коже водѣ̀ на пла́мень пома́лꙋ прилага́емѣй, соверше́ннѣ пла́мень ѹ҆гаша́етъ: та́кѡ и҆ и҆́стиннагѡ пла́ча слеза̀, всѧ́къ пла́мень ꙗ҆́рости и҆ скорогнѣ̑вїѧ ѹ҆гаша́ти ѡ҆бы́че: тѣ̑мже томꙋ̀ послѣ̑дованнѣ сїѧ̑ (безгнѣ̑вїе и҆ кро́тость) и҆ ѹ҆чини́хомъ.
в҃. Безгнѣ̑вїе ѹ҆́бѡ є҆́сть, жела́нїе безче́стїѧ ненасыща́емо: ꙗ҆́коже во тщесла́вныхъ, благохвале́нїѧ безконе́чно. Безгнѣ̑вїе є҆́сть, є҆стества̀ побѣжде́нїе, неѡщꙋщє́нїи доса́дъ, ѿ пѡ́двигъ и҆ по́тѡвъ прибыва́ющо.
г҃. Кро́тость є҆́сть, неподви́жимо дꙋшѝ ѹ҆строе́нїе, въ безче́стїихъ и҆ бл҃гохвале́нїихъ та́кожде сꙋ́щее.
д҃. Нача́ло ѹ҆́бѡ безгнѣ̑вїѧ, молча́нїе ѹ҆сте́нъ въ смꙋще́нїи се́рдца: среда́ же, молча́нїе пѡ́мыслъ, въ то́нцѣ смꙋще́нїи дꙋшѝ: коне́цъ же, водрꙋже́на тишина̀ во вре́мѧ вѣ̑ѧнїѧ вѣ́тръ нечи́стыхъ.
є҃. Гнѣ̑въ є҆́сть, воспомина́нїе сокрове́нны не́нависти, си́рѣчь памѧтоѕло́бїѧ. Гнѣ̑въ є҆́сть, жела́нїе ѡ҆ѕлобле́нїѧ, раздража́ющагѡ. Скороѧ́ростїе є҆́сть возгорѣ̑нїе се́рдца безвре́меннѣ быва́ющо. Го́ресть є҆́сть, несла́достно движе́нїе въ дꙋшѝ сосѣдѧ́що. Ꙗ҆рость є҆́сть, ѹ҆добопрелага́емо движе́нїе нра́вѡвъ, и҆ дꙋшѝ без̾ѻбра́зїе.
ѕ҃. Ꙗ҆коже свѣ̑тꙋ ꙗ҆́влшꙋсѧ, ѹ҆стꙋпа́етъ тма̀: та́кѡ и҆ ѿ вонѝ смире́нїѧ, всѧ́ка го́ресть и҆ ꙗ҆́рость и҆стреблѧ́етсѧ.
з҃. Нѣ̑цыи ѹ҆добопрелага́еми ѿ ꙗ҆́рости сꙋ́ще, неради́вѡ ѡ҆ врачева́нїи сеѧ̀ и҆ прилѣжа́нїи пребыва́ютъ, не разꙋмѣва́юще ѡ҆каѧ́ннїи ре́кшагѡ: ѹ҆стремле́нїе ꙗ҆́рости є҆гѡ̀ паде́нїе є҆мꙋ̀.
и҃. Є҆́сть движе́нїе же́рнова бы́стро, въ є҆ди́номъ мгнове́нїи па́че всегѡ̀ днѐ, и҆но́гѡ, пшени́цꙋ дꙋшѝ и҆ пло́дъ живота̀ стира́ющо и҆ и҆стреблѧ́ющо: тѣ̑мже внима́ти подоба́етъ разꙋ́мнѣ. Є҆́сть пла́мене возгорѣ̑нїе вско́ре ѿ крѣ̑пка вѣ̑тра возжига́емо, и҆ па́че пла́мене коснѧ́ща, село̀ се́рдца пожига́ющо и҆ погꙋблѧ́ющо.
ѳ҃. Нижѐ сїѐ на́мъ та́йно бы́ти до́лжно є҆́сть, ѽ дрꙋ́зи, ꙗ҆́кѡ на вре́мѧ лꙋка́вїи бѣ̑си себѐ вма́лѣ спрѧ́тываютъ, да ꙗ҆́кѡ ѡ҆ ма́лыхъ ѡ҆ вели́кихъ страсте́хъ вознеради́вше, неисцѣ̑лнѣ про́чее вознедꙋ́гꙋемъ.
і҃. Ꙗ҆коже ка́мень ѻ҆строꙋго́ленъ и҆ же́стокъ со и҆нѣ̑ми ка́менїи сража́ѧсѧ и҆ сбива́ѧсѧ, по всемꙋ̀ своемꙋ̀ ѻ҆строꙋго́лномꙋ и҆ жесто́комꙋ и҆ тве́рдомꙋ воѻбраже́нїю стира́етсѧ, и҆ ѻ҆блови́дно содѣ̑ловаетъ: та́кѡ и҆ дꙋша̀ лю́та и҆ жесто́ка смѣшава́ющисѧ и҆ спребыва́ющи съ жесто́кими нѣ̑кими, и҆з̾ двою̀ є҆ди́но под̾е́млетъ: и҆лѝ терпѣ̑нїемъ ꙗ҆́звꙋ свою̀ и҆сцѣли́тъ, и҆лѝ ѹ҆стꙋпи́вши, ѿню́дъ не́мощь свою̀ позна́етъ: бѣ̑гствꙋ семꙋ̀ боѧзли́вомꙋ сїю̀ тѣ̑й, ꙗ҆́кѡ въ зерца́лѣ ꙗ҆́влшꙋ.
а҃і. Ꙗ҆ростивъ є҆́сть (вре́меннѣ) неи́стовствꙋющсѧ во́л̾нѣ, ѿ нево́л̾на предпрїѧ́тїѧ поверга́емь и҆ сокрꙋша́емь.
в҃і. Ничто́же та́кѡ ка́ющымсѧ є҆́сть несво́йственно ꙗ҆́коже ꙗ҆́рость смꙋща́ема: є҆лма̀ ѡ҆браще́нїе, мно́га тре́бꙋетъ смире́нїѧ: сїѧ́ же, всѧ́кагѡ возноше́нїѧ є҆́сть зна́менїе.
г҃і. А҆́ще сїѐ предѣ̑лъ є҆́сть кра́йнѣйшїѧ кро́тости, є҆́же и҆ присꙋ́тствꙋющꙋ раздража́ющемꙋ ти́хѡ се́рдцемъ и҆ люби́телнѣ къ немꙋ̀ зало́гъ и҆мѣ̑ти: то̀ ѿню́дъ сїѐ предѣ̑лъ кра́йнѣйшїѧ ꙗ҆́рости, є҆́же и҆ ѡ҆ себѣ̀ пребыва́ющꙋ є҆ди́номꙋ, на ѡ҆печа́лившаго свари́тисѧ и҆ раз̾ѧрѧ́тисѧ.
д҃і. А҆́ще дх҃ъ ст҃ы́й, ми́ръ дꙋшѝ ѡ҆предѣлѧ́етсѧ бы́ти, и҆ є҆́сть: гнѣ̑въ же, смꙋще́нїе се́рдца и҆ є҆́сть и҆ нарица́етсѧ: то̀ ничто́же та́кѡ прише́ствїе є҆гѡ̀ въ ны̀, ꙗ҆́коже ꙗ҆́рость загражда́ти ѡ҆бы́че.
є҃і. Премнѡ́га и҆ лю̑та рождє́нїѧ є҆ѧ̀ познава́юще бы́ти, є҆ди́но и҆ є҆ди́нственно нево́льно и҆сча́дїе а҆́ще и҆ прелюбодѣ̑йчищно, ѻ҆ба́че поле́зно бы́ти позна́хомъ: ви́дѣхъ неи́стовнѣ возже́гшихсѧ, и҆ многовре́менное и҆ внꙋ́трь сокрове́нное памѧтоѕло́бїе и҆зблева́вшихъ: и҆ стра́стїю, стра́сти и҆зба́влшихсѧ: ѡ҆ многовре́меннѣй печа́ли, и҆лѝ покаѧ́нїе, и҆лѝ и҆звѣще́нїе ѿ ѡ҆печа́лившагѡ прїе́мшихъ: и҆ ви́дѣхъ мнѣ̑нїемъ долготерпѣ̑вшихъ безслове́снѣ, и҆ молча́нїемъ памѧтоѕло́бїе внꙋ́трь сокры́вшихъ: и҆ па́че неи́стовѧщихсѧ, тѣ̑хъ ѡ҆каѧ́хъ, ꙗ҆́кѡ бѣ̑лость го́лꙋбю помрачи́вшихъ. Мно́га на́мъ на ѕмі́ѧ сего̀ потре́бно є҆́сть прилѣжа́нїѧ: є҆стество́ бо и҆ то́й, ꙗ҆́коже и҆ тѣле́сный содѣ̑йствꙋющо себѣ̀ и҆́мать.
ѕ҃і. Ви́дѣхъ прогнѣ̑вавшихсѧ, и҆ ѿ го́рести пи́щꙋ ѿри́нꙋвшихъ: тѣ̑мже, и҆ ꙗ҆́дъ ꙗ҆́домъ, безслове́снымъ воздержа́нїемъ прїѧ́ша: и҆ ви́дѣхъ и҆нѣ̑хъ а҆́ки бы за винꙋ̀ бл҃госло́внꙋ за ꙗ҆́рость є҆́мшимсѧ, и҆ чревоѡб̾ѧде́нїемъ себѐ ѹ҆хитри́вшихъ, и҆ ѿ ꙗ҆́мы въ стремни́нꙋ впа́дшихъ: и҆нѣ̑хъ же разꙋ́мныхъ ви́дѣхъ, ꙗ҆́кѡ до́брыхъ враче́й ѻ҆боѧ̀ сраствори́вшихъ, и҆ по велича́йшымъ чрез̾ ѹ҆мѣ̑ренное ѹ҆тѣше́нїе по́льзꙋ прїе́мшихъ.
з҃і. Ѻ҆вогда̀ ѹ҆́бѡ пѣснопѣ̑нїе ꙗ҆́рость и҆зрѧ́днѣйше разорѧ́етъ, ѹ҆мѣ̑ренное: ѻ҆вогда́ же со сластолю́бїемъ схо́дитсѧ, безмѣ̑рное и҆ безвре́менное: времена̀ ѹ҆́бѡ пра́вилнѣ и҆стѧзꙋ́юще, та́кѡ то̀ ѹ҆потреби́мъ.
и҃і. Слы́шахъ присѣдѧ̀ внѣ̀ по нѣ̑коей потре́бѣ, мꙋже́й безмо́лвствꙋющихъ: а҆́ки рѧ́бцѡвъ въ ке́ллїи ѿ го́рести и҆ ꙗ҆́рости въ себѣ̀ а҆́ки въ кле́тцѣ: и҆ на лицѐ а҆́ки присꙋ́тствꙋющꙋ ѡ҆печа́лившемꙋ наска́чꙋщихъ: и҆́мже а҆́зъ не жи́ти ѻ҆со́бь бл҃гоче́стнѣ совѣ̑товахъ, да не ѿ человѣ́къ бѣ̑си бꙋ́дꙋтъ. И҆ ви́дѣхъ напроти́въ блꙋ́дныхъ и҆ смрадова́тыхъ сердцы̀, кро́ткихъ нѣ̑кихъ и҆ ласка́телныхъ, и҆ братолюби́выхъ, и҆ любокрасотоли́чныхъ сꙋ́щихъ: и҆́хже безмо́лвїе ꙗ҆́кѡ врачбꙋ̀ блꙋдоненави́стнꙋ и҆ смрадоненави́стнꙋ проходи́ти сотвори́хъ, да не ѿ слове́сна въ безслове́сно є҆стество̀ ѡ҆каѧ́ннѣ преложа́тсѧ. А҆ поне́же мѝ нѣ̑цыи во ѻ҆боѧ̀ себѐ глаго́лахꙋ бѣ̑днѣйше ѹ҆стремлѧ́тисѧ, то̀ си́хъ а҆́зъ ѿню́дъ самовла́стнѣ ходи́ти возбрани́хъ: настоѧ́телємъ же и҆́хъ, ѡ҆ се́мъ любе́знѣ совѣ̑товавъ: ѻ҆вогда̀ ѹ҆́бѡ тѣ́мъ, на вре́мѧ се́й: ѻ҆вогда́ же ѻ҆́нъ чи́нъ попꙋща́ти проходи́ти: ѻ҆ба́че всѣ̑ми бра́тїѧми ѡ҆блада́ющемꙋ, си́рѣчь настоѧ́телеви вы́ю преда́въ. Сластолюби́вый ѹ҆́бѡ са́маго себѐ, не́гли же и҆ и҆но́го є҆ди́наго люботаи́нника своего̀ погꙋблѧ́ти ѡ҆бы́че: ꙗ҆́ростивый же, а҆́ки во́лкъ, мно́жицею всѐ ста́до возмꙋтѝ, и҆ мнѡ́ги дꙋ́шы смири́въ ѹ҆тѣснѝ.
[Среда:]
ѳ҃і. Лю́то ѹ҆́бѡ є҆́сть ѻ҆́ко се́рдца ѿ ꙗ҆́рости смꙋти́ти, по ре́кшемꙋ: смѧте́сѧ ѿ ꙗ҆́рости ѻ҆́ко моѐ: лю́тше же, є҆́же ѹ҆стна́ма стремле́нїе дꙋшѝ ꙗ҆ви́ти: а҆ є҆́же (и҆) рꙋка́ма, то̀ ѿню́дъ мона́шескагѡ сегѡ̀ и҆ а҆́гг҃лскагѡ и҆ бжⷭ҇твеннагѡ жи́телства, вражде́бно є҆́сть и҆ чꙋ́жде.
к҃. А҆́ще сꙋче́цъ и҆но́гѡ и҆сцѣли́ти хо́щеши, па́че же непщꙋ́еши: то̀ да не вмѣ̑стѡ ѻ҆рꙋ́дїѧ враче́вскагѡ бервно́мъ се́й ѡ҆тре́ши и҆лѝ и҆зслѧ́чиши: бервно̀ є҆́сть, тѧ̑жка словеса̀, и҆ ѻ҆́бразы нелѣ̑пи. Дрꙋго́е же, кро́тко ѹ҆чи́телство, и҆ долготерпѣли́во запреще́нїе: ѡ҆бличѝ, гл҃етъ, запретѝ, ѹ҆молѝ: а҆ не ѹ҆́бѡ и҆ побі́й: а҆́ще ли же бы и҆ сїѐ потре́бно бы́ло, то̀ рѣ̑дцѣ, и҆ не собо́ю.
к҃а. Присмотри́мсѧ, и҆ во мно́зѣхъ ꙗ҆́ростныхъ бдѣ̑нїе ѹ҆се́рднѣ, и҆ поще́нїе, и҆ безмо́лвїе сотворѧ́емо ѹ҆ви́димъ: ра́зꙋмъ бо є҆́сть бѣ̑сꙋ семꙋ̀, расти́тєлнаѧ стра́сти сеѧ̀ вещєства̀, вино́ю а҆́ки бы покаѧ́нїѧ и҆ пла́ча тѣ́мъ совѣ̑товати.
к҃в. А҆́ще є҆ди́нъ во́лкъ, ꙗ҆́коже предреко́хомъ, мо́жетъ возмꙋти́ти ста́до, бѣ̑са помо́щника и҆мѣ̑ѧ, то̀ всѧ́кѡ є҆ди́нъ бра́тъ премⷣрѣйшъ, ꙗ҆́коже мѣ̑хъ бла́гъ є҆ле́а по́лнъ волнꙋ̀ превзы́ти и҆ ѹ҆ти́шитисѧ твори́ти корабле́ви, а҆́гг҃ла помо́щника и҆мѣ̑ѧ: по вели́чествꙋ ѡ҆сꙋжде́нїѧ, ѻ҆́нагѡ пе́рвшагѡ, се́й ѿ бг҃а мздꙋ̀ и҆мѣ̑ѧ прїѧ́ти, и҆ ѻ҆́бразъ по́льзы всѣ́мъ быва́ѧ.
к҃г. Нача́ло бл҃же́ннагѡ неѕло́бїѧ, съ го́рестїю и҆ болѣ̑знїю дꙋшѝ, безчє́стїѧ стерпѣва́ти: среда́ же, безпеча́лнѣ въ тѣ̑хъ пребыва́ти: соверше́нїе же, а҆́ще и҆ є҆́сть, ꙗ҆́кѡ бл҃гохвалє́нїѧ та̑ вмѣнѧ́ти. Да ра́дꙋешисѧ пе́рвшїй, здра́вствꙋй вторы́й, бл҃же́нъ ѡ҆ гдⷭ҇ѣ и҆ ра́дꙋйсѧ тре́тїй.
к҃д. Бѣ̑денъ бы́ти назна́менахъ во гнѣвли́выхъ позо́ръ, ѿ возноше́нїѧ ѡ҆́тай тѣ́мъ слꙋча́ющсѧ: гнѣ̑вающесѧ бо, побѣжде́нїѧ ра́ди па́ки гнѣ̑вахꙋсѧ: и҆ паде́нїемъ паде́нїе ѿгонѧ́емо зрѧ̀, ѹ҆дивлѧ́хсѧ: и҆ грѣ̑хъ грѣхо́мъ ѿмща́ющихъ ви́дѧ, ми́ловахъ: и҆ бѣсѡ́въ кова́рства ѹ҆жаса́ѧсѧ, жи́зни своеѧ̀ ма́лѡ не ѿчаѧва́хсѧ.
к҃є. А҆́ще бы кто̀ себѐ ѿ возноше́нїѧ и҆ скороѧ́ростїѧ, лꙋка́вства же и҆ лицемѣ̑рїѧ, ѹ҆до́бь побѣжда́ема ѹ҆ви́дѣлъ, и҆ та́кѡ ме́чь кро́тости и҆ неѕло́бїѧ ѻ҆бою́дꙋ ѻ҆́стръ на та̑ѧ ѹ҆смотрѣ̑лъ и҆звлещѝ: то́й ше́дъ да прїи́детъ ꙗ҆́коже въ пра́твꙋ спасе́нїѧ въ собо́ръ бра́тїй, и҆ па́че же жесточа́йшихъ, а҆́ще тѣ̑хъ соверше́ннѣ совлещи́сѧ хо́щетъ: да та́мѡ доса́дами и҆ безчє́стїи, и҆ чрез̾ бра́тїй треволнє́нїи потѧза́емь, и҆ ѹ҆́мнѣ бїе́мь, и҆лѝ не́гли нѣ̑когда и҆ чꙋ́вственнѣ стꙋжа́емь, и҆ попира́емь и҆ пѧто́ю ѹ҆дарѧ́емь, скве́рнꙋ сꙋ́щꙋю на ри́зѣ дꙋшѝ своеѧ̀ ѿмыва́етъ: (и҆) са́мый тѧ̀ ѻ҆́нъ наро́дный гла́съ да ѹ҆вѣ̑ритъ, поноше́нїе мы́лню страсте́й дꙋше́вныхъ бы́ти: глаго́лютъ бо нѣ̑цыи и҆з̾ сꙋ́щихъ въ мі́рѣ, внегда̀ кого̀ въ лицѐ безчє́стїи ѡ҆блага́ютъ, хва́лѧщесѧ пред̾ и҆нѣ̑ми, ꙗ҆́кѡ ѻ҆́нсицꙋ ѡ҆мы́хъ: є҆́же и҆ и҆́стинно є҆́сть.
к҃ѕ. И҆́но є҆́сть є҆́же ѿ пла́ча въ новонача́лныхъ безгнѣ̑вїе: и҆ и҆́на, ꙗ҆́же въ соверше́нныхъ сꙋ́щаѧ неподви́жность: и҆ ѻ҆́нъ (гнѣ̑въ въ новонача́лныхъ) ѹ҆́бѡ, ꙗ҆́коже нѣ̑кою ѹ҆здо́ю слезо́ю свѧ́занъ є҆́сть: се́й (гнѣ̑въ въ соверше́нныхъ) же, ꙗ҆́коже ѕмі́й, безстра́стїемъ ꙗ҆́кѡ мече́мъ, ѹ҆мерщвле́нъ є҆́сть.
к҃з. Трѝ а҆́зъ кꙋ́пнѡ ви́дѣхъ и҆́ноки безче́стїе прїе́мшѧ: и҆ є҆ди́нъ ѹ҆́бѡ ѹ҆грызе́нъ бы́сть, и҆ ѹ҆молча̀: дрꙋгі́й же, возра́довасѧ (ѹ҆́бѡ) себѐ ра́ди, ѡ҆печа́лисѧ же ѡ҆ ѹ҆кори́вшемъ: тре́тїй же, вре́дъ бли́жнѧгѡ воѡбрази́въ, прослези́сѧ те́плѣ: и҆ возмо́жно бѣ̀ ѹ҆ви́дѣти, стра́ха, и҆ мзды̀, и҆ любвѐ, дѣ̑лателей.
к҃и. Ꙗ҆коже ѻ҆гневи́ца тѣле́снаѧ, є҆ди́на ѹ҆́бѡ є҆́сть, мнѡ́ги же а҆ не є҆ди́нꙋ возгорѣ̑нїѧ своегѡ̀ винꙋ̀ и҆́мать: та́кѡ и҆ ꙗ҆́рости возгорѣ̑нїе и҆ движе́нїе, и҆ про́чїихъ страсте́й на́шихъ, мнѡ́ги и҆ разли̑чны вины̑ и҆мꙋ́ще сꙋ́ть: тѣ̑мже и҆ невозмо́жно є҆́сть ѡ҆ си́хъ є҆диноѻбра́знѣ ѡ҆предѣли́ти. Совѣ̑тъ же даю̀ па́че, коегѡ́ждо про́чее и҆з̾ недꙋ́гꙋющихъ попече́ннымъ тща́нїемъ недꙋ́га сегѡ̀ врачева́нїе (хꙋдо́жество) взы́сковати. Пе́рвое же да бꙋ́детъ врачева́нїе, болѣ̑зни своеѧ̀ винꙋ̀ позна́ти, да винѣ̀ ѻ҆́нѣй ѡ҆брѣ̑тшейсѧ, на тꙋ̀ и҆ пла́стырь ѿ про́мысла бж҃їѧ и҆ враче́й дх҃о́вныхъ прїи́метъ. Ꙗ҆коже во ѻ҆́бразѣхъ: хотѧ́щїи съ на́ми ѡ҆ гдⷭ҇ѣ во ѹ҆́мное и҆ предложе́нное сꙋди́лище совни́ти, да совни́дꙋтъ: и҆ неѧ́снѣ нѣ̑какѡ ѡ҆ предрече́нныхъ страсте́хъ и҆лѝ вина́хъ и҆стѧжи́мъ.
к҃ѳ. Да свѧ́жетсѧ про́чее ꙗ҆́рость ꙗ҆́кѡ мꙋчи́тель ѹ҆́зами кро́тости, и҆ бїе́ма ѿ долготерпѣ̑нїѧ, и҆ влачи́ма ѿ ст҃ы́ѧ любвѐ, на сꙋди́щи се́мъ сло́ва сегѡ̀ предста́вши ѡ҆ подоба́ющихъ и҆стѧзꙋ́ема да быва́етъ. Глаго́ли на́мъ ѽ безꙋ́мна и҆ безче́стна, и҆ ро́ждшагѡ (тѧ̀) нарече́нїе, и҆ ѕлѣ̀ ро́ждшїѧ тѧ̀ наименова́нїе, и҆ сынѡ́въ твои́хъ и҆ дще́рей скве́рныхъ и҆мена̀: не то́чїю же, но и҆ ра́тꙋющихъ и҆ ѹ҆бива́ющихъ тѧ̀ назнамена̑нїѧ. Ѻ҆на́ же къ на́мъ ѿвѣщава́ющи глаго́ла: ро́ждшыѧ менѐ, мнѡ́ги сꙋ́ть, и҆ ѻ҆те́цъ мо́й, нѣ̑сть є҆ди́нъ: ма́тєри же моѧ̑ сꙋ́ть, тщесла́вїе, сребролю́бїе, чревоѡб̾ѧде́нїе: ѻ҆вогда́ же и҆ блꙋ́дъ. Роди́вый менѐ, нарица́етсѧ возноше́нїе: дщє́ри же моѧ̑ сꙋ́ть, памѧтоѕло́бїе, не́нависть, вражда̀, словоѡправда́нїе: сопє́рницѣ же моѝ, ѿ нею́же ны́нѣ ѡ҆бдержи́ма є҆́смь ѹ҆́зница, сопротивлѧ́ющѣисѧ тѣ́мъ сꙋ́ть: безгнѣ̑вїе и҆ кро́тость: навѣ̑тница же моѧ̀, смиренномꙋ́дрїе нарица́етсѧ: кто́ же є҆́сть роди́вый ѻ҆́но, во своѐ вре́мѧ то̀ вопроси́те.
На ѻ҆смо́мъ нѣ̑коемъ степе́ни, вѣне́цъ безгнѣ̑вїѧ лежи́тъ: и҆ и҆́же ѹ҆́бѡ ѿ є҆стества̀ того̀ носѧ́й, не́гли не но́ситъ и҆но́го: а҆ и҆́же ѿ по́тѡвъ, то̀ ѿню́дъ ѻ҆́смь си́хъ (степе́ней) превзы́де.