Ѡ҆ то́мжде а҆́ввѣ і҆ѡа́ннѣ и҆гꙋ́менѣ сїна́йскїѧ горы̀, си́рѣчь, лѣ̑ствичницѣ.

Прише́дшꙋ нѣ̑когда а҆́ввѣ мартѵ́рїю а҆́ввы і҆ѡа́нна къ вели́комꙋ а҆наста́сїю, и҆ ви́дѣвъ тѣ̑хъ гл҃етъ ко а҆́ввѣ мартѵ́рїю: рцы̀ а҆́вво мартѵ́рїе: ѿкꙋ́дꙋ є҆́сть ѻ҆́трокъ се́й; и҆ кто̀ є҆го̀ пострижѐ; ѻ҆́нъ же гл҃етъ є҆мꙋ̀: ра́бъ тво́й є҆́сть ѻ҆́ч҃е, и҆ а҆́зъ постриго́хъ є҆го̀: и҆ гл҃етъ є҆мꙋ̀, ѡ҆̀ле а҆́вво мартѵ́рїе, кто̀ рече́тъ, ꙗ҆́кѡ и҆гꙋ́мена сїна́йскаго постри́глъ є҆сѝ; и҆ нѣ̑сть погрѣши́лъ ст҃ы́й се́й: по четыредесѧти́хъ бо лѣ̑тѣхъ бы́сть и҆гꙋ́менъ на́шъ.

Па́ки и҆ногда̀ пое́мъ того́жде і҆ѡа́нна настоѧ́тель є҆гѡ̀ а҆́вва мартѵ́рїй по́йде къ вели́комꙋ і҆ѡа́ннꙋ саваі́тинꙋ въ гꙋдді́йстей пꙋсты́ни тогда̀ пребыва́вшемꙋ. Ꙗ҆кѡ ѹ҆̀бо ѹ҆ви́дѣ тѣ̑хъ ста́рецъ ѻ҆́нъ воста́въ влїѧ̀ во́дꙋ и҆ ѹ҆мы̀ но́зѣ а҆́ввы і҆ѡа́нна, и҆ поцѣлова̀ рꙋ́кꙋ є҆гѡ̀. А҆́ввы же мартѵ́рїа не ѹ҆мы̀ но́гъ. Вопроша́ющꙋ же ѹ҆ченикꙋ̀ є҆гѡ̀ стефа́нꙋ, что̀ та́кѡ сотвори́лъ є҆́сть; гл҃етъ є҆мꙋ̀, вѣ̑рꙋ мѝ и҆мѝ ча́до, а҆́зъ кто̀ є҆́сть ѻ҆́трокъ и҆́нъ, не вѣ̑мъ: но а҆́зъ и҆гꙋ́мена сїна́йскаго прїѧ́хъ и҆ но́зѣ и҆гꙋ́менꙋ ѹ҆мы́хъ. И҆ а҆́вва страти́гїй въ де́нь то́й в̾ ѻ҆́ньже постриже́сѧ а҆́вва і҆ѡа́ннъ два́десѧтихъ лѣ̑тъ сы́й, предречѐ ѡ҆ не́мъ, ꙗ҆́кѡ вели́ка ѕвѣзда̀ и҆́мать бы́ти.

Тѣ̑мже ѹ҆̀бо кꙋ́пнѡ со є҆́же бы́ти є҆мꙋ̀ и҆гꙋ́менꙋ на́шемꙋ, вше́дшымъ здѣ̀ ꙗ҆́кѡ шестьсо́тъ стра̑ннымъ, внегда̀ сѣдѣ̑ти тѣ́мъ и҆ ꙗ҆́сти, зрѧ́ше то́й нѣ̑коего краткостри́жна ѡ҆дѣ̑ѧнна і҆ꙋде́йски въ плащани́цꙋ, ѡ҆бтека́юща, и҆ со вла́стїю повелѣва́юща по́варѡмъ же и҆ і҆коно́мѡмъ и҆ келларѧ́мъ и҆ прѡ́чїимъ послꙋго́вателємъ. По є҆́же ѹ҆̀бо ѿитѝ лю́демъ ѻ҆́нѣмъ, сѣ̑дшымъ ꙗ҆́сти слꙋжи́телємъ, и҆ско́мъ бѣ̀ ѻ҆́нъ и҆́же повсю́дꙋ ѡ҆бтека́ше и҆ повелѣва́ше, не ѡ҆брѣта́шесѧ. Тогда̀ ра́бъ бж҃їй прпⷣбный ѻ҆ц҃ъ на́шъ і҆ѡа́ннъ гл҃етъ на́мъ: ѡ҆ста́вите є҆го̀: ничто́же стра́нно сотвори́лъ є҆́сть гдⷭ҇и́нъ мѡѷсе́й во свое́мъ мѣ̑стѣ послꙋжи́въ.

Нѣ̑когда бездо́ждїю въ палесті́нскихъ страна́хъ бы́вшꙋ мо́ленъ бы́въ ѿ ѻ҆́крестъ живꙋ́щихъ помоли́сѧ и҆ сни́де и҆зоби́ленъ до́ждь: и҆ нѣ̑сть невѣ̑рна: во́лю бо боѧ́щихсѧ є҆гѡ̀ сотвори́тъ гдⷭ҇ь, и҆ мл҃твꙋ и҆́х ѹ҆слы́шитъ (ѱал. рм҃д, ѳ҃і).

Вѣ̑дати подоба́етъ ꙗ҆́кѡ і҆ѡа́ннъ лѣ̑ствичникъ и҆мѣ̑ѧше ро́дна бра́та, сего̀ чꙋ́днаго а҆́ввꙋ геѡ́ргїа, є҆го́же є҆щѐ жи́въ сы́й поста́ви и҆гꙋ́мена сїна́йскаго, безмо́лвїе са́мъ любѧ̀, є҆́же ѿ нача́ла ѹ҆невѣ̑стилъ є҆́сть себѣ̀ премꙋ́дрый се́й. И҆мꙋ́щꙋ ко гдⷭ҇ꙋ и҆тѝ но́вомꙋ семꙋ̀ на́шемꙋ мѡѷсе́й прпⷣбнѣйшемꙋ і҆ѡа́ннꙋ и҆гꙋ́менꙋ, предстоѧ́ше є҆мꙋ̀ пла́ча а҆́вва геѡ́ргїй сво́йственный є҆гѡ̀ бра́тъ гл҃ѧ, ꙗ҆́кѡ сѐ ѡ҆ставлѧ́еши ли мѧ̀ и҆ и҆́деши; а҆́зъ молѧ́хсѧ да ты̀ мѧ̀ проведе́ши: ниже́ бо є҆́смь дово́ленъ без̾ тебѐ ѹ҆пастѝ дрꙋжи́нꙋ сїю̀, ѽ гдⷭ҇ине мо́й. Па́че же а҆́зъ тѧ̀ да провож-да́ю. Гл҃етъ є҆мꙋ̀ а҆́вва і҆ѡа́ннъ, не скорбѝ, нижѐ пецы́сѧ, а҆́ще бо ѡ҆брѧ́щꙋ дерзнове́нїе ко гдⷭ҇ꙋ, то̀ не ѡ҆ста́влю тѧ̀ сконча́ти лѣ̑то по мнѣ̀. Є҆́же и҆ бы́сть. Внꙋ́трь бо десѧтѝ мѣ́сѧцъ, ѿи́де и҆ то́й ко гдⷭ҇ꙋ.