Мцⷭ҇а ма́рта въ л҃ де́нь па́мѧть прпⷣбнагѡ ѻ҆ц҃а̀ на́шегѡ і҆ѡа́нна списа́телѧ лѣ̑ствицы.

Се́й шести́надесѧти лѣ̑тъ сы́й, и҆ ѻ҆строꙋ́менъ сы́й ѡ҆крꙋ́жною премꙋ́дростїю, принесѐ себе сама́го же́ртвꙋ сщ҃е́ннѣйшꙋ бг҃ови, на сїна́йскꙋю го́рꙋ возше́дъ, и҆ и҆́нокъ бы́въ, и҆ въ повинове́нїи пребыва́ѧ. Та́же по девѧтина́десѧтихъ лѣ̑тѣхъ послꙋша́нїѧ воста́въ, прихо́дитъ къ безмо́лвїѧ по́прищꙋ, пѧтѝ зна́менїй ѿ цр҃кве, бж҃е́ственныѧ боре́нїѧ ѻ҆́нагѡ ѻ҆би́тели дости́гъ, ѳѡла̀ и҆́мѧ мѣ̑стꙋ ѻ҆́номꙋ, и҆ четы́редесѧть лѣ̑тъ соверши́въ въ горѧ́щемъ раче́нїи, и҆ ѻ҆гне́мъ бж҃е́ственныѧ любвѐ разжига́емь.

Ꙗ҆дѧ́ше ѹ҆́бѡ ѿ всѣ̑хъ, ꙗ҆̀же непоро́чнѡ попꙋщє́на сꙋ́ть ѡ҆бѣ̑тꙋ семꙋ̀, ма́лѡ же ѕѣлѡ̀ и҆ не въ сы́тость. И҆ въ се́мъ мню̀ киче́нїѧ ро́гъ сломлѧ́ѧ всепремꙋ́дрѣ. Но сле́зъ и҆сто́чникъ ѻ҆́нагѡ, ко́е бы сло́во и҆зрещѝ могло̀; Сна́ же толи́ка прїе́млѧше, є҆ли́кѡ сꙋществꙋ̀ ѹ҆ма̀ бдѣ̑нїемъ не бы́ти поврежде́нꙋ. Тече́нїе же є҆гѡ̀ мл҃и́тва бѣ̀ непреста́нна. Се́й ѹ҆̀бо всѧ́цѣй добродѣ̑тели и҆з̾ѡбꙋчи́всѧ, и҆ до́брѣ пожи́телствовавъ, и҆ велича́йшихъ зрѣ̑нїй и҆спо́лненъ бы́въ, и҆ ѹ҆ченика̀ спѧ́ща въ нѣ̑коемъ мѣ̑стѣ, под̾ велича́йшимъ ка́менемъ, и҆ и҆мꙋ́ща ѿ негѡ̀ па́дающа ѹ҆жѐ ѹ҆бїе́на, и҆ на ча̑сти раздѣле́на бы́ти, въ ке́ллїи сы́й, и҆ дх҃омъ бж҃е́ственнымъ позна́въ, ѿ таковы́ѧ сме́рти и҆зба́вилъ є҆́сть ꙗ҆́влсѧ є҆мꙋ̀ во снѣ̑хъ, и҆ возста́вивъ ѿ паде́нїѧ ѻ҆́нагѡ, є҆́же и҆мѣ̑ѧше пострада́ти.

До сегѡ̀ ѹ҆̀бо добродѣ̑тели дости́гъ, и҆ и҆гꙋ́менъ ст҃ы́ѧ горы̀ сїна́йскїѧ бы́въ, ѡ҆ста́вилъ є҆́сть ме́ртвеннꙋю сїю̀ жи́знь, къ вѣ̑чномꙋ преложи́сѧ ѹ҆покое́нїю, пе́рвѣе написа́въ всемꙋ́дрꙋю кни́гꙋ бж҃е́ственныхъ и҆ дх҃о́вныхъ восхожде́нїй, ꙗ҆́же, и҆ лѣ̑ствица и҆менꙋ́етсѧ.