СЛО́ВО К҃Ѕ. Ѡ҆ разсꙋжде́нїи пѡ́мыслъ, и҆ страсте́й и҆ добродѣ̑телей.
Разсꙋжде́нїе є҆́сть, во вводи́мыхъ ѹ҆́бѡ, и҆́стинное свои́хъ позна́нїе: въ сре́днихъ же, сво́йственнѣ бл҃го́е ѿ є҆сте́ственнагѡ и҆ сопроти́внагѡ непогрѣ̑шнѣ разсꙋжда́ющее ѹ҆́мное чꙋ́вство: въ соверше́нныхъ же, бжⷭ҇твеннымъ просвѣще́нїемъ внꙋ́трь сꙋ́щїй ра́зꙋмъ: и҆́же и҆ ꙗ҆̀же во и҆нѣ̑хъ те́мнѣ внꙋ́трь сꙋ̑щаѧ свѣти́лникомъ свои́мъ просвѣща́ти мо́жетъ.
в҃. И҆лѝ не́гли собо́рнѣ сїѧ̀ ве́щь и҆ є҆́сть и҆ разꙋмѣва́етсѧ бы́ти разсꙋжде́нїе, бжⷭ҇твенныѧ во́ли и҆звѣ̑стное постиже́нїе, во всѧ́комъ вре́мени и҆ мѣ̑стѣ и҆ ве́щи: є҆́же є҆́сть во є҆ди́нѣхъ чи́стыхъ се́рдцемъ, и҆ тѣ̑ломъ, и҆ ѹ҆сты̀.
г҃. И҆́же ѹ҆́бѡ трїе́хъ бл҃гоче́стнѣ низложи́вый, снизложи́лъ є҆́сть и҆ пѧти́хъ: а҆ и҆́же ѡ҆ ѻ҆́нѣхъ нерадѧ́й, то̀ ни є҆ди́наго ни дрꙋга́го побѣди́тъ.
д҃. Разсꙋжде́нїе є҆́сть, со́вѣсть нескве́рна, и҆ чи́сто чꙋ́вство.
є҃. Никто́же въ мона́шестѣмъ жи́телствѣ, вы́ше є҆стества̀ нѣ́каѧ слы́ша и҆лѝ зрѧ̀ ѿ неразꙋ́мїѧ въ невѣ̑рїе да впаде́тъ: и҆дѣ̑же бо прїи́детъ и҆́же вы́ше є҆стества̀ бг҃ъ, то̀ вы́ше є҆стества̀ про́чее мнѡ́жайшаѧ ѿ веще́й быва́ютъ.
ѕ҃. Тремѝ си́ми собо́рнѣйшими ѻ҆́бразы, всѧ́ка бра́нь бѣсо́вска въ на́съ состои́тъ: и҆лѝ ѿ нерадѣ̑нїѧ, и҆лѝ ѿ горды́ни, и҆лѝ ѿ за́висти бѣсѡ́въ: и҆ ѻ҆каѧ́ненъ ѹ҆́бѡ є҆́сть пе́рвый, всеѻкаѧ́ненъ є҆́сть вторы́й: тре́тїй же требл҃же́нъ.
з҃. Намѣ̑ренїе и҆ пра́вило на́шꙋ по бг҃ꙋ со́вѣсть на всѧ̑ ѹ҆потреби́мъ: ꙗ҆́кѡ да разꙋмѣ̑вше вѣ̑ѧнїе вѣ̑трѡвъ ѿкꙋ́дꙋ грѧде́тъ, по то́й про́чее и҆ вѣ́трила возпростре́мъ.
и҃. Во всѣ̑хъ на́шихъ ꙗ҆̀же по бг҃ꙋ дѣ̑ланїихъ, трѝ на́мъ ꙗ҆́мы бѣ̑сове и҆зрыва́ютъ: и҆ пе́рвое ѹ҆́бѡ бо́рютсѧ, да бл҃го́е возбранѧ́тъ бы́ти: второ́е же, по пе́рвѣмъ се́мъ побѣжде́нїи свое́мъ, да не по бг҃ꙋ приклю́чшеесѧ бꙋ́детъ: є҆гда́ же и҆ сегѡ̀ та́тїе ѻ҆́ни намѣ̑ренїѧ погрѣша́тъ, тогда̀ про́чее безмо́лвнѣ пристꙋ́плше въ дꙋшѝ на́шей блажа́тъ на́съ, ꙗ҆́кѡ по бг҃ꙋ жи́телствꙋющихъ во всѣ̑хъ: пе́рвшагѡ ѹ҆́бѡ вра́гъ є҆́сть, тща́нїе и҆ попече́нїе ѡ҆ сме́рти: втора́гѡ же, повинове́нїе и҆ ѹ҆ничиже́нїе: тре́тїѧгѡ же, є҆́же са́маго себѐ вы́нꙋ ѹ҆корѧ́ти. Сїѐ трꙋ́дъ є҆́сть пред̾ на́ми, до́ндеже вни́детъ во ст҃и́ло на́ше ѻ҆́гнь ѻ҆́нъ бж҃їй: не бꙋ́дꙋтъ бо про́чее тогда̀ предпрїѧ́тїй въ на́съ нꙋ̑жды: бг҃ъ бо на́шъ, ѻ҆́гнь є҆́сть поѧда́ющъ раждеже́нїе, и҆ движе́нїе, и҆ предпрїѧ́тїе, и҆ ѡ҆жесточе́нїе, и҆ ѡ҆мраче́нїе, внꙋ́трь и҆ внѣ̀ ви́димое же и҆ помышлѧ́емое.
ѳ҃. Бѣ̑сове сопроти́вное па́ки речє́ннымъ твори́ти ѡ҆быко́ша: повнегда́ бо дꙋ́шꙋ ѡ҆долѣ̑ютъ, и҆ свѣ̑тъ ѹ҆ма̀ помрача́тъ, то̀ не ктомꙋ̀ бꙋ́детъ въ на́съ ѻ҆каѧ́нныхъ, ни трезвѣ̑нїе, ни разсꙋжде́нїе, ни позна́нїе, ни сра́мъ: но непоболѣ̑нїе, и҆ нечꙋ́вство, и҆ неразсꙋжде́нїе, и҆ слѣпота̀ ѹ҆ма̀.
і҃. Вѣ̑дѧтъ рече́нное ѕѣлѡ̀ ꙗ҆́вѣ ѿ блꙋда̀ воспрѧнꙋ́вшїи, и҆ ѿ дерзнове́нїѧ востѧгнꙋ́вшїисѧ, и҆ ѿ безстꙋ́дїѧ въ сразꙋмѣ̑нїе прише́дшїи: ка́кѡ по и҆стрезвѣ̑нїи ѹ҆ма̀, и҆ ѡ҆слѣпле́нїѧ, па́че же и҆ поврежде́нїѧ є҆гѡ̀ разрѣше́нїи, и҆ сами́хъ себѐ (ꙗ҆́коже рещѝ) во ѹ҆мѣ̀ стыдѧ́тсѧ, ѡ҆ тѣ̑хъ ꙗ҆̀же пре́жде глаго́лахꙋ и҆ дѣ̑ѧхꙋ въ слѣпотѣ̀ пребыва́юще.
а҃і. А҆́ще не повечерѣ̑етъ и҆ потемнѣ̑етъ пре́жде въ де́нь дꙋшѝ (на́шеѧ), то̀ та́тїе ѻ҆́ни не ѹ҆кра́дꙋтъ, и҆ не зако́лютъ, и҆ не погꙋбѧ́тъ: тат̾ба̀ є҆́сть є҆́же не сꙋ́щее до́брое, ꙗ҆́кѡ добро̀ дѣ̑лати: тат̾ба̀ є҆́сть, бога́тства поги́бель: тат̾ба̀ є҆́сть, невѣ̑домо плѣне́нїе дꙋшѝ. закла́нїе дꙋшѝ є҆́сть, словесна̀ ѹ҆ма̀ ѹ҆ме́ртвїе, въ дѣѧ̑нїѧ безмѣ́стна впа́дша: поги́бель же, по беззако́нїи, сама́гѡ себѐ ѿча́ѧнїе.
в҃і. Никто́же ѡ҆ є҆ѵⷢ҇лскихъ за́повѣдехъ не́мощь да предлага́етъ: сꙋ́ть бо дꙋ́ши ꙗ҆̀же и҆ вы́ше за́повѣди содѣ̑ѧша: ѹ҆вѣ̑ритъ тѧ̀ всѧ́кѡ ѡ҆ рече́нномъ, и҆́же па́че себѐ бли́жнѧго возлюби́вый, и҆ за него̀ дꙋ́шꙋ (свою̀) предположи́вый, а҆́ще и҆ за́повѣдь гдⷭ҇ню ѡ҆ се́мъ не прїе́мый.
г҃і. Да дерза́ютъ смири́вшїисѧ встра́ственнїи, а҆́ще бо и҆ во всѧ̑ ꙗ҆́мы впадꙋ́тъ, и҆ во всѣ̑хъ сѣ̑техъ ѹ҆вѧ́знꙋтъ, и҆ всѧ́цѣмъ недꙋ́гомъ вознедꙋ́гꙋютъ: но ѹ҆́бѡ по здра́вїи всѣ́мъ свѣти̑ла, и҆ вра́чеве, и҆ свѣти́лницы, и҆ ѡ҆корми́теле быва́ютъ, коегѡ́ждо недꙋ́га ѻ҆́бразы сказꙋ́юще: и҆ и҆мꙋ́щихъ па́дати, и҆скꙋ́сомъ свои́мъ спаса́юще.
д҃і. А҆́ще ѹ҆́бѡ ѿ преждебы́вшихъ предпрїѧ́тїй мꙋчи́телствꙋеми сꙋ́ть нѣ̑цыи, и҆ ѹ҆чи́ти понѐ просты́мъ сло́вомъ мо́гꙋтъ, то̀ да наꙋча́тъ: не́гли бо нѣ̑когда понѐ слове́съ свои́хъ ѹ҆срами́вшесѧ, дѣ̑ѧтелнꙋ добродѣ̑тель на́чнꙋтъ: а҆ не ѹ҆́бѡ да и҆ вознача́лствꙋютъ: и҆ сбꙋ́детсѧ и҆ на ни́хъ є҆́же и҆ на нѣ̑кихъ въ ти́нѣ валѧ́ющихсѧ ви́дѣхъ быва́ющо: ѡ҆калѧ́ни бо сꙋ́ще, ѻ҆́бразъ ѻ҆́нъ та́мошнѧгѡ и҆́хъ погрѧзнове́нїѧ мимоходѧ́щымъ ска́зовахꙋ: ѡ҆ спасе́нїи тѣ̑хъ сїѐ сотворѧ́юще: ꙗ҆́кѡ да не и҆ ѻ҆нѝ тѣ̑мжде пꙋте́мъ падꙋ́тъ: и҆ ѹ҆́бѡ спасе́нїѧ ра́ди и҆нѣ̑хъ, всеси́лный и҆ тѣ̑хъ ѿ ка́ла ѻ҆́нагѡ и҆зба́вилъ є҆́сть: а҆́ще ли же встра́ственнїи ті́и во́лею себѐ въ сла̑сти вмета́ютъ, то̀ молча́нїемъ ѹ҆че́нїе то̀ пока́зовати и҆́мꙋтъ: за сїѧ̑ бо нача́тъ і҆и҃съ твори́ти же и҆ ѹ҆чи́ти.
є҃і. Лю́тꙋ вои́стиннꙋ лю́тꙋ препла́ваемъ, ѽ мона́си смире́ннїи пꙋчи́нꙋ, и҆ мно́гихъ вѣ́тръ, и҆ ска́лъ, и҆ за́вєртъ, и҆ разбѡ́йникъ, и҆ сме́рчей, и҆ мѣ̑лѡвъ, и҆ ѕвѣре́й, и҆ во́лнъ и҆спо́лненꙋ. Скалꙋ̀ ѹ҆́бѡ въ дꙋшѝ свирѣ̑пꙋю ꙗ҆́рость и҆ внеза́пнꙋю разꙋмѣ̑имъ: за́вертъ же, безнаде́жїе ѡ҆крꙋжа́ющее ѹ҆́мъ, и҆ са́маго сего̀ во глꙋбинꙋ̀ ѿча́ѧнїѧ низвестѝ тща́щеесѧ: мѣ̑лъ же невѣ̑жество, ѕло́е ꙗ҆́кѡ добро̀ содержа́щее: ѕвѣ́ри же, тѧ́жкое сїѐ и҆ свирѣ̑пое тѣ̑ло: разбо́йники же, тщесла́вїѧ лютѣ̑йшыѧ слꙋги̑, вре́мѧ на́ше и҆ трꙋ́дъ добродѣ̑телей восхища́ющыѧ: волнꙋ́ же, надме́нное и҆ напыщава́емое чре́во, стремле́нїемъ свои́мъ ѕвѣ̑реви ѻ҆́номꙋ предаю́щее: сме́рчь же, съ нб҃сѐ све́рженнꙋю горды́ню, возносѧ́щꙋю на́съ про́чее и҆ низводѧ́щꙋю до бе́зднъ.
ѕ҃і. зна́єма сꙋ́ть пи́сменамъ ѹ҆ча́щымсѧ, ка̑ѧ ѹ҆́бѡ вводи́мыхъ: ка̑ѧ же сре́днихъ: ка̑ѧ же ѹ҆чи́тєль, сꙋ́ть ѹ҆чє́нїѧ: во́нмемъ разꙋ́мнѡ: не ка́кѡ ли во ѹ҆че́нїи ѹ҆коснѣ̑вше, є҆щѐ во вводи́мыхъ пребыва́емъ ѡ҆бѣ̑тѣхъ: є҆́же сра́мъ всѣ́мъ познава́етсѧ, ста́ра ѹ҆ви́дѣти во ѹ҆чи́лище ходѧ́ща. И҆зрѧ́днѣйшъ всѣ́мъ є҆́сть а҆лфаві́тъ се́й: послꙋша́нїе, по́стъ, вре́тище, пе́пелъ, сле́зы, и҆сповѣ̑данїе, молча́нїе, смире́нїе, бдѣ̑нїе, мꙋ́жество, стꙋ́день, трꙋ́дъ, ѕлострада́нїе, ѹ҆ничиже́нїе, сокрꙋше́нїе, непамѧтоѕло́бїе, собра́тство, кро́тость, вѣ̑ра про́ста и҆ нелюбопы́тна, безпопече́нїе ѡ҆ мі́рѣ, не́нависть безненави́стна роди́телей, безпристра́стїе, простота̀ съ неѕло́бїемъ, во́льна хꙋ́дость.
[Статия 2]
з҃і. Постиже́нїе и҆ и҆зрече́нїе (ѡ҆) пред̾ꙋспѣва́ющихъ є҆́сть: нетщесла́вїе, безгнѣ̑вїе, бл҃гонаде́ждїе, безмо́лвїе, разсꙋжде́нїе, сꙋда̀ па́мѧть тве́рда, милосе́рдїе, страннолю́бїе, поꙋче́нїе соꙋмѣ̑ренно, мл҃и́тва безстра́стна, несребролю́бїе.
и҃і. Се́й предѣ̑лъ, сло́во же и҆ зако́нъ дꙋхѡ́въ и҆ тѣле́съ є҆́сть, во пло́ти бл҃гоче́стнѣ соверше́нныхъ быва́ющихъ: неплѣнѧ́емо се́рдце, соверше́нна любы̀, смиренномꙋ́дрїѧ и҆сто́чникъ, ѹ҆ма̀ и҆зше́ствїе, хрⷭ҇то́во вше́ствїе, свѣ̑та неѡкрадѣ̑нїе и҆ мл҃и́твы, ѡ҆сїѧ́нїѧ бж҃їѧ и҆з̾ѻби́лїе, жела́нїе сме́рти, не́нависть жи́зни, бѣ̑гство тѣ̑ла, мі́ра моли́твенникъ, бг҃а нꙋди́тель, а҆́гг҃лъ сослꙋже́бникъ, ра́зꙋма бе́здна, та́инствъ до́мъ, неизрече́нныхъ храни́тель, человѣ̑кѡмъ спа́съ, бѣсѡ́мъ бо́гъ, страсте́й госпо́дь, влады́ка тѣ̑лꙋ, є҆стества̀ приста́вникъ, грѣха̀ стра́ненъ, безстра́стїѧ до́мъ, подража́тель влⷣки, по́мощїю влⷣки.
ѳ҃і. Не ма́ла на́мъ, є҆гда̀ тѣ̑ло недꙋ́гꙋетъ, потре́бно є҆́сть трезвѣ̑нїѧ: на землѝ бо бѣ̑сове ѹ҆ви́дѣвше на́съ (лежа́щихъ), и҆ не могꙋ́щихъ про́чее ѿ и҆знеможе́нїѧ по́двига на ни́хъ ѹ҆потреби́ти, лю́тѣ (на́съ) тогда̀ ра́товати покꙋша́ютсѧ.
к҃. Въ сꙋ́щихъ ѹ҆́бѡ въ мі́рѣ, ꙗ҆́рости: ѻ҆вогда́ же и҆ хꙋлы̀ бѣ̑съ, въ недꙋ́гꙋющихъ, припослѣ̑дствꙋетъ: въ сꙋ́щихъ же внѣ̀ мі́ра, а҆́ще ѹ҆́бѡ потре́бами и҆зѻби́лꙋютъ, то̀ чревоѡб̾ѧде́нїѧ и҆ блꙋда̀: а҆́ще ли же на без̾ꙋтѣ̑шныхъ нѣ̑кихъ и҆ подви́жническихъ пребыва́ютъ мѣ̑стѣхъ, то̀ ѹ҆ны́нїѧ и҆ неблагодаре́нїѧ присѣди́тъ мꙋчи́тель.
к҃а. Назна́менахъ во́лка ѻ҆́наго блꙋда̀, болѣ́зни прилага́юща недꙋ́гꙋющемꙋ, и҆ въ са́михъ тѣ̑хъ болѣ̑знехъ, двиза̑нїѧ въ не́мъ и҆ и҆стица̑нїѧ творѧ́ща: и҆ мо́щно бѣ̀ ѹ҆жа́сно нѣ̑что быва́емо ѹ҆ви́дѣти, въ болѣ̑знехъ пло́ть бꙋѧ́ющꙋ и҆ неи́стовѧщꙋсѧ. И҆ ѡ҆брати́хсѧ и҆ ви́дѣхъ лежа́щихъ, и҆ на са́момъ то́мъ ѻ҆дрѣ̀, ѿ бжⷭ҇твеннагѡ дѣ̑йства и҆лѝ ѿ ѹ҆миле́нїѧ ѹ҆тѣша́емыхъ: и҆ сегѡ̀ ра́ди ѹ҆тѣше́нїемъ ѻ҆́нѣмъ болѣ́зни ты́ѧ ѿража́хꙋ: ꙗ҆́кѡ та́кѡ завѣща́нїе и҆мѣ̑ти, ꙗ҆́кѡ не хотѣ̑ти тѣ́мъ ѿ недꙋ́га и҆зба́витисѧ когда̀. И҆ ѡ҆брати́хсѧ, и҆ ви́дѣхъ ѡ҆ѕло́бленныхъ, и҆ недꙋ́гомъ ꙗ҆́кѡ запреще́нїемъ нѣ̑кимъ стра́сти дꙋше́вныѧ и҆зба́влшихсѧ: и҆ просла́вихъ бре́нїемъ ѻ҆́нѣмъ бре́нїе сїѐ ѡ҆чи́стившаго.
к҃в. Ѹ҆́мъ разꙋмѣва́теленъ, ѿню́дъ разꙋмѣва́телнымъ и҆ чꙋ́вствомъ ѡ҆дѣ̑ѧнъ є҆́сть: є҆́же въ на́съ, и҆ не въ на́съ сꙋ́щее, взыскꙋ́юще не преста́нимъ. Ѻ҆́номꙋ бо ꙗ҆́влшꙋсѧ, внѣ́шнѧѧ чꙋ̑вства ѿню́дъ своѧ̑ дѣ̑йствовати сво́йственнѣ преста́нꙋтъ: и҆ сїѐ є҆́сть, є҆́же вѣ̑дый нѣ̑кто премꙋ́дръ, речѐ: и҆ бжⷭ҇твенно чꙋ́вство ѡ҆брѧ́щеши.
к҃г. Житїѐ мона́шеско, въ чꙋ́вствѣ се́рдца да быва́етъ, дѣ̑лы и҆ словесы̀, и҆ помышлє́нїи, и҆ движє́нїи: а҆́ще ли (же) нѝ, то̀ не бꙋ́детъ мона́шеско, да не гл҃ю а҆́гг҃лско.
к҃д. И҆́но є҆́сть про́мыслъ бж҃їй, и҆ и҆́но застꙋпле́нїе, и҆ и҆́но хране́нїе, и҆ и҆́но ми́лость бж҃їѧ, и҆ и҆́но ѹ҆тѣше́нїе: и҆ ѻ҆́но ѹ҆́бѡ, во всѧ́цѣмъ є҆стествѣ̀: ѻ҆́во же въ вѣ̑рныхъ и҆ то́чїю: и҆но́е (же) въ вѣ̑рныхъ, вѣ̑рныхъ вои́стиннꙋ: четве́ртое, въ рабо́тающихъ є҆мꙋ̀: послѣ̑днее же, въ лю́бѧщихъ є҆го̀ показꙋ́етсѧ.
к҃є. Ѻ҆вогда̀ є҆́же и҆но́мꙋ є҆́сть врачба̀, дрꙋго́мꙋ ѡ҆тра́ва быва́етъ: ѻ҆вогда́ же то́жде и҆ томꙋ́жде, во своѐ ѹ҆́бѡ вре́мѧ приноси́мо, врачба̀ быва́етъ: не во вре́мѧ же напроти́въ ѡ҆тра́ва быва́етъ.
к҃ѕ. Ви́дѣхъ невѣ̑ждна врача̀, недꙋ́жна сокрꙋше́нна ѡ҆безче́стивша: и҆ ничесомꙋ́же мно́жае, ра́звѣ то́чїю ѿча́ѧнїю томꙋ̀ вино́вна бы́вша: и҆ ви́дѣхъ быстроꙋ́мна, надме́нно се́рдце безче́стїемъ рѣ̑завша, и҆ ве́сь смра́дъ є҆гѡ̀ и҆стощи́вша.
к҃з. Ви́дѣхъ того́жде недꙋ́жнаго, ѻ҆вогда̀ ѹ҆́бѡ ѡ҆чище́нїѧ ра́ди скве́рны, и҆спи́вша послꙋша́нїѧ цѣлбꙋ̀, и҆ дви́жащасѧ и҆ ходѧ́ща, и҆ неспѧ́ща: ѻ҆вогда́ же ѻ҆́комъ дꙋшѝ недꙋ́гꙋюща и҆ недви́жна, и҆ безмо́лвствꙋюща, и҆ въ молча́нїи пребыва́юща: и҆мѣ̑ѧй ѹ҆́ши слы́шати, да слы́шитъ.
к҃и. Нѣ̑цыи, ѿкꙋ́дꙋ не вѣ̑мъ: (ниже́ бо мнѣ̑нїемъ да́ры бж҃їѧ и҆спы́товати и҆ любопы́тствовати наꙋчи́хсѧ) є҆стество́мъ, да та́кѡ рекꙋ̀, къ возде́ржности, и҆лѝ къ безмо́лвничествꙋ, и҆лѝ чистотѣ̀, и҆лѝ бездерзнове́нности, и҆лѝ кро́тости, и҆лѝ ѹ҆добоꙋмиле́нности прикло́нность и҆́мꙋтъ: и҆ сꙋ́ть и҆́ни ма́лѡ не и҆ са́мое є҆стество̀ своѐ на сїѧ̑ тѣ́мъ сопротивлѧ́ющосѧ и҆мꙋ́ще, и҆ по си́лѣ себѐ понꙋжда́юще: а҆́ще во вре́мѧ и҆ побѣжда́ютсѧ: но ѻ҆ба́че ꙗ҆́кѡ понꙋди́телей є҆стества̀, тѣ̑хъ па́че пе́рвыхъ похвалѧ́ю.
к҃ѳ. Не велехвали́сѧ ѡ҆ безтрꙋ́днѣмъ бога́тствѣ, ѽ человѣ̑че: мно́гїй бо вре́дъ тво́й, и҆ не́мощь, и҆ поги́бель пред̾ꙋвѣ̑дѣвъ дарода́тель ѻ҆́нъ, многшеи́мствы свои́ми ѻ҆́нѣми безме́здными, понѐ ѿча́сти тѧ̀ спасѐ.
л҃. И҆ ꙗ҆̀же и҆з̾ младе́нчества наказа̑нїѧ, и҆ воспита̑нїѧ, и҆ ѡ҆бꙋчє́нїѧ схѡ́дна сꙋ́ть: и҆лѝ и҆ сопротивлѧ́ютсѧ на́мъ возра́стшымъ, къ добродѣ̑тели же, и҆ къ мона́шескомꙋ жи́телствꙋ.
[Статия 3]
л҃а. Свѣ̑тъ ѹ҆́бѡ мона́хѡмъ, сꙋ́ть а҆́гг҃ли: свѣ̑тъ же всѣ̑хъ человѣ́къ є҆́сть, мона́шеское жи́телство: тѣ̑мже во всѣ̑хъ ѻ҆́бразъ бл҃гъ быва́ти да подвиза́ютсѧ: никомꙋ́же претыка́нїе ни въ че́мже даю́ще, ꙗ҆̀же ли́бо дѣ̑лаютъ, и҆лѝ провѣщава́ютъ: а҆́ще бо свѣ̑тъ се́й тма̀ быва́етъ, то̀ тма̀ ѻ҆́на, си́рѣчь, сꙋ́щїи въ мі́рѣ, колмѝ потемнѣ̑ютъ.
л҃в. А҆́ще ѹ҆́бѡ мнѣ̀ покарѧ́етесѧ, покарѧ́ющїисѧ, па́че же хотѧ́щїи, то̀ добро̀ є҆́сть на́мъ не разли́чествовати себѐ, и҆ ѻ҆каѧ́ннꙋю дꙋ́шꙋ на́шꙋ раздѣлѧ́ти, и҆ бра́нь твори́ти съ ты́сѧщными ты́сѧщми, и҆ безчи́сленными тма́ми врагѡ́въ: не бо дово́лни бꙋ́демъ всѧ̑ кова̑рствїѧ и҆́хъ ѹ҆разꙋмѣ̑ти, и҆лѝ всѧ́кѡ ѡ҆брѣстѝ.
л҃г. Трⷪ҇цею ст҃о́ю, на трїе́хъ, тремѝ воѡрꙋжи́мсѧ: а҆́ще ли же нѝ, то̀ мно́гихъ трꙋдѡ́въ себѣ̀ вино́вни бꙋ́демъ.
л҃д. Вои́стиннꙋ а҆́ще и҆ въ на́съ бꙋ́детъ, ѡ҆браща́ѧй мо́ре въ сꙋ́шꙋ, то̀ пре́йдетъ всѧ́кѡ и҆ на́шъ і҆и҃ль, си́рѣчь ѹ҆́мъ зрѧ́й бг҃а, то̀ без̾ вла́ѧнїѧ: и҆ ѹ҆́зритъ є҆гѵ́птѧны сїѧ̑ въ водѣ̀ сле́зъ и҆стоплє́ны: ѻ҆́номꙋ бо въ ны̀ не приходѧ́щꙋ, шꙋ́мꙋ во́лнъ є҆гѡ̀, си́рѣчь пло́ти сеѧ̀ кто̀ постои́тъ;
л҃є. А҆́ще воскре́снетъ въ на́съ бг҃ъ дѣѧ́нїемъ, расточа́тсѧ вразѝ є҆гѡ̀: и҆ а҆́ще видѣ̑нїемъ прибли́жимсѧ къ немꙋ̀, побѣжа́тъ ненави́дѧщїи є҆го̀ и҆ на́съ, ѿ лица̀ є҆гѡ̀ и҆ на́шегѡ.
л҃ѕ. По́томъ наипа́че, а҆ не наги́мъ сло́вомъ, бж҃е́ствєннымъ наꙋчава́тисѧ потщи́мсѧ: не словеса́ бо, но дѣла̀ во вре́мѧ и҆схо́да нꙋ́ждно бꙋ́детъ показа́ти.
л҃з. Слы́шавшїи сокро́вище сокрове́нно на мѣ̑стѣ (нѣ̑коемъ) и҆́щꙋтъ: и҆ ѿ и҆ска́нїѧ ѡ҆брѣте́ннꙋю ве́щь съ трꙋдо́мъ хранѧ́тъ: безтрꙋ́днѣ бо ѡ҆богатѣ̑вшїи, расточа́ютъ.
л҃и. Неꙋдо́бно ѹ҆́бѡ є҆́сть, є҆́же предпрїѧ̑тїѧ ѹ҆до́бь ѡ҆долѣ̑ти: не престаю́щїи же є҆щѐ прилага́ти къ тѣ́мъ, и҆лѝ са́михъ себѐ ѿча́ѧша, и҆лѝ ничи́мже ѿ ѿрече́нїѧ сегѡ̀ спо́льзовашасѧ: ѻ҆ба́че вѣ̑мъ, ꙗ҆́кѡ бг҃ъ всѧ̑ мо́жетъ, невозмо́жно же є҆мꙋ̀ ничто́же.
л҃ѳ. Неꙋдоборазсꙋжда́емо мнѣ̀ нѣ̑цыи и҆спыта́нїе съ недоꙋмѣва́нїемъ предложи́ша, и҆ подо́бныхъ мнѣ̀ всѣ̑хъ превосходѧ́що: и҆ ни во є҆ди́ной прише́дшихъ до менѐ кни́гъ ѡ҆бдержи́мо, гл҃юще: кі́и и҆з̾ ѻ҆сми́хъ пѡ́мыслъ, сво́йственнѣе и҆сча̑дїѧ сꙋ́ть; и҆ кі́й, и҆ ко́егѡ пѧти́хъ и҆з̾ трїе́хъ предста́телей, роди́тель є҆́сть; А҆́зъ же на недоꙋмѣва́нїе сїѐ похва́лно невѣ̑дѣнїе предложи́въ, и҆ ѿ всепрпⷣбныхъ ѻ҆́нѣхъ мꙋже́й ѹ҆разꙋмѣ̑хъ та́кѡ: ма́ти ѹ҆́бѡ блꙋда̀ є҆́сть, чревоѡб̾ѧде́нїе: ѹ҆ны́нїѧ же, тщесла́вїе: печа́ль же, трїе́хъ си́хъ є҆́сть рожде́нїе, ꙗ҆́коже и҆ гнѣ̑въ: горды́ни же ма́ти є҆́сть: тщесла́вїе.
м҃. А҆́зъ же къ приснопомина́ємымъ ѻ҆́нѣмъ ѿвѣщава́ѧ, гл҃ахъ: молѧ́сѧ разꙋмѣва́ти про́чее, и҆ ѻ҆сми́хъ си́хъ рождє́нїѧ, и҆ ко́е ко́егѡ є҆́сть чревоноше́нїе. Ска́зовахꙋ же прїѧ́зненнѣ безстра́стнїи ѻ҆́ни гл҃юще, не бы́ти чи́нꙋ и҆лѝ ра́зꙋмꙋ въ неразꙋ́мныхъ: но всѧ́комꙋ безчи́нїю и҆ нестрое́нїю и҆ ѹ҆вѣрѧ́юще бл҃же́ннїи ѹ҆вѣщава́телными примѣ̑ры, гл҃ахꙋ: на средꙋ̀ произне́сше ѹ҆вѣща́тєлна ѹ҆каза̑нїѧ и҆ мнѡ́гша: ѿ ни́хже нѣ́каѧ въ настоѧ́щемъ сло́вѣ сочинѧ́емъ, да ѿ ѻ҆́нѣхъ про́чее, и҆ ѡ҆ про́чихъ просвѣти́мсѧ.
м҃а. Ꙗ҆коже что̀ гл҃ю, смѣ̑хъ безвре́менный, ѻ҆вогда̀ ѹ҆́бѡ ѿ бѣ̑са блꙋда̀ ражда́етсѧ: ѻ҆вогда́ же ѿ тщесла́вїѧ: є҆гда̀ кто̀ са́мъ въ себѣ̀ внꙋтр̾ꙋ́дꙋ почита́етсѧ безче́стнѡ, ѻ҆вогда́ же и҆ ѿ наслажде́нїѧ.
м҃в. Со́нъ мно́гїй, ѻ҆вогда̀ ѹ҆́бѡ ѿ наслажде́нїѧ: ѻ҆вогда́ же ѿ поста̀, є҆гда̀ постѧ́щїисѧ возно́сѧтсѧ: ѻ҆вогда́ же ѿ ѹ҆ны́нїѧ, ѻ҆вогда́ же и҆ ѿ є҆стества̀.
м҃г. Многосло́вїе, ѻ҆вогда̀ ѹ҆́бѡ ѿ чревоѡб̾ѧде́нїѧ: ѻ҆вогда́ же, ѿ тщесла́вїѧ.
м҃д. Ѹ҆ны́нїе, ѻ҆вогда̀ ѹ҆́бѡ ѿ наслажде́нїѧ: ѻ҆вогда́ же, ѿ безстра́шїѧ бж҃їѧ.
м҃є. Хꙋла̀, є҆́сть ѹ҆́бѡ сво́йственнѣ чревоноше́нїе горды́ни: мно́жицею же и҆ ѿ є҆́же сꙋди́ти ѡ҆ то́мжде бли́жнѧго, и҆лѝ и҆ ѿ за́висти безвре́менны бѣсѡ́въ.
м҃ѕ. Жестосе́рдїе, ѻ҆вогда̀ ѿ насыще́нїѧ, (и҆) ѿ нечꙋ́вства, (и҆) ѿ пристра́стїѧ. Па́ки же пристра́стїе, ѻ҆вогда̀ ѹ҆́бѡ ѿ блꙋда̀, и҆лѝ сребролю́бїѧ, и҆лѝ чревоѡб̾ѧде́нїѧ, и҆лѝ тщесла́вїѧ, и҆ ѿ и҆ны́хъ мно́гихъ.
м҃з. Лꙋка́вство па́ки ѿ возноше́нїѧ и҆ гнѣ̑ва.
м҃и. Лицемѣ̑рїе, ѿ самоꙋго́дїѧ и҆ своечи́нїѧ.
м҃ѳ. Проти̑внаѧ же си̑мъ, ѿ проти́вныхъ роди́тєль свои́хъ ражда́ютсѧ. и҆ да не мнѡ́га гл҃ю, недоста́нетъ бо мѝ вре́мене сегѡ̀, а҆́ще по є҆ди́номꙋ и҆стѧ́зовати хощꙋ̀. Сво́йственнѣ всѣ̑хъ предрече́нныхъ страсте́й, ѹ҆бива́телно смиренномꙋ́дрїе: є҆́же стѧжа́вшїи, всѧ̑ побѣди́ша.
[Статия 4]
н҃. Роди́телница всѣ̑хъ ѕѡ́лъ ѻ҆́нѣхъ є҆́сть, сла́сть и҆ лꙋка́вство: ꙗ҆̀же содержа́й, не ѹ҆́зритъ гдⷭ҇а: но ничто́же на́съ ѿ пе́рвшїѧ ѹ҆дале́нїе, кромѣ̀ (ѹ҆дале́нїѧ) ѿ втора́гѡ по́льзовати и҆́мать.
н҃а. Стра́ха гдⷭ҇нѧ приꙋка́зъ, ѿ кнѧзе́й и҆ ѕвѣре́й прїи́мимъ: любве́ же ꙗ҆́же ко бг҃ꙋ, раче́нїе тѣле́съ ѻ҆́бразъ да бꙋ́детъ тебѣ̀: ничто́же бо є҆́сть возбранѧ́ющее, и҆ ѿ сопроти́вныхъ твори́ти на́мъ добродѣ̑телей приꙋка́зы.
н҃в. Ѡ҆лꙋка́вствовалсѧ лю́тѣ настоѧ́щїй ро́дъ, и҆ ве́сь возноше́нїѧ и҆ лицемѣ̑рїѧ и҆спо́лнисѧ: трꙋды̀ ѹ҆́бѡ тѣлє́сны, по дрє́внимъ ѻ҆ц҃є́мъ на́шымъ не́гли показꙋ́ющъ: дарова́нїй же и҆́хъ не сподоблѧ́емь: а҆́ще, непщꙋ́ю, и҆ никогда́же ꙗ҆́коже ны́нѣ є҆стество̀ сїѐ дарова́нїй тре́боваше: и҆ влѣ̑потꙋ пострада́хомъ: не въ трꙋдѣ̑хъ бо, но въ простотѣ̀ и҆ смире́нїи бг҃ъ ꙗ҆влѧ́етсѧ: а҆́ще си́ла гдⷭ҇нѧ и҆ въ не́мощи соверша́етсѧ, ѻ҆ба́че ѿри́нетъ гдⷭ҇ь дѣ̑лателѧ не смиренномꙋ́дра.
н҃г. Внегда̀ кого̀ и҆з̾ подви́жникѡвъ на́шихъ, ѡ҆ѕлоблѧ́ема тѣле́снѣ ѹ҆́зримъ, то̀ не ѿ лꙋка́вства сꙋ́дъ недꙋ́га є҆гѡ̀ разꙋмѣва́ти потщи́мсѧ, но па́че просто́ю и҆ нелꙋка́вною любо́вїю, ꙗ҆́кѡ ѹ҆́дъ сво́й, и҆ ꙗ҆́кѡ во́ина ѿ бра́ни ѹ҆ѧ́звенна, прїе́мше ѹ҆врачꙋ́имъ.
н҃д. Є҆́сть недꙋ́гъ ѡ҆чище́нїѧ ра́ди согрѣше́нїй, и҆ є҆́сть за є҆́же смири́тисѧ мꙋдрова́нїю.
н҃є. Бл҃гі́й на́шъ и҆ всебл҃гі́й влⷣка и҆ гдⷭ҇ь, внегда̀ мно́жицею нѣ̑кихъ лѣ̑ностншихъ къ подвижничествова́нїю ѹ҆́зритъ, то̀ недꙋ́гомъ про́чее, ꙗ҆́кѡ ѿра́дншимъ подвижничествова́нїемъ пло́ть смирѧ́етъ: ѻ҆вогда́ же и҆ дꙋ́шꙋ ѿ пѡ́мыслъ лꙋка́выхъ и҆ страсте́й ѡ҆чища́етъ.
н҃ѕ. Всѧ̑ на́мъ слꙋча̑ющаѧсѧ, и҆лѝ ви̑дима, и҆лѝ неви̑дима, мо́щно є҆́сть и҆ до́брѣ и҆ встра́ственнѣ, и҆ сре́дственнѣ прїѧ́ти. Ви́дѣхъ тре́хъ бра́тїй ѿтщетѣ̑нныхъ: и҆ ѻ҆́въ ѹ҆́бѡ, негодова́ше: ѻ҆́въ же, пребы́сть без̾ печа́ли: ѻ҆́въ же, мно́гꙋ ра́дость прїѧ́тъ.
н҃з. Ви́дѣхъ ѹ҆ земледѣ̑лєцъ є҆ди́но сѣ̑мѧ поверга́емо, но ра́зꙋмъ сво́йственъ кі́йждо воз̾имѣ̑лъ бѣ̀: ѻ҆́въ ѹ҆́бѡ, да до́лги своѧ̑ ѿда́стъ: ѻ҆́въ же, да бога́тство себѣ̀ ѹ҆сокро́вищствꙋетъ: ѻ҆́въ же, да дармѝ влⷣкꙋ почти́тъ: и҆́нъ же, да ѡ҆ добродѣ̑лїи ѿ мимоходѧ́щихъ пꙋте́мъ житїѧ̀ сегѡ̀ похвалꙋ̀ ѹ҆лови́тъ: ѻ҆́въ же, да са́маго врага̀ своего̀ позави́дѣвша ѡ҆скорби́тъ: ѻ҆́въ же, да не ꙗ҆́кѡ пра́зденъ ѿ человѣ́къ поноша́емь быва́етъ. Сїѧ̑ сꙋ́ть воздѣ̑лателей сѣ̑мене ѻ҆́нагѡ нарица̑нїѧ: по́стъ, бдѣ̑нїе, ми́лостынѧ, слꙋжє́нїѧ и҆ подѡ́бнаѧ: ра́зꙋмы же ѹ҆се́рднѡ ѡ҆ гдⷭ҇ѣ бра̑тїѧ и҆стѧза́ти и҆́мꙋтъ.
н҃и. Ꙗ҆коже во́дꙋ ѿ и҆стѡ́чникъ почерпа́юще, ѻ҆вогда̀ ѻ҆́тай и҆ глаго́лемꙋю жа́бꙋ спочерпо́хомъ: та́кѡ и҆ добродѣ̑тєли дѣ̑йствꙋюще, мно́жицею сплетє́нны съ ни́ми неѧ́внѣ (и҆) ѕлѡ́бы дѣ̑йствꙋемъ: ꙗ҆́коже что̀ гл҃ю: къ страннопрїи́мствꙋ, чревоѡб̾ѧде́нїе сплете́сѧ: къ любвѝ, блꙋ́дъ: къ разсꙋжде́нїю, кова́рство: къ мꙋ́дрости лꙋка́вство: къ кро́тости тайнолꙋка́вство: и҆ ко́сность, и҆ лѣ̑ность, и҆ прекосло́вїе, и҆ своечи́нїе, и҆ непослꙋша́нїе: къ молча́нїю, киче́нїе ѹ҆чи́телства: къ ра́дости, возноше́нїе: къ наде́ждѣ, лѣ̑ность: къ любвѝ напроти́въ, є҆́же ѡ҆сꙋжда́ти: къ безмо́лвїю ѹ҆ны́нїе и҆ лѣ̑ность: къ чистотѣ̀, го́ресть: къ смиренномꙋ́дрїю, дерзнове́нїе: си̑мъ всѣ́мъ ꙗ҆́коже ѻ҆́бщаѧ врачба̀, па́че же ѡ҆тра́ва тщесла́вїе сплета́етсѧ.
н҃ѳ. Да не ѡ҆печа́лимсѧ просѧ́ще ѹ҆ гдⷭ҇а проше́нїй, и҆ на времена̀ не ѹ҆слышава́еми: занѐ хотѣ̑лъ бы гдⷭ҇ь всѣ́мъ человѣ̑кѡмъ въ є҆ди́номъ вре́мене мгнове́нїи безстра̑стнымъ бы́ти.
ѯ҃. Всѝ просѧ́щїи ѿ бг҃а проше́нїй, и҆ не прїе́мшїи, є҆ди́ныѧ ра́ди и҆з̾ си́хъ ви́нъ всѧ́кѡ не прїе́млютъ: и҆лѝ ꙗ҆́кѡ пре́жде вре́мене про́сѧтъ, и҆лѝ ꙗ҆́кѡ недосто́йнѣ про́сѧтъ и҆ тщесла́внѣ: и҆лѝ ꙗ҆́кѡ прїе́млюще вознести́сѧ и҆мѣ̑ѧхꙋ, и҆лѝ нерадѣ̑ти про́чее по полꙋче́нїи проше́нїѧ.
ѯ҃а. Ꙗ҆кѡ ѹ҆́бѡ ѿхо́дѧтъ бѣ̑сове и҆ стра̑сти ѿ дꙋшѝ, и҆лѝ на вре́мѧ нѣ̑кое, и҆лѝ вы́нꙋ, никто́же, непщꙋ́ю, ѹ҆сꙋмнѣва́етсѧ: а҆ є҆́же коли́цѣми ѻ҆́бразы ѿхожде́нїе тѣ̑хъ ѿ на́съ быва́етъ, ма́ли вѣ̑дѧтъ.
ѯ҃в. Ѿидо́ша стра̑сти ѿ нѣ̑кихъ, не то́чїю вѣ̑рныхъ, но и҆ невѣ̑рныхъ̑ кромѣ̀ є҆ди́ныѧ: ѻ҆́нꙋ є҆ди́нꙋ ѡ҆ста́влше тѣ́мъ ꙗ҆́кѡ ѕло̀ нѣ̑кое пе́рвствꙋющо, и҆ мѣ̑сто всѣ̑хъ и҆сполнѧ́ющо: поне́же тако́въ и҆́мать вре́дъ, ꙗ҆́кѡ и҆ съ нб҃сѐ низве́ргнꙋти.
ѯ҃г. Потреблѧ́емо быва́етъ вещество̀ ѻ҆гне́мъ бжⷭ҇твеннымъ и҆знꙋрѧ́емо, и҆ веществꙋ̀ семꙋ̀ и҆скоренѧ́емꙋ, и҆ дꙋшѝ ѡ҆чища́емѣй, соѿхо́дѧтъ и҆ стра̑сти про́чее: а҆́ще не па́ки та̑ веществова́тымъ пребыва́нїемъ и҆ лѣ̑ностїю привлече́мъ.
ѯ҃д. Ѹ҆стꙋпа́ютъ бѣ̑си во́лею, без̾ попече́нїѧ бы́ти сотворѧ́юще, и҆ внеза́пꙋ ѡ҆каѧ́ннꙋю дꙋ́шꙋ расхища́юще, и҆ въ коне́цъ ѹ҆сво́йствоватисѧ страст̾мѝ сотворѧ́юще, ꙗ҆́кѡ ѿсю́дꙋ самонавѣ̑тнꙋ сꙋ́щꙋ и҆ самосꙋпоста́тнꙋ.
ѯ҃є. Вѣ̑мъ и҆ и҆́но бѣ̑гство ѕвѣре́й си́хъ, по є҆́же соверше́ннѣ ѡ҆бы́кнꙋти дꙋшѝ, и҆ приꙋка́зъ рече́ннагѡ сꙋ́ть младе́нцы: по до́лзѣ бо ѻ҆бы́чаи, и҆ без̾ сосца̀, ѿ пе́рстѡвъ свои́хъ ссꙋ́тъ.
ѯ҃ѕ. Вѣ̑мъ и҆ пѧ́тое є҆щѐ въ дꙋшѝ безстра́стїе: ѿ простоты̀ мно́гїѧ и҆ неѕло́бїѧ похвалѧ́ема составлѧ́єма: пра́ведна бо є҆́сть по́мощь такѡвы́мъ ѿ бг҃а спаса́ющагѡ пра̑выѧ се́рдцемъ, и҆ неѡщꙋ́тнѣ ѿ ѕѡ́лъ си́хъ и҆збавлѧ́юща: поне́же и҆ младе́нцы совлече́ни бы́вше, не ѕѣлѡ̀ вѣ̑дѧтъ.
[Статия 5]
ѯ҃з. Ѕло́ба ѹ҆́бѡ и҆лѝ стра́сть є҆сте́ственнѣ въ є҆стествѣ̀ нѣ̑сть, нѣ̑сть бо зижди́тель страсте́й бг҃ъ: добродѣ̑тєли же є҆стество́мъ и҆ мнѡ́ги въ на́съ ѿ негѡ̀ бы́ша, и҆з̾ ни́хже сꙋ́ть и҆ сїѧ̑ ꙗ҆́вѣ: ми́лостынѧ, поне́же и҆ є҆́ллини милосе́рдствꙋютъ: любы̀, поне́же и҆ безсловє́снаѧ живѡ́тна мно́жицею ѡ҆ лише́нїи дрꙋ́гъ дрꙋ́га прослези́шасѧ: вѣ̑ра, вси́ бо са́ми ѿ себѐ сїю̀ поражда́емъ: наде́жда, поне́же и҆ взаи́мъ взе́млюще, и҆ взаи́мъ даю́ще, и҆ пла́вающе, и҆ сѣ̑юще, ѡ҆богатѣ̑ти надѣ̑емсѧ. А҆́ще ѹ҆́бѡ ꙗ҆́коже ѹ҆каза́сѧ, любы̀ є҆сте́ственна добродѣ̑тель въ на́съ є҆́сть: сою́зъ же и҆ и҆сполне́нїе зако́на, сїѧ̀ є҆́сть: то̀ ѹ҆̀бо не дале́че ѿ є҆стества̀ добродѣ̑тєли сꙋ́ть: да посра́мѧтсѧ ѹ҆̀бо не́мощь ѡ҆ дѣ̑ланїи си́хъ предлага́ющїи.
ѯ҃и. Вы́ше є҆стества̀ сꙋ́ть, чистота̀, безгнѣ̑вїе, смиренномꙋ́дрїе, мл҃и́тва, бдѣ̑нїе, по́стъ, ѹ҆миле́нїе всегда́шнее. И҆з̾ си́хъ, ѻ҆́выхъ ѹ҆́бѡ, человѣ̑цы: ѻ҆́выхъ же а҆́гг҃ли: ѻ҆́выхъ же, са́мъ бг҃ъ сло́во є҆́сть ѹ҆чт҃ль и҆ да́тель.
ѯ҃ѳ. Въ сравне́нїи ѕѡ́лъ, подоба́етъ на́мъ ле́гшее и҆збира́ти: ꙗ҆́коже, мно́жицею на мл҃и́твѣ предстоѧ́щымъ на́мъ, бра́тїѧ къ на́мъ прїидо́ша: и҆ и҆з̾ двою̀ є҆ди́но (предлежи́тъ), и҆лѝ мл҃и́твꙋ ѡ҆ста́вити, и҆лѝ бра́та без̾ѿвѣ̑тна ѿше́дша ѡ҆печа́лити. Любы̀, бо́лша мл҃и́твы є҆́сть: занѐ сїѧ̀ ѹ҆́бѡ, ча́стна є҆́сть: ѻ҆́на же, всѣ̑хъ є҆́сть ѡ҆бдержи́телна.
ѻ҃. Дре́вле во гра́дъ и҆лѝ ве́сь прише́дъ нѣ̑когда є҆щѐ ю҆́нъ сы́й, ѿ пѡ́мыслъ чревоѡб̾ѧде́нїѧ и҆ тщесла́вїѧ кꙋ́пнѡ на трапе́зѣ сѣдѧ̀ ѡ҆б̾ѧ́тъ бы́хъ: и҆ ѹ҆́бѡ и҆сча́дїѧ чревонеи́стовства боѧ́сѧ, тщесла́вїемъ па́че побѣжде́нъ бы́хъ. Позна́хъ а҆́зъ бѣ̑са чревоѡб̾ѧде́нїѧ бѣ̑са тщесла́вїѧ побѣди́вша, въ ю҆́ныхъ: и҆ влѣ̑потꙋ. Въ сꙋ́щихъ ѹ҆́бѡ въ мі́рѣ, ко́рень всѣ́мъ ѕлы̑мъ є҆́сть, сребролю́бїе: въ мона́сѣхъ же, чревоѡб̾ѧде́нїе.
ѻ҃а. Сꙋ́ть въ дх҃о́вныхъ мно́жицею, нѣ́кїѧ легча̑йшїѧ стра̑сти, ѿ бг҃а смотри́телнѣ ѡ҆ставлѧ́ємы: да ле́гкими нѣ̑кими и҆ безгрѣ̑шными себѐ ѕѣлѡ̀ ѡ҆бвинѧ́юще, бога́тство смиренномꙋ́дрїѧ стѧ́жꙋтъ.
ѻ҃в. Нѣ̑сть возмо́жно въ нача́лѣхъ смире́нїе стѧжа́ти, без̾ повинове́нїѧ пребыва́ющемꙋ: поне́же всѧ́къ своечи́ннѣ хꙋдо́жествꙋ наꙋчи́выйсѧ, мечта́етсѧ.
ѻ҃г. Во двои́хъ (по́стъ, и҆ повинове́нїе) ро́днѣйшихъ добродѣ̑телехъ, ѻ҆ц҃ы̀ дѣ̑ѧтелнꙋю добродѣ̑тель ѹ҆ставлѧ́ютъ бы́ти: и҆ влѣ̑потꙋ: занѐ ѻ҆́ва ѹ҆́бѡ, потреби́телна сласте́й є҆́сть: ѻ҆́ва же, потребле́нїе то̀ смиренномꙋ́дрїемъ ѹ҆тверди́ла є҆́сть: сегѡ̀ ра́ди и҆ пла́чь, сꙋгꙋ́бъ є҆́сть: ꙗ҆́кѡ грѣха̀ потреби́теленъ, и҆ смиренномꙋ́дрїѧ твори́теленъ.
ѻ҃д. Бл҃гочести́выхъ ѹ҆́бѡ є҆́сть, є҆́же, всѧ́комꙋ просѧ́щемꙋ даѧ́ти: бл҃гочести́вшихъ же, и҆ не просѧ́щемꙋ: а҆ є҆́же ѿ взима́ющагѡ не и҆стѧ́зовати, наипа́че же могꙋ́щымъ, безстра́стныхъ и҆ є҆ди́ныхъ сво́йственно є҆́сть.
ѻ҃є. Во всѣ̑хъ страсте́хъ и҆ добродѣ̑телехъ, са́мѣхъ себѐ и҆стѧзꙋ́юще не преста́нимъ, гдѣ̀ є҆смы̀: въ нача́лѣ ли, въ средѣ̑ ли, и҆лѝ на концѣ̀.
ѻ҃ѕ. Всѧ̑ проти́вꙋ на́мъ бѣсѡ́вскїѧ бра̑ни, ѿ трїе́хъ си́хъ ви́нъ составлѧ́ютсѧ: ѿ сластолю́бїѧ, и҆лѝ ѿ горды́ни, и҆лѝ ѿ за́висти и҆́хъ: (и҆) послѣ̑днїи ѹ҆́бѡ, бл҃же́ни сꙋ́ть: сре́днїи же, всеѡкаѧ́нни: пе́рвїи же, до конца̀ непотре́бни сꙋ́ть.
ѻ҃з. Є҆́сть нѣ̑кое чꙋ́вство, па́че же завѣща́нїе дꙋшѝ неꙋдобопрелага́емо, болѣзнотерпѣли́во нарица́емо: и҆́мже ꙗ҆́тъ бы́вый, не ктомꙋ̀ ѹ҆бои́тсѧ, и҆лѝ ѿврати́тсѧ болѣ̑зни когда̀: си́мъ приснопа́мѧтнымъ дꙋ̑ши мч҃нкѡвъ ѡ҆б̾ѧ́ты бы́вше, мꙋ́кꙋ ѹ҆до́бь презрѣ̑ша.
ѻ҃и. И҆́на ве́щь є҆́сть, хране́нїе пѡ́мыслъ, и҆ и҆́но блюде́нїе ѹ҆ма̀: (и҆) є҆ли́кѡ ѿстоѧ́тъ восто́цы ѿ за̑падъ, толи́кѡ вы́шше є҆́сть пе́рвшагѡ второ́е, а҆́ще и҆ трꙋ́днше є҆́сть.
ѻ҃ѳ. И҆́но є҆́сть моли́тисѧ на по́мыслы: и҆ и҆́но сопроти́въ вѣща́ти тѣ́мъ: и҆ и҆́но ѹ҆ничижа́ти и҆ ѿлага́ти тѣ̑хъ. И҆ пе́рвомꙋ ѹ҆́бѡ ѻ҆́бразꙋ свидѣ̑телствꙋетъ, рекі́й: бж҃е въ по́мощь мою̀ вонмѝ, и҆ подѡ́бнаѧ: второ́мꙋ же, рекі́й: и҆ ѿвѣща́ю поноша́ющымъ мѝ сло́во противоглаго́лателно: и҆ па́ки: положи́лъ є҆сѝ на́съ въ пререка́нїе сосѣ̑дѡмъ на́шымъ: тре́тїѧгѡ же свидѣ̑тель пѣсновоспѣ̑вый: ѡ҆нѣмѣ̑хъ и҆ не ѿверзо́хъ ѹ҆́стъ мои́хъ: и҆ положи́хъ тѣ́мъ храни́ло, внегда̀ воста́ти грѣ̑шномꙋ предо мно́ю: и҆ па́ки: го́рдїи законопрестꙋпова́хꙋ до ѕѣла̀, ѿ видѣ̑нїѧ же твоегѡ̀ а҆́зъ не ѹ҆клони́хсѧ. И҆з̾ си́хъ сре́днїй ѹ҆́бѡ, пе́рвшее мно́жицею ѹ҆потреблѧ́етъ за непригото́ванїе: пе́рвшїй же, не ѹ҆̀ вторы́мъ ѻ҆́бразомъ мо́жетъ врагѝ сїѧ̑ ѿри́нꙋти: тре́тїй же, ѿню́дъ бѣ̑сы ѡ҆плева̀.
п҃. Невозмо́жно є҆́сть є҆сте́ственнѣ безтѣле́сное ѿ тѣ̑ла ѡ҆предѣлѧ́емо бы́ти: бг҃ꙋ же созда́вшемꙋ всѧ̑ возмѡ́жна сꙋ́ть.
п҃а. Ꙗ҆коже чꙋ́вствомъ ѡ҆бонѧ́нїѧ здра́ви сꙋ́щїи, а҆рѡма́ты ѻ҆́тай держа́щаго познава́ти мо́гꙋтъ: та́кѡ и҆ дꙋша̀ чиста̀, и҆ бл҃гоꙋха́нїе є҆́же и҆ са́ма ѿ бг҃а пристѧжа́ла є҆́сть, и҆ ѕлосмра́дїе ѿ негѡ́же соверше́ннѣ и҆зба́влена є҆́сть во и҆нѣ̑хъ сꙋ́що, познава́ти, без̾ ѡ҆щꙋще́нїѧ и҆нѣ́мъ сꙋ́щымъ, ѡ҆бы́че.
п҃в. Не всѣ́мъ ѹ҆́бѡ безстра̑стнымъ бы́ти мо́щно є҆́сть: всѣ́мъ же спасти́сѧ и҆ съ бг҃омъ примири́тисѧ нѣ̑сть невозмо́жно.
[Статия 6]
п҃г. Да не поѡблада́ютъ тебѐ и҆ноплеме́нницы ѻ҆́ни, смотрє́нїѧ бж҃їѧ неизречє́ннаѧ, и҆лѝ въ человѣ̑цѣхъ быва̑ющаѧ, любопы́тствовати хотѧ́щїи, и҆ лицепрїе́мна бы́ти гдⷭ҇а ѡ҆́тай влага́ющїи: возноше́нїѧ бо и҆сча̑дїѧ и҆ сꙋ́ть и҆ познава́еми быва́ютъ.
п҃д. Є҆́сть бѣ̑съ сребролю́бїѧ, мно́жицею смире́нїе лицемѣ̑рнѣ притворѧ́ющъ: и҆ є҆́сть бѣ̑съ тщесла́вїѧ, къ ми́лостыни под̾ꙋща́ющъ: ꙗ҆́коже и҆ сластолю́бїѧ: а҆́ще ѹ҆̀бо ѿ ѻ҆бою̀ чи́сти бꙋ́демъ, то̀ на всѧ́комъ мѣ̑стѣ ми́ловати не преста́нимъ.
п҃є. Нѣ̑цыи ѹ҆́бѡ рѣ̑ша, бѣ̑сы бѣсѡ́мъ сопротивлѧ́тисѧ: а҆́зъ же позна́хъ, всѣ̑хъ поги́бели на́шеѧ и҆́щꙋщихъ.
п҃ѕ. Всѧ́кагѡ дх҃о́вна дѣ̑ланїѧ, ви́дима же и҆ разꙋмѣва́ема, предварѧ́етъ предложе́нїе сво́йственно, и҆ жела́нїе и҆зрѧ́днѣйшо, съ содѣ̑йствомъ бж҃їимъ быва́єма: пе́рв шымъ бо положє́нымъ не бы́вшымъ, второ́е припослѣ̑дствовати не ѡ҆бы́че.
п҃з. А҆́ще вре́мѧ є҆́сть во всѧ́кой ве́щи и҆з̾ тѣ̑хъ ꙗ҆̀же под̾ нб҃се́мъ, ꙗ҆́коже гл҃етъ є҆кклисїа́стъ: во всѣ̑хъ же и҆ сщ҃е́ннагѡ жи́телства на́шегѡ ѹ҆ста́влени сꙋ́ть вє́щи: тѣ̑мже разсмотри́мъ, а҆́ще ѹ҆го́дно є҆́сть, и҆ въ ко́еждо вре́мѧ сво́йствєннаѧ вре́мени ѻ҆́номꙋ и҆стѧжи́мъ: вре́мѧ бо ѿню́дъ въ подвиза́ющихсѧ є҆́сть безстра́стїѧ, и҆ вре́мѧ встра́стїѧ младе́нчества ра́ди подвиза́ющихсѧ гл҃ю. Вре́мѧ сле́зъ, и҆ вре́мѧ жестосе́рдїѧ: вре́мѧ повинове́нїѧ, и҆ вре́мѧ повелѣва́нїѧ: вре́мѧ поста̀, и҆ вре́мѧ снѣ̑ди прїѧ́тїѧ: вре́мѧ бра́ни тѣ̑ла врага̀, и҆ вре́мѧ сме́рти раждиза́нїѧ: вре́мѧ бꙋ́ри дꙋшѝ, и҆ вре́мѧ тишины̀ ѹ҆ма̀: вре́мѧ печа́ли серде́чныѧ, и҆ вре́мѧ ра́дости дх҃о́вныѧ: вре́мѧ ѹ҆чи́телства, и҆ вре́мѧ слы́шанїѧ: вре́мѧ скве́рнъ, не́гли за возноше́нїе, и҆ вре́мѧ ѡ҆чище́нїѧ, смире́нїѧ ра́ди: вре́мѧ борбы̀ и҆ (вре́мѧ) тве́рды ѿра́ды: вре́мѧ безмо́лвїѧ, и҆ вре́мѧ безмо́лвна попече́нїѧ: вре́мѧ мл҃и́твы непреста́нны, и҆ вре́мѧ слꙋ́жбы нелицемѣ̑рны. Не ѹ҆̀бо пре́жде вре́мене ѿ гордели́ва ѹ҆се́рдїѧ прелща́еми ꙗ҆̀же вре́мене взы́щимъ: ни въ зимѣ̀, ꙗ҆̀же лѣ̑та: ни въ сѣ̑ѧтбѣ, ꙗ҆̀же рꙋкоѧ́тїй: поне́же вре́мѧ є҆́сть є҆́же посѣ̑ѧти трꙋды̀, и҆ вре́мѧ є҆́же пожа́ти бл҃года̑ти неизречє́нныѧ: а҆́ще ли же нѝ, то̀ ни во вре́мѧ (своѐ) сво́йствєннаѧ вре́мене тогѡ̀ прїи́мемъ.
п҃и. Нѣ̑цыи пре́жде трꙋдѡ́въ, нѣ̑цыи во трꙋдѣ̑хъ, нѣ̑цыи по трꙋдѣ̑хъ, нѣ̑цыи на сме́рти, прпⷣбнаѧ воздаѧ̑нїѧ ѿ бг҃а трꙋдѡ́въ свои́хъ по смотре́нїю неизрече́ннꙋ прїѧ́ша: и҆спыта́ти подоба́етъ кто̀ и҆з̾ си́хъ дрꙋга́гѡ смире́ншъ є҆́сть.
п҃ѳ. Є҆́сть ѿча́ѧнїе ѿ мно́жества грѣхѡ́въ, и҆ тѧготы̀ со́вѣсти, и҆ нестерпи́мыѧ печа́ли, за є҆́же препогрꙋзи́тисѧ мно́жествомъ ꙗ҆́звъ си́хъ дꙋшѝ, и҆ тѧгото́ю тѣ̑хъ во глꙋбинѣ̀ ѿча́ѧнїѧ ѹ҆топа́ти: и҆ є҆́сть ѿча́ѧнїе, ѿ горды́ни и҆ возноше́нїѧ на́мъ приключа́ющеесѧ, непщꙋ́ющымъ себѐ ꙗ҆́кѡ недостѡ́йнымъ сꙋ́щымъ слꙋчи́вшагѡсѧ паде́нїѧ. Сїе́ же наблюда́ѧй во ѻ҆бои́хъ ѡ҆брѧ́щетъ сво́йство: ѻ҆́ваго ѹ҆́бѡ, въ нерадѣ̑нїе себѐ про́чее преда́вша: ѻ҆́ваго же, по́двига во ѿча́ѧнїи держа́щагосѧ, є҆́же несогла́сно є҆́сть: но ѻ҆́наго ѹ҆́бѡ, воздержа́нїе, и҆ бл҃гонаде́ждїе: сего́ же, смире́нїе, и҆ є҆́же никого́же сꙋди́ти, и҆сцѣлѧ́ти ѡ҆быко́ша.
ч҃. Не подоба́етъ ѹ҆дивлѧ́тисѧ на́мъ и҆лѝ ѹ҆жаса́тисѧ, зрѧ́щымъ лꙋка̑ва ѹ҆́бѡ нѣ̑кихъ дѣ̑лающихъ дѣла̀, бла̑га же словеса̀ произносѧ́щихъ: поне́же и҆ ѕмі́ѧ ѻ҆́наго въ раѝ возноше́нїе сїѐ возне́сшо погꙋби́ло є҆́сть.
ч҃а. Ѻ҆́бразъ тебѣ̀ (се́й) и҆ пра́вило да бꙋ́детъ сїѐ, во всѣ̑хъ твои́хъ начина́нїихъ и҆ жи́телствахъ, подчине́нныхъ же и҆ неподчине́нныхъ (толкова́нїе: врꙋче́нныхъ же ѿ и҆нѣ̑хъ и҆ неповелѣ̑нныхъ), ви́димыхъ и҆ разꙋмѣва́емыхъ, сво́йственнѣ ли по бг҃ꙋ сꙋ́ть: гл҃ю же: внегда̀ ꙗ҆ково́либо прилѣ̑жнѣ сотворѧ́емъ, вводи́мїи гл҃ю, начина́нїе, и҆ ѿ дѣ̑ланїѧ тогѡ̀, смире́нїе, є҆́же стѧжа́ли бѣ̑хомъ, не прїе́млемъ мно́жае въ дꙋшѝ, то̀ не мни́тсѧ мѝ по бг҃ꙋ то̀ содѣ̑ловати: ма́ло ли, и҆лѝ вели́ко є҆́сть: занѐ въ на́съ ѹ҆́бѡ младе́нчественшихъ сїѐ є҆́сть во́ли гдⷭ҇кїѧ и҆звѣще́нїе: въ сре́днихъ же, не́гли бра́ней ѿхожде́нїе: въ соверше́нныхъ же, бжⷭ҇твеннагѡ свѣ̑та прило́гъ и҆ и҆зѻби́лїе.
ч҃в. Ма̑лаѧ ѹ҆́бѡ ѹ҆ вели́кихъ, не́гли нѣ̑сꙋть ма̑ла: вели̑каѧ же ѹ҆ ма́лыхъ, нѣ̑сꙋть всѧ́кѡ совершє́нна.
ч҃г. Воздꙋ́хъ ѹ҆́бѡ ѡ҆чи́стивсѧ ѿ ѻ҆́блакъ, свѣ̑тло показа̀ со́лнце: дꙋша́ же предпрїѧ́тїй проще́нїѧ сподо́блшисѧ, всѧ́кѡ бжⷭ҇твенъ свѣ̑тъ ѹ҆ви́дѣла є҆́сть.
[Статия 7]
ч҃д. И҆́но є҆́сть грѣ̑хъ, и҆ и҆́но пра́здность, и҆ и҆́но нерадѣ̑нїе, и҆ и҆́но стра́сть, и҆ и҆́но паде́нїе: могі́й ѡ҆ гдⷭ҇ѣ и҆спы́товати, да и҆спытꙋ́етъ ꙗ҆́вѣ.
ч҃є. Нѣ̑цыи чꙋдотво́рное и҆ зри́мое въ дх҃о́вныхъ дарова́нїихъ, па́че всѣ̑хъ бл҃жа́тъ: невѣ̑дѧще мнѡ́га бы́ти прєвы́шша сегѡ̀ и҆ сокровє́нна.
ч҃ѕ. Ѡ҆чи́стивыйсѧ ѹ҆́бѡ соверше́ннѣ, са́мꙋю (же), и҆ не са́мꙋю тꙋ̀ дꙋ́шꙋ бли́жнѧгѡ ви́дитъ, въ кі́ихъ завѣща́нїе и҆́мать: пред̾ꙋспѣва́ѧй же є҆щѐ, тѣ̑ломъ сїю̀ примѣча́етъ.
ч҃з. Ѻ҆́гнь ма́лъ мно́жицею, всѐ вещество̀ потреби́лъ є҆́сть: ꙗ҆́коже и҆ сква́жнѧ ма́ла, ве́сь трꙋ́дъ расточи́ла є҆́сть.
ч҃и. Є҆́сть поко́й вражде́бницею се́ю си́лꙋ ѹ҆ма̀ возбꙋжда́ющъ, а҆ разжиза́нїѧ не воздви́жꙋщъ: и҆ є҆́сть мно́го и҆ста́ѧнїе, не́гли и҆ двиза̑нїѧ подви́жꙋщо: да не ѹ҆пова́юще бꙋ́демъ на сѧ̀, но на невѣ̑домѡ живꙋ́щꙋю сїю̀ ѹ҆мерщвлѧ́ющаго.
ч҃ѳ. Є҆гда̀ нѣ̑кихъ по гдⷭ҇ꙋ лю́бѧщихъ на́съ ѹ҆́зримъ, то̀ ко ѻ҆́нѣмъ наипа́че бездерзнове́нность сохрани́мъ: ничто́же бо та́кѡ разорѧ́ти любо́вь, ꙗ҆́коже дерзнове́нїе ѡ҆бы́че, и҆ не́нависть дѣ̑лати.
р҃. Разꙋмѣва́телно и҆ ѕѣлѡ̀ прекра́сно є҆́сть ѻ҆́ко дꙋшѝ, и҆ всѧ́къ ви́дъ по безпло́тныхъ сꙋщества́хъ превосходѧ́що: тѣ̑мже и҆ встра́ственни мно́жицею во и҆ны́хъ дꙋша́хъ помышлє́нїѧ, ѿ мно́ги любвѐ ꙗ҆́же къ ни̑мъ позна́ти возмого́ша: и҆ па́че же є҆гда̀ ѿ бре́нїѧ сегѡ̀ не погрѧза́ютъ ѡ҆сквернѧ́ющесѧ. А҆́ще ничто́же невеще́ственномꙋ ѻ҆́номꙋ є҆стествꙋ̀, ꙗ҆́коже веще́ственное сопротивлѧ́етсѧ: чты́й, да разꙋмѣ̑етъ.
р҃а. Наблюдє́нїѧ, въ сꙋ́щихъ ѹ҆́бѡ въ мі́рѣ, сопротивлѧ́ютсѧ про́мыслꙋ бж҃їю: въ на́съ же, разꙋмѣва́телномꙋ ра́зꙋмꙋ.
р҃в. Немощні́и ѹ҆́бѡ дꙋше́ю, ѿ тѣле́сныхъ ѡ҆бстоѧ́нїй и҆ бѣ̑дъ, и҆ внѣ̑шнихъ (и҆скꙋше́нїй), є҆́же къ ни̑мъ посѣще́нїе гдⷭ҇не да познава́ютъ: соверше́ннїи же ѿ прише́ствїѧ дх҃а, и҆ прило́га дарова́нїй.
р҃г. Є҆́сть бѣ̑съ, повнегда̀ на ѻ҆дрѣ̀ возлѧ́жемъ, къ на́мъ приходѧ́щъ, и҆ лꙋка́выми на́съ и҆ скве́рными стрѣлѧ́ющъ помышле́нми: ꙗ҆́кѡ да ѿ лѣ̑ности мл҃и́твою тогда̀ на́нь не воѡрꙋжи́вшесѧ, со скве́рными помышле́нми ѹ҆снꙋ́вше, сквє́рна и҆ сѡ́нїѧ и҆мѣ̑ти бꙋ́демъ.
р҃д. Є҆́сть и҆з̾ дꙋхѡ́въ предите́ча нарица́емь, ѿ сна̀ на́съ а҆́бїе прїе́млющъ, и҆ первомы́слїе на́ше ѡ҆сквернѧ́ющъ. Дава́й днѐ твоегѡ̀ нача̑тки гдⷭ҇ви: предварѧ́ющагѡ бо бꙋ́дꙋтъ. Досто́йно слы́шанїѧ сло́во, дѣ̑латель и҆зрѧ́днѣйшъ сказа̀ мнѣ̀: ѿ са́магѡ бо, речѐ, ѹ҆́тра, всѐ моѐ тече́нїе дне́вное предсвѣ̑мъ.
р҃є. Мнѡ́га сꙋ́ть и҆ бл҃гоче́стїѧ и҆ поги́бели пꙋтешє́ствїѧ: тѣ̑мже мно́жицею є҆ди́номꙋ сопротивлѧ́ющїйсѧ, дрꙋго́мꙋ и҆́скреннѣ споспѣ̑шествꙋетъ: и҆ ѻ҆бои́хъ ра́зꙋмъ се́й є҆́сть гдⷭ҇ꙋ бл҃гоꙋго́денъ.
р҃ѕ. Бо́рютъ ѹ҆́бѡ на́съ бѣ̑сове ѡ҆ слꙋча́ющихсѧ на́мъ и҆скꙋше́нїихъ, и҆лѝ рещѝ (что̀) и҆лѝ содѣ̑ѧти безмѣ̑стно: и҆ є҆гда̀ не возмо́гꙋтъ, то̀ ти́хѡ пристꙋ́плше, го́рдостно на́мъ бл҃годаре́нїе ко бг҃ꙋ ѻ҆́тай влага́ютъ.
р҃з. Гѡ́рнѧѧ ѹ҆́бѡ мꙋ́дрствовавшїи разлꙋча́ющесѧ, горѣ̀ ча́стнѣ восхо́дѧтъ: а҆ и҆́же дѡ́лнѧѧ, ни́зꙋ напроти́въ и҆́дꙋтъ: разлꙋча́ющихсѧ бо, ничто́же про́чее посре́дственно стои́тъ. Є҆ди́но и҆з̾ созда́нїй во и҆но́мъ а҆ не въ себѣ̀ само́мъ є҆́же бы́ти прїѧ́тъ: и҆ чꙋ́до є҆́сть, ка́кѡ кромѣ̀ тогѡ̀ въ не́мже є҆́же бы́ти прїѧ́тъ, состоѧ́тисѧ ѡ҆бы́че.
р҃и. Бл҃гочести̑выѧ ѹ҆́бѡ дщє́ри, ма́тєри ражда́ютъ: ма́тєри же, гдⷭ҇ь: и҆ на сопроти́вныхъ, предрече́ннымъ пра́виломъ ѡ҆предѣли́ти, нѣ̑сть непремꙋ́дро. Боѧзли́въ на бра́нь да не и҆схо́дитъ, мѡѷсе́й, па́че же бг҃ъ повелѣва́етъ: да не ка́кѡ бꙋ́детъ послѣ̑днѧѧ пре́лесть дꙋшѝ, па́че пе́рвагѡ паде́нїѧ тѣлеснагѡ и҆ влѣ̑потꙋ.
Свѣ̑тъ ѹ҆́бѡ всѣ̑хъ тѣле́сныхъ чле́нѡвъ, сꙋ́ть чꙋ́вственнїи ѻ҆́чи: свѣ̑тъ же мы́сленъ добродѣ̑телей бж҃е́ственныхъ, є҆́сть разсꙋжде́нїе.
[Статия 8]
Ѡ҆ разсꙋжде́нїи бл҃горазсꙋжда́емѣмъ.
р҃ѳ. И҆́мже ѻ҆́бразомъ жела́етъ є҆ле́нь пали́мь во́дъ, та́кѡ ѿ и҆́нѡкъ жела́емо є҆́сть, бжⷭ҇твенныѧ и҆ бл҃гі́ѧ во́ли постиже́нїе: не то́чїю же, но и҆ срастворе́нныѧ: є҆ще́ же и҆ сопроти́вныѧ позна́нїе: ѡ҆ ни́хже мно́го на́мъ вои́стиннꙋ є҆́сть сло́во сїѐ и҆ неꙋдобьсказа́емо: и҆ кі̑ѧ ѹ҆́бѡ и҆з̾ дѣ̑лъ на́шихъ неѿло́жнѣ дѡ́лжни сꙋ́ть быва́ти, и҆ всѧ́кагѡ пожда́нїѧ скорѣ̑е, по гл҃ющемꙋ: го́ре ѿлага́ющемꙋ де́нь ѿ днѐ, и҆ вре́мѧ ѿ вре́мене: ка̑ѧ же напроти́въ, съ кро́тостїю и҆ разсмотре́нїемъ, ꙗ҆́коже совѣ̑тꙋетъ рекі́й: со ѹ҆правле́нїемъ быва́етъ бра́нь: и҆ па́ки: всѧ̑ бл҃гоѻбра́знѡ и҆ по чи́нꙋ да быва́ютъ: нѣ̑сть бо нѣ̑сть приклю́чшихсѧ (каковы́хлибо) такѡва́ѧ неꙋдоб̾разсꙋжда́ємаѧ скорѣ̑е ѹ҆до́бь разсꙋди́ти: поне́же и҆ бг҃оно́сный ѻ҆́нъ, и҆ дх҃а въ себѣ̀ гл҃юща и҆мѣ̑вый, ѡ҆ се́мъ мно́жицею ꙗ҆влѧ́етсѧ молѧ́сѧ: и҆ ѻ҆вогда̀ ѹ҆́бѡ гл҃ѧ наꙋчи́ мѧ твори́ти во́лю твою̀, ты̀ є҆сѝ бг҃ъ мо́й: ѻ҆вогда́ же па́ки: наста́ви мѧ̀ на и҆́стинꙋ твою̀: и҆ па́ки: скажи́ ми гдⷭ҇и пꙋ́ть, во́ньже пойдꙋ̀, ꙗ҆́кѡ къ тебѣ̀ ѿ всѧ́кагѡ попече́нїѧ жите́йска и҆ стра́сти, дꙋ́шꙋ мою̀ взѧ́хъ и҆ возвы́сихъ.
р҃і. Є҆ли́цы во́лю гдⷭ҇ню ѹ҆вѣ̑дѣти восхотѣ̑ша, въ себѣ̀ ѹ҆мре́ти до́лжни сꙋ́ть: (тѣ̑мже са́мѣхъ себѐ ѿрица́юще:) вѣ̑рою ѹ҆́бѡ и҆ нелꙋка́вною простото́ю помоли́вшесѧ, и҆ дꙋ́шы ѻ҆тє́цъ и҆лѝ бра́тїй, со смире́нїемъ и҆ несꙋмнѣ̑ннымъ се́рдцемъ вопроси́вше, ꙗ҆́кѡ ѿ бж҃їихъ ѹ҆́стъ совѣ̑тꙋємаѧ ѿ ни́хъ да прїе́млютъ: а҆́ще и҆ проти̑вна своемꙋ̀ и҆́хъ ра́зꙋмꙋ речє́ннаѧ сꙋ́ть, а҆́ще и҆ не ѕѣлѡ̀ дх҃ѡ́вни вопроша́емїи сꙋ́ть: нѣ̑сть бо непра́веденъ бг҃ъ, дꙋ́шы вѣ̑рою и҆ неѕло́бїемъ себѐ бли́жнѧгѡ совѣ̑тꙋ и҆ сꙋдꙋ̀ смири́вшыѧ прелсти́ти: а҆́ще и҆ не слове́сни вопроше́ннїи сꙋ́ть, но гл҃ѧй невеще́ственъ є҆́сть и҆ неви́димь. Мно́га смиренномꙋ́дрїѧ и҆спо́лнени сꙋ́ть, предрече́ннымъ на́ми без̾ сꙋмнѣ̑нїѧ ходѧ́щїи пра́виломъ: а҆́ще бо и҆ во ѱалти́ри гана́нїе своѐ нѣ̑кто ѿверза́ше, коли́кѡ непщꙋ́ете слове́снꙋ ѹ҆мꙋ̀, и҆ дꙋшѝ ѹ҆́мнѣй бездꙋ́шна ра́знствовати провѣща́нїѧ.
ра҃і. Мно́зи не ѹ҆̀ соверше́ннагѡ сегѡ̀ и҆ ле́гкагѡ бл҃га предрече́ннагѡ ѿ самоꙋго́дїѧ дости́гшїи, но са́ми ѿ себѐ и҆ въ себѣ̀ гдⷭ҇ви бл҃гоꙋго́дное пости́гнꙋти покꙋси́вшїисѧ, разли̑чна на́мъ ѕѣлѡ̀ и҆ мнѡ́жайша ꙗ҆̀же ѡ҆ се́мъ непщева̑нїѧ сказа́ша.
рв҃і. Ѿста́виша нѣ̑цыи и҆з̾ соиспыта́телей ѿ всѧ́кагѡ пристра́стїѧ по́мыслъ сво́й, ѡ҆ є҆ди́нѣхъ и҆ дрꙋги́хъ совѣ̑тѣхъ дꙋшѝ (своеѧ̀): гл҃ю же покꙋша́ющемсѧ, и҆ вопрекѝ глаго́лющемъ: и҆ на́гъ ѹ҆́мъ сво́й ѿ во́ли своеѧ̀ съ горѧ́щимъ моле́нїемъ на ѹ҆речє́нны дни̑ предста́вивше гдⷭ҇ви, позна́нїе во́ли є҆гѡ̀ полꙋчи́ша: и҆лѝ ѹ҆мꙋ̀ ѹ҆́мнꙋ ѹ҆́мнѣ съ на́шимъ ѹ҆мо́мъ собесѣ̑довавшꙋ, и҆лѝ є҆ди́номꙋ ѻ҆́номꙋ помышле́нїю соверше́ннѣ и҆з̾ дꙋшѝ и҆стреби́вшꙋсѧ.
рг҃і. И҆́ни ѿ припослѣ̑довавшїѧ начина́нїю ѻ҆́номꙋ ско́рби и҆ расточе́нїю сїю̀ ве́щь бж҃е́ственнꙋ бы́ти постиго́ша, по ре́кшемꙋ: восхотѣ̑хомъ прїитѝ къ ва́мъ, и҆ є҆ди́ною и҆ два́жды, и҆ возбранѝ на́мъ сатана̀.
рд҃і. И҆́ни проти́вное па́ки: ѿ неча́ѧннагѡ въ ве́щи ѻ҆́нѣй споспѣ̑шества, сїѐ бг҃ꙋ бл҃гопрїѧ́тно бы́ти ѡ҆щꙋти́ша: возглаго́лавше ѻ҆́но, є҆́же всѧ́комꙋ произволѧ́ющемꙋ бл҃го́е, споспѣ̑шествꙋетъ бг҃ъ.
рє҃і. И҆́же бг҃а въ себѣ̀ просвѣще́нїемъ стѧжа́вый, то и҆ ѡ҆ спѣшнопонꙋжда́ющихъ, и҆ ѡ҆ пождава́ющихъ ве́щехъ, вторы́мъ ѻ҆́бразомъ не ѹ҆́бѡ и҆ вре́менемъ и҆звѣщава́тисѧ ѡ҆бы́че.
рѕ҃і. Є҆́же ѹ҆сꙋмнѣва́тисѧ ѡ҆ сꙋжде́нїихъ, и҆ без̾извѣще́ннꙋ на мно́зѣ пребыва́ти, непросвѣще́нны и҆ славолюби́вы дꙋшѝ зна́менїе є҆́сть.
рз҃і. Нѣ̑сть бг҃ъ непра́веденъ, ꙗ҆́кѡ со смире́нїемъ толкꙋ́щымъ затворѧ́ти.
ри҃і. Ра́зꙋмъ во всѣ̑хъ и҆́щетсѧ ѿ гдⷭ҇а, и҆ въ спѣшнопонꙋжда́ющихъ, и҆ во ѿлага́тисѧ до́лжныхъ сꙋ́щихъ: всѧ̑ бо чи̑ста пристра́стїѧ и҆ всѧ́кїѧ скве́рны, сво́йственнѣ гдⷭ҇а ра́ди, а҆ не и҆но́гѡ ра́ди чесогѡ̀ быва̑ющаѧ, а҆́ще и҆ не всѧ́кѡ бла̑га, но ѻ҆ба́че во бла́го на́мъ вмѣнє́на бꙋ́дꙋтъ.
рѳ҃і. Вы́ше на́съ бо и҆спыта́нїе, не безбѣ̑денъ и҆́мать коне́цъ. Неизрече́нъ є҆́сть ѿ на́съ гдⷭ҇ень сꙋ́дъ: мно́жицею бо во́лю свою̀ смотри́телнѣ ѿ на́съ ѹ҆таи́ти хо́щетъ, вѣ̑дый ꙗ҆́кѡ и҆ позна́вше тꙋ̀, преслꙋ́шали бы́хомъ є҆го̀, и҆ про́чее мно́гшы ꙗ҆̀звы прїи́мемъ.
р҃к. Свобо́дно є҆́сть пра́во се́рдце разли́чїѧ веще́й, безбѣ̑днѣ пла́вающо въ кораблѝ неѕло́бїѧ.
рк҃а. Сꙋ́ть мꙋ́жєственны дꙋ́ши, раче́нїемъ (бж҃їимъ) и҆ смире́нїемъ се́рдца, на дѣ́ланїѧ ꙗ҆̀же вы́ше себѐ покꙋша́ющесѧ: и҆ сꙋ́ть гордєли́ва сердца̀, то́жде содѣва̑юща: ра́зꙋмъ бо мно́жицею врагѡ́мъ на́шымъ є҆́сть, на ꙗ҆̀же вы́ше си́лы на́съ под̾ꙋщава́ти: да ѻ҆́нѣми вознеради́вше, и҆ ѿ тѣ̑хъ ꙗ҆̀же по си́лѣ ѿпаде́мъ, и҆ сотвори́мъ себѐ смѣ̑хъ врагѡ́мъ на́шымъ велича́йшъ.
рк҃в. Ви́дѣхъ и҆ не́мощны дꙋ́шы и҆ тѣлеса̀ мно́жества ра́ди согрѣше́нїй на ꙗ҆̀же вы́ше себѐ покꙋси́вшесѧ, и҆ не стерпѣ̑вшѧ: и҆́мже а҆́зъ коли́чествомъ смире́нїѧ, а҆ не трꙋдѡ́въ сказа́хъ, покаѧ́нїе ѿ бг҃а сꙋди́мо быва́ти.
рк҃г. Ѻ҆вогда̀ воспита́нїе, послѣ̑днихъ ѕѡ́лъ вино́вно быва́етъ: ѻ҆вогда̀ и҆ сопребыва́нїе: ѻ҆ба́че мно́жицею и҆ развраще́ннаѧ дꙋша̀, самодово́лна є҆́сть себѣ̀ на поги́бель: ѿлꙋчи́выйсѧ ѿ двою̀ ѻ҆́ною, и҆ ѿ тре́тїѧгѡ не́гли и҆зба́висѧ: тре́тїе же и҆мѣ̑ѧй, на всѧ́комъ мѣ̑стѣ непотре́бенъ є҆́сть: нико́е же бо мѣ̑сто, нб҃сѐ ѹ҆твержде́нше є҆́сть.
рк҃д. Къ ѕлохо́тнѣ ѹ҆̀бо съ на́ми ра́тꙋющымсѧ невѣ́рнымъ и҆лѝ ѕловѣ́рнымъ, по пе́рвомъ и҆ второ́мъ наказа́нїи преста́нимъ: къ хотѧ́щымъ же и҆́стинѣ наꙋчи́тисѧ, до́брое творѧ́ще до конца̀, не ѹ҆ныва́имъ: ѻ҆ба́че по ѹ҆твержде́нїю се́рдца на́шегѡ, (и҆) ѻ҆боѧ̑ ѹ҆потреби́мъ.
рк҃є. Безслове́сенъ ѕѣлѡ̀ є҆́сть, и҆́же вы́ше є҆стества̀ во ст҃ы́хъ слы́шай добродѣ̑тєли, и҆ себѐ ѿчаѧва́ѧйсѧ: па́че бо и҆з̾ двою̀ є҆ди́номꙋ тѧ̀ и҆зрѧ́днѣйше наказꙋ́ютъ: и҆лѝ къ ре́вности воздвиза́ютъ прпⷣбнымъ мꙋ́жествомъ, и҆лѝ къ мно́гомꙋ себѐ самогѡ̀ позна́нїю, и҆ сꙋ́щїѧ въ тебѣ̀ не́мощи ꙗ҆вле́нїю ѡ҆братѧ́тъ, трепрпⷣбнымъ смире́нїемъ.
[Статия 9]
рк҃ѕ. Сꙋ́ть нечи́сти лꙋка́выхъ лꙋка́внши бѣ̑си, и҆́же грѣ̑хъ на́мъ содѣ̑ловати є҆ди̑нѣмъ не совѣ̑тꙋютъ, но ѻ҆́бщники на́мъ на ѕло̀ сїѐ и҆ и҆нѣ̑хъ и҆мѣ̑ти совѣ̑тꙋютъ, да лю́тшꙋ на́мъ мꙋ́кꙋ сотворѧ́тъ. Ви́дѣхъ ѻ҆бы́чаю лꙋка́вꙋ ѿ є҆ди́нагѡ наꙋчи́вшасѧ дрꙋга́го, но ѻ҆ба́че наꙋчи́вый ѹ҆́бѡ въ соѡщꙋще́нїе прише́дъ, ка́ѧтисѧ нача́тъ, и҆ ѿ ѕла̀ тогѡ̀ преста̀: дѣ̑ланїемъ же ѹ҆ченика̀ тогѡ̀, не крѣ̑пко бы́сть покаѧ́нїе є҆гѡ̀.
рк҃з. Мно́го вои́стиннꙋ мно́го, и҆ неꙋдобьпостиза́емо є҆́сть дꙋхѡ́въ си́хъ лꙋка́вство, и҆ ма́лѣми ви́димо: непщꙋ́ю же, нижѐ ма́лѣми всѐ: ка́кѡ наслажда́ющесѧ ѹ҆́бѡ и҆ насыща́ющесѧ, бди́мъ тре́звеннѣ: постѧ́щесѧ же и҆ ѕлостра́ждꙋще, сно́мъ ѡ҆каѧ́ннѣ низво́димсѧ: безмо́лвствꙋюще, ѡ҆жесточава́емсѧ, а҆ сопребыва́юще ѹ҆милѧ́емсѧ: гла́дни сꙋ́ще, во снѣ̑хъ и҆скꙋша́еми быва́емъ: а҆ насыща́ющесѧ, неискꙋша́еми пребыва́емъ: во а҆́лчбѣ, мра́чни нѣ̑какови и҆ без̾ ѹ҆миле́нїѧ быва́емъ: въ вїнопи́тїи же, ра́достни и҆ ѹ҆добоꙋми́лни. Ѡ҆ си́хъ могі́й ѡ҆ гдⷭ҇ѣ просвѣти́тъ непросвѣще́нныхъ, мы́ бо непросвѣще́нни ѡ҆ таковы́хъ є҆смы̀: ѻ҆ба́че ѻ҆́но гл҃емъ, ꙗ҆́кѡ не всегда̀ ѿ бѣсѡ́въ таковы́й прело́гъ быва́етъ: но ѻ҆вогда̀ и҆ ѿ срастворе́нїѧ да́ннагѡ мѝ сегѡ̀, и҆ ѡ҆бѧза́вшагѡсѧ мнѣ̀ ка́кѡ не вѣ̑мъ, скве́рнагѡ и҆ ласкосе́рдагѡ дебе́лства.
рк҃и. Ѡ҆ неꙋдобьразсꙋжда́емѣмъ се́мъ приключа́ющемсѧ предрече́нныхъ премѣне́нїй, чи́стѣ и҆ смире́ннѣ гдⷭ҇а ѹ҆мо́лимъ: и҆ а҆́ще по моле́нїи и҆ вре́мени сегѡ̀ та́кожде ѡ҆брѧ́щемъ дѣ̑йствꙋющо быва́емое, то̀ позна́емъ: ꙗ҆́кѡ не ѿ бѣсѡ́въ, но ѿ є҆стества̀ є҆́сть быва́емое: мно́жицею же бж҃е́ственно смотре́нїе и҆ проти́вными бл҃годѣ̑телствовати на́съ хо́щетъ, всѣ̑ми возноше́нїе на́ше востѧга́ющо.
рк҃ѳ. Лю́то ѹ҆̀бо є҆́сть ю҆́же ѡ҆ сꙋдба́хъ глꙋбинꙋ̀ любопы́тствовати, въ корабли́ бо возноше́нїѧ любопы́тнїи пловꙋ́тъ: гл҃ати бо ѻ҆ба́че подоба́етъ нѣ́каѧ, не́мощи ра́ди мно́гихъ.
р҃л. Вопроси́лъ є҆́сть нѣ̑кто нѣ̑коего ѿ разꙋмѣва́ти могꙋ́щихъ: чесогѡ̀ ра́ди [пред]вѣ̑дый бг҃ъ нѣ̑кихъ падє́нїѧ, тѣ̑хъ дарова́нми и҆ чꙋдесы̀ ѹ҆краси́лъ є҆́сть: ѻ҆́нъ же гл҃етъ, да и҆ про́чихъ дх҃о́вныхъ ѹ҆тверди́тъ, и҆ самовла́стїе пока́жетъ, и҆ без̾ѿвѣ̑тны на сꙋдѣ̀ ѻ҆́нѣмъ па́дшыѧ сотвори́тъ.
рл҃а. зако́нъ ѹ҆́бѡ несоверше́нъ, внемлѝ, гл҃етъ, себѣ̀. Гдⷭ҇ь же ꙗ҆́кѡ пресоверше́нъ и҆ бра́тнее на́мъ и҆справле́нїе заповѣ̑далъ є҆́сть, ре́къ: а҆́ще согрѣши́тъ бра́тъ тво́й, и҆ прѡ́чаѧ. А҆́ще ѹ҆̀бо чи́сто є҆́сть ѡ҆бличе́нїе твоѐ и҆ смире́нно, па́че же напомина́нїе: то̀ ѻ҆́но гдⷭ҇не твори́ти да не ѿрече́шисѧ, и҆ па́че же въ прїе́млющихъ: а҆́ще ли же не ѹ҆̀ (къ семꙋ̀) дости́глъ є҆сѝ, то̀ понѐ зако́ннѣй прилѣжѝ слꙋ́жбѣ.
рл҃в. Не ѹ҆дивлѧ́йсѧ и҆ прелюбе́зныхъ твои́хъ, ѡ҆ ѡ҆бличе́нїихъ враждꙋ́ющихъ на тѧ̀ зрѧ̀: бѣсѡ́въ бо сꙋ́ть ѻ҆рꙋ̑дїѧ ле́гшїи, и҆ па́че же во вразѣ̑хъ и҆́хъ.
рл҃г. Ѹ҆дивлѧ́тисѧ мѝ ѡ҆ є҆ди́номъ и҆з̾ тѣ̑хъ ꙗ҆̀же въ на́съ ѕѣлѡ̀ нахо́дитъ: ка́кѡ на добродѣ̑тєли и҆ бг҃а всеси́лнаго, и҆ а҆́гг҃єлъ и҆ ст҃ы́хъ въ споспѣ̑шество и҆мꙋ́ще: на сопроти̑внаѧ же, лꙋка́ваго и҆ є҆ди́наго бѣ̑са: ѹ҆добопрекло́ннѣе и҆ скорѣ̑е на стра̑сти преклонѧ́емсѧ: ѡ҆ се́мъ ѹ҆́бѡ а҆́зъ ѡ҆па́снѣ гл҃ати не могꙋ̀, нижѐ хощꙋ̀.
рл҃д. Всѧ̑ ѹ҆́бѡ бы̑вшаѧ а҆́ще та́кѡ ꙗ҆́коже бы́ша є҆стество́мъ сꙋ́ть, то̀ ка́кѡ и҆ ѻ҆́бразъ є҆́смь бж҃їй, и҆ съ бре́нїемъ си́мъ смѣшава́юсѧ, ꙗ҆́коже гл҃етъ вели́кїй григо́рїй; А҆́ще ли же и҆́накѡ ка́кѡ нѣ́каѧ и҆з̾ созда́нныхъ па́че є҆́же бы́ша сꙋ́ть, то̀ всѧ́кѡ сро́дства своегѡ̀ несы́тнѣ жела́ютъ: всѧ́кое нѣ̑кто ѹ҆хищре́нїе да ѹ҆потреби́тъ, да та́кѡ рекꙋ̀, ꙗ҆́кѡ да на прⷭ҇то́лѣ бж҃їи бре́нїе сїѐ возне́съ посади́тъ: никто́же ѹ҆̀бо къ восхожде́нїю ѻ҆́номꙋ да и҆звинѧ́етсѧ, пꙋ́ть бо ѻ҆́нъ и҆ две́рь ѻ҆́на ѿве́рзесѧ.
рл҃є. Слꙋ́шанїе ѹ҆́бѡ и҆справле́нїй дх҃о́вныхъ ѻ҆тє́цъ, ѹ҆́мъ и҆ дꙋ́шꙋ къ ре́вности возбꙋжда́ютъ: слꙋ́шанїе же ѹ҆чи́телское, къ подража́нїю ревни́телей ѻ҆бы́че наставлѧ́ти.
рл҃ѕ. Разсꙋжде́нїе є҆́сть тмѣ̀ свѣти́лникъ, заблꙋжде́нныхъ возвраще́нїе, слѣпотствꙋ́ющихъ просвѣще́нїе. Разсꙋди́теленъ є҆́сть, здра́вїѧ ѡ҆брѣ̑тникъ, и҆ недꙋ́га потреби́тель.
рл҃з. По двою̀ ѻ҆́бразꙋ всѝ глаго́лемїи ѡ҆ ма́лыхъ ве́щехъ ѹ҆дивлѧ́ющїисѧ сїѐ страда́ти ѡ҆быко́ша: и҆лѝ невѣ̑жества ра́ди послѣ̑днѧгѡ, и҆лѝ ра́зꙋмомъ смиренномꙋ́дрїѧ та̑ ꙗ҆̀же сꙋ́ть бли́жнѧгѡ велича́юще и҆ возносѧ́ще.
рл҃и. Подвиза́имсѧ не то́чїю боро́ти но и҆ ра́товати бѣ̑сы: занѐ ѻ҆́нъ ѹ҆́бѡ, ѻ҆вогда̀ ѹ҆́бѡ бїе́тъ, ѻ҆вогда́ же бїе́мь быва́етъ: сі́и же, всегда̀ врага̀ (своего̀) го́нѧтъ.
рл҃ѳ. Побѣди́вый стра̑сти, ѹ҆ѧзвлѧ́етъ бѣ̑сы: стра̑сти ѹ҆́бѡ притворѧ́ѧсѧ и҆мѣ̑ти, си́мъ же прелща́ѧ врагѝ своѧ̑, и҆ пребыва́ѧ нера́тꙋемь ѿ ни́хъ. Ѡ҆безче́щенъ бы́сть нѣ̑когда нѣ̑кїй и҆з̾ бра́тїй, и҆ ѿню́дъ ни подви́гнꙋвсѧ се́рдцемъ, во ѹ҆мѣ̀ помоли́всѧ: та́же пла́катисѧ ѡ҆ безче́стїи нача́тъ притво́рною стра́стїю безстра́стїе своѐ ѹ҆таи́въ. И҆́нъ и҆з̾ бра́тїй ѡ҆ предсѣда́нїи сы́й ѿню́дъ нежела́теленъ, ѡ҆ то́мъ болѣ̑знꙋющаго себѐ притвори́лъ є҆́сть. Ка́кѡ же тѝ скажꙋ̀ чистотꙋ̀ ѻ҆́нагѡ, въ блꙋди́лище мнѣ̑нїемъ грѣха̀ ра́ди, вскочи́вшагѡ, блꙋдни́цꙋ же къ по́стничествованїю и҆сто́ргшагѡ. Нѣ̑коемꙋ па́ки и҆з̾ безмо́лвствꙋющихъ гро́здъ нѣ̑кто принесѐ ѕѣлѡ̀ ра́нѡ: ѻ҆́нъ же по ѿше́ствїи прине́сшагѡ, ско́рымъ нѣ̑кимъ ѹ҆стремле́нїемъ, нежела́телнѣ того̀ снѣ̑де, бѣсовѡ́мъ чревоѡб̾ѧ́стлива себѐ ꙗ҆влѧ́ѧ. И҆́нъ па́ки ма̑ла вѣ́твїѧ погꙋби́въ, ве́сь де́нь творѧ́ше себѐ болѣ̑знꙋюща. Мно́га такѡвы́мъ трезвѣ̑нїѧ потре́ба є҆́сть, да не ка́кѡ рꙋга́тисѧ покꙋси́вшесѧ, на порꙋга́нїе (са́михъ себѐ) ѡ҆конча́тъ: сі́и бо вои́стиннꙋ сꙋ́ть ѡ҆ ни́хже нѣ̑кто речѐ, ꙗ҆́кѡ лестцы̀ и҆ и҆́стинни.
[Статия 10]
р҃м. А҆́ще кто̀ тѣ̑ло поста́вити хо́щетъ чи́сто гдⷭ҇еви, и҆ се́рдце чи́сто показа́ти є҆мꙋ̀, да соблюде́тъ безгнѣ̑вїе и҆ воздержа́нїе: без̾ си́хъ бо, ве́сь трꙋ́дъ на́шъ неполе́зенъ є҆́сть.
рм҃а. Ꙗ҆коже разли́чни сꙋ́ть ѻ҆че́съ си́хъ свѣ̑тове, та́кѡ мнѡ́га и҆ разли̑чна сꙋ́ть мы́сленнагѡ сл҃нца быва̑ющаѧ въ дꙋшѝ ѡ҆сѣнє́нїѧ: занѐ и҆́но ѹ҆́бѡ є҆́сть є҆́же тѣле́сными слеза́ми, а҆ и҆́но є҆́же дꙋше́вными: и҆́но є҆́же тѣле́сныма ѻ҆чи́ма, а҆ и҆́но є҆́же ѹ҆́мныма: и҆ и҆́но є҆́же ѿ слꙋ́ха сло́ва, а҆ и҆́но своево́лнѣ (са́мо ѡ҆ себѣ̀) дви́жимое въ дꙋшѝ ра́дованїе: и҆́но є҆́же ѿ безмо́лвїѧ, и҆ и҆́но є҆́же ѿ послꙋша́нїѧ: кромѣ̀ всѣ̑хъ си́хъ, и҆́но є҆́сть ѻ҆́но ѹ҆́жасомъ ѹ҆́мъ во свѣ̑тѣ хрⷭ҇тꙋ̀ представлѧ́ющее неизрече́ннѣ и҆ несказа́ннѣ.
рм҃в. Сꙋ́ть добродѣ̑тєли, и҆ сꙋ́ть ма́тєри добродѣ̑телей: разꙋ́мный ѹ҆́бѡ ѡ҆ стѧжа́нїи ма́терей па́че подвиза́етсѧ. Ма́терей ѹ҆́бѡ, са́мъ бг҃ъ сво́йственнымъ дѣ̑йствомъ ѹ҆чи́тель є҆́сть: дще́рей же, мно́жайши.
рм҃г. Во́нмемъ, да не ка́кѡ скꙋ́дость наслажде́нїѧ, многосло́вїемъ наполнѧ́емъ: дѣ̑ло бо бездꙋ́шныхъ є҆́сть сїѧ̀ ве́щь, ꙗ҆́коже и҆ сопроти́вное.
рм҃д. Ви́дѣхъ дѣ̑латєль по нѣ̑коемꙋ ѡ҆бстоѧ́нїю ма́лѡ ѹ҆тро́бѣ посла́бившихъ, скорѣ̑е же мꙋ́жественнїи сі́и всено́щнымъ стоѧ́нїемъ ѡ҆каѧ́нницꙋ сїю̀ ѹ҆мꙋ́чиша, и҆ насыще́нїѧ про́чее съ ра́достїю ѿвраща́тисѧ наказа́ша.
рм҃є. Бо́ретсѧ ѹ҆́бѡ сребролю́бїѧ бѣ̑съ съ нестѧжа́телми: є҆гда́ же невозмо́жетъ, тогда̀ про́чее ни́щыѧ въ винꙋ̀ предлага́ѧ, невеще́ствєнныѧ, веще́ствєнны па́ки ѹ҆вѣща̀ бы́ти.
рм҃ѕ. Печа́лꙋюще ѹ҆̀бо, за́повѣдь гдⷭ҇ню ꙗ҆́же къ петрꙋ̀ помина́юще не преста́нимъ, ѡ҆ є҆́же проща́ти седмдесѧ́тъ кра́тъ седмери́цею согрѣша́ющемꙋ: є҆́же бо и҆но́мꙋ заповѣ̑да, то̀ всѧ́кѡ и҆ са́мъ мно́гѡ мно́жае сотвори́тъ. Возносѧ́щесѧ же, вкꙋ́пѣ ве́сь (гл҃ъ) ре́кшагѡ не преста́нимъ помышлѧ́юще: и҆́же соверши́тъ ве́сь зако́нъ дх҃о́вный, согрѣши́тъ же во є҆ди́ной стра́сти, то́есть въ высокомꙋ́дрїи, бы́сть всѣ́мъ пови́ненъ.
рм҃з. Сꙋ́ть нѣ́каѧ дꙋхѡ́въ лꙋка́выхъ и҆ зави́дливыхъ ѹ҆строє́нїѧ, во́лею ѿ ст҃ы́хъ ѿходѧ̑ща, да не за непобѣди̑мыѧ бра̑ни винѡ́вна вѣнцє́въ стꙋжа́ємымъ бꙋ́дꙋтъ.
рм҃и. Бл҃же́ни ѹ҆́бѡ миротво́рцы, и҆ никто́же сопроти́въ глаго́лѧй: а҆́зъ же ви́дѣхъ и҆ враждотво́рцы бл҃жє́ны: два̑ нѣ́каѧ дрꙋ́гъ ко дрꙋ́гꙋ ѹ҆свое́нїе блꙋ́дническо стѧжа̑ла бѣ̑ста: и҆з̾ разꙋмѣва́телнѣйшихъ же мꙋ́жъ нѣ̑кїй и҆скꙋ́снѣйшъ, слꙋга̀ къ є҆ди́номꙋ и҆ дрꙋго́мꙋ не́нависти бы́сть: ко ѻ҆́номꙋ ѹ҆́бѡ сего̀ ѡ҆болгава́ѧ ꙗ҆́кѡ клеве́щꙋща є҆го̀, къ семꙋ́ же напроти́въ ѻ҆́наго подо́бнѣ: и҆ возмо́же премꙋ́дрый се́й бѣсѡ́въ ѕло́бꙋ человѣ̑ческимъ кова́рствомъ ѿрази́ти, и҆ не́нависть содѣ̑лати, блꙋ́дъ разорѧ́ющꙋ.
рм҃ѳ. Є҆́сть и҆́же за́повѣди ра́ди за́повѣдь разорѧ́ѧй: ви́дѣхъ ю҆́ныхъ по бг҃ꙋ къ себѣ̀ ѹ҆свое́нїе и҆мꙋ́щихъ, но ѻ҆ба́че вре́да ра́ди и҆нѣ̑хъ и҆ со́вѣсти, дрꙋ́гъ дрꙋ́га и҆звѣсти́вше, на вре́мѧ ѹ҆дали́стасѧ.
р҃н. Ꙗ҆коже проти̑вна сꙋ́ть бра́къ и҆ и҆схо́дъ, та́кѡ несогла̑сна сꙋ́ть горды́нѧ и҆ ѿча́ѧнїе: и҆ мо́щно є҆́сть ѿ нестрое́нїѧ бѣсѡ́въ, ѻ҆боѧ̀ вкꙋ́пѣ ѹ҆ви́дѣти.
рн҃а. Сꙋ́ть нѣ̑цыи и҆з̾ нечи́стыхъ бѣсѡ́въ, толкова́нїе бж҃е́ственныхъ писа́нїй въ нача́лѣхъ на́мъ сказꙋ́юще: сїе́ же наипа́че ѻ҆бы́чай и҆́мꙋтъ твори́ти въ сердца́хъ тщесла́вникѡвъ, и҆ па́че же внѣ̑шнемꙋ наказа́нїю ѡ҆бꙋче́ныхъ: да пома́лꙋ тѣ̑хъ прелща́юще, въ є҆́рєси и҆ хꙋлы̑ сведꙋ́тъ. Ѿ быва́ющагѡ въ дꙋшѝ во вре́мѧ сказа́нїѧ сегѡ̀, смꙋще́нїѧ, и҆ ра́дости разлїѧ́нны и҆ безче́стны, бг҃осло́вїе бѣсѡ́въ си́хъ, па́че же бг҃обо́рство позна́емъ.
рн҃в. Чи́нъ ѹ҆́бѡ и҆ нача́ло, нѣ́каѧ же и҆ коне́цъ ѿ сотво́ршагѡ бы̑вшаѧ прїѧ́ша: добродѣ̑тель же безконе́ченъ коне́цъ и҆́мать: всѧ́кїѧ бо, гл҃етъ ѱалмопѣ̑вецъ, кончи́ны ви́дѣхъ коне́цъ, широка́ же и҆ безконе́чна є҆́сть за́повѣдь твоѧ̀ ѕѣлѡ̀: а҆́ще по́йдꙋтъ нѣ̑цыи до́бри дѣ̑латєли, ѿ си́лы дѣ̑ѧтелства въ си́лꙋ видѣ̑нїѧ: и҆ (а҆́ще) любы̀ никогда́же престае́тъ: и҆ (а҆́ще) гдⷭ҇ь сохрани́тъ вхо́дъ стра́ха твоегѡ̀, и҆ и҆схо́дъ любвѐ твоеѧ̀, то̀ ѹ҆̀бо безконе́ченъ є҆́сть коне́цъ тоѧ̀: въ не́йже пред̾ꙋспѣва́юще, никогда́же преста́немъ: ни въ настоѧ́щемъ, ни въ бꙋ́дꙋщемъ вѣ̑цѣ: свѣ̑томъ свѣ̑тъ ра́зꙋма прїе́млюще. А҆́ще и҆ стра́нно нѣ̑какѡ мнѡ́зѣмъ гл҃емое, ѻ҆ба́че по предгл҃анномꙋ на́ми ѹ҆каза́нїю, ѽ бл҃же́нне, нижѐ ѹ҆́мнаѧ ѻ҆́на сꙋщєства̀ а҆́зъ непред̾ꙋспѣѧ́тєлна бы́ти ре́клъ бы́хъ: но сла́вꙋ па́че къ сла́вѣ при́снѡ прїє́млюща, и҆ ра́зꙋмъ къ ра́зꙋмꙋ, ѡ҆предѣлѧ́ю.
рн҃г. Да не ѹ҆диви́шисѧ а҆́ще и҆ бла̑га на́мъ бѣ̑сове ѹ҆́мнѣ сопроти́въ глаго́лютъ: ра́зꙋмъ бо є҆́сть врагѡ́мъ на́шымъ чрез̾ сїѐ ѹ҆вѣща́ти на́съ, ꙗ҆́кѡ и҆ сердє́чнаѧ помышлє́нїѧ на̑ша вѣ̑дѧтъ.
рн҃д. Не хощѝ бы́ти го́рекъ сꙋдїѧ̀ сло́вомъ ѡ҆ вели́кихъ ѹ҆ча́щымъ, зрѧ̀ тѣ̑хъ ѡ҆ дѣ̑ѧтелствѣ лѣ̑ностншихъ пребыва́ющихъ: мно́жицею бо ѡ҆скꙋдѣ̑нїе дѣ̑ла, и҆спо́лнила є҆́сть ѹ҆че́нїѧ ѻ҆́нагѡ по́л̾за. Не всѝ всѧ́кѡ всѧ̑ ра́внѣ стѧжа́хомъ: занѐ въ нѣ̑кихъ ѹ҆́бѡ, сло́во, дѣ̑ла: во и҆нѣ̑хъ же напроти́въ, второ́е пе́рвагѡ превосхо́дитъ.
рн҃є. Ѕло́е ѹ҆́бѡ бг҃ъ не сотворѝ, нѝ содѣ̑телствова: прелсти́шасѧ же нѣ̑цыи, ре́кше є҆сте́ствєнны бы́ти нѣ̑кїѧ и҆з̾ страсте́й въ дꙋшѝ: не ѹ҆разꙋмѣ̑вше, ꙗ҆́кѡ состави́тєлнаѧ є҆стества̀ свѡ́йства, мы̀ на стра̑сти преложи́хомъ: си́рѣчь, є҆стество́мъ є҆́сть въ на́съ сѣ̑мѧ чадоро́дїѧ ра́ди, мы́ же претвори́хомъ то̀ на блꙋ́дъ: є҆стество́мъ є҆́сть ꙗ҆́рость въ на́съ на ѕмі́ѧ ѻ҆́наго, мы́ же ѹ҆потреблѧ́емъ тꙋ̀ на бли́жнѧго: в̾ на́съ є҆́сть ре́вность за є҆́же добродѣ̑телємъ ревнова́ти, мы́ же на ѕло́е ревнꙋ́емъ: є҆стество́мъ є҆́сть въ дꙋшѝ є҆́же сла́вы жела́ти, но вы́шнїѧ. Є҆стество́мъ є҆́же гордѣ̑тисѧ, но на бѣ̑сы: подо́бнѣ (и҆) ра́дость но гдⷭ҇а ра́ди и҆ бл҃годѣ̑лїѧ ра́ди бли́жнѧгѡ: прїѧ́хомъ и҆ ѕлопомнѣ̑нїе, но на врагѡ́въ дꙋшѝ прїѧ́хомъ жела́нїе пи́щи, а҆ не блꙋда̀.
рн҃ѕ. Нелѣ̑ностива дꙋша̀, воздви́же на сѧ̀ бѣ̑сы: ѹ҆мно́жившымсѧ же бра́немъ, ѹ҆мно́жишасѧ и҆ вѣнцы̀. Не ѹ҆ѧзвлѧ́емый ѿ сꙋпоста̑тъ, ѿню́дъ ѹ҆вѣнча́нъ не бꙋ́детъ: ѡ҆ слꙋча́ющихсѧ же паде́нїихъ не и҆знемога́ѧй, ѿ а҆́гг҃єлъ ꙗ҆́кѡ ра́тникъ похвале́нъ бꙋ́детъ.
[Статия 11]
рн҃з. Трѝ ѹ҆́бѡ нѣ̑кто но́щи въ землѝ сотвори́въ, ѡ҆живѐ во́всѧ: три́ же часы̀ побѣди́вый, не ѹ҆́мретъ про́чее.
рн҃и. А҆́ще по смотри́телнꙋ наказа́нїю, по восхо́дѣ свое́мъ въ на́съ, со́лнце ѻ҆́но позна̀ за́падъ сво́й, то̀ всѧ́кѡ положѝ тмꙋ̀ закро́въ сво́й, и҆ бы́сть но́щь: въ не́йже про́чее про́йдꙋтъ къ на́мъ, пре́жде ѿше́дшїи ди́вїи скѵ́мни, и҆ всѝ ѕвѣ̑рїе дꙋбра́внїи тернова́тыхъ страсте́й, рыка́юще восхи́тити сꙋ́щꙋю въ на́съ наде́ждꙋ: и҆ взыскꙋ́юще ѿ бг҃а, страсте́й пи́щꙋ себѣ̀, и҆лѝ помышле́нїемъ и҆лѝ дѣѧ́нїемъ. Возсїѧ̀ на́мъ, чрез̾ те́мное смире́нїе, па́ки со́лнце ѻ҆́но, и҆ къ себѣ̀ ѕвѣ̑рїе сі́и собра́шасѧ, и҆ въ ло́жахъ свои́хъ, си́рѣчь сластолюби́выхъ сердца́хъ лѧ́гꙋтъ, а҆ не в̾ на́съ: тогда̀ рекꙋ́тъ во бѣ̑сѣхъ, возвели́чилъ є҆́сть гдⷭ҇ь сотвори́ти съ ни́ми ми́лость па́ки: мы́ же къ ни́мъ: возвели́чилъ є҆́сть гдⷭ҇ь сотвори́ти съ на́ми: бы́хомъ веселѧ́щесѧ, вы́ же ѿгонѧ́еми. Сѐ гдⷭ҇ь сѣди́тъ на ѻ҆́блацѣ ле́гцѣ дꙋшѝ ѿню́дъ всѧ́кагѡ зе́мна жела́нїѧ возвы́сившейсѧ: и҆ прїи́детъ во є҆гѵ́петское се́рдце, пре́жде помраче́нное: и҆ потрѧсꙋ́тсѧ рꙋкотворе́ннїи і҆́дѡли, и҆ помышлє́нїѧ ѹ҆ма̀.
рн҃ѳ. А҆́ще хрⷭ҇то́съ ѿ и҆́рѡда тѣле́снѣ бѣ̑гаетъ, а҆́ще и҆ всѧ̑ могі́й, то̀ да наказꙋ́ютсѧ продерзли́вїи, не вмета́ти себѐ во и҆скꙋшє́нїѧ: не да́ждь бо, гл҃етъ, во смѧте́нїе ногѝ твоеѧ̀, и҆ не воздре́млетъ хранѧ́й тѧ̀ а҆́гг҃лъ.
р҃жⷭ҇. Сплета́етсѧ съ мꙋ́жествомъ киче́нїе, ꙗ҆́коже глаго́лемый смі́лажⷭ҇ъ съ кѷпарі́ссомъ.
рѯ҃а. Дѣ̑ло на́мъ да бꙋ́детъ непреста́нно, не про́стымъ помышле́нїемъ непщева́ти на́мъ ꙗ҆ково́либо стѧжа́ти бл҃го: но сего̀ ѡ҆па́снѣ и҆спытꙋ́юще сво́йство разсмотри́мъ, є҆́сть ли въ на́съ, и҆ тогда̀ ѿню́дъ ѡ҆скꙋдѣва́ющихъ себѐ разꙋмѣ̑ти и҆́мамы.
рѯ҃в. И҆спытꙋ́й и҆ страсте́й непреста́ннѡ зна́мєнїѧ, и҆ тогда̀ мно́га сꙋ̑ща въ тебѣ̀ ѹ҆разꙋмѣ̑еши, ꙗ҆̀же въ недꙋ́зѣхъ ѹ҆̀бо сꙋ́ще распозна́ти не мо́жемъ, и҆лѝ не́мощи ра́ди, и҆лѝ глꙋбока̀ ра́ди предпрїѧ́тїѧ.
рѯ҃г. Предложе́нїе сꙋ́дитъ бг҃ъ: въ тѣ̑хъ же ꙗ҆̀же сꙋ́ть по си́лѣ, (и҆) дѣ̑ланїѧ, человѣколю́бнѣ ѻ҆ба́че, и҆́щетъ. Вели́къ ѹ҆́бѡ є҆́сть, и҆́же ничи́мже по си́лѣ ѡ҆скꙋдѣва́ѧй: бо́лїй же, и҆́же со смире́нїемъ на та̑ ꙗ҆̀же вы́ше си́лы покꙋша́ѧйсѧ.
рѯ҃з. Ѿ вїна̀ помрачи́вшїисѧ, и҆стрезви́шасѧ мно́жицею водо́ю: ѿ страсте́й же помрачи́вшїисѧ, и҆стрезви́шасѧ слеза́ми.
рѯ҃и. И҆́но є҆́сть, потемнѣ̑нїе зрѣ̑нїѧ: и҆ и҆́но, возлїѧ́нїе: и҆ и҆́но, ѡ҆слѣпле́нїе. И҆ пе́рвшее ѹ҆́бѡ, и҆сцѣлѝ воздержа́нїе: второ́е же, безмо́лвїе: тре́тїе же, послꙋша́нїе, и҆ бг҃ъ (на́съ ра́ди) послꙋшли́въ бы́вый.
рѯ҃ѳ. Мы̀ и҆з̾ двою̀ дѡ́лнѧѧ ѡ҆чища́ющихъ, прили́чнѣ два̀ сїѧ̑, гѡ́рнѧѧ мꙋ́дрствꙋющихъ, ꙗ҆́кѡ во приꙋка́зѣхъ прїѧ́хомъ.
р҃ѻ. И҆ пра́твꙋ ѹ҆́бѡ, є҆́же ѡ҆ гдⷭ҇ѣ ѻ҆бщежи́тїе, скве́рнꙋ и҆ дебе́лство и҆ без̾ѻбра́зїе дꙋшѝ ѡ҆стрꙋга́ющее, ре́кше: краси́телнѧ же могла́ бы бы́ти, ѿшелничествова́нїе: блꙋдовожделѣ̑нїе и҆ памѧтоѕло́бїе и҆ ꙗ҆́рость ѿложи́вшымъ, и҆ ѿто́лѣ про́чее на безмо́лвїе преходѧ́щымъ.
рѯ҃д. Мно́жицею бѣ̑сове лє́гшаѧ и҆ полє́знаѧ, возбранѧ́ютъ на́съ содѣѧва́ти: трꙋ̑дншаѧ же содѣ̑лати па́че побꙋжда́ютъ.
рѯ҃є. Ѡ҆брѣта́ю і҆ѡ́сифа ѻ҆́наго ѿвраще́нїѧ ра́ди ѿ грѣха̀, а҆ не показа́нїѧ ра́ди безстра́стїѧ бл҃жи́ма. И҆спыта́ти подоба́етъ на́мъ въ кі́ихъ и҆ коли́цѣхъ грѣсѣ̑хъ, ѿвраще́нїе вѣне́цъ и҆́мать: и҆́но (бо) є҆́сть є҆́же ѿвраща́тисѧ сѣ̑ни сеѧ̀: вы́шше же є҆́сть є҆́же притека́ти къ со́лнцꙋ ѻ҆́номꙋ.
рѯ҃ѕ. Помраче́нїе, вино́вно быва́етъ претыка́нїѧ: претыка́нїе же, паде́нїѧ: паде́нїе же ѹ҆мира́нїѧ.
рѻ҃а. Нѣ̑цыи є҆́же въ та̑ѧжде па́дати падє́нїѧ, ѿ ѡ҆скꙋдѣ̑нїѧ прили́чествꙋющагѡ и҆ равновѣ̑снагѡ покаѧ́нїѧ пе́рвшемꙋ, гл҃ютъ бы́ти: и҆спыта́ти же подоба́етъ, всѧ́къ ли не пады́й тѣ̑мжде ви́домъ, досто́йнѣ ли и҆ пока́ѧсѧ. Падо́ша въ та̑ѧжде нѣ̑цыи, и҆лѝ пе́рвшихъ ѿ забве́нїѧ глꙋбино́ю зари́вшесѧ, и҆лѝ бг҃а ѿ сластолю́бїѧ чл҃вѣколюби́ва бы́ти непщꙋ́юще, и҆лѝ спасе́нїѧ своегѡ̀ ѿрица́ющесѧ: не вѣ̑мъ а҆́ще бы не ѹ҆̀ кто̀ менѐ порица́ти и҆мѣ̑лъ, поне́же ре́клъ бы́хъ: ꙗ҆́кѡ врага̀ сего̀ про́чее свѧза́ти не могꙋ́ще, ѻ҆бы́чаѧ крѣ̑постїю мꙋчи́телствꙋющаго тѣ̑хъ.
рѻ҃в. И҆спыта́ти подоба́етъ ка́кѡ безтѣле́сна сꙋ́щи дꙋша̀, є҆диносꙋ́щныхъ къ не́й приходѧ́щихъ, ꙗ҆́коже сꙋ́ть є҆стество́мъ, зрѣ̑ти не мо́жетъ: не ка́кѡ ли спрѧже́нїѧ ра́ди, є҆́же свѧза́вый є҆ди́нъ вѣ̑сть.
рѻ҃г. Хотѧ́щꙋ наꙋчи́тисѧ сказꙋ́й ѹ҆̀бо сказꙋ́й, нѣ̑кїй мѧ̀ разꙋмѣ̑теленъ вопроси́лъ є҆́сть: кі́и и҆з̾ дꙋхѡ́въ смирѧ́ти, кі́и же возвыша́ти ѡ҆ грѣсѣ̑хъ ѡ҆быко́ша ѹ҆́мъ; и҆ мнѣ̀ ѡ҆ разсмотре́нїи се́мъ вознедоꙋмѣ̑вшꙋсѧ, и҆ невѣ̑дѣнїе и҆звѣствова́вшꙋ клѧ́твою, наꙋчава́ѧйсѧ наꙋчи́лъ є҆́сть: ма́лѣми, гл҃етъ, разсꙋжде́нїѧ кла́съ тебѣ̀ да́въ, ѡ҆ста́влю и҆спы́товати со трꙋдо́мъ: бѣ̑съ тѣле́съ, и҆ гнѣ̑ва, и҆ чревонеи́стовства, и҆ ѹ҆ны́нїѧ, и҆ сна̀, не ѡ҆быко́ша нѣ̑какѡ возвыша́ти ро́гъ ѹ҆ма̀: сребролю́бїѧ же, нача́лствованїѧ же и҆ многосло́вїѧ, и҆ и҆́ни мно́гши, къ ѕлꙋ̀ ѕло̀ ѡ҆быко́ша присовокꙋплѧ́ти: тѣ̑мже и҆ бѣ̑съ є҆́же сꙋди́ти, си̑мъ подо́бенъ є҆́сть. рѻ҃д. А҆́ще кто̀ къ мїрѧ́нѡмъ и҆лѝ прїи́де и҆лѝ прїѧ́лъ є҆́сть (и҆́хъ) и҆ ѡ҆ и҆́хъ по часѣ̀ и҆лѝ днѝ ѿше́ствїи печа́ли стрѣлꙋ̀ прїѧ́тъ, а҆ не па́че ра́дость, ꙗ҆́кѡ возбране́нїѧ сѣ̑ти и҆зба́влсѧ, то̀ се́й и҆лѝ ѿ тщесла́вїѧ, и҆лѝ ѿ блꙋда̀ порꙋга́емь быва́етъ.
[Статия 12]
рѻ҃є. Сїѐ ѿкꙋ́дꙋ вѣ̑тръ ѻ҆́нъ вѣ̑етъ, пре́жде всѣ̑хъ и҆спыта́имъ, да не ка́кѡ ѡ҆брѧ́щемсѧ проти́внѣ вѣ́трила протѧза́юще.
рѻ҃ѕ. Ѹ҆тѣша́й ѿ любвѐ ста́рцы дѣ̑ѧтєлны, и҆́же сотро́ша тѣлеса̀ своѧ̑ по́стничествованїемъ, ма́ло ѹ҆покое́нїе тѣ́мъ подава́ѧ: ѹ҆бѣжда́й ю҆́ныхъ воздержава́тисѧ, и҆́же сотро́ша дꙋ́шы своѧ̑ грѣха́ми, па́мѧть мꙋ́ки тѣ́мъ повѣ̑даѧ.
рѻ҃з. Не и҆з̾ возмо́жныхъ є҆́сть є҆́же и҆ во и҆но́мъ рѣ̑хомъ, а҆́бїе въ нача́лѣхъ ѿню́дъ чревоѡб̾ѧде́нїѧ и҆ тщесла́вїѧ на́мъ чи́стымъ бы́ти: но не восхощи́мъ наслажде́нїемъ со тщесла́вїемъ ра́товати: побѣжде́нїе бо тщесла́вїѧ, тщесла́вїе, во вводи́мыхъ гл҃ю, ражда́етъ: па́че же а҆́лчбою на то̀ помо́лимсѧ: прїи́детъ бо ча́съ, и҆ ны́нѣ є҆́сть хотѧ́щымъ, да покори́тъ гдⷭ҇ь и҆ сїѐ под̾ но́ги на́шѧ.
рѻ҃и. Не тѣ̑мижде ю҆́нїи и҆ состарѣ̑вшїисѧ приходѧ́ще ра́тꙋеми быва́ютъ страст̾мѝ, мно́жицею бо ѿню́дъ проти̑вны недꙋ́ги и҆́мꙋтъ: сегѡ̀ ра́ди бл҃же́нно є҆́сть бл҃же́нное смире́нїе, ꙗ҆́кѡ и҆ ю҆́нымъ и҆ состарѣ̑вшымсѧ тве́рдо и҆ си́лно быва́етъ покаѧ́нїе.
рѻ҃ѳ. Не смꙋща́йсѧ ѡ҆ то́мъ є҆́же гл҃ати грѧдꙋ̀: рѣ̑дки бо, ѻ҆ба́че сꙋ́ть дꙋ́ши пра̑вы и҆ нелꙋка́вны, ѕло́бы и҆ лицемѣ̑рїѧ и҆ ѕлокова́рства свобѡ́дны сꙋ́ще, и҆́мже ѿню́дъ человѣ̑ческое сопребыва́нїе сопротивлѧ́етсѧ: могꙋ́щымъ съ наста́вникомъ ѿ безмо́лвїѧ, ꙗ҆́кѡ ѿ приста́нища, на нб҃о восходи́ти: и҆ ѻ҆бщежи́телныхъ мо́лвъ и҆ собла̑знъ пребы́ти нетре́боватєлнымъ и҆ неискꙋ̑снымъ.
р҃п. Блꙋ́дныхъ ѹ҆́бѡ, человѣ̑цы: лꙋка́выхъ же, а҆́гг҃ли: го́рдыхъ же, бг҃ъ и҆сцѣли́ти мо́жетъ. Ви́дъ любвѐ мно́жицею не́гли бы́сть и҆ се́й, є҆́же бли́жнемꙋ ѡ҆ставлѧ́ти приходѧ́щꙋ къ на́мъ твори́ти ꙗ҆́коже хоще́тъ во всѣ̑хъ, на́мъ ѹ҆̀бо ра́дость всѧ́кꙋ показꙋ́ющымъ. И҆спыта́ти подоба́етъ, ка́кѡ, и҆ доко́лѣ, и҆ когда̀, и҆ разори́телно ли ѹ҆̀бо є҆́сть раска́ѧнїе до́брыхъ, ꙗ҆́коже ѕлы́хъ.
рп҃а. Разсꙋжде́нїѧ мно́га ѹ҆потреби́мъ, когда̀ ѹ҆̀бо стоѧ́ти, и҆ въ кі́ихъ, и҆ доко́лѣ боро́тисѧ со страсте́й вещества́ми до́лжни є҆смы̀: ѻ҆вогда́ же (и҆) ѹ҆стꙋпа́ти: мо́щно бо є҆́сть и҆ бѣ̑гство предпочестѝ не́мощи ра́ди, да не ѹ҆́мремъ.
рп҃в. Ѹ҆ви́димъ и҆ сохрани́мъ, (не́гли бо во вре́мѧ го́рестїю и҆ же́лчь и҆стощи́ти мо́жемъ) кі́и ѹ҆̀бо и҆з̾ бѣсѡ́въ возноша́ютъ, кі́и же смирѧ́ютъ: и҆ кі́и ѹ҆̀бо ѡ҆жесточа́ютъ, кі́и же ѹ҆тѣша́ютъ: и҆ кі́и ѹ҆̀бо помрача́ютъ, кі́и же напроти́въ просвѣще́нїе лицемѣ̑рнѣ притворѧ́ютъ: и҆ кі́и ѹ҆̀бо ко́сныхъ, кі́и же ѕлокова́рныхъ, кі́и же посꙋпле́нныхъ, и҆ кі́и ра́достныхъ на́съ содѣ̑ловаютъ.
рп҃г. Не ѹ҆жасни́мсѧ на по́прищи се́мъ въ нача́лѣхъ встра́ственшихъ себѐ па́че бы́вшагѡ въ мі́рѣ пребыва́нїѧ на́шегѡ зрѧ́ще: подоба́етъ бо всѣ́мъ винѡ́внымъ подви́гнꙋтисѧ, (и҆) пото́мъ здра́вїю къ на́мъ прибы́ти: не́гли бо нѣ̑гдѣ ѕвѣ̑рїе ѻ҆́ни кры́ющесѧ и҆ не ви́дѧхꙋсѧ.
рп҃д. Є҆гда̀ по нѣ̑коемꙋ приключе́нїю про́чее къ соверше́нствꙋ приближа́ющїисѧ, въ нѣ̑чесомъ ле́гкомъ ѿ бѣсѡ́въ побѣжде́ни бꙋ́дꙋтъ, то̀ всѧ́ко ѹ҆хищре́нїе ѹ҆потреблѧ́ютъ вско́рѣ сїѐ ѿ ни́хъ стори́чно восхи́тити.
рп҃є. Ꙗ҆коже вѣ̑три сі́и, ѻ҆вогда̀ ѹ҆̀бо пове́рхность, тишины̀ ра́ди: ѻ҆вогда́ же глꙋбинꙋ̀ мо́рѧ колеба́ти ѡ҆быко́ша: та́кѡ мѝ разꙋмѣва́й и҆ ѡ҆ те́мныхъ ѻ҆́нѣхъ вѣ̑трѣхъ: занѐ встра́ственныхъ ѹ҆́бѡ са́мое то̀ се́рдца чꙋ́вство колеба́ти ѡ҆быко́ша: пред̾ꙋспѣ̑вшихъ же ѹ҆жѐ, пове́рхность ѹ҆ма̀: тѣ̑мже сі́и скорѣ̑е и҆ тишинꙋ̀ свою̀ ѡ҆щꙋща́ютъ, нескве́рнꙋ пребы́вшꙋ.
рп҃ѕ. Соверше́нныхъ є҆́сть є҆́же позна́ти при́снѡ въ дꙋшѝ, ко́е ѹ҆́бѡ со́вѣсти, ко́е же бж҃їе, и҆ ко́е бѣсѡ́въ є҆́сть помышле́нїе: не бо̀ всѧ̑ сопроти̑внаѧ ѿ нача̑лъ ѡ҆́тай влага́ютъ бѣ̑сове: тѣ̑мже те́мно вои́стиннꙋ є҆́сть и҆ предложе́нїе сїѐ.
Двѣма̀ ѻ҆чи́ма чꙋ́вственныма просвѣща́етсѧ тѣ̑ло, а҆ мы́сленнымъ и҆ ви́димымъ разсꙋжде́нїемъ ѻ҆́чи се́рдца просвѣща́ютсѧ.
[Статия 13]
Воз̾ѡглавле́нїе вкра́тцѣ предрече́нныхъ слове́съ є҆гѡ̀.
рп҃з. Вѣ̑ра и҆звѣ̑стна, ма́ти є҆́сть ѿрече́нїѧ: сопроти́вное же ꙗ҆́вственно є҆́сть.
рп҃и. Наде́жда неꙋкло́нна, две́рь є҆́сть безпристра́стїѧ: сопроти́вное же ꙗ҆́вственно є҆́сть.
рп҃ѳ. Любы̀ бж҃їѧ, вина̀ є҆́сть стра́нничества: сопроти́вное же ꙗ҆́вственно є҆́сть.
р҃ч. Повинове́нїе роди́ло є҆́сть са́магѡ себѐ зазрѣ̑нїе, и҆ здра́вїѧ жела́нїе.
рч҃а. Воздержа́нїѧ ма́ти є҆́сть помышле́нїе сме́рти, и҆ па́мѧть тве́рда же́лчи и҆ ѻ҆́цта влⷣки и҆ бг҃а.
рч҃в. бⷭ҇ѣломꙋ́дрїѧ помо́щникъ є҆́сть и҆ вина̀, безмо́лвїѧ. Раждиза́нїѧ сокрꙋше́нїе, по́стъ є҆́сть: пѡ́мыслъ же лꙋка́выхъ и҆ стꙋ́дныхъ сꙋпоста́тъ є҆́сть сокрꙋше́нїе мы́сли.
рч҃г. Вѣ̑ра и҆ стра́нничество, сме́рть є҆́сть сребролю́бїѧ: милосе́рдїе же и҆ любы̀, преда́ста (и҆) тѣ̑ло.
рч҃д. Мл҃и́тва прилѣ̑жна, поги́бель є҆́сть ѹ҆ны́нїю: па́мѧть же сꙋда̀, вино́вна є҆́сть ѹ҆се́рдїѧ.
рч҃є. Пѣснопѣ̑нїе же и҆ милосе́рдїе и҆ нестѧжа́нїе сꙋ́ть, печа́ли ѹ҆да́ва:
рч҃ѕ. Безпристра́стїе ѡ҆ чꙋ́вственныхъ, видѣ̑нїе є҆́сть мы́сленныхъ.
рч҃з. Молча́нїе и҆ безмо́лвїе тщесла́вїю сꙋ́ть сꙋпоста̑тна: а҆́ще ли же посредѣ̀ є҆сѝ, то̀ безче́стїе пройдѝ.
рч҃и. Го́рдость ви́димꙋ и҆сцѣлѧ́тъ сѣ̑тѡванна ѹ҆строє́нїѧ: неви́димꙋ же, и҆́же пре́жде вѣ́къ неви́димый.
рч҃ѳ. Всѣ̑хъ ѕвѣре́й чꙋ́вственныхъ, ѹ҆бива́теленъ є҆́сть є҆ле́нь: мы́сленныхъ же, смире́нїе.
[Статия 14]
с҃. Мо́щно є҆́сть всѣ̑ми на́шими ꙗ҆̀же по є҆стествꙋ̀, ꙗ҆́вственнѣ ѡ҆ мы́сленныхъ наꙋча́тисѧ.
с҃а. Ꙗ҆коже ѕмі́ю невозмо́жно є҆́сть ве́тхости своеѧ̀ совлещи́сѧ, въ тѣ̑снꙋ сква́жню не влѣ̑зшꙋ: та́кѡ и҆ мы̀ вє́тхаѧ предпрїѧ̑тїѧ, и҆ ве́тхость дꙋшѝ, и҆ ри́зꙋ ве́тхагѡ человѣ̑ка не ѿве́ржемъ, а҆́ще ѹ҆́зкагѡ и҆ тѣ̑снагѡ поста̀ и҆ безче́стїѧ пꙋ́ть не про́йдемъ.
с҃в. Ꙗ҆коже многоплѡ́тнымъ и҆з̾ пти̑цъ на нб҃о возлетѣ̑ти невозмо́жно є҆́сть: та́кѡ и҆ пло́ти свое́й ѹ҆гожда́ющемꙋ.
с҃г. И҆зсо́хши ти́на, не ктомꙋ̀ свинїѧ́мъ ѹ҆гожда́етъ: и҆ ѹ҆вѧ́дши пло́ть, не ктомꙋ̀ бѣ̑сы ѹ҆покоева́етъ.
с҃д. Ꙗ҆коже полѣ́нъ мно́жество мно́жицею сподавлѧ́етъ пла́мень, и҆ ѹ҆гаша́етъ, мно́жество ды́ма содѣ̑лавшо: та́кѡ мно́жицею и҆ печа́ль вышемѣ̑рна, дымова́тꙋ и҆ те́мнꙋ дꙋ́шꙋ дѣ̑лаетъ, и҆ во́дꙋ сле́зъ и҆зсꙋша́етъ.
с҃є. Ꙗ҆коже слѣ̑пъ стрѣле́цъ, неискꙋ́сенъ є҆́сть: та́кѡ (и҆) ѹ҆чени́къ прекосло́вѧщъ, погиба́етъ.
с҃ѕ. Ꙗ҆коже желѣ̑зо и҆скꙋ́сно, и҆ неискꙋ́сное наѡстри́ти мо́жетъ: та́кѡ (и҆) бра́тъ ѹ҆се́рденъ, лѣни́ваго мно́жицею спасѐ.
с҃з. Ꙗ҆коже ꙗ҆́ица въ нѣ̑дрѣ грѣ̑єма ѡ҆животворѧ́ютсѧ: та́кѡ и҆ по́мысли не ѡ҆б̾ѧвлѧ́еми въ дѣла̀ происхо́дѧтъ.
с҃и. Ꙗ҆коже ко́ни текꙋ́ще, є҆ди́ни съ дрꙋги́ми ретѧ́тсѧ: та́кѡ (и҆) дрꙋжи́на бла́га са́мꙋ себѐ побꙋжда́етъ.
с҃ѳ. Ꙗ҆коже ѻ҆́блацы покрыва́ютъ со́лнце: та́кѡ (и҆) лꙋка̑ваѧ помышлє́нїѧ, помрача́ютъ и҆ погꙋблѧ́ютъ ѹ҆́мъ.
с҃і. Ꙗ҆коже и҆зрече́нїе прїе́мый, и҆ на ѡ҆сꙋжде́нїе и҆ды́й, не бесѣ̑дꙋетъ ѡ҆ позо́рищахъ: та́кѡ ни и҆́же вои́стиннꙋ пла́чай, чре́во ѹ҆поко́итъ когда̀.
са҃і. Ꙗ҆коже ѹ҆бо́зи сокрѡ́вища ца̑рска зрѧ́ще, наипа́че нищетꙋ̀ свою̀ познава́ютъ: та́кѡ и҆ дꙋша̀ вели̑кїѧ ѻ҆тє́цъ добродѣ̑тєли чтꙋ́щи, ѿню́дъ смире́нше твори́тъ мꙋдрова́нїе своѐ.
св҃і. Ꙗ҆коже и҆ не хотѧ́що желѣ̑зо, повинꙋ́етсѧ магни́тꙋ: та́кѡ и҆ ѹ҆ка́чествовавшїисѧ предпрїѧ́тїи, мꙋчи́телствꙋеми быва́ютъ ѿ ни́хъ.
сг҃і. Ꙗ҆коже є҆ле́й и҆ нехотѧ́що мо́ре ѹ҆крощева́етъ: та́кѡ и҆ по́стъ, и҆ невѡ́лна ѹ҆гаша́етъ тѣлє́снаѧ раждиза̑нїѧ.
сд҃і. Ꙗ҆коже ѹ҆тѣснѧ́ема вода̀, на высотꙋ̀ востека́етъ: та́кѡ мно́жицею и҆ дꙋша̀ ѿ бѣ̑дъ ѹ҆тѣсне́на бы́вши, ко бг҃ꙋ покаѧ́нїемъ взы́де и҆ спасе́сѧ.
сє҃і. Ꙗ҆коже а҆рѡма́ты носѧ́й, и҆ не хотѧ̀ ѿ вонѝ тоѧ̀ ѡ҆б̾ѧвлѧ́емь быва́етъ: та́кѡ и҆ дх҃а гдⷭ҇нѧ и҆мѣ̑ѧй, ѿ слове́съ свои́хъ и҆ смире́нїѧ познава́емь быва́етъ.
сѕ҃і. Ꙗ҆коже вѣ̑три смꙋща́ютъ бе́зднꙋ: та́кѡ и҆ ꙗ҆́рость мно́жае всѣ̑хъ, смꙋща́етъ ѹ҆́мъ.
сз҃і. Ꙗ҆коже тѣ̑хъ ꙗ҆̀же ѻ҆́ко не ви́дѣ, ни горта́нь ѕѣлѡ̀ ѿ слꙋ́ха жела́етъ вкꙋси́ти: та́кѡ и҆ чи́стїи тѣ̑ломъ, мно́го ѿ сегѡ̀ ѡ҆блегче́нїе и҆́мꙋтъ.
си҃і. Ꙗ҆коже ѻ҆рꙋ̑жїѧ ца́рска на мѣ̑стѣ нѣ̑коемъ лежа̑ща зрѧ́ще та́тїе, не ꙗ҆́коже бы приключи́лосѧ та́мѡ нахо́дѧтъ: та́кѡ и҆ съ се́рдцемъ мл҃и́твꙋ совокꙋпи́вый, не ꙗ҆́коже бы приключи́лосѧ, ѿ мы́сленныхъ разбѡ́йникъ ѡ҆крада́емь быва́етъ.
сѳ҃і. Ꙗ҆коже не ражда́етъ ѻ҆́гнь снѣ̑га, та́кѡ ни и҆́же здѣ̑шнїѧ и҆ща́й че́сти, та́мошнїѧ наслажда́тисѧ и҆́мать.
с҃к. Ꙗ҆коже є҆ди́на и҆́скра ѻ҆́гненна мно́жицею мно́го вещество̀ сожжѐ: та́кѡ и҆ є҆ди́но бл҃го ѡ҆брѣта́етсѧ мно́жество вели́кихъ согрѣше́нїй и҆згла́дившо.
ск҃а. Ꙗ҆коже нѣ̑сть мо́щно без̾ ѻ҆рꙋ́жїѧ ѕвѣ́ри погꙋби́ти: та́кѡ ни без̾ смире́нїѧ, безгнѣ̑вїе стѧжа́ти.
ск҃в. Ꙗ҆коже нѣ̑сть возмо́жно жи́ти по є҆стествꙋ̀ без̾ снѣ̑ди: та́кѡ нѣ̑сть возмо́жно да́же до и҆схо́да понѐ во мгнове́нїи вознерадѣ̑ти.
ск҃г. Ꙗ҆коже лꙋча̀ со́лнечна сква́жнею вше́дши въ хра́минꙋ, всѧ̑ просвѣща́етъ, ꙗ҆́кѡ и҆ тонча́йшїй зрѣ̑ти тогда̀ пра́хъ лета́ющъ: та́кѡ и҆ стра́хъ гдⷭ҇нь въ се́рдце прише́дъ, всѧ̑ томꙋ̀ грѣхѝ є҆гѡ̀ показꙋ́етъ.
ск҃д. Ꙗ҆коже глаго́лемїи ра́ки ѹ҆добое́млеми быва́ютъ, за є҆́же, ѻ҆вогда̀ ѹ҆́бѡ напре́дъ ходи́ти, ѻ҆вогда́ же наза́дъ: та́кѡ и҆ дꙋша̀, ѻ҆вогда̀ ѹ҆̀бо смѣю́щисѧ, ѻ҆вогда́ же пла́чꙋщи, ѻ҆вогда́ же, наслажда́ющисѧ, никꙋ́ю же по́л̾зꙋ воз̾имѣ̑ти мо́жетъ.
ск҃є. Ꙗ҆коже спѧ́щїи, ѹ҆до́бь ѡ҆крада́еми быва́ютъ: та́кѡ и҆ бли́зъ мі́ра добродѣ̑тель проходѧ́щїи.
ск҃ѕ. Ꙗ҆коже со лво́мъ ра́тꙋѧйсѧ, а҆́ще ѹ҆клони́тсѧ ѻ҆́комъ, а҆́бїе погиба́етъ: та́кѡ и҆ и҆́же съ пло́тїю свое́ю ра́тꙋѧйсѧ, а҆́ще тꙋ̀ ѹ҆поко́итъ.
[Статия 15]
ск҃з. Ꙗ҆коже на лѣ̑ствицꙋ восходѧ́щїи гни́лꙋ, бѣ̑дствовати и҆́мꙋтъ: та́кѡ (и҆) всѧ́ка че́сть и҆ сла́ва и҆ могꙋ́тство, смиренномꙋ́дрїю сопротивлѧ́ютсѧ.
ск҃и. Ꙗ҆коже невозмо́жно є҆́сть а҆́лчꙋщемꙋ, не помина́ти хлѣ̑ба: та́кѡ невозмо́жно є҆́сть спасти́сѧ, и҆схо́да и҆ сꙋда̀ не помина́ющемꙋ.
ск҃ѳ. Ꙗ҆коже вода̀ пи́смена, та́кѡ слеза̀ согрѣшє́нїѧ, и҆зглажда́ти мо́жетъ.
с҃л. Ꙗ҆коже нѣ́каѧ и҆з̾ пи́сменъ, не и҆мꙋ́ще воды̀, и҆нѣ̑ми ѻ҆́бразы и҆зглажда́емъ: та́кѡ сꙋ́ть и҆ дꙋ́ши лиша́ющесѧ сле́зъ, и҆ печа́лїю, и҆ воздыха́нїемъ, и҆ мно́гимъ сѣ̑тованїемъ та̑ и҆зглажда́ютъ и҆ и҆стреблѧ́ютъ.
сл҃а. Ꙗ҆коже мно́жество гно́ѧ, мно́жество че́рвїѧ дѣ̑лаетъ: та́кѡ (и҆) мно́жество бра́шенъ, мно́жество паде́нїй и҆ лꙋка́выхъ пѡ́мыслъ и҆ со́нїй дѣ̑лаетъ.
сл҃в. Ꙗ҆коже нога́ма ѡ҆кова́нный, ходи́ти ѹ҆до́бь не мо́жетъ: та́кѡ и҆ сокро́виществꙋющїи пѣ́нѧзи, на нб҃о взы́ти не мо́гꙋтъ.
сл҃г. Ꙗ҆коже горѧ́щаѧ ра́на, ѹ҆добьисцѣлѧ́ема быва́етъ: та́кѡ и҆ многовре́мєнныѧ ꙗ҆̀звы дꙋшє́вныѧ сопроти́вное стра́ждꙋтъ, и҆ неꙋдо́бь и҆сцѣлѧ́ємы быва́ютъ, є҆гда̀ и҆ и҆сцѣлѣ̑ютъ.
сл҃д. Ꙗ҆коже нѣ̑сть возмо́жно ѹ҆мира́ющемꙋ ходи́ти, та́кѡ невозмо́жно є҆́сть ѿча́ѧвшемꙋсѧ спасти́сѧ.
сл҃є. И҆́же вѣ̑рꙋ ѹ҆́бо пра́вꙋ и҆мѣ̑ти глаго́лѧй, грѣхи́ же содѣва́ѧй, подо́бенъ є҆́сть лицꙋ̀ ѻ҆́чїю неимꙋ́щемꙋ: и҆́же вѣ̑ры не и҆мѣ̑ѧй, дѡ́браѧ же не́гли нѣ́каѧ дѣ̑лаѧй, подо́бенъ є҆́сть во́дꙋ че́рплющемꙋ, и҆ въ де́лвꙋ провертѣ̑ннꙋ влива́ющемꙋ.
сл҃ѕ. Ꙗ҆коже кора́бль, бла́га ко́рмчїѧ и҆мѣ̑ѧ, безбѣ̑днѣ въ приста́нище бг҃ꙋ содѣ̑йствꙋющꙋ вхо́дитъ: та́кѡ и҆ дꙋша̀, бла́га па́стырѧ и҆мꙋ́щи, ѹ҆до́бь на нб҃о восхо́дитъ, а҆́ще и҆ мнѡ́га ѕла̑ содѣ̑ѧвши є҆́сть.
сл҃з. Ꙗ҆коже не и҆мѣ̑ѧй пꙋтеводи́телѧ, ѹ҆до́бь на пꙋтѝ заблꙋжда́етъ, а҆́ще и҆ ѕѣлѡ̀ мꙋ́дръ є҆́сть: та́кѡ и҆ самовла́стнѣ пꙋте́мъ мона́шескимъ ходѧ́й, ѹ҆до́бь погиба́етъ, а҆́ще и҆ всю̀ премꙋ́дрость мі́ра сегѡ̀ вѣ̑сть.
сл҃и. Внегда̀ кто̀ тѣ̑ломъ не́мощенъ, и҆ лю̑та согрѣшє́нїѧ содѣ̑ѧвъ, то̀ пꙋте́мъ смире́нїѧ, и҆ сво́йствы є҆гѡ̀ да ше́ствꙋетъ, и҆но́гѡ бо спасе́нїѧ не ѡ҆брѧ́щетъ.
сл҃ѳ. Ꙗ҆коже нѣ̑сть возмо́жно до́лгимъ недꙋ́говавшемꙋ недꙋ́гомъ, въ є҆ди́номъ мгнове́нїи здра́вїе стѧжа́ти: та́кѡ нѣ̑сть возмо́жно внеза́пꙋ стра̑сти и҆лѝ стра́сть ѡ҆долѣ̑ти.
с҃м. Всѧ́кїѧ стра́сти и҆ всѧ́кїѧ добродѣ̑тели и҆мѣ̑й зна́менїе коли́чества, и҆ ѹ҆вѣ̑си своѐ пред̾ꙋспѣѧ́нїе.
см҃а. Ꙗ҆коже зла́томъ бре́нїе и҆мѣнѧ́ющїи, ѿщетѣва́ютсѧ: та́кѡ и҆ тѣле́сныхъ ра́ди, дх҃ѡ́внаѧ позо́рствꙋющїи и҆ сказꙋ́ющїи.
см҃в. Ѿпꙋще́нїе ѹ҆́бѡ вско́рѣ мно́зи, безстра́стїе же никто́же стѧжа́лъ є҆́сть: сїѧ́ бо ве́щь вре́мене, и҆ любвѐ мно́ги, и҆ бг҃а тре́бꙋетъ.
см҃г. И҆спыта́имъ, кі́и ѹ҆́бѡ въ сѣ̑ѧтвꙋ, кі́и же во вре́мѧ зла́ка, кі́и же въ жа́твꙋ на ны̀ ѕвѣ̑ри и҆лѝ пти̑цы навѣ̑тꙋютъ.
см҃д. Ꙗ҆коже нѣ̑сть пра́веднѡ ѻ҆гневи́цею жего́момꙋ, са́маго себѐ ѹ҆би́ти: та́кѡ да́же до послѣ̑днѧгѡ и҆здыха́нїѧ не подоба́етъ ѿча́ѧтисѧ когда̀.
см҃є. Ꙗ҆коже безче́стно є҆́сть ѻ҆тца̀ своего̀ погре́бшемꙋ, та́же ѿ погребе́нїѧ тогѡ̀ возврати́вшꙋсѧ на бра́къ ходи́ти: та́кѡ неприли́чнѡ є҆́сть пла́чꙋщымъ ѡ҆ согрѣше́нїихъ, че́сть, и҆лѝ поко́й, и҆лѝ сла́вꙋ, въ настоѧ́щемъ вѣ̑цѣ взыска́ти ѿ челѡвѣ̑къ.
см҃ѕ. Ꙗ҆коже и҆́на гражда́нѡвъ, а҆ и҆́на ѡ҆сꙋжде́нникѡвъ сꙋ́ть жили̑ща: та́кѡ ѿню́дъ до́лжно є҆́сть премѣне́но бы́ти пла́чꙋщихъ ѡ҆ вина́хъ ѻ҆со́бнѣ ѿ непови́нныхъ, ѹ҆строе́нїе.
см҃з. Ꙗ҆коже во́ина на лицѣ̀ свое́мъ прїе́мшаго ра̑ны лю̑ты на бра́ни, не повелѣва́етъ цр҃ь ѿ вои́нствованїѧ ѿверга́ема бы́ти, но и҆ па́че пред̾ꙋспѣва́ти: та́кѡ и҆ мона́ха, мнѡ́ги бѣды̑ ѿ бѣсѡ́въ терпѧ́щаго, нбⷭ҇ный цр҃ь вѣнчава́етъ.
см҃и. Чꙋ́вство дꙋшѝ є҆́сть, сво́йство є҆ѧ̀: грѣ̑хъ же чꙋ́вства заꙋше́нїе. Соѡщꙋще́нїе ражда́етъ, ѕла̀ и҆лѝ преста́тїе, и҆лѝ ѹ҆мале́нїе: соѡщꙋще́нїе же є҆́сть, рожде́нїе со́вѣсти. Со́вѣсть же є҆́сть, сло́во и҆ ѡ҆бличе́нїе храни́телѧ на́шегѡ, ѿ кр҃ще́нїѧ пре́даннагѡ на́мъ: тѣ̑мже нижѐ толи́кѡ непросвѣще́нныхъ ѡ҆брѣта́емъ бїе́мыхъ ѡ҆ ѕлы́хъ дѣѧ́нїихъ въ дꙋшѝ свое́й: но неѧ́снѣ нѣ̑какѡ.
см҃ѳ. И҆ ѹ҆мале́нїе ѹ҆́бѡ ѕла̀, ражда́етъ ѹ҆дале́нїе ѿ ѕла̀: ѹ҆дале́нїе же ѿ ѕла̀, нача́ло є҆́сть покаѧ́нїѧ: нача́ло же покаѧ́нїѧ, нача́ло є҆́сть спасе́нїѧ: нача́ло же спасе́нїѧ є҆́сть, предложе́нїе бл҃го: предложе́нїе же бл҃го, роди́тель є҆́сть трꙋдѡ́въ: трꙋдѡ́въ же нача́ло, сꙋ́ть добродѣ̑тєли: нача́ло же добродѣ̑телей, цвѣ̑тъ є҆́сть: цвѣ̑тъ же добродѣ̑тели є҆́сть, дѣ̑ланїе: добродѣ̑тели же рожде́нїе є҆́сть, ча́стость: ча́стагѡ же ѡ҆бꙋче́нїѧ пло́дъ и҆ рожде́нїе є҆́сть, неꙋдобопрелага́емо дꙋшѝ завѣща́нїе: и҆́мства же рождество̀ є҆́сть ѹ҆сво́йствованїе. Добра́ же ѹ҆ка́чествованїе є҆́сть, роди́тель стра́ха: стра́хъ же ражда́етъ блюде́нїе за́повѣдей, нбⷭ҇ныхъ гл҃ю же и҆ земны́хъ: за́повѣдей хране́нїе, зна́менїе є҆́сть любвѐ: любве́ же нача́ло, мно́жество є҆́сть смире́нїѧ: мно́жество же смире́нїѧ, ма́ти є҆́сть безстра́стїѧ: сегѡ́ же стѧжа́нїе є҆́сть, любвѐ и҆сполне́нїе: си́рѣчь бж҃їе соверше́нно вселе́нїе, во ѻ҆́нѣхъ безстра́стїемъ чи́стыхъ се́рдцемъ: ꙗ҆́кѡ ті́и бг҃а ѹ҆́зрѧтъ: томꙋ̀ сла́ва во вѣ̑ки вѣкѡ́въ, а҆ми́нь.