Посла́нїе ст҃а́гѡ і҆ѡа́нна, и҆гꙋ́мена раі́ѳскагѡ ко і҆ѡа́ннꙋ досточꙋ́дномꙋ сїна́йскїѧ горы̀ и҆гꙋ́менꙋ.
Вышеесте́ственнѣйшемꙋ и҆ равноа́гг҃лномꙋ ѻ҆тцꙋ̀ ѻ҆тє́цъ, и҆ ѹ҆чи́телю преѕѣ̑лномꙋ, грѣ̑шный раі́ѳскїй и҆гꙋ́менъ ѡ҆ гдⷭ҇ѣ ра́доватисѧ.
Вѣ̑дѧще мы̀ хꙋ́дїи є҆́же ѡ҆ гдⷭ҇ѣ несꙋмнѣ̑нное твоѐ пре́жде всѣ̑хъ, ꙗ҆́коже и҆ во всѣ̑хъ добродѣ̑телехъ ѹ҆краше́нное послꙋша́нїе, и҆ па́чеже и҆дѣ̑же бы приѡбрѣстѝ къ да́нномꙋ тебѣ̀ ѿ бг҃а тала́нтꙋ подоба́ло, хꙋ́да вои́стиннꙋ, и҆ ми́лостивна ѹ҆потреби́хомъ сло́га рече́нное во ѹ҆мѣ̀ прїе́мше: вопроси́ бо, гл҃етъ, ѻ҆тца̀ твоего̀, и҆ возвѣсти́тъ тебѣ̀, ста́рцы твоѧ̑, и҆ рекꙋ́тъ тѝ (второз. л҃в, з҃). Сегѡ̀ ра́ди ꙗ҆́кѡ ко ѻ҆́бщемꙋ всѣ̑хъ ѻ҆ц҃ꙋ̀ и҆ ста́рьшемꙋ па́че всѣ̑хъ въ по́стничествѣ же и҆ ѻ҆строꙋ́мїи, и҆ ѹ҆чи́телю и҆зрѧ́днѣйшꙋ припа́дающе, си́ми на́шими пи́смены, тво́й мо́лимъ добродѣ̑тели ве́рхъ, ѡ҆ є҆́же посла́ти къ на́мъ неꙋчє́нымъ, ꙗ҆̀же бг҃овидѣ̑нїемъ ꙗ҆́коже дре́внїй мѡѷсе́й въ то́йжде горѣ̀ ви́дѣлъ є҆сѝ, и҆ ꙗ҆́кѡ скрижа̑ли бг҃опи̑санны въ посыла́емꙋю ѿ тебѐ къ на́мъ честнꙋ́ю кни́гꙋ вложи́въ къ наꙋче́нїю но́вагѡ і҆и҃лѧ но́вѡ ѿ мы́сленныхъ є҆гѵ̑птѧнъ, и҆ мо́рѧ житїѧ̀ сегѡ̀ и҆зше́дшихъ. Ꙗ҆коже ѹ҆̀бо вмѣ̑стѡ жезла̀ бг҃оглаго́ливымъ твои́мъ ѧ҆зы́комъ по бз҃ѣ чꙋдодѣ̑йствовалъ є҆сѝ, то̀ и҆ ны́нѣ да не неꙋдосто́иши мо́лимь бл҃горазсꙋ́днѣ лѣ̑пѡтствꙋющаѧ мона́шескомꙋ жи́телствꙋ и҆ подоба̑ющаѧ нелѣ̑ностнѣ ѡ҆ гдⷭ҇ѣ ко спасе́нїю на́мъ начерта́ти, ꙗ҆́кѡ вели́къ наста́в-никъ вои́стиннꙋ всѣ̑хъ прїе́мшихъ таково́е а҆́гг҃лское жи́телство. Не помышлѧ́ѧ льще́нїе бы́ти нѣ̑кое и҆лѝ ласка́нїе речє́ннаѧ на́ми. Вѣ̑си бо ѽ сщ҃е́нный вои́стиннꙋ ве́рше, ꙗ҆́кѡ чꙋ́жда сꙋ́ть ѿ на́съ сїѧ̑: но є҆́же є҆́сть ꙗ҆́вственнѣ ви́димо и҆ разꙋмѣва́емо и҆ глаго́лемо ѿ всѣ̑хъ. Тѣ̑мже ѹ҆пова́емъ на гдⷭ҇а прїѧ́ти ско́рѡ и҆ ѡ҆блобыза́ти надѣ̑ємаѧ на́ми честна̑ѧ на скрижа́лехъ си́хъ начерта̑нїѧ наставлѧ̑ющаѧ вои́стиннꙋ послѣ̑дꙋющихъ непогрѣ̑шнѣ. И҆ ꙗ҆́коже лѣ̑ствица ѹ҆твержде́на да́же до нбⷭ҇ныхъ вра́тъ возводѧ́щи произволѧ́ющихъ безтще́тныхъ и҆ безвре́дныхъ, преходѧ́щихъ невозбра́ннѡ дꙋ́хи ѕло́бы, и҆ мїродержи́тєли тмы̀, и҆ кнѧ̑зи воздꙋ̑шныѧ. А҆́ще бо ꙗ҆́кѡвъ ѻ҆́нъ ѻ҆ве́цъ па́стырь сы́й, таково́е стра́шно видѣ̑нїе на лѣ̑ствицѣ ѻ҆́нѣй ѹ҆ви́дѣ, то̀ колмѝ па́че слове́сныхъ ѻ҆ве́цъ предстоѧ́тель сы́й, не видѣ̑нїемъ то́чїю, но и҆ дѣ̑ломъ и҆ и҆́стиною непогрѣ̑шенъ восхо́дъ ко бг҃ꙋ всѣ́мъ показа́ти возмо́глъ бы. здра́вствꙋй ѡ҆ гдⷭ҇ѣ чтⷭ҇нѣ̑йшїй ѻ҆́ч҃е.