Тогѡ́жде ст҃а́гѡ і҆ѡа́нна лѣ̑ствичника сло́во ѻ҆со́бнѣйше къ па́стырю, ѡ҆б̾е́млющо: каковꙋ̀ предстоѧ́телю слове́сныхъ ѻ҆ве́цъ бы́ти подоба́етъ.

Въ до́лнѣй ѹ҆́бѡ се́й кни́зѣ, а҆́зъ тѧ̀ бж҃е́ственне ѻ҆́ч҃е, всѣ̑хъ послѣ̑днѧ ѹ҆чини́хъ: въ го́рнѣй же ѻ҆́нѣй, и҆звѣсти́хсѧ, тебѐ всѣ̑хъ на́съ въ написа́нїи бж҃е́ственнѣмъ пе́рвша бы́ти: поне́же и҆́стиненъ є҆́сть ѻ҆́нъ рекі́й: бꙋ́дꙋтъ послѣ̑днїи мꙋдрова́нїемъ, пе́рви досто́инствомъ.

Глава а҃.

а҃. Па́стырь сво́йственнѣ є҆́сть, и҆́же поги́бшыѧ словє́сныѧ ѻ҆́вцы неѕло́бїемъ, тща́нїемъ свои́мъ и҆ мл҃и́твою взыска́ти и҆ и҆спра́вити могі́й.

в҃. Ко́рмчїй є҆́сть, крѣ̑пость ѹ҆́мнꙋ ѿ бг҃а и҆ свои́хъ трꙋдѡ́въ прїе́мый: не то́чїю ѿ треволне́нїѧ, но и҆ ѿ са́мыѧ бе́здны, кора́бль се́й и҆сто́ргнꙋти могі́й.

г҃. Вра́чь є҆́сть, тѣ̑ло и҆ дꙋ́шꙋ стѧжа́вый безнедꙋ̑жна, ниеди́нагѡ ѿню́дъ пла́стырѧ ѿ и҆нѣ̑хъ тре́бꙋѧй.

д҃. Ѹ҆чи́тель вои́стиннꙋ є҆́сть, и҆́же ѹ҆́мнꙋ кни́гꙋ ра́зꙋма, пе́рстомъ бж҃їимъ, си́рѣчь дѣ̑йствомъ ѡ҆сїѧ́нїѧ, ѿ негѡ̀ собо́ю прїе́мый, и҆ про́чїихъ кни́гъ нетре́бователенъ бы́вый.

є҃. Нелѣ̑по є҆́сть ѹ҆чи́телємъ, ѿ преписа́нїй нака́зовати, и҆ живопи́сцємъ ѿ до́скъ живопи́санныхъ ве́тхихъ зна́меновати.

ѕ҃. До́лнихъ наказꙋ́ѧй, снача́ла ѿ высоты̀ ѹ҆чи́сѧ: и҆ ѻ҆́бразомъ чꙋ́вственнымъ, и҆но́мꙋ наказꙋ́йсѧ. Не забꙋ́ди гл҃ющагѡ: не ѿ человѣ́къ, ни человѣ̑ки, ѹ҆че́нїю семꙋ̀ наказꙋ́ѧ: не бо мо́гꙋтъ дѡ́лнѧѧ, та̑ ꙗ҆̀же на землѝ и҆сцѣлѧ́ти когда̀.

з҃. Бла́гъ ко́рмчїй, спасе́тъ кора́бль: и҆ до́бръ па́стырь, ѡ҆животвори́тъ и҆ и҆сцѣли́тъ недꙋ̑жныѧ ѻ҆́вцы.

и҃. Поели́кꙋ ѻ҆́вцы сїѧ̑ па́стырю без̾ ѡ҆стаѧ́нїѧ пред̾ꙋспѣ̑вше послѣ̑дꙋютъ, потоли́кꙋ ѡ҆ ни́хъ до́мꙋ влⷣцѣ сло́во возда́ти и҆́мать.

ѳ҃. Да ме́щетъ а҆́ки ка́менїемъ сло́вомъ па́стырь се́й, и҆ на сїѧ̑, ѿ лѣ̑ности, и҆лѝ чревоѡб̾ѧде́нїѧ ѡ҆стаю́щыѧсѧ ѻ҆́вцы: є҆́сть бо и҆ сїѐ, бл҃га па́стырѧ зна́менїе.

і҃. Внегда̀ ѻ҆́вцы сїѧ̑ ѿ распале́нїѧ зно́ѧ сегѡ̀, па́че же тѣле́снагѡ, дрема́ти дꙋше́ю на́чнꙋтъ: тогда̀ ѕѣ̑лнѣе ѡ҆ ни́хъ на нб҃о зрѧ̀ па́стырь се́й да бди́тъ: ѡ҆быко́ша бо во вре́мѧ зно́ѧ ѻ҆́нагѡ, мнѡ́ги волкоснѣда́ємы быва́ти: ѻ҆ба́че а҆́ще и҆ ті̑ѧ по внѣ̀ во ѻ҆́вцахъ ви́димомꙋ ѻ҆́бразꙋ, главꙋ̀ дꙋшѝ своеѧ̀ во вре́мѧ распале́нїѧ сегѡ̀, до́лꙋ на зе́млю преклонѧ́ютъ: то̀ и҆́мамы ре́кшаго: се́рдце сокрꙋше́нно и҆ смире́нно бг҃ъ не ѹ҆ничижи́тъ (ѱал. н҃, ѳ҃і).

а҃і. Тмѣ̀ и҆ но́щи страсте́й пости́гшей па́ствꙋ сїю̀, ѡ҆предѣлѧ́й неподви́жнѣ пса̀ сего̀ ко бг҃ꙋ на но́щнꙋю стра́жꙋ: ничто́же бо є҆́сть безмѣ̑стно ѹ҆ма̀ твоего̀ разꙋмѣ̑ти бꙋ́деши ѹ҆бива́телѧ ѕвѣре́й ѻ҆́нѣхъ.