Глава в҃.
а҃. Є҆стества̀ сво́йство и҆ сїѐ бл҃гі́й на́шъ сотворѝ гдⷭ҇ь, да врача̀ зрѧ̀ недꙋ́гꙋѧй весели́тсѧ, а҆́ще не́гли и҆ ничи́мже ѿ негѡ̀ по́льзꙋетсѧ. Стѧжѝ и҆ ты̀ ѽ чꙋ́дне, пла̑стыри, пра́хи, коллꙋ̑рїа, напоє́нїѧ, гꙋ̑бы, негнꙋша́емость, жилосѣ́чива, же́ги, ма̑сти, ѹ҆спи́тєлна, но́жь, ѡ҆бѧ́зы: а҆́ще ли же си́хъ не и҆́мамы, то̀ ка́кѡ хꙋдо́жество сїѐ пока́жемъ; Ника́коже: не бо словеса́мъ, но дѣлѡ́мъ мзды̑ ѻ҆́ны даю́тсѧ.
в҃. Пла́стырь є҆́сть, и҆сцѣле́нїе страсте́й ви́димыхъ, си́рѣчь тѣле́сныхъ. Даѧ́нїе є҆́сть, и҆сцѣле́нїе страсте́й внꙋ́треннихъ, и҆ и҆спраздне́нїе скве́рны неви́димы.
г҃. Пра́хъ є҆́сть, безче́стїе ѹ҆ѧда́ющо, и҆ возноше́нїѧ гни́лость ѹ҆врачева́ющо. Коллꙋ́рїй є҆́сть, ѻ҆́ка дꙋшѝ ѹ҆ма̀ ѡ҆чище́нїе, ѿ возмꙋще́нїѧ ꙗ҆́рости смꙋти́вшасѧ.
д҃. Напое́нїе є҆́сть, ѡ҆терпѣва́ющо запреще́нїе, и҆ по ма́лѣ ѹ҆врачева́ющо.
є҃. Жилосѣ̑чиво є҆́сть, ско́ро и҆спраздне́нїе смра́да неѧ́вственна: жилосѣ̑чиво є҆́сть сво́йственнѣ, продолжи́телно и҆ жесто́ко нападе́нїе во спасе́нїе недꙋ́гꙋющихъ.
ѕ҃. Гꙋ́ба є҆́сть, по жилосѣче́нїи и҆лѝ рѣ̑занїи, кро́ткими и҆ ти́хими словесы̀ и҆ мѧ́гкими врача̀ сегѡ̀ на недꙋ́гꙋющемъ врачева́нїе и҆ ѡ҆те́ртїе.
з҃. Же́гъ є҆́сть, ѡ҆предѣле́нїе и҆ є҆пїті́мїа къ покаѧ́нїю на вре́мѧ дає́ма чл҃вѣколю́бнѣ. Ма́сть є҆́сть, по же́зѣ се́мъ, и҆лѝ сло́вомъ, и҆лѝ ма́лымъ ѹ҆тѣше́нїемъ прилага́емо недꙋ́гꙋющемꙋ ѹ҆тѣше́нїе.
и҃. Ѹ҆спи́телно є҆́сть, є҆́же бре́мѧ по́слꙋшника своегѡ̀ воспрїѧ́ти: и҆ повинове́нїемъ ѹ҆покое́нїе томꙋ̀ и҆ со́нъ безсо́ненъ, и҆ слѣпотꙋ̀ прпⷣбнꙋ, є҆́же не зрѣ̑ти дѡ́браѧ своѧ̑, пода́ти.
ѳ҃. Ѡ҆б̾ѧ́зи сꙋ́ть, є҆́же тщесла́вїемъ разслаблѧ́емыхъ и҆ ѡ҆сла́бленныхъ, терпѣ̑нїемъ и҆ до сме́рти ѹ҆твержда́ти и҆ пристѧ́говати.
і҃. Коне́цъ же всѣ̑мъ, но́жъ є҆́сть, ѡ҆предѣле́нїе и҆ и҆зрече́нїе на ѿсѣче́нїе ѹ҆мерщвле́нна дꙋше́внѣ ѹ҆́да и҆ согни́вша: да не и҆ прѡ́чїимъ кра́стꙋ свою̀ препода́стъ.
а҃і. Бл҃же́нна є҆́сть негнꙋша́емость во враче́хъ: а҆ въ предстоѧ́телехъ, безстра́стїе: занѐ ті́и ѹ҆́бѡ не блюю́ще, на всѧ́ко смра́да врачева́нїе без̾ лѣ̑ности покꙋ́сѧтсѧ: сі́и же, всѧ́кꙋ ѹ҆ме́ршꙋ дꙋ́шꙋ воскреси́ти возмо́гꙋтъ.
в҃і. И҆ сїѧ̀ є҆ди́на и҆з̾ мл҃и́твъ тогѡ̀ предстоѧ́телѧ да бꙋ́детъ, є҆́же ко всѣ́мъ по своемꙋ̀ и҆́хъ досто́инствꙋ милосе́рднѣ прикланѧ́тисѧ и҆ созавѣщава́тисѧ: да не ка́кѡ ꙗ҆́коже і҆а́кѡвъ ѻ҆́нъ, и҆ са́мъ, и҆ люби́маго и҆ соꙋченикѡ́въ повреди́тъ: сїе́ же страда́ти ѡ҆быко́ша, поне́же не ѹ҆̀ чꙋ̑вства дꙋшѝ, соверше́ннѣ ѡ҆бꙋчє́на стѧжа́ша, въ разсꙋжде́нїе добра́ же и҆ сре́днѧ и҆ ѕла̀.