Глава є҃.

а҃. Тогда̀ да́ннꙋю є҆мꙋ̀ ѿ бг҃а вра́чь се́й позна́етъ премꙋ́дрость, є҆гда̀ мно́гими неꙋврачи̑мыѧ стра̑сти, ѹ҆врачева́ти возмо́жетъ. Нѣ̑сть чꙋ́денъ ѹ҆чи́тель ѹ҆добоꙋча́щыѧсѧ ѻ҆́троки премꙋ̑дры содѣ̑лавый и҆ совершє́нны сотвори́вый. Тогда̀ колесницеꙋправи́телей быстроꙋ́мїе похвалѧ́емо и҆ ꙗ҆влѧ́емо быва́етъ, є҆гда̀ съ неикꙋ́сными ко́нми побѣдѧ́тъ, и҆ коне́й тѣ̑хъ сохранѧ́тъ.

в҃. А҆́ще прїѧ́лъ є҆сѝ ѻ҆́чи предзрѣ̑ти вѡ́лны, то̀ сꙋ́щымъ въ кораблѝ се́мъ ꙗ҆́вѣ предглаго́ли: а҆́ще ли же нѝ, то ты̀ и҆стопле́нїѧ сегѡ̀ вино́венъ є҆сѝ, ꙗ҆́кѡ тебѣ̀ ѿ всѣ̑хъ ѹ҆вѣ̑рено бы́сть безпе́чнѣ ѹ҆правле́нїе сїѐ.

г҃. Ви́дѣхъ враче́й недꙋ́жномꙋ ви́нъ не предвозвѣсти́вшихъ, тѣ̑мже ѿ сегѡ̀ и҆ недꙋ́гꙋющымъ и҆ себѣ̀, многа̀ трꙋда̀ и҆ сокрꙋше́нїѧ вино́вныхъ бы́вшихъ.

д҃. Поели́кꙋ предстоѧ́тель, и҆ по́слꙋшникѡвъ, и҆ дале́че сꙋ́щихъ, вѣ̑рꙋ къ себѣ̀ мно́гꙋ ѹ҆́зритъ: потоли́кꙋ про́чее себѐ всѧ́цѣмъ хране́нїемъ да соблюда́етъ, во всѣ̑хъ ꙗ҆̀же и҆ дѣ̑етъ и҆ вѣща́етъ: вѣ̑дый, ꙗ҆́кѡ всѝ на него̀, ꙗ҆́кѡ на началоѻбра́зенъ ѻ҆́бразъ взира́ютъ: и҆ ꙗ҆̀же ѿ негѡ̀, во ѹ҆ста́въ и҆ зако́нъ вмѣнѧ́ютъ.

є҃. Па́стырѧ и҆́стинна, ѹ҆ка́жетъ любы̀: любве́ бо ра́ди па́стырь ѻ҆́нъ распѧ́тсѧ.