Глава ѕ҃.
а҃. Словесы̀ ѹ҆своѧва́й ꙗ҆̀же во и҆нѣ̑хъ, и҆ не востре́бꙋеши мно́га стыдѣ̑нїѧ всегда̀.
в҃. Ѡ҆печалѧ́й недꙋ́гꙋюща до вре́мене, да не долгоꙋкосни́тъ, и҆лѝ ѹ҆́мретъ, ѿ молча́нїѧ проклѧ́та. Мно́зи молча́нїемъ ко́рмчїевымъ до́брѣ пла́вати непщева́хꙋ, до́ндеже ѡ҆ скалꙋ̀ прирази́шасѧ. Па́ѵла вели́каго къ тїмоѳе́ю ѹ҆слы́шимъ пи́шꙋща: насто́й на ни́хъ, гл҃етъ, бл҃говре́меннѣ, безре́меннѣ: бл҃говре́меннѣ ѹ҆́бѡ, непщꙋ́ю, є҆гда̀ ѡ҆блича́емїи ѡ҆бличе́нїе то̀ сла́дцѣ терпѧ́тъ: безре́меннѣ же, є҆гда̀ ѡ҆ се́й ве́щи ѹ҆грыза́еми быва́ютъ: поне́же и҆ и҆сто́чницы, и҆ никомꙋ́же жа́ждꙋщꙋ, и҆сточа́ютъ стрꙋи̑.
г҃. Є҆́сть є҆стество̀ (преклонѧ́ющосѧ), да та́кѡ рекꙋ̀, къ стыдѣ̑телности въ предстоѧ́телехъ припослѣ̑дствꙋющо, и҆ дѡ́лжнаѧ къ дѡ́лжнымъ (дѡ́лжна сꙋ̑щаѧ къ по́слꙋшникѡмъ, глаго́лєма бы́ти) мно́жицею ѹ҆молчава́ющо: є҆́же (но сі́и ѹ҆́бѡ) ѻ҆́но ѹ҆чи́телей твори́ти на ѹ҆чени́чествꙋющихъ, да не ѿрекꙋ́тсѧ: и҆ писа́нїемъ потрє́бнаѧ возвещє́нїѧ зна́меновати тѣ́мъ да покꙋсѧ́тсѧ. Ѹ҆слы́шимъ ѡ҆ нѣ̑кихъ бж҃е́ственный гла́съ гл҃ющъ: и҆зсѣцы̀ ю҆̀, вскꙋ́ю и҆ зе́млю ѹ҆пражнѧ́етъ (лꙋкѝ г҃і, з҃): и҆, и҆зми́те ѕла́го ѿ ва́съ самѣ̑хъ (а҃ кор. є҃, г҃і): и҆, не моли́сѧ ѡ҆ лю́дехъ си́хъ (і҆ер. з҃, ѕ҃і): и҆ ѡ҆ саꙋ́лѣ подо́бнѣ. Сїѧ̑ всѧ̑ па́стыреви вѣ̑дѣти нꙋ́ждно є҆́сть, на кі́ихъ, и҆ ка́кѡ, и҆ когда̀ дѡ́лжна сꙋ́ть быва́ти: бг҃а бо ничто́же и҆́стинше є҆́сть.
д҃. А҆́ще кто̀ ѻ҆со́бнѣ ѡ҆блича́емь не срамлѧ́етсѧ, се́й и҆ пред̾ мно́жествомъ ѡ҆бличе́нїе, винꙋ̀ безстꙋ́дїѧ сотвори́лъ є҆́сть, во́лею спасе́нїѧ своегѡ̀ возгнꙋша́всѧ.