Глава з҃.
а҃. Разсмотрѣва́ю же и҆ ѻ҆́но, є҆́же ѹ҆ мно́гихъ бл҃горазꙋ́мныхъ недꙋ́жныхъ, ѹ҆ви́дѣхъ быва́емо: боѧ́знь бо свою̀ и҆ не́мощь вѣ̑дѧще, и҆ не хотѧ́щихъ враче́й свѧза́ти тѣ̑хъ, и҆ во́льною нꙋ́ждею ѹ҆врачева́ти ѹ҆моли́ша: зане́же дх҃ъ ѹ҆́бѡ ѹ҆се́рденъ є҆́сть, бꙋ́дꙋщїѧ ра́ди наде́жды: пло́ть же немощна̀, предва́ршихъ ра́ди предпрїѧ́тїй. А҆́зъ же сїѐ ви́дѣвъ, покарѧ́тисѧ тѣ́мъ враче́й ѻ҆́нѣхъ ѹ҆моли́хъ.
в҃. Нижѐ всѣ́мъ пꙋтеводи́тель се́й, ѹ҆́зокъ и҆ тѣ̑сенъ бы́ти пꙋ́ть се́й приходѧ́щымъ гл҃ати до́лженъ є҆́сть: нижѐ ѹ҆́бѡ коемꙋ́ждо, и҆́го сїѐ бла́го, и҆ бре́мѧ сїѐ легко̀ є҆́сть: разсмотрѣва́ти же па́че, и҆ прили́чнѣ составлѧ́ти врачбы̑: ѡ҆тѧгчє́ннымъ ѹ҆́бѡ ѿ лю́тыхъ грѣхѡ́въ, и҆ ѹ҆дѡ́бнымъ ко ѿча́ѧнїю сꙋ́щымъ, втора́ѧ: преклонѧ́ющымсѧ же напроти́въ къ высо́комꙋ и҆ возноси́телномꙋ мꙋдрова́нїю, пе́рваѧ прили́чна є҆́сть врачба̀.
г҃. Нѣ̑цыи пꙋте́мъ ше́ствовати до́лгимъ и҆мꙋ́ще, и҆ вопроси́вше вѣ̑дѧщихъ, пра́въ се́й и҆ гла́докъ и҆ безбѣ̑денъ ѿ ни́хъ бы́ти слы́шаша: и҆ ѹ҆́бѡ слы́шанїемъ си́мъ разслаби́вшесѧ къ пꙋтеше́ствїю ѻ҆́номꙋ ѡ҆ посре́дныхъ тогѡ̀ и҆лѝ бѣдꙋ̀ пострада́ша, и҆лѝ и҆ возврати́шасѧ, непригото́вани къ скорбе́мъ ѡ҆брѣ̑тшесѧ: ꙗ҆́коже и҆ сопроти́вное, разꙋмѣва́й мѝ. И҆дѣ̑же раче́нїе бж҃е́ственно прикосне́сѧ се́рдца, та́мѡ стра́хъ глагѡ́лъ не возмо́же: и҆ и҆дѣ̑же стра́хъ гее́нны ꙗ҆ви́сѧ, та́мѡ трꙋдѡ́въ всѧ́ческихъ терпѣ̑нїе: а҆ и҆дѣ̑же црⷭ҇тва наде́жда познава́етсѧ, та́мѡ всѣ̑хъ до́лнихъ быва́етъ презрѣ̑нїе.
д҃. Подоба́етъ до́бромꙋ воево́дѣ семꙋ̀, коегѡ́ждо и҆з̾ нача́лствꙋемыхъ стоѧ́нїе и҆ чи́нъ ꙗ҆́вѣ вѣ̑дѣти: не́гли бо сꙋ́ть во мно́жествѣ се́мъ нѣ̑цыи съ ни́мъ за во́ины сїѧ̑ предра́тницы и҆ є҆динора́тницы, до́лжни сꙋ́ще въ безмо́лвїи ѹ҆строѧ́еми быва́ти.
є҃. Не мо́жетъ є҆ди́нъ ко́рмчїй, без̾ содѣ̑йствїѧ кора́бленникѡвъ, кора́бль спастѝ: нижѐ вра́чь болѧ́щаго и҆сцѣли́ти, не пе́рвѣе ѿ негѡ̀ ѹ҆моле́нъ бы́въ, и҆ ꙗ҆́звы ꙗ҆вле́нїемъ побꙋжде́нъ бы́въ всеꙋвѣ̑реннѣ: ѹ҆стыдѣ̑вшїисѧ враче́й, гни́лѡсти сотвори́ша: мно́зи же, мно́жицею и҆ ѹ҆мро́ша.