Глава и҃.

а҃. Пасꙋ́щимсѧ ѻ҆вца́мъ си̑мъ, свирѣ̑ли сло́ва па́стырь се́й ѹ҆потреблѧ́ѧ да не преста́нетъ, и҆ па́чеже и҆мꙋ́щымъ си̑мъ въ со́нъ приходи́ти: ничесогѡ́же бо та́кѡ бои́тсѧ во́лкъ, ꙗ҆́коже возглаше́нїѧ свирѣ̑ли па́стырскїѧ.

в҃. Нижѐ всегда̀ смирѧ́ти себѐ безслове́снѣ, нижѐ всегда̀ возноси́ти несмы́сленнѣ себѐ предстоѧ́тель се́й до́лженъ є҆́сть, зрѧ̀ па́ѵла во ѻ҆бои́хъ ходѧ́ща. Гдⷭ҇ь мно́жицею спокры́лъ є҆́сть ѻ҆́чи нача́лствꙋемыхъ, въ нѣ̑кихъ предстоѧ́телевыхъ недоста́тцѣхъ: то́й же сїѧ̑ ꙗ҆ви́въ тѣ́мъ, невѣ̑рїе роди́лъ є҆́сть.

г҃. Ви́дѣхъ предстоѧ́телѧ ѿ кра́йнѧ смире́нїѧ съ ча́ды свои́ми, въ нѣ̑кихъ совѣ̑тꙋющасѧ: и҆ ви́дѣхъ и҆но́го свою̀ премꙋ́дрость немꙋ́дрꙋ, ѿ возноше́нїѧ тѣ́мъ ꙗ҆влѧ́ти хотѧ́ща, и҆ похвалонасмѣѧва́телнѣ завѣщава́ющасѧ къ ни́мъ.

д҃. Рѣ̑дцѣ ѹ҆́бѡ, ѻ҆ба́че по нѣ̑коей нꙋ́ждѣ, ви́дѣхъ встра́ственныхъ безстра́стными нача́лствовавшихъ: и҆ пома́лꙋ нача́лствꙋемыхъ, ѹ҆стыдѣ̑вшихсѧ, и҆ стра̑сти своѧ̑ ѿсѣ̑кшихъ: сїе́ же, непщꙋ́ю, мзда̀ спаса́емыхъ въ ни́хъ дѣ̑йствова: и҆ бы́сть тѣ́мъ встра́ственное то̀ начина́нїе, безстра́стїѧ вина̀.