[ѾВѢ́ТЪ] І҆ѡа́ннъ і҆ѡа́ннꙋ ра́доватисѧ.

Прїѧ́хъ вои́стиннꙋ подоба́ющъ чтⷭ҇но́мꙋ твоемꙋ̀ и҆ безстра́стномꙋ житїю̀ и҆ чи́стомꙋ и҆ смире́нномꙋ се́рдцꙋ твоемꙋ̀, є҆го́же къ на́мъ ни́щымъ и҆ ѹ҆бѡ́гимъ ѿ добродѣ̑телей, посла́лъ є҆сѝ че́стенъ тво́й сло́гъ: па́че же за́повѣдь, и҆ вы́ше крѣ̑пости на́шеѧ повелѣ̑нїе. Твое́ бо бѣ̀ вои́стиннꙋ твоѐ, и҆ твоеѧ̀ сщ҃е́нныѧ дш҃ѝ сво́йственно, є҆́же ѿ на́съ ненака́занныхъ, и҆ сло́вомъ и҆ дѣ̑ломъ неꙋче́ныхъ, ѹ҆чи́телства и҆ наказа́нїѧ сло́ва попроси́ти. Ѡ҆бы́кла бо є҆́сть при́снѡ на́мъ сама̀ собо́ю ѻ҆́бразъ смиренномꙋ́дрїѧ приꙋка́зовати. Ѻ҆ба́че ны́нѣ и҆ а҆́зъ ѻ҆́но рекꙋ̀, ꙗ҆́кѡ, а҆́ще не бы̀ стра́хъ, и҆ мно́га бѣда̀ ма́тере всѣ̑хъ добродѣ̑телей послꙋша́нїѧ прпⷣбнагѡ и҆́го ѿ себѐ ѿве́ргти зави́сѣли, то̀ не бы́хомъ безслове́снѣ на та̑ ꙗ҆̀же па́че си́лы посмѣ̑ли.

Подоба́ше бо тѝ, ѽ чꙋ́дный ѻ҆́ч҃е, подоба́ше сїѧ̑ вопроси́вшꙋ ѿ до́брѣ ѹ҆вѣ̑дѣвшихъ ѹ҆разꙋмѣ̑ти: мы́ бо є҆щѐ во ѹ҆чени́чествꙋющихъ чи́нѣ є҆смы̀. Но поне́же сїю̀ ве́щь бг҃оно́снїи на́ши ѻ҆ц҃ы̀ и҆ и҆́стиннагѡ ра́зꙋма тайноꙋчи́тєли послꙋша́нїе бы́ти ѡ҆предѣлѧ́ютъ, є҆́же въ тѣ̑хъ ꙗ҆̀же па́че си́лы несꙋмнѣ̑ннѡ повелѣва́ющымъ покарѧ́тисѧ. Сѐ ꙗ҆̀же ѡ҆ себѣ̀ презрѣ̑вше бл҃гоче́стнѣ, на та̑ ꙗ҆̀же па́че себѐ смире́ннѣ покꙋси́хомсѧ: не ꙗ҆́кѡ что̀ тебѣ̀ и҆мꙋ́що поле́зно бы́ти, и҆лѝ ꙗ҆влѧ́ющо ѻ҆́но, є҆́же и҆ ты̀ вѣ̑си не мнѣ̑е на́съ, ѽ сщ҃е́нный ве́рше: и҆звѣсти́хсѧ бо не а҆́зъ то́чїю, мню́ же и҆ и҆з̾ до́брѣ мꙋ́дрствꙋющихъ кі́йждо, чи́стꙋ бы́ти твоемꙋ̀ ѹ҆ма̀ ѻ҆́кꙋ ѿ всѧ́кагѡ зе́мленна и҆ те́мна те́мныхъ страсте́й возмꙋще́нїѧ, и҆ невозбра́ннѡ на бж҃е́ственный ѻ҆́нъ свѣ̑тъ взира́ти же, и҆ ѿ негѡ̀ ѡ҆зарѧ́тисѧ. Но сме́рти ꙗ҆́же ѿ преслꙋша́нїѧ ѹ҆страша́ѧсѧ, и҆ а҆́ки ѿ тоѧ̀ къ послꙋша́нїю спорѣва́емь, ко всепрпⷣбномꙋ повелѣ̑нїю твоемꙋ̀ со стра́хомъ и҆ любо́вїю прїидо́хъ, ꙗ҆́кѡ бл҃горазꙋ́менъ послꙋ́шникъ и҆ ра́бъ неключи́мъ живопи́сца и҆зрѧ́днѣйша: хꙋ́дымъ бо на́шимъ и҆ сла́бымъ ра́зꙋмомъ, и҆ хꙋдогла́снымъ произноше́нїемъ черни́ломъ є҆ди́нѣмъ є҆динови́днѣ жива̑ѧ ѡ҆сѣни́вше то́чїю словеса̀. Тебѣ̑ же про́чее, ѽ ѹ҆чителе́й нача́лниче и҆ чинонача́лниче ѡ҆ста́вль приꙋкраси́ти и҆ ѹ҆ѧсни́ти, и҆ ѡ҆скꙋдѣва̑ющаѧ, ꙗ҆́кѡ и҆спо́лнителю скрижа́лей и҆ зако́на дх҃о́вна понапо́лнити. Не къ тебѣ̑ же нижѐ са́мое сїѐ начина́нїе на́ше посла́хъ: да не бꙋ́детъ: сїе́ бо послѣ̑днѧгѡ неразꙋ́мїѧ бы́ло бы зна́менїе. Си́ленъ бо є҆сѝ ѡ҆ гдⷭ҇ѣ, не и҆нѣ̑хъ то́чїю, но и҆ на́съ самѣ̑хъ бж҃е́ственными ѹ҆твержда́ти нра́вы же и҆ ѹ҆че́нми: но ко ѻ҆́нѣй съ на́ми ѹ҆ тебѐ, ѽ и҆зрѧ́днѣйшихъ ѹ҆чи́тєль и҆зрѧ́днѣйшїй, ѹ҆чени́чествꙋющей бг҃озва́ннѣй дрꙋжи́нѣ, є҆ѧ́же и҆ твои́ми же мл҃и́твами, ꙗ҆́коже нѣ̑кими мы́сленными наде́ждами, невѣ̑жества ѡ҆блегчава́емь, вѣ̑трило про́чее тро́сти протѧ́гъ, до́бромꙋ на́шемꙋ соко́рмчїю корми́ло сло́ва на́шегѡ въ рꙋ́цѣ со всѧ́цѣмъ моле́нїемъ да́въ, сїѐ къ тѣ́мъ ва́ми начина́ю, просѧ̀ чтꙋ́щихъ всѣ̑хъ, а҆́ще бы кто̀ что̀ въ се́мъ по́льзꙋ приносѧ́що ѹ҆смотрѣ̑лъ, то̀ сегѡ̀ пло́дъ и҆зрѧ́днѣйшемꙋ на́шемꙋ настоѧ́телю, ꙗ҆́кѡ бл҃горазꙋ́менъ, да вмѣнѧ́етъ. И҆ начина́нїѧ сегѡ̀ и҆ є҆ди́нагѡ да́нꙋ бы́ти ѿ бг҃а да и҆спро́ситъ на́мъ воздаѧ́нїю: н на гл҃ємаѧ взира́ѧ, хꙋ̑да бо вои́стиннꙋ сꙋ́ть, и҆ всѧ́кагѡ невѣ̑жества и҆спо́лнєна: но приносѧ́щагѡ прїе́млѧ вдовы́ческое предложе́нїе. Не бо̀ мно́жествꙋ дарѡ́въ и҆ трꙋдѡ́въ: но мно́жествꙋ предложе́нїѧ, бг҃ꙋ мзды̑ воздае́тъ.