Глава а҃і.

а҃. Нѣ̑сть пра́во львꙋ̀ ѻ҆́вцы пастѝ, и҆ нѣ̑сть безбѣ̑дно встра́ственнꙋ є҆щѐ, встра́ственными нача́лствовати.

в҃. Нелѣ̑потно є҆́сть видѣ̑нїе, въ ко́кошахъ лиси́ца: и҆ ничто́же нелѣ̑потнше є҆́сть, па́стырѧ гнѣ̑вающасѧ: занѐ ѻ҆́на ѹ҆́бѡ ко́кошы: се́й же, дꙋ́шы словє́сны смꙋща́етъ и҆ погꙋблѧ́етъ.

г҃. зрѝ не бꙋва́й прилѣ̑женъ ѡ҆ малѣ̑йшихъ и҆стѧза́тель, не бꙋ́деши бо про́чее бг҃ꙋ подража́тель.

д҃. И҆мѣ̑й бг҃а и҆ са́мъ строи́телѧ и҆ наста́вника всѣ̑хъ твои́хъ внꙋ́треннихъ и҆ внѣ̑шнихъ, пред̾ ни́мъ, ꙗ҆́коже пред̾ нѣ̑кимъ и҆зрѧ́днѣйшимъ ѹ҆прави́телемъ: и҆ ѻ҆́нѣмъ во́лю свою̀ ѿсѣца́ѧ, и҆ бꙋ́деши и҆ ты̀ без̾ попече́нїѧ, ма́нїемъ є҆гѡ̀ и҆ є҆ди́нѣмъ води́мь.

є҃. И҆спыта́ти подоба́етъ тебѣ̀ и҆ сїѐ, и҆ всѣ́мъ: не ка́кѡ ли ѿ вѣ̑ры приходѧ́щихъ, а҆ не ѿ чистоты̀ на́шеѧ, бл҃года́ть мнѡ́жайшаѧ на́ми дѣ̑йствовати ѹ҆смотри́ла є҆́сть: мно́зи бо и҆ встра́ственни предрече́ннымъ ѻ҆́бразомъ чꙋдодѣ̑йствоваша: а҆́ще мно́зи, гл҃етъ, рекꙋ́тъ мнѣ̀ во ѻ҆́нъ де́нь: гдⷭ҇и гдⷭ҇и, не въ твое́ ли и҆́мѧ прⷪ҇ро́чествовахомъ; (матѳ. з҃, к҃в) и҆ прѡ́чаѧ: то̀ нѣ̑сть невѣроѧ́тна предрече́ннаѧ глава̀.

ѕ҃. И҆́же вои́стиннꙋ бг҃а себѣ̀ ѹ҆ми́лостививый, то̀ и҆ без̾ ѡ҆щꙋще́нїѧ болѧ́щихъ, бл҃годѣ̑телствовати тѣ́мъ мо́жетъ, два̀ велича̑йшаѧ содѣ̑ловаѧ: себѐ ѹ҆́бѡ ѿ сла́вы, ꙗ҆́коже ѿ глаго́лемыѧ ржѝ, невреди́ма соблюда́ѧ: поми́лѡванныѧ же, бг҃ꙋ є҆ди́номꙋ бл҃годари́ти сотворѧ́ѧ.