Глава г҃і.
а҃. Сра́мъ є҆́сть па́стырю, сме́рти боѧ́тисѧ: є҆лма̀ сїѧ̀ ве́щь, послꙋша́нїе бы́ти ѹ҆ставлѧ́етсѧ, безстра́шїе сме́рти.
в҃. И҆спытꙋ́ѧй, ѽ бл҃же́нне: без̾ ко́еѧ и҆з̾ добродѣ̑телей никто́же ѹ҆́зритъ гдⷭ҇а: и҆ ѻ҆́нꙋ пре́жде всѣ̑хъ ѹ҆своѧва́й ча́дѡмъ твои̑мъ, гла́дка и҆ женови́дна лица̀ ѿню́дъ и҆збавлѧ́ѧ.
г҃. Да бꙋ́дꙋтъ всѣ́мъ сꙋ́щымъ под̾ на́ми ѡ҆ гдⷭ҇ѣ, по тѣлє́снымъ во́зрастѡмъ ѹ҆строє́нїѧ и҆ жили̑ща разли̑чна: не подоба́етъ бо кого̀ ѿ приста́нищъ си́хъ ѿсыла́ти. Пре́жде ра́зꙋма и҆́же въ мі́рѣ зако́ннагѡ, рꙋ́цѣ ско́рѡ на кого̀ не возло́жимъ: да не ка́кѡ въ невѣ̑дѣнїи приходѧ́ще нѣ́кїѧ и҆з̾ ѻ҆ве́цъ си́хъ, къ ра́зꙋмꙋ про́чее приходѧ́ще, и҆ тѧготы̀ сеѧ̀ и҆ ва́ра не терпѧ́ще, въ мі́ръ пребѣжа́тъ: є҆́же пре́жде рꙋ́цѣ возложи́вшымъ, не безбѣ̑дно ѿ бг҃а є҆́сть.
д҃. Кі́й ѹ҆̀бо тако́въ є҆́сть ѿ бг҃а строи́тель, и҆́же и҆сто́чникѡвъ свои́хъ и҆ трꙋдѡ́въ нетре́бователенъ є҆́сть; И҆ ко ѡ҆чище́нїю и҆́нѣхъ, си́хъ ко бг҃ꙋ неща́днѡ ѹ҆потреблѧ́етъ.
є҃. Дꙋ́шы, и҆ па́чеже тѣлеса̀ ѡ҆сквернє́нна ѡ҆чища́ѧ, да не когда̀ преста́неши: да не то́чїю свои́хъ ради, но и҆ чꙋ́ждыхъ ра́ди дꙋ́шъ вѣнцы̀ ѿ до́брагѡ подвигополо́жника со дерзнове́нїемъ и҆зи́щеши. Ви́дѣхъ не́мощна, не́мощь не́мощна, ѿ вѣ̑ры ѡ҆чи́стивша: безстꙋ́дїе похвалѧ́емо ко бг҃ꙋ ѡ҆ ѻ҆́нѣмъ ѹ҆потреби́вша, и҆ дꙋ́шꙋ за дꙋ́шꙋ положи́вша, ѻ҆ба́че со смире́нїемъ: и҆ и҆сцѣле́нїемъ ѻ҆́нагѡ, и҆ себѐ про́чее и҆сцѣли́вша: и҆ ви́дѣхъ ѿ возноше́нїѧ подо́бнѣ сотво́рша, и҆ врачꙋ̀ и҆сцѣли́сѧ са́мъ (лꙋкѝ д҃, к҃г), съ запреще́нїемъ ѹ҆слы́шавша.
ѕ҃. Мо́щно є҆́сть ѡ҆ста́вити бла́го, бо́лша ра́ди бла́га: ꙗ҆́коже и҆́же мч҃ничества не ѿ стра́ха и҆збѣжа́вый но по́льзы ра́ди под̾ ни́мъ спаса́емыхъ и҆ просвѣща́емыхъ.
з҃. Є҆́сть и҆́же са́мъ себѐ безче́стїю, че́сти ра́ди и҆́нѣхъ преда́вый: и҆ ѿ мно́гихъ ꙗ҆́кѡ сластолюби́въ вмѣнѧ́емый, ѡ҆ба́че ꙗ҆́кѡ лсте́цъ и҆ и҆́стиненъ є҆́сть (в҃ кор. ѕ҃, и҃).
и҃. А҆́ще сло́во по́льзы содержа́щїй, и҆ сїѐ и҆зоби́лнѣ не преподава́ѧй, неказни́мь не бꙋ́детъ: то̀ коли́ка непщꙋ́еши, ѽ дрꙋ́же, є҆́сть бѣда̀ ѻ҆́на могꙋ́щымъ и҆ са́мымъ дѣ̑лъ споспѣ̑шествомъ со ѡ҆ѕлоблѧ́емыми спотрꙋжда́тисѧ и҆ не спотрꙋжда́ющымсѧ (прит. к҃д, а҃і). И҆зба́ви и҆зба́вленны ѿ бг҃а, и҆ спасѝ спасе́нный ведо́мыхъ на сме́рть, и҆ и҆скꙋпꙋ́ѧ ѹ҆бива́емыхъ ѿ бѣсѡ́въ, да не бꙋ́деши скꙋ́пъ: сїе́ бо всѧ́кагѡ дыха́нїѧ могꙋ́ща ве́лїѧ є҆́сть по́честь ѹ҆ бг҃а па́че всѧ́кагѡ дѣ̑ланїѧ и҆ видѣ̑нїѧ сме́ртныхъ и҆ безсме́ртныхъ.
ѳ҃. А҆́ки споспѣ̑шника безтѣле́сныхъ и҆ ѹ҆́мныхъ си́лъ себѐ показꙋ́етъ, и҆́же ѿ бг҃а да́нною себѣ̀ чистото́ю, скве́рнꙋ и҆́нѣхъ ѡ҆тира́ѧй: и҆ ѿ поро́чныхъ, непорѡ́чны бг҃ови да́ры приносѧ́й: сїе́ бо и҆ є҆ди́но при́снѡ дѣ̑ло є҆́сть бж҃е́ственныхъ ѻ҆́нѣхъ слꙋ́гъ: вси́ бо и҆́же ѻ҆́крестъ є҆гѡ̀ принесꙋ́тъ да́ры, дꙋ́шы (ѱал. ѻ҃є, в҃і).
і҃. Ничто́же та́кѡ къ на́мъ созда́вшагѡ на́съ показꙋ́етъ чл҃вѣколю́бїе и҆ бл҃гость, ꙗ҆́кѡ є҆́же ѡ҆ста́вити девѧтьдесѧ́тъ и҆ де́вѧть ѻ҆ве́цъ, и҆ заблꙋ́ждшꙋю взыска́ти. Внима́й ѹ҆̀бо, ѽ чꙋ́дне, и҆ всѐ твоѐ тща́нїе, и҆ любо́вь, теплотꙋ̀, прилѣжа́нїе, и҆ къ бг҃ꙋ моле́нїе, ѡ҆ ѕѣлѡ̀ заблꙋжде́нныхъ и҆ сокрꙋше́нныхъ покажѝ: и҆дѣ̑же бо вели́цы сꙋ́ть недꙋ́зи сі́и и҆ стрꙋ́пи, то̀ без̾ сꙋмнѣ̑нїѧ вели̑ки и҆ мзды̑ дає́мы быва́ютъ.
а҃і. Ѹ҆смотри́мъ и҆ наблюди́мъ и҆ сотвори́мъ, не бо всегда̀ пра́ведное предстоѧ́тель се́й предпочита́ти до́лженъ є҆́сть, не́мощи ра́ди. Ви́дѣхъ а҆́зъ два̀ сꙋдѧ̑щасѧ ѹ҆ премꙋ́дра сꙋдїѝ, и҆ непра́веднаго ꙗ҆́кѡ ле́гша, пра́ведна бы́ти проповѣ̑да: пра́веднаго же, непра́ведна бы́ти, ꙗ҆́кѡ мꙋ́жественна и҆ бл҃годꙋ́шна, ѡ҆сꙋди́лъ є҆́сть: да не пра́вдою, мно́гшъ раздо́ръ ѻ҆́нъ бꙋ́детъ: ѻ҆со́бнѣ же ѻ҆ба́че и҆ раздѣ̑лнѣ, сво́йствєннаѧ коемꙋ́ждо речѐ, и҆ па́чеже дꙋше́ю недꙋ́гꙋющемꙋ.
в҃і. По́ле ѹ҆́бѡ ѕлаконо́сно, ѻ҆вца́мъ всѣ́мъ прили́чно є҆́сть: ѹ҆че́нїе же и҆ и҆схо́да воспомина́нїе, всѣ́мъ словє́снымъ прили́чнше є҆́сть, всѧ́кꙋ кра́стꙋ и҆сцѣли́ти могꙋ́що.
г҃і. Ѹ҆смотрѝ бл҃годꙋ́шныхъ, и҆ ѡ҆безчеща́й всꙋ́е во прише́ствїи немощны́хъ: да и҆но́гѡ лѣ̑чбою, и҆ и҆но́гѡ ꙗ҆́звꙋ ѹ҆врачꙋ́еши, и҆ терпѣли́выхъ бы́ти ѡ҆сла́бленныхъ нака́жеши.
д҃і. Нигдѣ̑же бг҃ъ и҆́сповѣдь ѹ҆слы́шавъ, наро́днѣ и҆з̾ѧви́въ ꙗ҆влѧ́етсѧ, да не и҆сповѣ̑дающихсѧ и҆з̾ѧвле́нїемъ тѣ̑мъ возбрани́тъ, и҆ про́чее тѣ̑хъ неисцѣ̑лнѣ недꙋ́говати сотвори́тъ. А҆́ще и҆ пред̾ꙋвѣ̑дѣнїѧ прича̑стницы є҆смы̀, то̀ мы̀ согрѣша́ющымъ согрѣше́нїй не предрецы́мъ: но па́че гада́нми тѣ̑хъ ко и҆сповѣ̑данїю побꙋди́мъ: быва́етъ бо тѣ́мъ и҆ ѿ є҆́же къ на́мъ и҆сповѣ̑данїѧ, не ма́ло проще́нїе: и҆ мно́гша тѣ̑хъ ѿ пре́жднѧгѡ и҆ прилѣжа́нїѧ и҆ дерзнове́нїѧ є҆́же къ на́мъ по и҆сповѣ̑данїи се́мъ сподоби́мъ: велми́ бо ѿ сегѡ̀ во ꙗ҆́же къ на́мъ вѣ̑рꙋ и҆ любо́вь пред̾ꙋспѣва́ютъ. И҆ пока́зовати тѣ́мъ ѻ҆́бразъ смире́нїѧ кра́йнѧ до́лжни є҆смы̀, но и҆ стра́хъ къ на́мъ и҆мѣ̑ти тѣ̑хъ накажи́мъ. зрѝ да не ка́кѡ є҆́же па́че потре́бы твоѐ во твои́хъ смире́нїе, ѹ҆́глїе ѻ҆́гненно на главꙋ̀ ча́дъ твои́хъ собере́тъ.
є҃і. Во всѣ̑хъ тебѣ̀ терпѣ̑телнꙋ подоба́етъ бы́ти, кромѣ̀ преслꙋша́нїѧ глаго́лемыхъ.
ѕ҃і. Присмотри́сѧ не ка́кѡ ли на селѣ̀ твое́мъ ѹ҆́зриши древеса̀ зе́млю ѹ҆пражнѧ̑юща, на и҆но́мъ же не́гли плодонѡ́сна бы́ти могꙋ̑ща: ꙗ҆̀же люби́телнымъ и҆сторгнꙋ́тїемъ пресажда́ти совѣ̑томъ не ѿрецы́мсѧ ѿню́дъ.
з҃і. Ѻ҆вогда̀ на неприли́чныхъ и҆ сластолюби́выхъ мѣ̑стѣхъ и҆лѝ гражда́нственшихъ добродѣ̑тель предстоѧ́тель содѣ̑ловаетъ безбѣ̑днѣ: да разсмотрѣва́етъ ѹ҆̀бо ѡ҆ прїѧ́тїи па́ственныхъ си́хъ: не бо всѧ́ко ѿвраще́нїе и҆ ѿрече́нїе ѿ бг҃а возбране́но є҆́сть. А҆́ще ѹ҆́бѡ безмо́лвїемъ дꙋше́внымъ вра́чь се́й и҆зоби́лꙋетъ, то̀ не толи́кѡ тѣле́снагѡ тре́бꙋетъ къ прилѣжа́нїю ѡ҆ недꙋ́гꙋющихъ: а҆́ще ли же пе́рвшагѡ неприча́стенъ є҆́сть, то̀ втора́гѡ ѹ҆потреби́тъ.
и҃і. Ниеди́нъ та́кѡ ѹ҆ бг҃а да́ръ ѿ на́съ бл҃гопрїѧ́тенъ є҆́сть, ꙗ҆́коже є҆́же дꙋ́шы є҆мꙋ̀ словє́сны покаѧ́нїемъ приноси́ти. Ве́сь мі́ръ се́й, дꙋшѝ нѣ̑сть равнодосто́инъ: занѐ ѻ҆́нъ ѹ҆́бѡ прехо́дитъ: сїѧ́ же нетлѣ̑нна и҆ є҆́сть и҆ пребыва́етъ.