Глава д҃і.

а҃. Тѣ̑мже не бл҃жѝ и҆́же и҆мѣ́нїѧ, бл҃же́нне, но и҆́же ѻ҆́вцы словє́сны хрⷭ҇тꙋ̀ приносѧ́щихъ: непоро́чно всесожже́нїе сїѐ творѝ: поне́же ничи́мже себѐ спо́льзовалъ є҆сѝ.

в҃. А҆́коже разꙋмѣва́ти подоба́етъ, ꙗ҆кѡ ѹ҆́бѡ преда́тисѧ подоба́ше сн҃ꙋ чл҃вѣ̑чꙋ, го́ре же томꙋ̀, и҆́мже предае́тсѧ (матѳ. к҃ѕ, к҃д): та́кѡ мѝ разꙋмѣва́й и҆ сопроти́вное: ꙗ҆́кѡ ѹ҆́бѡ спасти́сѧ мнѡ́зѣмъ произволѧ́ющымъ подоба́ше, мзда́ же ѻ҆́нѣмъ дана̀ бꙋ́детъ, и҆́миже спасе́нїе бы́сть по гдⷭ҇ѣ.

г҃. Си́лы на́мъ пре́жде всѣ̑хъ, ѽ че́стне, потре́бно є҆́сть дх҃о́вныѧ, да, ѻ҆́нѣхъ и҆́хже во ст҃а̑ѧ ст҃ы́хъ вводи́ти дерзнꙋ́хомъ, и҆ хрⷭ҇та̀ тѣ́мъ на та́инственнѣй и҆́хъ и҆ та́йнѣй трапе́зѣ почива́юща пока́зовати покꙋси́хомсѧ, доне́лѣже въ преддве́рїихъ вхо́да ѻ҆́нагѡ па́че сꙋ́ть, повнегда̀ ѹ҆ви́димъ тѣ̑хъ, ѿ наро́да возбранѧ́ти тѣ́мъ хотѧ́щихъ, ѹ҆гнѣта́емыхъ и҆ ѹ҆тѣснѧ́емыхъ, то̀ за рꙋ́кꙋ си́хъ ꙗ҆́кѡ младе́нєцъ є҆́мшесѧ, ѿ наро́да ѻ҆́нагѡ помыслѡ́въ свободи́мъ: а҆́ще ли же и҆ младе́нцы нѣ̑цыи ѕѣлѡ̀, и҆лѝ не́мощни сꙋ́ть, то̀ на ра́мѣхъ на́шихъ нꙋ́ждно є҆́сть понестѝ и҆ вознестѝ тѣ̑хъ, до́ндеже две́рь тꙋ̀ вхо́да ѻ҆́нагѡ вои́стиннꙋ ѹ҆́зкагѡ про́йдꙋтъ: та́мѡ бо всѧ́кѡ давле́нїе и҆ тѣснота̀ ѡ҆бы́че быва́ти: тѣ̑мже и҆ гл҃аше нѣ̑кто ѡ҆ не́й: сїѐ трꙋ́дъ є҆́сть предо мно́ю, до́ндеже вни́дꙋ во ст҃и́лище бж҃їе и҆ то́чїю (ѱал. ѻв҃, ѕі҃. зі҃).

д҃. Рече́но ѹ҆́бѡ є҆́сть на́ми, ѽ ѻ҆тє́цъ ѻ҆́ч҃е, и҆ въ предвари́вшихъ ѡ҆ ѻ҆́нѣмъ, ѻ҆ц҃ѣ̀ ѻ҆ц҃є́въ, и҆ ѹ҆чи́тели ѹ҆чи́телей: ꙗ҆ко́въ бѣ̀: премꙋ́дростїю вы́шнею ве́сь ѡ҆дѣ̑ѧнъ, нелицемѣ̑ренъ, ѡ҆бличи́теленъ, ра́достенъ: и҆ є҆́же всѣ̑хъ чꙋ́дншее: ꙗ҆́кѡ и҆дѣ̑же (кото́рыхълибо) хотѧ́щихъ спасти́сѧ ви́дѧше, то̀ мно́гша ѹ҆потреблѧ́ше ѻ҆па́сства: а҆ и҆́хже напроти́въ, во́лю свою̀ и҆лѝ пристра́стїе ви́дѧше и҆мꙋ́щихъ, то̀ та́кѡ тѣ̑хъ пристра́ствꙋемагѡ лиша́ше, ꙗ҆́кѡ про́чее всѣ́мъ ѡ҆блюда́тисѧ, ни въ чесо́мже и҆з̾ тѣ̑хъ къ ни́мже прилѣплѧ́хꙋсѧ пока́зовати во́лю свою̀. Гл҃аше же и҆ сїѐ при́снѡ приснопомина́емый ѻ҆́нъ: ꙗ҆́кѡ, гл҃етъ, лꙋ́чше є҆́сть и҆згна́ти кого̀ и҆з̾ ѻ҆би́тели, не́жели ѡ҆ста́вити по́слꙋшникѡвъ сво́йственнꙋ свою̀ во́лю твори́ти: занѐ и҆згна́вый ѹ҆́бѡ, мно́жицею и҆згна́ннаго смире́нна бы́ти содѣ̑ла, и҆ свою̀ про́чее ѿсѣца́юща во́лю: а҆ и҆́же мнѣ̑нїемъ человѣколю́бїе и҆ снизхожде́нїе такѡвы́мъ подава́ѧй, то̀ во вре́мѧ и҆схо́да ѡ҆каѧ́ннѣ того̀ клѧ́ти сотвори́лъ є҆́сть, ꙗ҆́кѡ прелсти́вша па́че, а҆ не спо́льзовавша тѣ̑хъ.

є҃. Бѣ̀ ѹ҆̀бо ѹ҆ви́дѣти вели́каго ѻ҆́наго, по и҆сполне́нїи вече́рнихъ мл҃и́твъ, на прⷭ҇то́лѣ, и҆звнѣ̀ ѹ҆́бѡ спле́тенѣ и҆з̾ дре́въ, внꙋ́трь же спле́тенѣ дарова́нми дх҃о́вными, сѣдѧ́ща ꙗ҆́кѡ цр҃ѧ нѣ̑коего, є҆го́же ѡ҆крꙋжа́хꙋ ꙗ҆́кѡ премꙋ̑дры пче́лы, до́браѧ ѻ҆́на дрꙋжи́на и҆ собра́нїе. И҆ ꙗ҆́кѡ бж҃їихъ слы́шахꙋ слове́съ, и҆ повелѣ̑нїй послꙋ́шахꙋ: и҆ ѻ҆́въ ѹ҆́бѡ, пѧтьдесѧ́тъ: ѻ҆́въ же, три́десѧть: ѻ҆́въ же, сто̀ и҆з̾ ѹ҆́стъ гл҃ати ѱалмѡ́въ пре́жде сна̀, повелѣва́емь быва́ше: ѻ҆́въ же, толи̑ка твори́ти колѣнопреклонє́нїѧ: ѻ҆́въ же, сѣдѧ̀ спа́ти: ѻ҆́въ ѹ҆́бѡ, ѡ҆предѣле́нъ честѝ ча́съ: ѻ҆́въ же на мл҃и́твѣ та́кожде предстоѧ́ти: поста́ви же на сїѐ и҆ два̀ назира́тєлѧ и҆з̾ бра́тїй: во днѝ ѹ҆́бѡ, собесѣ̑дѡванїѧ и҆ пра́зднѡсти назира́ющѧ и҆ возбранѧ́ющѧ: въ нощи́ же, бдѣ́нїѧ безвре́мєнна, и҆ ꙗ҆̀же нѣ̑сть пра́ведно писа́нїю преда́ти.

ѕ҃. Не то́чїю же, но и҆ ѡ҆ пи́щи сво́йственный чи́нъ комꙋ́ждо вели́кїй ѻ҆́нъ ѡ҆предѣли́лъ є҆́сть: бѣ̑ бо ѹ҆ставопи́щїе всѣ́мъ, не є҆ди́но: но раздѣлѧ́шесѧ коемꙋ́ждо по своемꙋ̀ є҆гѡ̀ ѹ҆строе́нїю: занѐ ѻ҆́вѣмъ ѹ҆́бѡ, сꙋ́хшее: ѻ҆́вѣмъ же, ѿра́дншее ѡ҆предѣли́лъ є҆́сть до́брый ѻ҆́нъ строи́тель: и҆ чꙋ́до бѣ̀: ꙗ҆́кѡ без̾ ропта́нїѧ повелѣва́емое, ꙗ҆́кѡ ѿ ѹ҆́стъ бж҃їихъ соверша́шесѧ. Бѣ̑ же томꙋ̀ приснопомина́емомꙋ подлежа́ща и҆ ла́ѵра, въ не́йже ѿ ѻ҆би́тели своеѧ̀ си́лныхъ на безмо́лвїе ѹ҆строѧ́ше ѻ҆́нъ во всѣ̑хъ соверше́нный.

з҃. Да не сотвори́ши, молю̀, неѕло́бивншихъ многоразли́чныхъ бы́ти въ кова́рствахъ ѡ҆ по́мыслѣхъ: па́че же, а҆́ще мо́щно є҆́сть, и҆ многоразли́чныхъ въ простотꙋ̀ прелага́й: є҆́же пресла́вно є҆́сть.

и҃. Соверше́ннѣ ѡ҆чище́нный ѿ кра́йнѧгѡ безстра́стїѧ, ꙗ҆́кѡ бж҃е́ственный сꙋдїѧ̀ и҆ прилѣжноистѧза́нїѧ ѹ҆потреби́тъ: ѡ҆скꙋдѣ̑нїе бо безстра́стїѧ, бїе́тъ сꙋдїино̀ се́рдце, и҆ не попꙋща́етъ, ꙗ҆́коже подоба́етъ, мꙋ́чити, и҆ ѡ҆чища́ти.

ѳ҃. Вѣ̑ры безстра́стны и҆ догма̑тъ бл҃гочести́выхъ пре́жде всѣ̑хъ, наслѣ̑дїе сыновѡ́мъ ѡ҆ставлѧ́й: да не то́чїю сынѡ́въ, но и҆ внꙋ́кѡвъ твои́хъ ко гдⷭ҇ꙋ, пꙋте́мъ правосла́вїѧ приведе́ши.

і҃. Крѣ̑пкихъ сꙋ́щихъ и҆ ю҆́ныхъ, ѹ҆вѧдова́ти и҆ ѹ҆томлѧ́ти да не поми́лꙋеши, да во вре́мѧ и҆схо́да восхва́лѧтъ тѧ̀. Ѻ҆́бразъ тебѣ̀ и҆ въ се́мъ мѡѷсе́й ѻ҆́нъ вели́кїй да бꙋ́детъ, премꙋ́дре: не бо̀ возмо́же послꙋ́шныхъ, а҆́ще и҆ бл҃гопоко́рнѣ послѣ̑дꙋющихъ, ѿ фараѡ́на ѻ҆́нагѡ свободи́ти, до́ндеже ѻ҆прѣсно́къ ѻ҆́нъ съ го́ркимъ ѕе́лїемъ ꙗ҆до́ша. Ѻ҆прѣсно́къ же є҆́сть, дꙋша̀ не и҆мꙋ́щаѧ прїѧ́тїѧ во́ли своеѧ̀: сїе́ бо надыма́ти и҆ воноша́ти тꙋ̀ мо́жетъ: ѻ҆прѣсно́къ же се́й, при́снѡ смире́нъ є҆́сть. Го́ркое же ѕе́лїе разꙋмѣ̑имъ, ѻ҆вогда̀ ѹ҆́бѡ, ѿ повелѣ̑нїѧ послѣ̑дꙋющꙋю си̑мъ лю́тость: ѻ҆вогда́ же, го́рестїю поста̀ тѣснотꙋ̀.

а҃і. А҆́зъ же, ѽ ѻ҆тє́цъ ѻ҆́ч҃е, сїѧ̑ къ тебѣ̀ посыла́ѧ, бою́сѧ слы́ша гл҃ющаго: ѹ҆ча́й и҆на́го, себе́ ли не ѹ҆чи́ши (ри́м. в҃, к҃а); Ны́нѣ же сїѐ то́чїю ре́къ, ѡ҆ко́нчꙋ сло́ва сегѡ̀ тече́нїе.