Глава є҃і.

Дꙋша̀ чистото́ю соедини́вшисѧ бг҃ꙋ, сло́ва, и҆но́гѡ, ко ѹ҆че́нїю не востре́бꙋетъ: присносꙋ́щное сло́во, тайноꙋчи́телѧ и҆ наста́вника и҆ просвѣще́нїе въ себѣ̀ носѧ́щи бл҃же́ннаѧ: ꙗ҆ко́въ и҆ тво́й сщ҃е́ннѣйшїй и҆ всесвѣ̑тлый ве́рхъ бы́ти по́мню, не сло́вомъ про́стѣ наги́мъ, но дѣ̑йствїемъ и҆ и҆скꙋ́сомъ ѹ҆́мъ тогѡ̀ всечи́стъ вѣ̑дый, кро́тостїю наипа́че ѕвѣрогꙋби́телною и҆ смире́нїемъ блиста́ющъ, по вели́комꙋ ѻ҆́номꙋ законополо́жникꙋ: є҆мꙋ́же вои́стиннꙋ и҆ по чи́нꙋ послѣ̑дꙋѧ терпеливострада́телнѣйше (зват. паде́жь), и҆ пред̾иды́й на высотꙋ̀ при́снѡ, ма́лѡ не и҆ ѻ҆́наго превозше́лъ є҆сѝ: по чистоты̀ гл҃ю, похвалѣ̀, и҆ цѣломꙋ́дрїѧ по́чести: и҆́миже и҆ па́че, не́жели и҆нѣ̑ми ко бг҃ꙋ приближа́тисѧ мо́жемъ, всечи́стомꙋ же и҆ всѧ́кагѡ безстра́стїѧ да́телю и҆ помо́щникꙋ: и҆ преставлѧ́ющемꙋ си́ми, ѿ землѝ на нб҃о, на землѝ є҆щѐ сꙋ́щихъ: и҆́миже ꙗ҆́кѡ на нѣ̑кꙋю ѻ҆́гненнꙋ колесни́цꙋ, по ѻ҆́номꙋ чистотолюби́вомꙋ и҆лїѝ, нога́ма безлѣ̑ностїѧ возше́дъ: не то́чїю є҆гѵ́птѧнина сего̀ ѹ҆би́лъ є҆сѝ, и҆ въ песцѣ̀ смире́нїѧ по́честь сїю̀ скры́лъ є҆сѝ: но ѹ҆́бѡ и҆ на го́рꙋ сїю̀ восте́клъ є҆сѝ, и҆ бг҃а тернова́тымъ и҆ ѕвѣрє́мъ неꙋдобопристꙋ́пнымъ жи́телствомъ ви́дѣлъ є҆сѝ: и҆ бж҃е́ственна гла́са и҆ свѣтоза́рности наслади́лсѧ є҆сѝ: и҆ сапо́гъ се́й, гл҃ю же, ве́сь ме́ртвенный се́й спокро́въ и҆ззꙋ́лъ є҆сѝ: и҆ за хво́стъ ѻ҆́нъ, си́рѣчь за коне́цъ, ѿ а҆́гг҃ла во ѕмі́ѧ прело́жшагосѧ, взѧ́лъ є҆сѝ: и҆ сего̀ ꙗ҆́кѡ въ свою̀ є҆гѡ̀ ꙗ҆́звинꙋ и҆ въ ро́въ до́лнѣйшъ, въ є҆гѵ́петъ и҆ потемнѣ̑нїе ѡ҆мрачи́въ преда́лъ є҆сѝ: и҆ фараѡ́на побѣди́лъ є҆сѝ высо́каго ѻ҆́наго и҆ го́рдаго, и҆ є҆гѵ́птѧны ѹ҆ѧзви́лъ є҆сѝ: и҆ си́хъ пе́рвенцы, є҆́же бо́лшаѧ па́че и҆́ныхъ є҆́сть по́честь, ѹ҆мертви́лъ є҆сѝ. Тѣ̑мже тебѣ̀ гдⷭ҇ь и҆ наставле́нїе бра́тїй, ꙗ҆́кѡ непоколеби́мꙋ ѹ҆вѣ̑рилъ є҆́сть: и҆́хже ты̀ наста́вниче наста̑вникъ, и҆ небоѧ́зненнѣ ѿ фараѡ́на ѻ҆́нагѡ, и҆ скве́рнагѡ, бре́нїѧ ѻ҆́нагѡ, плїнѳодѣ̑ланїѧ и҆зба́вилъ є҆сѝ: ѻ҆гнѧ̀ тѣ́мъ бж҃їѧ, и҆ ѻ҆́блака чистоты̀, всѧ́къ пла́мень ѹ҆гаша́ющагѡ, видѣ̑нїе и҆скꙋ́сомъ всѧ́цѣмъ препода́лъ є҆сѝ: не то́чїю же, не ѹ҆́бѡ и҆ чермно́е и҆ пала́ющее сїѐ мо́ре тѣ́мъ расточи́лъ є҆сѝ: въ не́мже и҆ па́чеже мно́гшїи бѣ̑дствовати ѡ҆быко́хомъ: и҆ побѣди́тєли и҆ побѣдоно́сцы жезло́мъ твои́мъ и҆ вѣ̑жествомъ па́стырскимъ сотвори́лъ є҆сѝ: и҆ всѣ̑хъ гонѧ́щихъ въ слѣ̑дъ и҆́хъ, въ коне́цъ и҆стопи́лъ є҆сѝ: не то́чїю же, но по се́мъ, и҆ а҆мали́ка возноше́нїѧ, по побѣ̑дѣ мо́рстѣй, ѹ҆срѣта́ти ѡ҆бы́кшаго побѣди́телей си́хъ, просте́ртїемъ рꙋкꙋ̀, посредѣ̀ дѣѧ́нїѧ и҆ видѣ̑нїѧ стоѧ̀, побѣди́лъ є҆сѝ. за лю́ди твоѧ̑ бг҃оꙋвѣ̑рєнны и҆ бг҃опросвѣщє́нны, побѣди́лъ є҆сѝ ꙗ҆зы́ки: къ горѣ̀ безстра́стїѧ, приве́лъ є҆сѝ сꙋ́щихъ съ тобо́ю: сщ҃е́нники поста́вилъ є҆сѝ, ѡ҆брѣ̑занїе преда́лъ є҆сѝ, и҆́мже не ѡ҆чи́стившымсѧ, бг҃а ѹ҆ви́дѣти невозмо́жно є҆́сть: на высотꙋ̀ возше́лъ є҆сѝ, всѧ́къ мра́къ и҆ мглꙋ̀ и҆ бꙋ́рю ѿрази́въ, неразꙋ́мїю гл҃ю треро́днꙋю тмꙋ̀. Прибли́жилсѧ є҆сѝ къ свѣ̑тꙋ, мно́гѡ кꙋпины̀ ѻ҆́ныѧ че́стншемꙋ и҆ мра́чншемꙋ и҆ вы́шшемꙋ: сподо́билсѧ є҆сѝ гла́са: сподо́билсѧ є҆сѝ видѣ̑нїѧ и҆ пррⷪ҇о́чества: ѹ҆ви́дѣлъ є҆сѝ нѣ̑гдѣ не́гли, є҆щѐ и҆ здѣ̀ сы́й, за̑днѧѧ бꙋ̑дꙋщаѧ: та́мѡ гл҃ю бꙋ́дꙋщее послѣ̑днее просвѣще́нїе ра́зꙋма сегѡ̀: та́же гла́сомъ ѻ҆́нѣмъ, не ѹ҆́зритъ человѣ̑къ, слы́шалъ є҆сѝ: тѣ̑мже и҆ въ глꙋбоча́йшꙋ нѣ̑гдѣ ю҆до́ль смире́нїѧ, въ хори́въ ѿ бг҃овидѣ̑нїѧ соше́лъ є҆сѝ: приносѧ̀ ꙗ҆́вѣ ꙗ҆́кѡ и҆ скрижа̑ли ра́зꙋма и҆ восхожде́нїѧ, и҆ лице́мъ дꙋшѝ просла́вленъ сы́й и҆ тѣ̑ла. Ѹ҆вы̀ дрꙋжи́ны моеѧ̀ ви́да телцетворе́нїѧ: ѹ҆вы̀ скрижа́лей си́хъ сокрꙋше́нїѧ. Та́же что̀; Взѧ́лъ є҆сѝ за рꙋ́кꙋ люде́й си́хъ, чрез̾ пꙋсты́ню преве́лъ є҆сѝ: не́гли же и҆ ѿ пла́мене ѻ҆гнѧ̀ своегѡ̀ жегѡ́мымъ си̑мъ нѣ̑когда, и҆сто́чникъ воды̀ сле́зъ дре́вомъ, гл҃ю же пло́ти распѧ́тїемъ со страстмѝ и҆ похотмѝ, роди́лъ є҆сѝ. Ра́тꙋеши срѣта́ющыѧ ꙗ҆зы́ки, ѻ҆гне́мъ гдⷭ҇нимъ потреби́въ ты́ѧ: на і҆орда́нъ приходи́ши: (ничто́же бо є҆́сть возбранѧ́ющее, ма́лѡ и҆ по́вѣсть ѻ҆́нꙋ ѿрази́ти): раздѣлѧ́еши лю́демъ, ꙗ҆́коже і҆исꙋ́съ сло́вомъ: и҆ пе́рвшыѧ ѹ҆́бѡ во́ды, въ мо́ре сла́ное и҆ ме́ртвое ѿдѣли́лъ є҆сѝ: любве́ же и҆нѣ̑мъ пꙋте́мъ нѣ̑гдѣ свы́ше поста́вивъ пред̾ ѻ҆чи́ма мы́сленныхъ твои́хъ си́хъ і҆сра̑илтѧнъ: и҆ ка́менїй про́чее носи́ти дванѧ́десѧть, повелѣва́еши: и҆лѝ а҆пⷭ҇лскїй степе́нь въ ни́хъ возсозда́въ, и҆лѝ ѻ҆сми́хъ ꙗ҆́вѣ ꙗ҆́кѡ ꙗ҆зы̑къ, ѻ҆́нѣхъ и҆ страсте́й побѣ̑дꙋ, и҆ па́ки четыре́хъ ѻ҆́нѣхъ ро́днѣйшихъ (собо́рнѣйшихъ) добродѣ̑телей предпрїѧ́тїе гада́телствꙋѧ, ме́ртвое про́чее сїѐ и҆ непло́дное мо́ре, ѿню́дъ созадѝ сотвори́л є҆сѝ. На гра́дъ вра́жїй приходи́ши: трꙋ́биши мл҃и́твою чрез̾ седмы́й се́й вѣ̑чный ѡ҆бхо́дъ: низложи́лъ є҆сѝ се́й, побѣди́лъ є҆сѝ: ꙗ҆́кѡ и҆ тебѣ̀ про́чее къ спобо́рникꙋ ѻ҆́номꙋ невеще́ственномꙋ и҆ неви́димомꙋ пѣ̑ти: врага̀ моегѡ̀ ѡ҆скꙋдѣ̑ша ѻ҆рꙋ̑жїѧ въ коне́цъ, и҆ гра́ды страсте́й мои́хъ разрꙋши́лъ є҆сѝ.

Хо́щеши ли да рекꙋ̀, всѣ̑хъ сво́йнственшее и҆ держа́вншее: къ і҆ерⷭ҇ли́мꙋ ѻ҆́номꙋ возше́лъ є҆сѝ, къ зрѣ̑нїю соверше́ннагѡ ми́ра дꙋшѝ: хрⷭ҇та̀ зри́ши бг҃а ми́ра: соѕлостра́ждеши ꙗ҆́кѡ до́бръ во́инъ: сраспина́ешисѧ съ пло́тїю и҆ со страстмѝ и҆ похотмѝ, и҆ влѣ̑потꙋ: ꙗ҆́кѡ и҆ са́мъ бо́гъ фараѡ́нꙋ бы́въ, и҆ всѧ́цѣй є҆гѡ̀ сопроти́внѣй си́лѣ. Спогреба́ешисѧ про́чее и҆ снизходи́ши во а҆́дъ бг҃осло́вїѧ гл҃ю и҆ неизрече́нныхъ та̑инъ: мѵ́ры помазꙋ́ешисѧ и҆ ѡ҆бл҃гоꙋха́ешисѧ ѿ сро́дныхъ си́хъ и҆ люби́мыхъ же́нъ си́рѣчь добродѣ̑телей. Что́ бо мѧ̀ є҆́сть возбранѧ́ющее по сло́вꙋ гл҃ати и҆ ска́зовати; И҆дѣ̑же и҆ на нб҃сѝ ѡ҆деснꙋ́ю є҆сѝ сѣдѧ́щъ: ѽ словꙋ́щагѡ сегѡ̀ ѡ҆крадѣ̑нїѧ: воскреса́еши и҆ са́мъ тридне́венъ по побѣ̑дѣ мꙋчи́тєль: не́гли сво́йственнѣе да рекꙋ̀, да по побѣ̑дѣ тѣ̑ла и҆ дꙋшѝ и҆ дꙋ́ха, и҆лѝ и҆ по ѡ҆чище́нїи си́рѣчь трича́стїѧ дꙋшѝ, стра́сти гл҃ю и҆ ꙗ҆́рости и҆ слове́сства: на го́рꙋ є҆леѡ́нскꙋю грѧде́ши. Подоба́етъ бо сокраща́ти а҆ не и҆зли̑шнѧ выпремꙋ́дрствовати къ премꙋ́дрости и҆спо́лненномꙋ, па́чеже посыла́ющꙋ, и҆ всѣ̑хъ сꙋ́щихъ па́че на́съ ра́зꙋмомъ превосходѧ́щемꙋ. Ѡ҆ не́йже непщꙋ́ю не́гли горѣ̀ доброте́чецъ нѣ̑кїй восходѧ̀ гл҃аше: го́ры высѡ́кїѧ є҆ле́немъ (ѱал. р҃г, и҃і), дꙋша́мъ ѕвѣре́й потреблѧ́ющымъ: съ ни́мъ ѹ҆̀бо съ ни́мъ и҆ са́мъ вкꙋпѣ текі́й и҆ спослѣ̑дствꙋѧ, къ восхожде́нїю сеѧ̀ прише́лъ є҆сѝ: воззрѣ̑въ на нб҃о: па́ки бо сло́ва сегѡ̀ ѻ҆́бразъ къ сло́вꙋ ѻ҆́номꙋ возвождꙋ̀: бл҃гослови́лъ є҆сѝ, ѹ҆ченикѡ́въ на́съ: ви́дѣлъ є҆сѝ предложе́ннꙋю сїю̀ и҆ ѹ҆твержде́ннꙋю добродѣ̑телей лѣ̑ствицꙋ: є҆ѧ́же по бл҃года́ти бж҃їей да́ннѣй тебѣ̀ ꙗ҆́кѡ премꙋ́дръ а҆рхїте́ктѡнъ ѡ҆снова́нїе положи́лъ є҆сѝ, па́че же и҆ и҆сполне́нїе: а҆́ще и҆ на́съ неразꙋ́мныхъ ѿ смиренномꙋ́дрїѧ полага́ѧ, ѹ҆ста̀ на̑ша сквє́рнаваѧ тебѣ̀ къ лю́демъ твои̑мъ заи́мствовати ѹ҆бѣди́лъ є҆сѝ: и҆ нѣ̑сть чꙋ́до: ѡ҆быкнове́но бо є҆́сть и҆ мѡѷсе́ю, по ѻ҆́бразꙋ по́вѣсти ѻ҆́ныѧ, хꙋдогла́сна себѐ нарица́ти и҆ косноѧзы́чна: но ѻ҆́нъ ѹ҆́бѡ а҆арѡ́на и҆зрѧ́днѣйша полꙋчи́лъ є҆́сть и҆ словода́вца и҆ рѣчете́чца: ты́ же, ѽ тайноꙋчи́телю, не вѣ̑мъ ѿкꙋ́дꙋ прише́ствїе ѡ҆ се́мъ сотвори́лъ є҆сѝ ко и҆сто́чникꙋ безво́днꙋ, и҆ всемꙋ̀ є҆гѵ́петскихъ жа́бъ, па́че же ѹ҆́глїй и҆спо́лненꙋ. А҆ поне́же не подоба́етъ не дости́гшꙋ мнѣ̀ сло́ва, ѽ нб҃оте́че, сегѡ̀ тече́нїѧ твоегѡ̀, посредѣ̀ ѡ҆ста́влшемꙋ ѿитѝ: па́ки собира́нїе добро́ты твоеѧ̀ и҆сткава́юще, гл҃емъ та́кѡ: ꙗ҆́кѡ и҆ прибли́жилсѧ є҆сѝ къ горѣ̀ ст҃ѣ̑й, и҆ ѻ҆́ко на нб҃о возпросте́рлъ є҆сѝ: и҆ на восхожде́нїе ѻ́но но́гꙋ возве́лъ є҆сѝ, и҆ возвы́силсѧ є҆сѝ, и҆ возше́лъ є҆сѝ на херꙋві́мы добродѣ̑телей, и҆ полетѣ̑лъ є҆сѝ, и҆ возше́лъ є҆сѝ въ воскликнове́нїи, врага̀ ѻ҆́наго побѣди́въ: и҆ предпꙋтесотвори́лъ є҆сѝ, и҆ преднаста́виши: па́че же є҆щѐ и҆ до ны́нѣ наставлѧ́еши, и҆ предварѧ́еши всѣ̑хъ на́съ: на са́мый то́й ве́рхъ восте́къ прпⷣбныѧ ѻ҆́ныѧ лѣ̑ствицы: и҆ соедини́всѧ съ любо́вїю, любы́ же є҆́сть бг҃ъ. Ꙗ҆кѡ томꙋ̀ подоба́етъ сла́ва, держа́ва, че́сть и҆ поклоне́нїе во вѣ̑ки вѣкѡ́въ. А҆ми́нь.