Всеви́дящий Бо́же, Со́лнце солнц, Све́те све́тов, И́же взо́ром Свои́м обыма́еши вся сотворе́нная на небеси́ и на земли, И́же еди́н ве́си число́ во́инства а́нгельскаго, я́коже и число́ мра́виев в пе́рсти, птиц на возду́се и рыб в воде́, – изле́й ми́лость Свою́ на наро́д кита́йский, премноголю́ден наро́д Твой на земли́, мо́лим Ти ся.

Го́споди, Ты дал еси́ наро́ду кита́йскому ве́лию живо́тну прему́дрость, да ве́дает земледе́лати, ку́плю пра́ведно води́ти, власте́м покоря́тися, роди́тели почита́ти, дом свой промышля́ти и люби́ти по всему́ зако́н и после́дование.

Оба́че му́дрость сия́ во́дит челове́ка ра́зве до гро́ба, и́же недале́че отстои́т от колы́би вся́каго сме́ртнаго. Недостае́т наро́ду кита́йскому тоя́ ве́чныя Му́дрости Твоея́, Го́споди, я́же воплоти́лася есть на земли́ в Сы́не Твое́м Единоро́днем, я́же прено́сит ду́шу чрез гроб и вво́дит ю́ в Ца́рствие Небе́сное.

Тво́рче благи́й, Любы́ безпреде́льна, еда́ мо́жет любы́ Твоя́ име́ти преде́л ко мно́зим лео́дром Твоего́ вели́каго наро́да кита́йскаго? Ни, ника́коже! Оба́че Ты ди́вным Свои́м Про́мыслом определи́л еси́ час, во́ньже наро́ду кита́йскому приити́ и поклони́тися кресту́ Христо́ву и прия́ти в себе́ кровь Христо́ву пречи́сту и си́лу Ду́ха Твоего́ Свята́го.

Ускори́ той час, Многоми́лостиве. Помози́ пропове́дателем Креста́ и Воскресе́ния в земли́ кита́йстей. Отве́рзи Кита́ю врата́ благода́ти Твоея́ супроти́в грехо́м на́шым: я́ко да и земля же́лтых челове́к взыгра́ет пе́сньми и восклица́нии от безчи́сленных уст, воспева́ющи: «Рождество́ Твое́, Христе́ Бо́же наш» со «Христо́с воскре́се из ме́ртвых»! Тро́ице Пресвята́я, бу́ди та́ко моли́твами апо́стол всех и евангели́стов, бу́ди та́ко. Ами́нь.