Сим же убо, о Владыко, Царю и Боже наш, Высокий и Славный, Человеколюбче, воздаяй противу трудом славу же и честь и причастники творя Своего Царства, помяни, яко Благ, и нас, нищих Твоих, яко имя Тебе Человеколюбец! Аще и добрых дел не имамы, но многия ради милости Твоея спаси ны, «мы бо людие Твои и овцы паствы Твоея», и стадо, еже ново начат пасти, исторг от пагубы идолослужения!
Пастырю добрый, положивый душу за овцы, не остави нас, аще и еще блудим, не отверзи нас, аще и еще согрешаем Ти, аки новокуплении раби, во всем не угодяще Господу своему; не возгнушайся, аще и мало стадо, но рцы к нам: «Не бойся, малое стадо, яко благоизволи Отец ваш небесный дати вам Царствие!».
Богатый милостию и Благий щедротами, обетщався приимати кающася и ожидаяй обращения грешных, не помяни многих грех наших, приими ны обращающася к Тебе, заглади рукописание соблазн наших, укроти гнев, имже разгневахом Тя, Человеколюбче, Ты бо еси Господь, Владыка и Творец и в Тебе есть власть или жити нам или умрети.
Уложи гнев Милостиве, егоже достойни есмы по делом нашим, мимоведи искушение, яко персть есмы и прах и не вниди в суд с рабы Своими, мы людие Твои, Тебе ищем, Тебе припадаем, Тебе ся мили деем; согрешихом и злая сотворихом, не соблюдохом, ни сохранихом, якоже заповеда нам!
Земнии суще, к земным преклонихомся и лукавая содеяхом пред лицем славы Твоея, на похоти плотяныя предахомся, поработихомся грехови и печалем житийским, быхом бегуни своего Владыки. Убози от добрых дел, окаянии злаго ради жития, каемся, просим, молим: каемся злых своих дел, просим, да страх Твой послеши в сердца наша, молим, да на Страшнем Суде помилует ны. Спаси, ущедри, призри, посети, умилосердися, помилуй, Твои бо есмы, Твое создание, Твоею руку дело!
«Аще бо беззакония назриши, Господи, кто постоит?». Аще воздаси комуждо по делом, то кто спасется? Яко от Тебе очищение есть, яко от Тебе милость и много избавление, и души наши в руку Твоею, и дыхание наше в воли Твоей. Донележе бо благопризирание Твое на нас, благоденствуем, аще ли с яростию призриши, исчезнем, яко утреняя роса. Не постоит бо прах противу бури, и мы противу гневу Твоему!
Но яко тварь от сотворившаго ны милости просим: помилуй ны, Боже, по велицей милости Твоей! Все бо благое от Тебе на нас; все же неправедное от нас к Тебе. Вси бо уклонихомся, вси вкупе неключими быхом, несть от нас ни единаго о небесных тщащася и подвизающа, но вси о земных, вси о печалех житийских: яко оскуде преподобный на земли. Не Тебе оставляющу и презрящу нас, но нам Тебе не взыскающим, но видимых сих прилежащим. Темже боимся, егда сотвориши на нас, яко на Иеросалиме, оставльшим Тя и не ходившим в пути Твоя. Но не сотвори нам яко и онем по делом нашим, ни по грехом нашим воздай нам, но терпи на нас, и еще долготерпи, устави гневный Твой пламень, простирающься на ны, рабы Твоя, Сам направляя ны на истину Твою, научая ны творити волю Твою. Яко Ты еси Бог наш, и мы людие Твои, Твоя часть, Твое достояние. Не воздеваем бо «рук наших к богу чуждему», ни последовахом лжому коему пророку, ни учения еретическая держим, но Тебе призываем Истиннаго Бога и к Тебе, живущему на небесех, очи наши возводим, к Тебе руки наши воздеваем, молим Ти ся; отдаждь нам, яко Благий Человеколюбец, помилуй ны, призывая грешники в покаяние, и на Страшнем Твоем Суде деснаго стояния не отлучи нас, но благословления праведных причасти нас! И донележе стоит мир, не наводи на ны напасти искушения, ни предай нас в руки чуждих, да не прозовется град Твой град пленен и стадо Твое «пришельцы в земли не своей», да не рекут страны: «где есть Бог их?», не попущай на ны скорби и глада, и напрасных смертий, огня, потопления!
Да не отпадут от веры нетвердии верою, мале показни, а много помилуй, мале язви, а милостивно исцели, вмале оскорби, а вскоре овесели, яко не терпит наше естество долго носити гнева Твоего, яко стеблие огня!
Но укротися, умилосердися, яко Твое есть еже помиловати и спасти; темже продолжи милость Твою на людех Твоих: ратныя прогоня, мир утверди, страны укроти, глады угобзи, владыки наши огрози странам, боляры умудри, грады разсили, Церковь Твою возрасти, достояние Свое соблюди, мужи и жены, и младенцы спаси, сущая в работе, в пленении, в заточении, в путех, плавании, в темницах, в алкоте и жажди и наготе — вся помилуй, вся утеши, вся обрадуй, радость творя им и телесную и душевную!
Молитвами, молением, Пречистыя Ти Матери и святых небесных сил, и Предтечи Твоего и Крестителя Иоанна, апостол, пророк, мученик, преподобных и всех святых молитвами умилосердися на ны и помилуй ны, да милостию Твоею пасоми во единении веры вкупе весело и радостно славим Тя Господа нашего Иисуса Христа со Отцем, со Пресвятым Духом, Троицу Нераздельну, Единобожествену, Царствующу на небесех и на земли ангелом и человеком, видимей и невидимей твари, ныне и присно и во веки веком. Аминь!