Тропарь святому преподобноисповеднику Никону, глас 2: Предстоя Престолу Божию, / яко един от избранных, / помяни в святых твоих молитвах / и нас недостойных, / чтущих память твою, / отче наш Никоне, приснопамятный.

Ин тропарь, глас тойже, творение новосвященномученика Василия Оптинскаго: Отрасле святая лозы старческой, / простершаяся до севера и моря, / плодами исповедничества украшенная / и венцем мученичества венчанная, / преподобне отче Никоне, / слава Оптины и похвало, / упование наше и утверждение, / не забуди убогих твоих, / призывающих имя твое святое.

Молитва: О преподобне отче наш Никоне, исповедниче Христов, к тебе, яко скорому помощнику и теплому молитвеннику, мы, немощнии и недостойнии, прибегаем и усердно молим: по данной тебе от Бога благодати помози нам волю Господню в смирении творити, веру православную крепко содержати и достойны быти твоего о нас молитвенного к Богу предстательства и в час смертный заступи нас молитвами твоими. Буди Пинежского края Российския страны крепкий заступниче, и мы предстательством твоим сподобимся обетованного Царства Небесного; умоли, угодниче Христов, всеблагого Бога даровати нам оставление всех содеянных нами от юности до настоящего дне и часа делом, словом и помышлением согрешений и исходатайствуй нам невозбранный вход в Царствие Небесное, да прославим от ангел купно с тобою Отца и Сына и Святого Духа и твое милостивное предстательство во веки веков. Аминь.