Возлю́бленый бра́те, уподо́бися чистото́ю фи́никови. Фи́ник бо се́рдце то́чию бе́ло и́мать, о́крест же че́рвий по́лно есть о́коло бе́ли его́. Подоба́ет у́бо ко всем челове́ком стяжа́ти любо́вь чи́стым се́рдцем, наипа́че же к свои́м единове́рным. К похотолю́бцем же и супроти́вным челове́ком, молча́ние име́ти. По молча́нию же ‐ ра́зум и мир, глаго́лющаго ра́ди апо́стола: Рабу́ Госпо́дню не подоба́ет свари́тися, но ти́ху бы́ти ко всем, учи́тельну в кро́тости наказу́ющу сопроти́вныя, еда́ когда́ даст им Бог покая́ние и в ра́зум и́стинный приити́. И воспря́нувшым от се́ти диа́воли, и изздра́вшеся во́ли его́.

О́ чистото́, ненави́дящия пи́щи мно́гия и добролю́бия теле́снаго и ри́знаго украше́ния! О́ чистото́, обузда́ние очи́ма и все те́ло веду́щия от тмы в свет! О́ чисото́, те́лу удержа́ние, и порабоща́я е́, и к небе́сным теку́щия ско́ро! О́ чистото́, роди́тельнице любо́вная, и а́нгельское жили́ще! О́ чистото́, се́рдце чи́сто иму́щи и горта́нь сла́док, и све́тлая лице́м! О́ чистото́, челове́чески со а́нгелы ликоствова́ти сотво́ршия! О́ чистото́, боголю́бнаго Ио́сифа возне́сшия на земли́ чужде́й, я́ко прода́вшим его́ искупу́ет! О́ чистото́ Христо́ва, благодаре́ния испо́лнь су́щи, благода́ти и наказа́ния и ра́зума! О́ чистото́, приста́нище невла́емое, испо́лнь ми́рнаго утеше́ния! О́ чистото́, небе́сный смы́сле, и святы́м пропове́дание! О́ чистото́, ра́дость творя́щия се́рдцу, стяжа́вшему тя, и ду́шу претвори́вшия на небе́сная, бы́вшия ра́дости духо́вныя, и ско́рби побива́ющия! О́ чистото́, ненави́дящия зла, прилепля́ющи же ся блазе́м! О́ чистото́, стра́сти искореня́ющия, а безстра́стие сотворя́ющи! О́ чистото́, пра́ведныя просвеща́ющия, и скоротеку́щия к венцу́ вы́шняго зва́ния о Го́споде! О́ чистото́, бре́мя ле́гкое и вода́ми непотопля́емое, и бога́тство сокрове́ное в души́ челове́ка христолю́бца, и́же обря́щет се стяжа́вый во вре́мя потре́бования! О́ чистото́, стяжа́ние до́брое, и зверьми́ нескверни́мое! О́ чистото́, в руку́ ле́ности не иму́щия, и пренемога́ние прогоня́ющи! О́ чистото́, колесни́це небе́сная, стяжа́вшаго тя возводя́щия на высоту́! О́ чистото́, пребыва́ющия в душа́х кро́тких и смире́ных и сих Бо́жия челове́ки сотворя́ющия! О́ чистото́, процве́тшия я́ко цвет посреде́ души и телесе́, и весь дом испо́лньшия благоуха́ния! О чистото́, предте́ча и совсе́льниче Свята́го Ду́ха! О чистото́, Бо́га моля́щия и обетова́ния Его́ прие́млющия, и всем челове́ком обрета́ющи благода́ть. Сию́ возлюби́ша святи́и, сию́ бо возлюби́ Святы́й Иоа́нн Евангели́ст. И сию́ возлю́бль сподо́бися на пе́рсех возлещи́ Господу сла́вы. О чистото́, не то́кмо в при́сно Де́вых обрета́емая, но и в пока́ющыхся стяжи́мая!

Сию́ у́бо и мы возлю́бим всем се́рдцем, раби́ благослове́нии Бо́гом и Отце́м Го́спода на́шего Иису́с Христа́, я́ко да ра́дость сотвори́ Ду́ху Бо́жию живу́щему в нас, Ему́же сла́ва во ве́ки веко́в. Ами́нь.