А не воздержа́йся и не име́яй воздержания, во вся́ком безу́мстве удо́бь увя́знет. Не воздержа́йбося есть и по́хоти любя́й. Не воздержа́йбося, в словесе́х мно́зех ви́димь есть, на праздносло́вие и на буесть отвраща́ется, и на по́хоти бра́шныя тужи́т, и о многояде́нии, и о многопитии́ мужа́ется, на су́етная похоти раждиза́ется, и помысло́м повину́ется. По́хотию увяда́ет и в че́сти привиде́ния твори́т. Ели́ко же наче́н речьми́ же́нскими, весели́тся, в добро́тах благорумя́нства теле́снаго изнемага́ет вертя́ся: пред ли́цы ра́дуется, вдохнове́нием волхву́ет, в бесе́дах же́нских и смехотворе́нии приле́жен есть. В па́мять вече́рних привиде́ниих твори́т, и па́мять держи́т напису́я лица́ же́нска в се́рдцы, и вся ели́ко же есть к по́хоти влеку́щих, сих любяй по́хоти, воздержа́тель не сый, напису́ет си во у́ме, и помысло́м повину́ется, и а́ще ви́дит сицевы́й кни́ги что́мы о целому́дрии, се́тует. И а́ще ви́дит па́ки отца́ глаго́люща о по́льзе, уклони́тся и не тре́бует его́. А́ще ли ви́дит остроту́ отца́ при́сно седя́ ро́пщет. И а́ще о посте́ услы́шит, смуща́ется. О собо́ре бра́тии не весели́тся. А́ще же ви́дит же́неск пол, весели́тся, и тече́т на слу́жбе хотя́ бы́ти тогда́, и на пе́ние обря́щется гото́в и благоглаго́лив, да бы возмо́гл добро́ту и красоту́ показа́ти пред прилучи́вшимися жена́ми. В безмо́лвии же дряхл есть и не́мощен нари́чется. Окая́н же и стр́астен не име́я воздержа́ния по вся́кой ве́щи.

Те́мже бра́тия, слы́шавше плоды́ воздержа́ния и плоды́ невоздержа́ния бра́шнаго, бежи́м от него́, и прилепи́мся воздержа́нию, я́ко высо́ко мздовоздая́ние есть, и несть конца́ вели́чию его́. Блаже́н у́бо стяжа́вый воздержа́ние. Блаже́н сотвори́вый себе́ уны́ла о вся́кой де́тели, и потща́вся в де́лех до́брых просия́ти. Блажен и́же не сотвори́ е́же не уго́дно есть Бо́гови, но вся́кою и́стинною рабо́тал Ему есть, и во све́те вся дея́ния его́ бы́ша. Иже не госпо́дствова во вся́ком по́мысле сове́туя су́етных. И что сотворю́ аз, блажи́вый вся́ку детель, и ни во еди́ной же пожи́в, но вся ле́та моя́ зле расточи́х? Да и о мне сконча́ется напи́саное, обременя́ете челове́ки бремены́ тя́жкими, и ни еди́нем пе́рстом каса́етеся их.

Те́мже молю́ ва́шу любо́вь благословле́ницы Христо́ви и прича́стницы ра́йстии, вси потщи́теся, да уго́дни бу́дете Воево́де Христу́, и никто́же вас да не изве́ржен бу́дет я́ко неради́в и лени́в. И ели́ко же есть вас благода́тию Бо́жиею, под ярмо́м су́щим, внемли́те не твори́ти во́ли плотския́, да не без отве́та обря́щетеся пред стра́шным Суди́щем о́нем, иде́же же бу́дет возда́ние кому́ждо, ли бла́го или́ зло, е́же ко́ждо сотвори́л есть. Лю́те же мне тогда́, я́ко без дерзнове́ния хощу́ предста́ти. И что сотворю́ во он час в неутеши́мей беде́? Блаже́ни и́же тогда́ со дерзнове́нием предстоя́т Судии́, и́же хотя́т прия́ти свято́е воздая́ние от руку́ Госпо́дни. Го́ре же тогда́ стыдя́щимся, ма́лыя ра́ди и худы́я ве́щи. Я́коже се, что глаго́лю: Кий отве́т есть? Славолю́бием нари́чущуся, ли велича́нием, или непоко́рством, ли чревообъяде́нием, или́ безчествова́нием (безо́чством), ли пререка́нием, или́ горды́нею, ли влады́чествия ра́ди, или завиде́ния, или́ уби́йства ра́ди, или́ ре́вности де́ля, или́ рве́ния, ли наглоду́шия ра́ди, или́ клеветы́ ра́ди, ли сочбы́ ра́ди. Кий отве́т есть, лиши́тися сея́ ра́ди ма́лыя ве́щи хотя́щему нарещи́ся? Кий ли прибы́ток, или́ ка́я похвала́ от сих прибу́дет? Ка́я же тщета́ есть сия́ сохрани́ти?

Молю́ вы бра́тие, да никто́же вас ники́я же ра́ди ве́щи осужде́н бу́дет. От тя́жких бо грех ве́де Бо́га ра́ди воздержитеся. Но сего́ я́ко ма́лаго ко́ждо вас пре́зрит, и неради́т о нем, мня не бы́ти истя́зану о сем, и сего ра́ди уловля́ет вас диа́вол, твори́т бо ко́ждо вас презре́ти и не ради́ти ни о чесо́м же. Но внемли́те, да не в сих увя́знете, но вся́цем хране́нием соблюди́те себе́, да со Христо́м ца́рствуете: Тому́ подоба́ет сла́ва и честь и держа́ва во ве́ки веко́в. Ами́нь.