Люби́миче мой, а́ще сподо́бишися ра́зуму и разсужде́нию, или́ дарова́нию исцеле́нием. Блюди́ся, еда́ когда́ наде́яся дарова́ний, сконча́ешися без плода́. Да не рече́ши «поми́луй», и услы́шиши с шу́ими, «не ве́де вас». Пи́шет бо: Не всяк глаго́ляй ми Го́споди, Го́споди, вни́дет в Ца́рство небесное, но творя́й во́лю Отца́ моего. Мно́зи бо реку́т Мне в день он: Го́споди, Го́споди, не Твои́м ли и́менем бе́сы изгна́хом, и си́лы мно́ги сотвори́хом? И тогда́ испове́сть им, я́ко никогда́ же разуме́х вас. Отступи́те от Мене́ де́лающеи беззако́ние. Почто́ убо? Я́ко любве́ не сохрани́ша, я́коже пи́шет. Не любя́й у́бо бра́та своего́ его́же видя, Бо́га Его́же не ви́дя ка́ко мо́жет люби́ти? Глаго́лет бо и апо́стол: А́ще язы́цы челове́чески и а́нгельски возглаго́лю, любве́ же не и́мам, бых я́ко медь звеня́щи или́ кимва́л звяца́я. И а́ще и́мам проро́чество и ве́дети та́йны вся и весь ра́зум, и а́ще и́мам ве́ру всю я́ко го́ры преставля́ти, любве́ же не и́мам, ничто́же есмь. И а́ще ухлеблю́ все име́ние си, и а́ще преда́м все те́ло мое́ да сожгу́т мя, любве́ же не и́мам, никоея́ же ми по́льзы.

Любы́ терпи́т, блажи́т, любы не зави́дит, не оплазу́ет, не горди́тся, не злообразу́ется, не и́щет свои́х си, не раздржается, не по́мнит зла́го, не ра́дуется о непра́вде, радуетжеся о истине. Все терпи́т и всему́ ве́ру е́млет. Все упова́ет, все престрада́ет. Любы́ николиже не отпа́дает. Се слы́шал ли еси любимиче мой си́лу любве? Сию́ стяжи́ себе́ во всех де́телех свои́х, я́ко да прии́меши похвалу́ от Бо́га.

Молю́ же вы, люби́мая бра́тие, по́мните мя неключи́маго раба́, рекше непотре́бнаго, во благоприя́тных ва́ших моли́твах, я́ко словеса моя́ да не бу́дут на мя, в прише́ствие Го́спода на́шего Иису́с Христа́, ничто́же бо в себе́ до́бра свем, стра́шнаго жда дне Су́днаго, и огня́ завистию поя́сти хотя́ща проти́вныя. Но да даст и мне Госпо́дь вни́ти с ва́ми в Ца́рствие Его́ Того́ ра́дьма, я́ко Тому́ сла́ва во ве́ки. Ами́нь.