Глаго́лаху о не́коем бра́те, я́ко бы́вшу собо́ру во вре́мя неде́ли, воста́в по обы́чаю вни́ти в це́рковь, и поруга́ся ему́ диа́вол, глаго́ла к нему́ в по́мысле, я́ко ка́мо и́деши в це́рковь, да прии́меши хлеб и вино́ я́ко Те́ло и Кровь Христо́ву? Не руга́йся. Брат же ем ве́ру по́мыслу, не и́де в це́рковь по обы́чаю. Бра́тии же жду́щим его́, тако́в бо есть обы́чай пусты́ни тоя́, не творя́ху собо́ра ре́кше моли́твы, до́ндеже сни́дутся вся бр́атия. Ожида́ющим же его́ по мно́зе, и о́ному не прише́дшу. Не́цыи же от них воста́вше, идо́ша в ке́лию его́ глаго́люще, еда́ ка́ко боле́в брат у́мрет. И я́коже приидо́ша в ке́лию его́, и вопраша́ху его́, почто́ не прии́де в собо́р, бра́те. Он же стыдя́шеся пове́дати им. Рзуме́вше же они диа́воль злоко́зненый сове́т, падо́ша ему́ бра́тия на ногу́, со умиле́нием, да им испове́ст диа́воль сове́т. Он же испове́да им глаго́ля, прости́те мя бра́тие, якоже воста́х по обы́чаю ити́ в це́рковь, и рече́ ми по́мысл: Несть Те́ло и Кровь Христо́ва, ка́мо и́деши прия́ти хле́ба про́ста и вина́? И а́ще хо́щете да прииду́ с ва́ми, утверди́те ми по́мысл о святе́й просфо́ре. Они́ же ре́ша: воста́ни и гряди́ с на́ми, и помо́лимся Бо́гови, да ти помо́жет, и та́йную си́лу Свою́ неви́димую сходи́му яви́т. И воста́в прии́де с ни́ми в це́рковь. И бы́вши моли́тве к Бо́гу о бра́те, да яви́тся ему́ божественых Та́ин си́ла. И я́ко нача́ша соверша́ти собо́р, ре́кше моли́тву, поста́вивше же бра́та посреде́ це́ркви. Он же до отпуще́ния собо́ру, не преста́ слеза́ми умыва́я лице́ свое́.
По собо́ре же, ре́кше по отпуще́нии моли́твенем, призва́вше его́ отцы́ и бра́тия, вопраша́ху его́ глаго́люще, е́же ти показа́л есть Бог, пове́ждь нам, да и мы ся по́льзуем. Он же с пла́чем нача́т глаго́лати, я́ко егда́ бысть пра́вило пе́сненое, и прочте́но бысть апо́стольское уче́ние, и ста диа́кон почести́ свято́е Ева́нгелие, тогда́ ви́дех покро́в церковный отве́рст, и небе́с явля́ющася, и ко́еждо сло́во ева́нгельское я́ко огнь бысть, и явля́шеся до небесе́. И я́коже бысть сконча́ние ева́нгельское, преди́ поидо́ша кли́рицы от диа́кон, иму́ще боже́ственых Та́ин прича́стие. И ви́дех небеса́ отве́рста, и огнь сходя́щь со мно́жеством святы́х а́нгел: и верху́ их, и́не две Лице́ прекра́сне, ею́же несть мо́щно добро́ты испове́дати. Бе бо свет Ею́ я́ко м́олнии. И посреде́ двою́ Лицу́ мало Отроча́. А́нгели же ста́ша о́крест святы́я Трапе́зы, Ли́цы же О́не две верху́ стоя́ трапе́зы, и Отроча́ посреде́ Ею́. И я́коже бысть конча́ние боже́ственых Та́ин, прибли́жшеся диа́кони от кли́роса, преломи́ти хлеб предложе́ния. И ви́дех аз две Лице́, и́же бе́яху верху́ святы́я Трапезы, связа́вше ру́це и но́зе Отроча́ти Е́же бе верху́ Ею́. И име́ста ножь, и закла́ста Отроча́, и излия́сте кровь Его́ в ча́шу, я́же бе верху́ святы́я Трапе́зы. И содроби́вши Те́ло Его́, положи́ста верху́ хле́ба. И бысть хлеб Те́ло. Тогда́ помяну́х апо́стол глаго́люща: И́бо Па́сха на́ша пожре́ся Христо́с. И я́коже прибли́жишся бра́тия прия́ти святы́я просфо́ры, и дая́шеся им Те́ло. И я́коже призыва́ху глаголюще: Ами́нь - и бысть хлеб в рука́х их. И аз я́коже приидо́х прия́ти, да́стьмися Те́ло. И не моѓох его́ прия́ти. И слы́шах глас во у́шию мое́ю глаго́лющь ми: Челове́че, что ра́ди не прии́меши? Несть ли се, его́же сниска́л? И рех: Ми́лостив ми бу́ди Го́споди, я́ко Те́ла не могу́ прия́ти. Па́ки же рече́ ми: А́ще бы могл челове́к Те́ло приима́ти, Те́ло бы ся обрета́ло, я́коже и ты обре́те. Но никто́же мо́жет Те́ла приима́ти: сего́ ра́ди повеле́ Бог бы́ти хлебо́м предложе́ния. Я́коже бо испе́рва Ада́м рука́ма Бо́жиима бысть плоть, и вду́ну вонь дух живо́тен, и плоть отлучи́ся в зе́млю, дух же пребы́сть в нем. И ны́не Христо́с, Свою́ плоть со Святы́м Ду́хом и́мать, плоть же милосе́рдует в человеќа, Дух же стои́т в се́рдцы: да а́ще ве́руеши, приими́ е́же и́маши в руку́. И я́ко рех: Ве́рую Го́споди, и се ми ре́кшу «Ами́нь», бысть Те́ло е́же бе в руку́ мое́ю хлеб. И похвали́х Бо́га, прия́х святу́ю просфо́ру. Егда́ же собо́р отпе́, и приидо́ша кли́рицы вку́пе, и ви́дех па́ки Отроча́ посреде́ двою́ Лицу́, а кли́рицы сотребля́юще да́ры. И ви́дех покро́в церко́вный отве́рст, и боже́ственыя си́лы вознося́щася на небеса́, и Отроча́ посреде́ Лицу́.
Сия́ слы́шавше братия, и мно́го умиле́ние прие́мше, отъидо́ша в ке́лии своя́, восыла́юще сла́ву Бо́гу Отцу́. Ами́нь.