Лове́ц всех благи́х, исто́чник исцеле́нием и сокро́вище щедро́там, Ты Еди́н Благи́й Бог и Милосе́рдый, да́руяй при́сно блага́я и́щущим Тебе́. Поне́же и аз сам све́де ча́сто блага́я исцеле́ния, и да́ры снеда́емыя по вся дни. И сего́ ра́ди стыдя́ся молю́тися Христе́ Бо́же незло́бивый, да прии́дет на мя благода́ть Твоя́, я́ко да совокупи́т по́мысл мой и исцели́т та́йныя моя́ стру́пы. Се бо напа́сти и глумле́ния окая́нней мое́й души́, обновля́ют при́сно лю́тыя моя́ стру́пы и не дадя́т ми спасти́ся.
Сам же Долготерпели́ве исцеля́я благода́тию и щедро́тами, исцели́ я́ко Милосе́рд, ча́стыя моя́ боле́зни мне гре́шному. Аз же мзды проти́ву целе́нием Твои́м не мого́х возда́ти, Влады́ко. Твоя́ бо исцеле́ния отку́ду хотя́т цену име́ти? Ни не́бо, ни земля́ не мо́жет возда́ти. Досто́йно воздая́ние проти́ву исцеле́нием. Суть же исцеле́ния Твоя́ благосты́ни мно́гия Твоея́ щедро́ты.
Те́мже не мо́жется пода́ти исцеле́ние небе́сное свято́е ине́м ниче́мже, цены бо не и́мать. Слеза́ми же подае́ши е́ Спа́се, и пла́чем го́рьким да́руеши си всем. Кто убо не чуди́тся? Кто же ли не удиви́тся? И кто у́бо не просла́вит? Кто ли не благослови́т мно́гаго милосе́рдия Твоего́ и благосты́ни, Спа́се душ на́ших, я́ко изво́лил еси́ прия́ти слеза́ми мзду, проти́ву Твои́м исцеле́нием?
О́ си́ло слез, до коли́ка доспе́ла еси́ в са́мое то не́бо, со дерзнове́нием мно́зем вошла́ еси́ невозбра́нно. О́ си́ло слез, я́ко вси а́нгели со все́ми си́лами ра́дуются о твое́м дерзнове́нии. О́ си́ло сле́зная, коли́ко мо́жеши а́ще хо́щеши, мо́жеши пред святы́м и высо́ким престо́лом Пречи́стаго Влады́ки предстоя́ти в ра́дости. О́ си́ло слез, я́ко в мгнове́нии оче́снем от земли́ на небеса́ воспари́ши и твоя́ проше́ния прие́млеши от Бо́га: са́мо бо сокро́вище ще́дро Бо́жиих сря́щет тя, ти́хо нося́ отпуще́ние.
Да́руй у́бо Влады́ко мне недосто́йному сле́зы всегда́ на просвеще́ние се́рдцу, да просвети́в се́рдце, источу́ исто́чник слез со сла́достию в моли́тве чи́сте, я́ко да потреби́тся вели́кое пи́смя мои́х грехо́в, в слеза́х ма́лых, и да угаси́т та́мо ма́лым сим пла́чем огнь паля́щий. А́ще бо зде пла́чуся, та́мо изба́влюся огня́ негаси́маго, я́ко бо всегда́ раздража́ю Влады́ко пред очи́ма Твое́ долготерпе́ние и милосе́рдие, мое́ю го́рестию. Да победи́т благода́ть Твоя́ Твои́м долготерпе́нием мою́ го́ресть. И́бо и пти́цы во мно́зе милосе́рдии пита́ют чада, и отмета́тися свои́х чад не рача́т, ниже́ презре́ти их, я́ко побежда́еми быва́ют свои́ми утро́бами. То а́ще пти́цы си́це суть милосе́рды, кольми́ па́че Влады́ко побежда́ет благода́ть Твоя́, мно́гими щедро́тами поми́ловати вся Тебе́ и́щущим. Та́кожде же и ма́ти укаря́ема отроча́тем свои́м, не терпи́т душа́ ея́ презре́ти его́, и́мже побеждена́ бысть от своея́ утро́бы. И а́ще покори́тся яко побежда́ема свое́ю утро́бою, кольми́ па́че благода́ть Твоя́ Влады́ко Душелю́бче, всегда́ побежда́ема быва́ет от свои́х щедро́т, спасти́ и поми́ловати жела́ющих Тебе́ при́сно. И поне́же держи́мь есмь нечи́стым враго́м стужа́ющим ми при́сно, возопию́ в нощи́ и во дне ко Твоему́ милосе́рдию, я́ко да изба́виши мя от бра́ни его́. Кто бо мо́жет понести́ лука́ваго начина́ния, а́ще усту́пит от мене́ в мгнове́нии благода́ть Твоя́ Влады́ко? По вся бо часы́ стужа́ет души́ мое́й. Си́ла Твоя́ Христе́, запреща́ет волна́м морски́м: да запрети́т ему́, да ся бы упраздни́л от мене́ раба́ Твоего́. Поне́же у́бо всегда́ на мне обновля́ет ко́зни своя́, тщи́тбося влады́чествовати мои́м помысло́м и отврати́ти хотя́ ум мой от Твоея́ сла́дости и до́браго поуче́ния боже́ственых Твои́х за́поведей. Посли́ Влады́ко Твою́ благода́ть вско́ре, да отжене́т от раба́ Твоего́ змия вели́каго, со все́ми по́мыслы сту́дными и лука́выми.
При́тча Твоя́ да препри́т Тя, о́ Влады́ко: рекл бо еси́, во гра́де е́тере судию́ су́ща, Бо́га не боя́щася и челове́к не срамля́ющася, и в то́мже гра́де бе вдови́ца ни́ща, приходя́щи к нему́ и глаго́лющи ему́ всегда́: мсти мене́ про́чее от супе́рника моего́. По вре́менех же дово́льнех презря́ немилосе́рдый при́сно скорбя́щую, а не на пра́вое навести́ хотя́ при́ вдови́чи, но возмо́же вознести́ся терпе́ние вдови́цы. О́на бо вдови́ца к немилосе́рдому и к беззако́нному судии́ прихожда́ше, да мстит ея́ от супе́рника ея́. Аз же к Тебе́ припа́даю Влады́ко мой, Милосе́рдому и Долготерпели́вому Благу, иму́щу на небеси́ и на земли́ послу́шати вско́ре, уста́ боже́ственая и свята́я. Не ложь бо нарече́тся Бог благослове́н, я́коже рекл еси Спа́се, и сотвори́ вско́ре мще́ние всем, на Тя упова́ющим в нощи́ и во дне.
Влады́ко, не закосни́, в мое́ мще́ние, изми́ мя от враг мои́х, и к себе́ напра́ви мя, я́ко да врага́ побежду́ Твое́ю благода́тию, и Тебе́ еди́наго просла́влю, и Тебе́ еди́наго благословлю́, Милосе́рдаго и терпели́ваго, хотя́щаго спасти́ вся челове́ки. Поне́же оскуде́ вре́мя живота́ моего́ в суете́ и в по́мыслех злых скве́рных. Нарцы́ ми врачева́ния, да исцелю́ та́йныя моя́ стру́пы. И укрепи́ мя, я́ко да де́лаю поне́ во еди́н час приле́жно во Твое́м винограде в годи́ну пе́рвую на́десяте. Вре́мя живота́ моего́ су́етнаго про́чее у́бо приближа́ется: наста́ви кора́бль моея́ ку́пли, Твои́ми за́поведьми, и да́руй ра́зум немощному купцу́, да купу́ет свою ку́плю до́ндеже вре́мя и́мать. И́бо кора́бль пловы́й доспе́л есть на коне́ц, а на купца́ вели́ка зима́ пости́гла есть, и вре́мя позыва́ет мя глумя́щагося: Прииди́ и покажи́, о́ лени́ве, всю ку́плю вре́мене живота́ своего́. И годи́на сме́рти страши́т мя окая́ннаго. Зрю бо дела́ моя, и трепе́щет ми душа́, и ви́жу нераже́ние моея́ ле́ности, и движа́т ми вся ко́сти. Годи́на бо разлуче́нию пришла́ ми есть пред очи́ма, и зело́ убоя́хся разуме́в ю́: в ра́дости моея́ ме́сто бою́ся. Не сотвори́в ей досто́йных дел мои́х к благода́ти. Страх бо вели́к есть в годи́ну сме́рти, всем гре́шником мне уподо́бившися. И па́ки ра́дость есть в годи́ну разлуче́ния всем пра́ведным и всем святы́м, и всем воздержавшимся. Па́ки же печа́ль есть годи́на разлуче́нию, неприлежи́вым и сла́бым. Егда́ воспомя́нут свою́ ле́ность и неприлежание, мину́вшаго вре́мене живота́ их. Лю́те му́чит ле́ность се́рдце челове́ку, облени́вшемуся о свое́м спасе́нии. О том стра́се сме́ртнем и разлуче́нии есть муче́ние с пока́знию ему́. Па́ки же праведнии ра́дуются и святи́и и воздержа́щиися, в час сме́рти и разлуче́ния, ви́дяще пред очи́ма труд вели́кий своего́ воздержа́ния, бде́ния и слез, поста́ и моли́тв, на земли́ лега́ния и вре́тищь: и весели́тся душа́ их, я́ко на поко́й приготовля́ется изы́ти от своего́ те́ла. Стра́шно же есть прише́ствие гре́шником и сла́бым сме́ртное, и не тща́щимся, и неве́дением хотя́щим в житии́ сем су́етнем. И ка́ко несть стра́шна и ско́рбна годи́на сме́ртная челове́ку гре́шну? Не отпу́стит бо ся ему́ весьма́ что отвеща́ти.
У́ лю́те мне! У́ лю́те мне, душе́ моя! Что ра́ди лени́шися, жи́зни радьма ве́чныя? Почто́ глу́мствено живе́ши дни своя́ ма́лаго сего вре́мене? Не ве́си ли я́ко внезапу буде зва́ние твое́? И что сотвори́ши тамо, зде облени́вшися, пред суди́щем стра́шнаго Судии́? Кий отве́т и́маши отвеща́ти? Ка́ко кра́дет тя враг. Не разуме́еши ли окая́нне, ка́ко па́ки кра́дет небе́сное бога́тство по вся дни? Не ве́си ли глумниче́? Воспряни́, воспряни́, о́ ду́ше, в годи́ну бра́ни! Помоли́ся Богови со слеза́ми моля́ся Ему́. Возопи́й к Богу с жела́нием сердца, и а́бие по́слет ти в по́мощь а́нгела ми́лостива, и свободи́т тя от тоя́ бра́ни и смуще́ния вра́жия. Потщи́ся не впа́сти в годи́ну разлуче́ния, в скорбь и воздыха́ние, и пла́катися и́маши без по́льзы в ве́ки веко́м. И приидут вся в твою́ мысль годи́ну о́ну. И рече́ши в себе́ рыда́я лю́те: Аз по вся часы́ сия́ вся помина́х, и сведе́тельствуя в себе́ глаго́лах, да прейду́ дни своя́, я́же есмь на земли́, да не согрешу́, ниже́ па́ки да отпаду́ за́поведи Бо́жия, но да творю́ Ему́ всегда́ уго́дная во мно́зе прилежа́нии. Ны́не же обрето́хся тощь, и не имы́й весма́ ни еди́наго же исправле́ния до́бра.
Прииди́ у́бо в себе́ душе́, и подвиза́йся. Ча́сто бо́йся всегда́, возлюби́ си Иису́са и угоди́ Ему́ дея́нии благи́ми, да егда́ прии́дет годи́на сме́рти и разлуче́нию, обря́щет тя благоприле́жна с ра́достию вели́кою прие́млющи тя. Поразуме́й о свое́м житии́ и о зва́нии Бо́жии. Годи́на бо разлучен́ию не оскорбля́ет свобо́днаго, свободи́вшагося от земны́х веще́й, но оскорбля́ет смерть му́жа гре́шника, оскорбля́ет и глумника́, оскорбля́ет и неопа́сиваго, оскорбля́ет лени́ваго, облени́вшагося сотвори́ти уго́дная Бо́гови. Оскорбля́ет многостяжа́вшаго и привяза́вшаго ду́шу свою́ ве́щех мирски́х. Оскорбля́ет бога́таго, я́ко разлуча́ет его́ от жития́ нево́лею. Оскорбля́ет и отца́, я́ко разлуча́ет его́ чад люби́мых и бога́тства. Оскорбля́ет и жити́йскаго. Оскорбля́ет и братию, я́ко разлуча́ет я́ от себе́ в пла́чи. Си́и у́бо вси печа́льни суть в годи́ну сме́ртную, поне́же привя́зани суть в ве́щех мирски́х. Ты же что ра́ди печа́луешися и воздыха́еши, о́ душе́, свобо́дь су́щи и ми́ра удали́вшися и его́ веще́й? Си́це пребыва́й всегда́, я́ко наречена́ свобо́дь, и ходи́ приле́жно путе́м Госпо́дним, творя́щи вседу́шно уго́дная Ему́. А́ще прилепи́шися Бозе от всея́ души́, не и́маши боя́тися никогда́ часа́ сме́ртнаго, но па́че, смерть и разлучен́ие теле́сное ра́дость ти бу́дет.
Спаси́ мя Долготерпели́ве. Спаси́ мя, Сы́не Бо́жий Безгре́шне Христе́, и да́руй ми Спа́се поуче́ние ве́чныя жи́зни, я́ко да не и́мам на мое́м се́рдцы ра́зве и сея́ печа́ли, да бых Твою́ во́лю соверши́л всегда́, благода́ти Твое́й поспешеству́ющи мне гре́шному. И да бу́ду благоприле́жен к Твои́м за́поведем, да ку́плю сотворю́ до́бру сре́бреником, и́же Сам дасть ми Царь Небе́сный, и до́брую ку́плю до́бре сотворю́ в виногра́де Твоем Спа́се, похвалу́ получу́ от Тебе́ Влады́ко, и реку́ пред все́ми с ра́достию се́рдца, егда́ прии́деши Го́споди, блаже́н ся нари́чу, я́ко прише́л еси́ Влады́ко, оде́я мя одея́нием досто́йным, на бра́ки Безсме́ртна Жениха, е́же стяжа́х аз Твое́ю благода́тию. Вожгу же и свещу́ ю́же ми дарова́ благода́ть Твоего́ долготерпе́ния Христе́, и изы́ду с ра́достию в сре́тение Твое́, сла́вя и благословля́ Жени́ха небе́снаго, я́ко да сподо́блюся соприча́стник бы́ти пра́ведником, и святы́м Твои́м угоди́вшим Ти во веки веко́м. Аминь.