Послу́шай апостола глаголюща: хоте́л бых да бы́ша вси челове́цы были я́коже и аз есмь, но ко́ждо свой дар и́мать: ов си́це, ин же си́це. Не ра́вно положи́ слово: поне́же бы рекл, ов си́це, ин же си́це. Я́ве яко к жити́йским и ко употакти́том (си́речь, поднача́льным), ре́кше к бельце́м, и к чернеце́м. Разли́чно твори́т, реки́й: Ко́йждо свой дар и́мать от Бо́га, ов си́це, ин же си́це. Ни жити́йским возбрани́л есть зако́нно жени́тися, ни употакти́том отъя́л есть воздержа́ние. Рек, ов си́це, ин же си́це, жити́йским бо вели́т глаго́ля: детораще́ния ра́ди ко́ждо свою́ жену́ да и́мать. И па́ки че́стен брак всем и ло́же нескве́рнено. Блуднико́м же и прелюбоде́ем су́дит Бог. Употакти́том же ре́кше в покоре́нии живу́щим положи́ им воздержа́ние, е́же рече́: Всяк подвиза́яйся, да всегда́ воздержи́тся. Две бо бра́ни поста́вило есть сло́во, яќоже пре́жде реч́е. И ты у́бо мни́ше разуме́й, в кий чин поручи́лся еси. И что зна́мение в не́же оболче́н еси́, и чи́я моли́твы обеща́ния, в ня́же обеща́лся еси́ Бо́гови. Проти́ву бо сим и сло́во возда́си. Рече́ бо Госпо́дь: Усты́ твои́ми сужду ти, рабе лука́вый.

Я́коже у́бо пре́жде ре́хом, жити́йским зако́нно повеле́ жени́тися. Употакти́том же воздержа́тися, поне́же са́ми поручи́шася. А́ще бо бы повеле́ло сло́во всем жени́тися, лу́чше нежели раждиза́тися, то не бы никто́же соде́лал де́тели сея́. Ни Илия́ фесви́тянин, ни Елисе́й, ни Иоа́нн. И ели́коже скопи́ша себе́ Ца́рствия ра́ди небе́снаго. Ни сам же апо́стол не бы ся воздержа́л, а́ще не бы ся озира́л на мздовоздая́ние. Ниже́ да ключи́т ны ся глаго́ля, я́коже не́цыи вину́ творя́т. Ре́ша бо они́ пра́ведни бе́ша, аз же гре́шен есмь. Пра́ведни убо сотвори́шася, я́ко пра́ведно пожи́ша свою́ жизнь.

Что у́бо рече́м? Я́ко пра́веднии безпло́тни ли бе́ша? Еда́ и ти́и пло́тию не бе́ша ли оболче́ни? Послу́шай апо́стола глаго́люща: Во пло́ти ходя́ще, не плотска́я во́инствуем: ору́жия бо во́инства на́шего не пло́тска, но си́ла Бо́жия на очище́ние тве́рдем. Я́ве я́ко и ти́и побежда́хуся я́ко плоть нося́ще, но проти́ву подвиза́хуся.

Те́мже то́йжде глаго́лет: Удержу́ те́ло мое́ и порабощу́ е́. Еда́ ка́ко ине́м пропове́дав сам непотре́бен бу́ду. Наставля́я же ны к де́тели сам глаго́лет: Подо́бни ми быва́йте, я́коже и аз Христу́.

Во́нмем у́бо бра́тие, еда́ когда́ похоте́ние свое́ сконча́ти хотя́ще, апо́стольскую за́поведь напи́шем ви́нну, си́лы словесе́ не разуме́юще. И́мже пи́шет, душа́ лука́вы прельща́ются во гресе́х. Что же бра́те слы́шал еси́? Лу́чше жени́тися, не́жели раждиза́ти? Или́ не слы́шал еси́, е́же прино́сит глаго́ля. Вре́мя после́днее есть, да иму́ще и жены́ я́ко не иму́щеи бу́дут. Прехо́дит бо о́браз ми́ра сего́. Те́мже мни́ше, не отмещи́ся дарова́нныя ти сея́ благода́ти. Не ослу́шайся его́ глаго́люща к теб́е́ апо́столом. Не лени́ся о благода́ти твое́й да́ней ти, еда́ когда́ престу́пника себе́ обря́щеши. Созида́я па́ки я́же раздруши́л еси́. Но возда́ждь Го́сподеви моли́твы твоея́, я́коже пи́шет. У́не есть не помоли́тися, не́жели помоли́тися и не возда́ти. Подвиза́йся у́бо сконча́ти тече́ние твое́ зако́нно, я́ко да и́маши дерзнове́ние. Ку́пно по апо́стольску глаго́лу: До́брым подвиза́нием подвиз́ахся, тече́ние сконча́х и веру соблюдо́х. Те́мже предлежи́т ми пра́ведный вене́ц, и́же возда́ст ми Госпо́дь в день он пра́ведный Суди́й. Не то́кмо же мне, но и всем возлю́бльшим явле́ние Его́. Ами́нь.