Прииди́те в себе́ бра́тия моя́, и послу́шайте вси сове́та моего́, гре́шнаго и ненака́занаго Ефре́ма. Уже́ бо пости́гл ны есть, о́ бра́тие, день он стра́шный и вели́кий. А мы люби́мицы глуми́мся, не хо́щем у́бо ны́не воспряну́ти в ма́лое се вре́мя, и потща́тися к Бо́гу. Се бо дни́е лет на́ших и ме́сяцы, яко со́ния прехо́дят, и я́ко сень к ве́черу. Да прии́дет вскоре стра́шное и вели́кое прише́ствие Христо́во. Вои́стину бо стра́шен есть и вели́к день он, гре́шником и не хоте́вшим сотвори́ти во́ли Бо́жия, и спасе́ным бы́ти. Молю́ вы у́бо бра́тия моя́ блаже́ная, прииди́те отве́рзем печа́ль земны́х веще́й: вся бо мимоиду́т, и вся изче́знут. И́но бо ничтоже по́льзует ны в годи́ну ону, но то́кмо дела́ блага́я я́же отсю́ду и́мамы. Хо́щет бо ки́йждо нас почести́ своя́ делеса́ же и глаго́лы, пред суди́щем Судии́ стра́шнаго. Вострепе́щет бо се́рдце и у́дове изменя́тся, егда́ же бу́дет та́мо дея́нием явле́ние, помысло́м же и ре́чем.

Вели́к страх бра́тия моя́, вели́к тре́пет о́ дру́зи. Кто у́бо не вострепе́щет, возрыда́ет же и пла́чет, я́ко та́мо явя́тся я́же сотвори́л есть в та́йне и во тме. Разуме́йте бра́тие. Се е́же глаго́лю вам, даю́ вы изве́ство ва́шей любви́, плодови́та дре́ва, я́ко вну́треняя их во вре́мя предлага́ют плоды́ с ли́ствием, а не вне́шняя. Отню́дуже оде́ются древеса́ свое́ю ле́потою. Вну́треняя бо их повеле́нием Бо́жиим предлага́ют плод, ки́йждо по естеству́. Та́ко и в день он стра́шный, предлага́ют вся телеса́ челове́ческая, вся я́же сотвори́ли суть блага́я же и лука́вая, и понесе́т ко́ждо пред суди́щем Судии́ стра́шнаго, делеса а́ки плод, ре́чи же а́ки ли́ствие. Пра́ведницы но́сят плод добр и красе́н, святи́и но́сят плод добр и благоцвету́щь, му́ченицы но́сят му́ки и ра́ны, похвалу́ терпе́нию, чернецы́ но́сят покоре́ние, воздержа́ние, бде́ние и моли́твы. Му́жи же гре́шницы нечести́вии и скве́рницы, но́сят та́мо плод студови́т и гнил, испо́лнь сущь смра́да, пла́ча же и рыда́ния, че́рви не усыпаю́ща, во огни негаси́мем.

Стра́шно о́ бра́тие всем та́мо суди́ще, я́ко без по́слуха яви́тся вся, дела́ же и ре́чи, по́мыслы же и похоте́ния. Егда́ предстоя́т тмы тма́ми, и ты́сяща ты́сящами, а́нгел и арха́нгел, херуви́м и серафи́м, пра́ведных и святы́х, проро́к и апо́стол.

Что у́бо лени́мся бра́тие люби́мая? Врем́я приспе́ло есть, и день прибли́жился есть. Егда́ та́йны на́ша Стра́шный Судия́ на свет изведе́т вся. И а́ще бы́хом ве́дали братие, что нам предлежи́т, пла́калися бы́хом всегда́, во дне и в нощи́ Бо́гу моля́щеся, да изба́вит ны студа́ о́ного и тмы кроме́шняя. Заткну́т бо ся уста́ гре́шнику пред суди́щем, вострепе́щет бо вся тва́ри, и ти́и чи́нове святы́х а́нгел, от сла́вы о́ноя прише́ствия Его́. Что у́бо речем Ему́ в день су́дный? А́ще вре́мя се погуби́м ле́ностию бра́тие. Сам бо долотерпи́т, и вся ны зове́т во Свое́ Ца́рство, и сло́ва от нас взы́щет, о ле́ности ма́лаго сего́ вре́мене, и Сам рече́т нам: Вас ра́ди воплоти́хся, и вас де́лма на земли́ яви́хся, вас ра́ди ра́ны прия́х, вас де́лма зауше́н бых, вас ра́дма заплева́н бых, и вас де́лма ра́спят бых на дре́ве. Вас ра́дьма о́цта напое́н бых, да вы сотворю́ свя́тцы небе́сныя. Мое́ Ца́рство дах вам, мой рай дарова́х вам, вся вы нареко́х бра́тию Себе́, Отце́ви принесо́х себе́, Дух посла́х. Бо́ле сего́ всего́, что име́х сотвори́ти и не сотвори́х, да вы спасе́теся. То́кмо во́ли ва́шея не хощу́ ну́дити, да не ну́ждно бу́дет вам спасе́ние. Рцы́те гре́шницы ме́ртвы по естеству́ су́ще, что вы пострадасте Мене́ ра́ди Влады́ки, пострада́вшаго вам ра́ди? Се уже́ уготов́ано есть Ца́рство и жизнь, поко́й и ра́дость, и мука ве́чная во тме кроме́шней, иде́же хо́щет ко́ждо вас ходи́ти о себе́. Свое́ю вла́стию ходи́те.

Прииди́те вќупе пла́чемся, и поклони́мся вси пред Го́сподем сотво́ршим ны, глаго́люще: О́ Влады́ко, сия́ вся я́ко Бог претерпе́л еси́ нас ра́ди. Мы же гре́шницы отме́щемся всегда́ благода́тей Твои́х. Ты же Бог Сый безнача́лен естество́м, непостижи́мь, безстра́стен, без сумне́ния показа́ла есть Твоя́ благода́ть стра́сти ра́ди кре́стныя, спасти́ся всем гре́шником све́дущим. Дарова́в им просвеще́ние ра́зума. Что ти у́бо возда́ст род гре́шный, Бо́же непостижи́мый, Бла́же и Милосе́рдый? И́же нарица́хуся предложе́нием нечести́ви, не по естеству́ же пре́жде у́бо нам спасти́ся есть, нечести́в бо нарица́шеся весь род наш. И па́ки по сем гре́шницы быхом, на́шим предлежа́нием. Сам же о Влады́ко, Сам сый всегда́ Благ и Милосе́рд, стра́шен и сла́вен веко́м Творе́ц. И терпи́ши искони́ зло́бивое стропта́ние на́ше. Многих ра́ди щедро́т Твои́х, я́же показа́л еси́ нам Сы́ном Челове́ческим. Побежде́н быв Бог Сый от любве́ Своея́ и святы́х щедро́т, бесе́довавый на кресте́, спасе́ния ра́ди всея́ Вселе́ныя от Своея́ благода́ти.

Се рещи́ пред сла́вою Твое́ю, а́ще не бы побежде́н был Свои́м милосе́рдием Христе́. Себе́ не бы пре́дал на же́ртву и на приноше́ние за гре́шники. Испо́лнися Влады́ко ум раба́ Твоего́, от сла́дости благода́ти и любве́, и всегда́ слади́тся, всегда́ просвеща́ется, и ча́сто утвержда́ется, и всегда́ отмета́ется, и на го́ресть его́ прелага́ет, не хотя́ при́сно име́ти его́ сла́дости своего́ Влады́ки. Иису́се Единоча́дый, и Заре́ О́тча, Све́те Живы́й неприкоснове́нный, Све́те непостижи́мый, просвеща́яй благода́тию Свое́ю всю вселе́ную, просвети́ и во мне су́щии омраче́неи ми о́чи, сокрове́не бо еста́ во тме омраче́неи о́чи. Просвети́ ею́ при́сно благода́тию и щедро́тами, да не омрача́стася от губи́теля мра́ком. Уподо́билбося есть Влады́ко, не́мощный ум наш новосажде́ну дре́ву, яко тре́бует всегда́ дыха́ния водна́го, та́ко и ум наш не́мощен сый, безпреста́ни тре́бует от Твоея́ благода́ти просвеще́ния и утвержде́ния. Сло́во Твое́ Го́споди отве́рзи о́чи слепцу́ из ма́тере роди́вшуся. Вели́ко чу́до Влады́ко бысть в Силоа́ме, слепцу́ прозре́вшу теле́сныма очи́ма. Да просвети́тся вну́трений о́чию ум, е́же пропове́дати без стра́ха Твоя́ щедро́ты, Бо́га су́ща и Спа́са. Просвети́ мои очи серде́чнеи Влады́ко в любовь Твою́, жела́нием соверши́ти во́лю Твою́, поне́же Силоам далече нас отстои́т. (И) ча́ша стра́шныя кро́ви Твоея, исполнь есть Све́та и жи́зни. Сию́ нам да́руй, ра́зум и просвеще́ние, да с ве́рою и с любо́вию и просвеще́нием присту́пим к ней. Да бу́дет нам оставле́ние грехов, а не во осужде́ние. Приступа́яй бо недосто́йне к боже́ственым Та́йнам, ду́шу свою осужда́ет, не очи́стив себе́ Царя́ прия́ти во свой черто́г. На́ша бо душа́ неве́ста есть свя́та безсме́ртнаго Жениха́. Брак же той нари́чется боже́ственыя та́йны, ядо́мыя а́лчущими во святе́й души́. Внимай у́бо себе́ при́сно, черто́га своего́ без скверне́на соблюсти́. И восхощи́ прия́ти Христа́ Царя́ небе́снаго Жениха́, да в день прише́ствия Его́ оби́тель сотвори́т в тебе́, со Свои́м Отце́м, и пред святы́ми а́нгелы похвала́ ти бу́дет. И в рай, со сла́вою вели́кою и ра́достию вни́деши. Не и́щет бо Бог от тебе́ ничто́же о́ бра́те, ра́звие спасе́ния. А́ще ли же ты лени́шися, не хотя́ спасе́н бы́ти, ни путе́м Бо́жиим ходи́ти, ни за́поведи Его́ не хо́щеши соверши́ти, себе́ убива́еши, и себе́ измета́еши небе́снаго черто́га. Бог Святы́й еди́ный без греха́, Сы́на Своего́ Единоча́даго не пощаде́. Ты же сам окая́нне себе́ не поми́луеши.

Воспряни́ у́бо от сна твоего́ поне́ ма́ло, о́ изможда́ле! Отве́рзи уста́ своя́ и моли́ся Ему́. Отве́рзи у́бо от себе́ грехо́вную тя́гость, и поми́луй себе моля́ся ча́сто. И пла́чися непреста́нно. Бежи́ сла́бости, возненави́ди уны́ние, да омерзи́т ти лука́вствие. Люби́ кро́тость, восхощи́ воздержа́нию, черне́честву и безмо́лвием. Поуча́йся пе́нию, потщи́ся о́ бра́те, до́ндеже вре́мя есть. Возлюби́ Бо́га от всея́ си души́, я́коже и тебе́ возлюби́л есть. Бу́ди це́ркви Бо́жия, и всели́тся в тя Бог Вы́шний. Душа́ бо име́ющи Бо́га в себе́, це́ркви нари́чется свя́та и чиста́, и боже́ственыя та́йны служа́тся в ней, и тща́тся при́сно си́лы небе́сныя посети́ти ея́, поне́же Госпо́дь всели́лся есть в ду́шу. А́нгели и небеса́ веселя́тся о ней, и тща́тся почести́ти ду́шу. Поне́же це́ркви нари́чется влады́ки их, блаже́н челове́к и́же Бо́га возлюби́ от всея́ души́ своея́, и возненави́де ми́ра и я́же в нем. Да то́кмо и́мать своего́ Влады́ку до́браго би́сера, скро́вища живо́тнаго ненасы́тимаго Бо́га. И иже сице лю́бит Бо́га всем се́рдцем, тому́ на земли́ несть ум, но горе́ всегда иде́же и возлюби́л есть. Душа́ бо восхоте́ла есть, и́же ждет ум, и отту́ду наслажда́ется, отту́ду насыща́ется сла́дости при́сно любве́ Бо́жия. Рад́ости и сла́дости испо́лнь есть вои́стину любы́ Бо́жия, и блаже́н есть вкуси́вый ея́, и ненасы́тивыйся ея́ от сла́дости любве́ Бо́жия. Кто у́бо мо́жет изрещи́ ея́ досто́йная? Павел апо́стол вкуси́ от нея́ и насы́тився ея́, сам вопие́т и глаголет: ни горе́ высоты́, ни до́ле глубины́, ни сама́ жизнь, ни хотя́щия бы́ти па́ки сме́рти, ни вси а́нгели, ни нача́ла, ни вла́сти, ни и́на кото́рая тварь, и вся вку́пе не мо́гут разлучи́ти от любве́ Бо́жия. Душа́ вкуси́вшия сла́дости его́, огнь безсме́ртен есть любы́ Бо́жия. Соде́ловает же в души́ возлюби́вшей Бо́га, све́тлая дела́ та и чу́вствия ея́ возно́сят от земли́ и ненави́дит земны́х. Самого́ то́кмо зрит Бо́га, Его́же возлюби́. И уча́т ны святи́и мученицы вкуси́вшее я́, и не насы́тившеся от нея́, соу́з мя́гок есть любы Бо́жия, и не мо́жет мечь обою́ду остр отсещи́ ея́. Отсека́ху бо мучи́тели у́ды святы́м, любве́ же их не можа́ху отсещи́. О́ мя́гкий соу́з любве́ Бо́жия! Испо́лнь сый чуде́с не могий ся отреши́ти. Мечь ея́ не отсече́, и огнь ея́ не раста́я. У́дове отсека́хуся, любы́ же не отсека́шеся. Паля́ху у́дове, у́зы же любо́вныя не реша́хуся. Потопля́хуся па́ки телеса́ святы́х, любы́ же их не потопля́шеся. Свя́зоваху па́ки телеса́ преподо́бных, любы́ же их не свя́зана бысть весма́. Кто у́бо не диви́тся мя́гкому сему́ соу́зу любо́вному, и́же не отсека́ется никогда́же, ниже́ па́ки реши́тся. И́же у́бо возлю́бит Бо́га всем се́рдцем, сицеву́ любо́вь имать. Сию́ бо любо́вь даст Бог свое́й це́ркви, укра́шеней бы́ти ей при́сно в сей любви́. Сия́ бо любы́ начне́т, Бо́га нарица́ти в души́. Столп и утвержде́ние любы́ нари́чется в души́ святе́й. Сия́ па́ки любы́ Единоча́даго Сы́на к нам приведе́. Сея́ ра́ди любве́ Бог вочелове́чися. Сея́ ра́ди любве́ воплоти́ся безпло́тный. Сея́ ра́ди любве́ отве́рзеся рай. Сея́ ра́ди любве́ свя́зан бысть кре́пкий. Сея́ ра́ди любве́ неве́ста бысть душа́ безсме́ртному Жениху, да ви́дит свою́ красоту душа́ в себе́. Сея́ ра́ди любве́ пострада́ безсме́ртный Жени́х. Кроме́ сея́ любве́ а́ще есть душа́, не благоволи́т о ней небе́сный Влады́ка, ну́дити же во́ли ея́ не хо́щет Бог. Еди́ною бо даст ей власть ходи́ти и жи́ти при́сно, я́коже си хо́щет. Кто у́бо мо́жет или́ кто дово́лен бу́дет просла́вити и воспет́и Бо́га и Спа́са, о дарова́ниих Его́? Сея́ бо ра́ди вси восприя́хом дарова́ния Его́, сла́ва и поклоне́ние благоволе́нию Его́.

Послу́шайте бра́тие до́браго сове́та моего́, потщи́мся при́сно ходи́ти чи́сто и досто́йно, до́ндеже вре́мя и́мамы, да Дух Святы́й всели́тся в ны, и любы́ Бо́жия окружи́вши спасе́т ны. Не име́им бра́тие ино́я ве́щи ра́зве сея́ печа́ли, я́ко душа́ на́ша чиста́ обря́щется, и не привя́жем ея́ ника́коже земны́х ве́щех и печа́лех. Е́же не пещи́ся о стяжа́нии и о бога́тстве. Украси́м же ея́ моли́твами и посто́м, бде́нием же и слеза́ми, я́ко да обря́щет та́мо душа́ дерзнове́ние поне́ ма́ло, пред судищем Судии́ стра́шнаго, егда́ предста́нут вся ду́шы в стра́се, егда́ же бу́дет разлуче́ние та́мо, избра́нным от гре́шных, егда́ же ста́нут па́ки овца́ одесну́ю, а ко́злища ошу́юю. И́мете ли ве́ру бра́тие, я́ко близ есть прише́ствие Госпо́дне? Да возда́ст кому́ждо по дело́м его́, и введе́т избра́нныя во свет ве́чный, гре́шники же в му́ку, прогне́вавшая его́.

Блаже́н челове́к обреты́й дерзнове́ние в годи́ну о́ну, и услы́шит глас он: Прииди́те благослове́нии Отца́ Моего́, насле́дуйте вси Мое́ Царствие. Тогда́ ви́дит ко́ждо себе́ во све́те и в сла́ве непобеди́мей, и поразуме́вся чуди́тся себе́, и помы́слит глаго́ля: А́ще у́бо сам аз есмь? И отку́ду у́бо обретох́ся си́це досто́ин? Присту́пят же и а́нгели с ра́достию вели́кою просла́вити святы́я, и пропове́дати им житие́ их, черне́чество воздержа́ние, бде́ние и моли́твы, самово́льну нищету́, и нестяжа́ние, пребыва́ние в моли́твах, ра́дость в наготе́ соверше́ныя любве́ ра́ди Христо́вы. Сия́ же святи́и а́нгели с ра́достию вели́кою пра́ведным глаго́лют. Отвеща́ют же им пра́веднии и глаго́лют: Весма́ на земли́ еди́наго дне на́шего исправле́ния, еди́наго добра́ не обря́щет в нас. Па́ки же а́нгели помина́ют им ме́ста и времена́, чудя́щимся им и Бо́га прославля́ющим. Ви́дяще телеса́ святы́х светя́щася па́че све́та, поне́же во́лею поскорбе́ша на земли́, и терпе́нием сокрыша себе́ до́браго би́сера и оде́жду безскве́рную. Обрето́ша бо сокро́вище сокрове́но на селе́, и прода́вше вся на земли́ того еди́наго стяжа́ша. Ма́ла боле́знь черне́чества бра́тие, вели́ка же отра́да возда́нию (воздержа́нию). Труд есть маловремени́т, в ве́ки же веко́м в раи́ пита́ет и поко́ит.

Те́мже и́же свесть себе́ я́ко согреши́л есть Бо́гови, и предложе́нием разсла́бився согреши́л есть во́лею, до́ндеже вре́мя есть слеза́м, с любо́вию да пла́чется непреста́нно, да слеза́ми восхи́тит благода́ть в се́рдце свое́, стяжа́ти покая́ние и омы́ти те́ло свое́ слеза́ми и воздыха́ньми. А́ще бысть у́бо име́ли иску́с слеза́м о́ бра́тие, просвети́лися бы́сте от ра́дости тоя́. Слеза́м сла́дость Б́ожию (по Бо́зе) а́ще све́сте бра́тие, несть на земли́ сладче́е ра́дости покая́ние в годи́ну о́ну, егда́ же кто моля́ся ви́дит Бо́га, но в се́рдцы его́ Бог жади́мь быва́ет при́сно. И́же кто от вас иску́сен быв, и наслади́вся слеза́ми моля́ся, жа́ждай вознесе́тся от земли́, бысть весь сам кроме́ телесе́, и кроме́ ве́ка сего́ весь бу́дет, и ктому́ на земли́ не нарече́тся. Сицевы́й Бо́га нари́чет в се́рдцы свое́м пр́исно. О́ Христе́ просвеща́ется, о Ду́се Святе́м святи́тся.

Ве́лие чу́до бра́тие, челове́к зе́мен Бо́га Отца́ нари́чет во свое́й моли́тве чи́стей святе́й. Блаже́н челове́к име́яй покая́ние всегда́ по Бо́жию (по Бо́зе). Покая́ние бра́тие души́ исцеле́ние есть. Покая́ние души́ просвеще́ние есть. Покая́ние бра́тие грехо́м оставле́ние хода́тайствует всегда́. Покая́ние бра́тие Ду́ха Свята́го в себе́ восхища́ет. Покая́ние бра́тие Иису́са Единоча́даго вселя́ет в нас, егда́ того́ жела́ем.

Бою́ся о́ бра́тие испове́дати нам си́лу слез. А́нна слеза́ми от Бо́га прия́т Самуи́ла проро́ка, высоту́ и похвалу́ своего́ се́рдца. Жена́ же гре́шна в дому́ Си́мони, от Христа́ прия́т оставле́ние грехо́в, пла́чущися и омыва́ющи святе́и но́зе Его́. Ве́лия си́ла бра́тие слез, мно́го бо мо́гут слеза́ по Бо́жию. Омыва́ют при́сно ду́шу от грех, и очища́ют ея́ от беззако́ния. Сле́зы по Бо́жию дерзновен́ие дают всегда́ к Бо́гу, и не мо́гут никогда́ же скве́рнии по́мысли прибли́житися души́ иму́щей покая́ние.

Что у́бо святе́е есть сла́дости сея́, егда́ Самого́ Бо́га ви́дит душа́ приходя́щи к Нему́, егда́ бо желает Бога душа́ бра́тие. Ви́дит И́ при́сно во свое́й моли́тве, и о Нем поуча́ется день и нощь. Сокро́вище некра́домо есть покая́ние, и неизглаго́лаемая ра́дость. Ра́дуется душа́, име́ющи покая́ние. Покая́ние же глаго́лю не еди́наго дне, но быва́емое в нощи́ и во дне в души́, я́ко исто́чник чист есть покая́ния при́сно в души́ братие, напая́ющи сады́ плодови́ты души́. Сады́ же плодовитыя исправле́ния глаго́лю, и доброде́телей исправле́ние, напая́емое мо́ре при́сно слеза́ми и воздыха́ньми сади́. Сады́ плодови́ты и благоцветущая в души́ твое́й при́сно. Напои́ я́ па́ки слеза́ми моля́ся при́сно. Сады́ бо своя напая́я слеза́ми и моли́твами, умно́жит плод благоцвету́щь в души́ свое́й при́сно. Потре́бни и избра́нни и красни́, да суть ти́и са́дове. Безпрестани напая́й бра́те сады́ своя́ слеза́ми моля́ся, напая́еми бо возрасту́т, плоды́ творя́ще по вся дни.

Не бу́ди мне подража́тель сла́бу и гре́шну, глаголющу всегда́, а не творя́щу никогда́же, уны́лу предложе́нием, и сла́бу во́лею, не имы́й покая́ние, ниже́ моли́твы чи́сты. Све́дый же себе́ всегда́ гре́шна, и бою́ся всегда́ Суда бу́дущаго, не имы́й отве́та о гресе́х свои́х моея́ ра́ди слабости.

Молю́ вы ны́не бра́тие моя́, ели́ко же есть вас боя́щеися Бо́га, и творя́ще всегда́ уго́дная Ему́. Помоли́теся Ему́ за мя окая́ннаго, да прии́дет на мя свята́я Его́ благода́ть ва́шими моли́твами, и спасе́т ми ду́шу в годи́ну о́ну стра́шную и вели́кую, егда́ прии́дет Христо́с, возда́ти кому́ждо по делом его.

Сла́ва Еди́ному Бо́гу, Свя́ту, Безсме́ртну, Бла́гу и Стра́шну, Пречи́сту, Милосе́рду, подви́гшему язы́к мой благода́тию, возгласи́ти глаго́лы су́дныя, и покая́ния и любве́. Па́ки созда́ти души́ просвеще́ние и се́рдцу, и ум поле́зен, да вся́ка душа́ пою́щи сия́ и наслади́вся, изведе́тся в жизнь ве́чную. Бо́гу на́шему сла́ва, ны́не и при́сно, и во ве́ки веко́в. Ами́нь.