Умили́ся душе́ моя́, умили́ о всех благи́х я́же прия́ла еси́ от Бо́га и не сохрани́ла. Пока́йся о всех, я́же согреши́л еси́ зле. Пока́йся о всех, я́же Бог долготерпи́т о тебе́. Пока́йся и умили́ся, да не кроме́шней тме предана́ бу́деши. Пока́йся душе́ окая́нная, да не постыди́шися на Стра́шнем Суде́ Христо́ве.

У́ лю́те мне гре́шному, оскверни́вшему чистоту́ се́рдца моего́ сла́бостию мое́ю! Неражде́ние мое и леность, дерзнове́ние се́рдца моего́ омрачи́ло есть лука́вая же похоть. Я́ко влады́ка рабу́ запреща́ет ми, и аз а́бие стра́хом я́ко младе́нец послу́шаю, и прельща́ет мя я́ко и све́де, и кто есть и́же бы ся мене́ пла́кал и уте́шил мя? Еди́н Ты Сам Спа́се мой стяжа́вый жили́ще благо́е, при́зри на мя ненача́емаго.

У́ лю́те мне гре́шному, я́ко аз еди́н уя́звен бых! У́ лю́те мне, я́ко чи́ста мя сотвори́л еси́ Влады́ко, и аз ле́ностию свое́ю оскверни́хся грехи́! Ра́вен сый а́нгелом себе́ ума́лих. Умно́жишася беззако́ния моя́ Го́споди, умно́жишася беззако́ния моя́, и несть конца́ мно́жеству их. Ка́ко же помолю́тися Спа́се мой, я́ко уста́ моя́ испо́лних клеветами? Или́ ка́ко воспою́ тя, я́ко со́весть моя́ осквернена́ есть? Или́ каќо возлюблю́ Тя Го́споди, я́ко не́нависти испо́лнен есмь? Или́ ка́ко всели́тся в Мя и́стина, я́ко лжа́ми себе́ испо́лнил есмь? Или́ ка́ко призову́ Тя, я́ко за́поведей Твои́х не сохрани́х? Но Сам нело́жен сый, не пре́зри мене́ уничиже́наго, ниже́ отве́рзи мене́ омраче́наго, ни оста́ви мене́ прельще́наго. Зело́ бо весели́тся враг мой, егда́ ви́дит я́ко себе́ не нача́ю, о сем еди́ном ра́дуется, я́ко от ненача́яния ви́дит мя плене́на су́ща. Но Ты милосе́рдием Твои́м посрами́ наде́жду его́, и исто́ргни мя из зуб его́, и зломы́сленыя ко́зни его́ раздруши́, и все его́ дви́жимое на мя действо.

Те́мже молю́ вы вся, ели́ко же со́вестию печа́луете о безместных де́лех, ре́кше о неподо́бных, не отча́йте себе́, и не сотвори́те ра́дости супоста́ту на́шему, но приступи́те без сумне́ния к Богу, и пла́читеся пред Ним и не отча́йте себе́. Зело́ бо ра́дуется Госпо́дь наш о ка́ющихся, и прие́млет в сласть испове́дание на́ше, и ждет обраще́ния на́шего. Рече́ бо: По всем сем ко Мне обрати́теся. И па́ки святы́м Ева́нгелием глаго́лет: Прииди́те ко Мне вси тружда́ющиися и обреме́ннии, и Аз поко́ю вы. Никто́ же у́бо да не отча́ет себе́, а́ще согрешил есть. Взыска́ющим бо Его́, Мздода́вец быва́ет, а отмета́ющимся Его́, яр есть.

Каце́м ти у́бо путе́м, мо́жет обре́тен бы́ти и́щущим Его́? Пре́жде же всего храни́ти, е́же есть ко бра́тии любы́. Любы́ бо рече́ Бог есть, иже у́бо любо́вь стяжа́, Бо́га стяжа́л есть: а и́же смире́ную му́дрость стяжа́, подо́бен есть Христу́. Не смире́но же му́друя, Христа́ есть чуждь. А и́же послуша́ние стяжа́, Бо́га подража́ет. Пререку́яй же, Христа́ чуждь есть. А и́же повину́ется старе́йшине ре́кше игу́мену, сей а́нгелы подража́ет. Противля́яйжеся ему, диа́вола вселя́ет в себе́. И́же и́стину лю́бит, во и́стину Христо́в друг есть. Любя́й же лжу, Христо́м ненави́димь есть. А и́же бра́та своего́ лю́бит, люби́мь есть Бо́гом. Ненави́дяй же бра́та своего́, ненави́димь есть Бо́гом. А и́же бра́та с бра́том сважда́ет, сей со диа́волом осужда́ется. Стражда́й же за бра́та своего́, сей Христа́ насле́дит. И́же возненави́дит соблазни́вшагося во гресе́х, себе́ осужда́ет. Спостра́дуя же согреши́вшим и спеча́луяй, сей свою́ ду́шу чи́сту соде́ловает. И́же потя́жет в наро́де собла́зн бра́тень, сей свою́ ду́шу оскверня́ет. Тща́йжеся сокры́ти милосе́рдия ра́ди, сицевы́й во вре́мя я́рости покрове́н бу́дет. А и́же велича́ется или́ хвали́тся, я́ко испра́вив жизнь и соверше́на себе́ творя́, погуби́лся есть и мзды не и́мать. А́ще ли же смире́нием тщи́тся кры́ти своя́ исправле́ния, сей вознесе́тся от Го́спода и мзду от Него́ прии́мет. И́же хва́лится в предспе́яниих, или́ горди́тся, сей паде́тся. Укаря́йже себе и умаляя, сей на высоту вышнюю себе возво́дит. И́же на́гло гне́вается или́ яри́тся, сицевы́й пра́вды кроме́ есть, и Христо́с с ним не водваря́ется. Кро́тость же в себе стяжа́вый и послуша́ние любя́й, сей жилище есть Свята́го Ду́ха. И́же отврати́тся бра́та согре́щша, сей прельща́ется и смысл тощь и́мать. В любви́ же спостражда́яй, сей соверше́н в де́лех свои́х есть. И́же стра́нна бра́та отврати́тся, отврати́тся его́ Христо́с. Прие́мляй же с любо́вию, самого́ Бо́га подъе́млет. И́же о дво́рех и о зда́ниих весели́тся, сей ве́чных благ тщи́тся наг бы́ти. О духо́вных же тща́йся и подвиза́яся, сей свесть сла́дость ве́чных благ. А и́же ризы добросве́тлы лю́бит, оде́жды боже́ственыя наг есть. Обы́чными же ри́зами себе́ закрыва́яй, сей пече́тся духо́вным оде́нием облещи́ся. И́же во вре́мя моли́тве и пе́ния лени́тся и глуми́тся, сей Бо́га прогне́вает. С прилежа́нием же и тща́нием наслажда́яся пе́ния, сей Свята́го Ду́ха сообе́щник бу́дет. И́же в по́льзах кни́жных не любе́зно послу́шает, и сих любе́зно не чтет, сей дуб безплодови́т нари́чется. А и́же со испыта́нием пыта́яй, сугу́бит пло́ды я́ко дре́во при исходи́щих водны́х. И́же в нощны́х моли́твах изнемага́ет сном и сего́ па́че чтет, сицевы́й пло́тян есть, а не духо́вен. Нудя́й же себе́ на бде́ние в прилежа́ниих, сей с любо́вию и́щет Христа́. И́же умножа́ет [ре́]чи во словесе́х су́етных, ме́рзска себе́ твори́т пред Бо́гом и пред челове́ки. Почита́яйже молча́ние, себе́ прославля́ет, и мно́гими люби́мь бу́дет. Иже избыточествуяй брату молящуся не подаст, сей святыни кроме есть, и во благих пищах не водворится. Подаяйже просящему, Царства небеснаго наследник будет. И́же я́ко си́лен сый и здрав, возно́сится на немощна́го и на неиму́щаго си́лы, про́клят бу́дет от Бо́га, и услы́шит от Него́: всяк вознося́йся, смири́тся. Подъе́мляй же и́, и спостра́дуяй, сей услы́шит от Бо́га, яко поне́же сотвори́сте еди́ному от сих ма́лых, Мне сотвори́сте. И́же смуща́ет бра́тию и сважда́ет еди́наго со еди́нем, сей ненави́димь есть а́нгелы и челове́ки. Кротя́й же свари́мыя и печа́луемыя, сей сын Бо́жий нарече́тся. И́же пре́зрит пост, и пло́ти соверша́ет во́ли и по́хоти, сей святбы́ и чистоты́ и целому́дрия кроме́ есть. Друча́й же посто́м те́ло свое́, вся́коя святы́ни и чистоты́ и целому́дрия де́латель есть. И́же о мно́зех я́дех и бра́шнех весели́тся, сей ду́хови вино́ю неи́стоваго чре́ва рабо́тает. Согнета́яй же себе́ воздержа́нием, сей и стра́сти и по́мыслы удо́бь удержи́т. И́же же́неск пол ви́дев и к ним веща́я весели́тся, страсте́м неприя́зненым работ́ает. Боря́йжеся с похоте́нием и от сих отвраща́яся, и сих обы́чай себе́ удаля́я, сей бра́ни кроме́ есть смиря́яй по́хоти. И́же у́жиками плотски́ми весели́тся и жела́ет на ня, си́и Бо́га ра́ди не суть да́ли себе́, но игра́ют и игра́еми суть от по́мысла. Удаля́яй же себе́ от у́жик по пло́ти и сих страсте́х не прилежи́т, сей вои́стину отве́рглся есть ми́ра и Бо́гови рабо́тает. И́же запреща́емь ро́пщет, мзду послуша́ния вино́ю погуби́т. С прилежа́нием же соверша́я повеле́ние повеле́вшаго, и со стра́хом Бо́жиим послу́шая его, сей све́тлую добро́ту душе́вную спасе́т. А и́же наказу́ющаго и сове́тующаго боже́ственое наказа́ние отвраща́ется несмы́слено, сей Христа́ отме́щется и вся́коя по́льзы кроме́ есть.

Сего́ ра́ди по́мысла бра́тие, благоиску́сне до́лжни есмы́ проти́ву подвиза́тися вси. Те́мже вне́млем себе́ люби́мая моя́ бра́тия, да не стра́сти де́лма плотски́я лиши́мся ве́чных благ.

У́ лю́те мне! Пи́ща уготов́ана есть и наслажде́ние, и несть подвиза́ющагося и тща́щагося, несть жела́ющаго: но супоста́тная и не су́щая лу́чша твори́м вре́менная и непребыва́ющая. О́нех же безме́рных благ ни во ум наш не вносим. О́ле омраче́ние! О́ле лесть вра́жия! У́ лю́те мне! Ка́ко лю́та му́ка угото́вана есть, по моему́ злу согреши́вшим гре́шником и в ле́ности живу́щим. И несть боя́щагося, ни трепе́щущаго: но я́ко сон мним глаго́лемая, и по́лни су́ще страсте́й теле́сных, привя́зани бо есмы́ в них я́ко у́жем желе́зным и несть подвиза́ющагося: но и привя́зани ра́дуемся. О́ всезла́го и нечести́ваго зми́я ко́зни! Ка́ко омрачи́л есть ум всех, да супоста́тная помышля́ем, и тще́тная лю́бим па́че бу́дущих благ.

Прииди́те бра́тия моя́, прииди́те отцы́, прииди́те раби́ Христо́ви, умили́м сердца́ на́ша, и пла́чемся пред Ним день и нощь. Прииди́те в себе, и по́мните о годи́не о́ной и неуте́шимей беде́. И пока́явшеся пла́читеся. Прииди́те и помяне́м о неизрече́нных и неска́жемых о́нех благи́х, и пока́имся. Приидите помяне́м стра́шное и тре́петное о́но суди́ще, и хотя́щий нам быти студ, и себе́ пла́чем. Прииди́те и помяне́м си бра́тие, ка́ко пра́ведницы хотя́т сия́ти, гре́шницы же проти́ву я́ко медь гнила́ (ме́ди гли́на) обря́щутся. Но умили́вше отцы́ на́ша, прии́мем ре́вность до́браго де́ла. Прииди́те бра́тия моя́, и себе́ любо́вию утверди́м во страх Бо́жий, я́ко да получи́м ве́чное блаже́нство. Прииди́те припаде́м Ему́ в покая́нии, и в се́рдцы сотре́не и про́сте: Благ бо есть и Милосе́рд, и спасе́т ка́ющаяся. Помо́лимся у́бо Ему́, да ны введе́т в Ца́рствие небе́сное, я́ко Тому́ подоба́ет сла́ва и поклоне́ние, со Отце́м и со Святы́м Ду́хом, ны́не и при́сно и во ве́ки веко́в. Ами́нь.