Бра́те, почто́ прельща́ешися, побежда́емь диа́волом? Преходя́ степе́ни, и́же на успех́ не суть ти, ниже́ на по́льзу, е́же на себе́ сам честь положи́л еси́. Но послу́шай апо́стола глаго́люща: Не бо известву́яй о себе́ той вели́к есть, но его́же Госпо́дь известву́ет. Послу́шай же Го́спода глаголюща: Ка́ко мо́жете ве́ровати сла́ву от челове́к прие́млюще? Прииди́ у́бо в себе́ возлю́бленне, и пом́ысли ея́же ра́ди вины́ отве́рглся еси́ ми́ра, и диа́вола и горды́ни его́, и оста́нися поышле́ний мирски́х. Не ве́си ли я́ко а́ще уничижи́ши бли́жняго своего́, руга́тельством и тще́ю пре́лестию, разуме́й уже́, я́ко предспе́еши сва́ром и руга́тельством непокоре́ния ра́ди бра́ту своему́. Еда́ у́бо тщесла́вие то, поста́вит тя Бо́гови? Блюди́ся бра́те, еда́ когда́ ты хо́тя бы́ти пе́рвый, и мний обря́щешися бра́та в бу́дущий век. И услы́шиши е́же слы́ша и бога́тый он, пали́мь огне́м негаси́мым, я́ко прия́л еси́ блага́я своя́ в животе́ твое́м. Пи́шет бо: Высо́кая в челове́цех, ме́рзска суть от Бо́га. Еда́ у́бо забы́л еси́ Ре́кшаго: Хотя́й быти в вас вели́к, да бу́дет вам слуга́. А и́же хотя́й ста́рей бы́ти, да бу́дет вам раб? Поразуме́й, я́ко у́мерл еси́ ми́ру, и живо́т твой сокрове́н есть со Христо́м в Бо́зе. Не люби́ у́бо сла́вы челове́ческия, не бо пребыва́ет во ве́ки. Вся́ка бо плоть трава́ есть. Блаже́н же па́че, и́же на небесе́х причте́н бу́дет в соверше́нных. Ви́димая бо вре́менна суть, неви́димая же ве́чна. А́ще бо па́ки земно́му смы́слу порабо́тишися, всу́е бу́дет ти вещь. Никто́же бо мо́жет двема́ господи́нома работати. Отве́рзися возлю́бленне ярма́ вра́жия, и всея́ горды́ни его́, и повини́ вы́ю свою́ под яре́м Сла́дкаго Влады́ки Иису́са Христа́. Сам бо рече́: Вознося́йся смири́т себе́, а смиря́яйся вознесе́тся. И па́ки: Госпо́дь го́рдым проти́вится, смире́нным же дае́т благода́ть. Убои́мся у́бо возлю́бленнии, еда́ ка́ко и к нам рече́т: Возлюби́ша сла́ву челове́ческу, па́че сла́вы Бо́жия. Ему́же сла́ва, во ве́ки. Ами́нь.