Блажу́ ва́шу жизнь, о́ духолю́бцы, я́ко благодерзнове́нна есть. И ока́ю мою́ жизнь, я́ко непотре́бна есть. Блажу́ вас о́ дру́зи, я́ко пра́вым житие́м и просты́м дру́зи ся сотвори́сте Бо́гови и а́нгелом Его́. Кто же мене́ не пла́чется, я́ко прогне́вах Бо́га делесы́ мои́ми су́етными? Блаже́ни есте́ вы насле́дующии рая́ чи́стым ва́шим житие́м, и любо́вию вашею безчи́сленою. Дивлю́жеся вам я́ко не облени́стеся толи́ка пути́ ше́ствовати до́лга, приити́ злостра́стныя ра́ди души́. И се же чу́днее, я́ко ко изможда́лу и осужде́ну грехи́ пришли́ есте́, и от него́ и́щете поле́зна сло́ва.
Ди́вно чу́до пои́стине, ка́ко сы́тии ко гла́дом та́ющему приидо́сте. Ка́ко ро́су духо́вную иму́щии, ко иссо́хшему жа́ждею. Ка́ко сла́дкия де́тели иму́щии, ко огорча́вшему грехи́. Ка́ко бога́тии, к ни́щему. Ка́ко прему́дрии, к поселя́нину. Ка́ко чи́стии, к скве́рному. Ка́ко це́ли, к боля́щему. Ка́ко угоди́вшии, к прогне́вавшему. Ка́ко свободнии, к пле́нному. Ка́ко прилежнии, к лени́вому. Са́ми бо ди́вни есте́ де́тельми, аз же несмы́слено нари́чася смиря́юся. Са́ми воздержа́ние иму́ще угожда́ете Бо́гу, аз же безстра́шием осужде́н есмь. Са́ми до́брыми де́лы и славною чистото́ю, благоуха́ние нарече́ся Христо́во, аз же сла́бости ра́ди моея́ и уны́ния весь смра́ден есмь.
Ди́вно чу́до пои́стине, ка́ко толи́ку иму́ще пол́ьзу ко мне приидо́сте, ниже́ поне́ себе́ потре́бну су́щу. И се у́бо досто́йно сотвори́сте о́ дру́зи Христо́ви, хотя́ще мою́ сла́бость утверди́ти, и уны́лую мою́ ду́шу приле́жну сотвори́ти, и пренемога́ние мое́ укрепи́ти. Поне́же вы у́бо соверше́ни су́ще, и ни еди́ного же что добра́ лише́ни есте́, поне́же смире́ною му́дростию пома́завшся, и от мене́ изможда́лаго слов́а, поле́зна и́щете и жизнь мою́ обличи́ти хо́щете. И сем́и повеле́сте, да послу́шественый плод глаго́лю. Стыжу́жеся, а́ще начну́ вам сове́товати, се бо осуди́тися хощу́. И а́ще начну́ и́ны облича́ти, сам ся оклевета́ю. Подо́бно же и мне рече́тся е́же Спа́сом рече́но есть: «Врачу́, исцели́ся сам». И паки Госпо́дь и Спас всех рече: «Вся елиќа а́ще рекут вам святи́тели твори́ти, твори́те. По дело́м же сих не твори́те». А́ще бо и аз нечи́ст нари́чуся, но прав сове́т вем сотвори́ти. Те́мже возре́в на а́нгельское се житие́, блажи́х коего́ждо их исправле́ние, и окаях коего́ждо их прегреше́ние.
Кто бо не блажи́т о де́лех до́брых и про́сто живу́щых, предлежа́щых ра́ди безчи́сленых и мно́гих благ? И кто у́бо не пла́чется па́ки в ле́ности живу́щых, и ма́лыя ра́ди ве́щи, вне пребыва́ющых Ца́рствия небе́снаго и не содрогнове́ния ра́ди вонь изгна́ным бы́ти из черто́га о́ного?