Прииди́те люби́мицы мои́, прииди́те отцы́ и бра́тия моя́, ста́до избра́нно Спа́сово. Прииди́те, ку́плю де́ем, до́ндеже торжество́ стои́т. Испо́лните очеса́ ва́ша слез, и абие серде́чнии о́чи ва́ши отве́рзетася. Глаго́лите сло́во о ве́чней жи́зни, и о Суде́ ве́чнем: и а́бие пока́ется се́рдце ва́ше. Приими́те добр по́мысл о Ца́рствии небе́снем и о раи́: и а́бие неради́те о земны́х ве́щех. И да никто́же от вас разсла́бив уны́ет, ни́же пренемога́я устраши́тся, ниже́ да убои́тся кто, ниже́ у́снет: но без сумне́ния да призов́ем Го́спода на́шего, и приле́жно да порабо́таем Спа́су на́шему. Потщи́мся да очи́стит сердц́а на́ша Святы́м Духом. Содержи́м же са́ми себе́, и мо́лим И́ и утверди́мся. И отпу́стим же грехи́ са́ми себе́ от всего се́рдца. Раби́ бо есмы́ нело́жнаго Бо́га, ре́кшаго та́ко: «Оте́ц Мой небе́сный не оста́вит, а́ще не оста́вит ко́ждо вас бра́ту своему́ от серде́ц ва́шых прегреше́ния их». И па́ки святы́ми Его́ апо́столы зна́менал есть, е́же колькра́ты есть отпусти́ти грехи́ бра́ту, ре́кшу Петру́: «Го́споди, колькра́ты согреши́т в мя брат мой и отпущу́ ему́, до седми́жды ли?». Рече́ же ему́ Госпо́дь: «Не глаго́лю ти до седми́щи, но и до седми́десят седми́цею». Мы же у́бо николи́же три́щи днем отпу́стим себе́.
Молю́ вы у́бо бра́тия моя и припа́даю вам о́ дру́зи, воспря́нем в ма́лое се вре́мя, и подвиза́йтеся во еди́ный на́десять час. Вече́р бо прибли́жился есть, и Мздода́вец Христос гряде́т со сла́вою, возда́ти хотя́ кому́ждо проти́ву дело́м его́. Внемли́те у́бо себе́, еда́ кто испра́вив себе́ возра́дуется, и облени́вся погуби́т безчи́сленое мздовозда́ние. Уподо́бился есть черне́ц осе́яне ни́ве, я́же возрасти́т плоды́ водо́ю и росо́ю, и плодови́т плод принесе́т весе́лия. И егда́ же пости́гнет плод на ней, тогда́ мно́жайшу наво́дит печа́ль де́лателю: пеки́й бо ся бдит и бои́тся, еда́ внеза́пу град или́ зверь дивий растли́т ни́ву его́. Та́ко и мних, до́ндеже живе́т в ве́це сем, день и нощь пече́тся и мо́лвит боле́знено, о безсме́ртней жи́зне, и о труде́ черне́чества своего́, да не облени́вся обря́щется всу́е теки́й. И вся ра́дость и весе́лие де́лателю есть, егда́ жа́тву собере́т в жи́тницу и получи́т возда́ния. Те́мже о́бразом и мних есть: ра́дуютбося и веселя́тся а́нгели Бо́жии на небесе́х, егда́ боя́йся Бо́га соверши́т тече́ние свое́. Де́латель бо егда́ жи́тницу испо́лнит, тогда́ без печа́ли есть и прочее пита́ется и весели́тся. И мних, егда́ положе́н бу́дет в жи́тницу е́же есть во гро́бе, а́бие бога́тство его́ взы́дет на не́бо.
Воспря́нем в бра́ни сей супе́рника на́шего. Брань бо гото́вит, сам же не́мощен и безси́лен есть. Влады́ка же наш и Подвигода́вец, ца́рствующий [и́ми] приле́жно борю́щымся си́лу подает и вене́ц неувяда́емый. Я́коже прах жено́мь быва́ет ве́тром ве́лием зел́о, та́ко и супе́рник наш жено́мь быва́ет гла́сом славосло́вящых Бо́га. Никто́же у́бо да не уныва́ет, ни да убои́тся, но кре́пкий не́мощнаго да подъи́мет. Приле́жный, пренемога́ющаго да уте́шит. Бдяй, обдержи́маго сном да воздви́гнет. Стро́йный, нестро́йнаго да нака́жет. Воздержа́йся, безчи́нному и несумня́щемуся да запреща́ет. Та́ко бо себе́ содержаще, единоду́шно побежда́юще, супроти́вника на́шего посрами́м, и Бо́га на́шего небе́снаго просла́вим, да и а́нгели святи́и о нас возвеселя́тся, и дивя́щеся нам, и слы́шаще о нас, сни́дутся. Я́ко Тому́ подоба́ет сла́ва, честь и держа́ва, ны́не и при́сно и во ве́ки веко́в. Ами́нь.