Блаже́н у́бо челове́к та́мо и́же и́мать страх Бо́жий всегда́ в себе́. Сицевы́й бо я́ве и Святы́м Ду́хом блажи́мь есть. Блаже́н муж боя́йся Го́спода, боя́йся Бога кроме́ есть всех ко́зней вра́жиих, и вся́кого сове́та неприя́знена и ла́яния. Име́яй страх Бо́жий удо́бь соодоле́ет я́ду злохи́тречу: ничи́мже бо его́ плени́т, стра́хом то́кмо еди́нем, и́же по́хоти плотски́я не прие́млет. Боя́йся Го́спода не глуми́тся зде, ожида́ет бо своего́ Влады́ки, еда́ ка́ко внеза́пу прии́дет и обрящет его́ уны́вша и разлучи́т и́. Име́яй страх Бо́жий не печется не о че́мже, трезви́т бо ся всегда́. Боя́йся, сну безме́рну себе́ не вдаст, но бдит, ожида́ет бо прише́ствия Го́спода своего́. Боя́йся Го́спода не объяда́ется, да не прогне́вает своего́ Влады́ки. Боя́йся не стяжи́т своего́ притяжа́ния, да не наразу́мен бу́дет. Боя́йся, всегда́ искуша́ет себе́, ка́ко угоди́ти Богови, и та́ко гото́вится, да прише́д Госпо́дь его́ возесели́вся и похва́лит и́. Во мно́зе у́бо сове́те спасе́ние быва́ет, страх Бо́жий стяжа́вшым и́.