Я́коже дре́во высо́ко и красно́ без плода́, та́коже и мних велича́в и горд. Я́коже плод внею́ду красе́н и добр, внутрь же согни́л, та́ко и мних гневли́в и зави́стив. Я́коже а́ще кто вве́ржет ка́мень во исто́чник чист, и возмути́т его́, та́ко и отве́т мни́хов со гне́вом возмуща́ет по́мыслы бли́жняго. Я́коже кто искорени́т дуб испо́лнен плодо́в, и пресади́т его́ на ино ме́сто, плод его́ увя́нет и ли́ствие его́ и́зсшет, та́ко и мних оста́вль свое́ ме́сто, и в друга́я преходя́ ме́сто. Я́коже зи́ждущии основа́ния, а ка́мене не иму́щии, та́ко и мних не имы́й терпе́ния в ско́рбех свои́х. Я́коже бы кто царев́и предстоя́ и бесе́дуя с ним, и призва́вшу ему́ клевре́та своего́, оста́вль царя́ и ко клевре́ту своему́ бесе́дует, та́ко и мних в пе́нии свое́м, бляды́й и глумя́ся во уме́ свое́м.

Поразуме́ем у́бо ны́не люби́мицы, ка́ко предстои́м. Я́коже бо а́нгели со стра́хом и тре́петом предстоя́т пою́ще, та́ко и мы люби́мицы до́лжни есмы́ с чи́стым се́рдцем и со стра́хом и тре́петом предстоя́ти в пе́нии на́шем, во вре́мя моли́твы на́шея. То́чию же пло́тию да не предстои́м явля́ющеся, по́мыслы же на́ша в плотски́я печа́ли вве́ргше, я́коже бо кора́бль в пучи́не волна́ми носи́мь быва́ет земны́ми ве́щьми.

Отве́рзем у́бо ны́не по́мыслы на́ша от земны́х веще́й люби́мицы мои́, да похвалу́ принесе́м к Бо́гу Претерпи́м напа́сти супроти́внаго, да просла́вимся со а́нгелы. Похвала́ бо есть мни́ху, терпе́ние с любо́вию. Похвала́ мни́ху нестяжа́ние, от всех жите́йских веще́й. Похвала́ есть мни́ху пред а́нгелы и челове́ки, смире́ная му́дрость и просты́ня се́рдца. Похвала́ мни́ху бде́ние с пла́чем в моли́твах его́. Похвала́ мни́ху, кро́тость и безмо́лвие. Похвала и о́браз мни́ху, егда́ лю́бит Бо́га от всего́ се́рдца и бли́жняго я́ко сам себе́. Похвала́ чернецу́, егда́ согла́сни быва́ют по́мыслы его́ де́лу его́. Похвала́ мни́ху, егда́ претерпи́т на ме́сте свое́м, и не прехо́дит се́мо и о́вамо, я́ко листвие ветром.

О́ лю́те мне гре́шному! У́ лю́те мне! Я́ко бых подо́бен ко́зни ме́дяне испо́лнь излива́ния, и ничто́же содержа́щи от ве́тра, та́ко и аз пове́дая вам де́тели, а ста́да Христо́ва от всех дале́че есмь. Сла́ва и поклоне́ние вели́чию Его́!

Люби́мицы мои́ и бра́тия моя́, а́ще кто вас впаде́т в скве́рный и гну́сный по́мысл, да не облени́вся уны́ет, ниже́ себе́ вдаст в неча́яние, но да пролее́т се́рдце свое́ пред Бо́гом, и воздохну́в да пла́чется, и да рече́т: «Воста́ни Го́споди, вонми́ суд мой, Бо́же мой, Го́споди мой на прю мою́. Суди́ ми Го́споди, по пра́вде Твое́й. И де́ло руку́ Твое́ю аз есмь, да почто́ презре́л мя еси́? И почто́ лице́ Твое́ отврати́л еси́? Забы́ти нищету́ мою́ и скорбь мою́, я́ко погна́ враг ду́шу мою́, смири́л есть на земли́ живо́т мой. Вся тиме́ния и глубины́ приидо́ша на мя, и несть ми постоя́ния. Ско́ро да предвари́т мя ми́лость Твоя́ Го́споди, я́ко да не поги́бну».

И а́ще Бо́га си́це призыва́еши, и претерпи́ши, и а́бие Человеколю́бец Бог по́слет благода́ть Свою́ в по́мощь твою́. И уте́шит тя, и поко́ит тя от труда́ твоего́ и бра́ни. Сицева́го у́бо Влады́ку иму́ще Бла́га и Человеколюби́ва, не лени́мся. И сицева́го иму́ще Спа́са Милосе́рда, да не уныва́ем. До́ндеже есмы́ зде, Той ще́дрит и ми́лует и спаса́ет, и собла́зны на́ша оставля́ет, и грехи́ на́ша отпуща́ет: а́ще мы хо́щем. Кто ся у́бо не ди́вит, я́ко слез ра́ди ма́лаго сего́ вре́мени, отпуща́ет нам тмы прегреше́ния? И слез де́лма во еди́ный на́десяте час, цели́т на́ша ты́сящныя стру́пы? И па́ки исцели́в, подае́т мзду исцеле́ния?

Я́ко да не лени́мся у́бо бра́тие, но потщи́мся исцеле́ни бы́ти я́коже и пре́жде рех. Зде у́бо ми́лует и ще́дрит Бог благода́тию Свое́ю, та́мо же несть си́це люби́мицы мои, но пра́ведный суд и мща́ние, и возда́ние соде́янным. Тамо бо многомилосе́рдый Авраа́м, немилосе́рд и неми́лостив обретается. Иже бо о содо́млянех моли́ Бо́га да спасу́тся, та́мо же о еди́ном гре́шнице не мо́лится да поми́лован бу́дет. Ни у́бо, да не буд́ет привя́зана на́ша мысль земны́х ве́щех, но потщи́мся бы́ти соприча́стницы святы́м, и снасле́дницы преподо́бным отце́м на́шым, да не лише́ни будем блаже́ныя сла́вы их. Подвиза́имся у́бо паче́ с соверше́ными венча́ни бы́ти. А́ще ли же ни, то поне́ со угоди́вшым похвале́ни бы́ти. Блаже́н бо есть и́же с соверше́ными подвиза́ется венча́н бы́ти. Окая́н же и стра́стен облени́выйсся поне́ ни с после́дними похвале́н бы́ти. Блаже́н есть сподо́бивыйся сла́ве их. Блаже́н есть сподо́бивыйся похвале́ их. Блаже́н есть сподо́бивыйся ра́дости их. Блаже́н есть сподо́бивыйся чи́смени их. Блаже́н есть, блаже́н и мно́жицею, сподо́бивыйся достоя́нию их. Блаже́н есть и́же сподо́бивыйся трапе́зе их. Блаже́н сподо́бивыйся соприча́стник бы́ти пи́щи их. Блаже́н сподо́бивыйся гла́су о́ному глаго́лющему к ним: Прииди́те благослове́нии Отца́ Моего́, насле́дуйте угото́ваное вам Ца́рствие от сложе́ния ми́ру.

И мы бо кий отве́т обря́щем тогда́, а́ще облени́мся зде? Жите́йский же стоя́, отвеща́ет: «В ми́ре привя́зан быв». Мы же что рече́м тогда́, жена́ми у́бо и ча́ды не пеку́щеся, а земны́ми ве́щьми смуще́ни бы́вше? У́ лю́те мне люби́мицы мои́! Бою́ся и трепе́щу, еда́ ка́ко похваля́ющии нас зде, та́мо ны поруга́ются, и блажа́щая нас зде, та́мо поно́сят ны.

Блюди́теся у́бо люби́мицы мои, да не осладча́ет нас уны́ние ве́ка сего́ и мирска́я печа́ль. Да не огорчи́тся в нас огнь ве́чный, и червь неусыпа́яй, и скре́жет зу́бный. Пла́чемся у́бо зде ма́ло, да изба́вимся от ве́чнаго пла́ча. Побди́м ма́ло люби́мицы мои́, до́ндеже вре́мя и́мамы. Не ве́руете ли словеси́ Спа́сову, я́ко внеза́пу я́ко мо́лния блесне́т, та́ко есть прише́ствие Его́? Не разуме́ете ли, я́ко не бу́дет возвеща́ющаго, сей день или́ он день? Не бои́телися, я́ко ко́ждо по дело́м свои́м восприи́мет в день он? Внемли́те себе́, еда́ внеза́пу пости́гнет ны, и тогда́ мно́го себе́ зазри́м, и ничто́же по́льзующе. И ко́ждо пла́чася да рече́т глаго́ля: У́ лю́те мне! У́ лю́те мне гре́шному, погуби́вшему дни своя́! У́ лю́те мне. Что ми бысть, я́ко облени́хся? У́ лю́те мне окая́нному! Почто́ презре́х и почто́ уны́х? У́ лю́те мне! Почто́ ве́ры не имя́х глаго́лющим?

Си́и и множайша сего́ рече́т тогда́ в ско́рби свое́й, и ничто́же по́льзуяся.

Ве́руете ли люби́мицы мои́, я́ко после́дняя годи́на есть, и я́ко кончи́на ве́ка сего́ прибли́жилася есть? А́ще ли очи́ма не ви́дите, у́бо то не и́мете и ве́ры? Блюди́теся да не сбу́дется сло́во пи́саное, по проро́ку глаго́лющу: «Го́ре жела́ющым дне Госпо́дня». Потщи́мся убо ны́не и подвиза́имся, да не обря́щемся я́ко раб он, и́же прише́д господи́н его́ обре́те и спя́ща и нерадя́ща. Те́мже молю́ вы, побдим ма́ло, да не и мы та́кожде обря́щемся. Без сумне́ния же просла́вим Бо́га на́шего и мо́лим И́, да изба́вит ны от тмы о́ноя и скре́жета зу́бнаго, и да сподо́бит ны Ца́рствию Своему́:

«Молю́ Тя Спасе всего́ ми́ра Христе́, при́зри на мя и поми́луй мя, и изба́ви мя от мно́жества беззако́ний мои́х. Отверго́хбося от вся́кого бла́га, я́же сотвори́л еси со мно́ю Го́споди мой от ю́ности моея́. И елико сотвори́л еси́ со мно́ю, отверго́хся Го́споди, и ны́не отме́щуся. Мене́ же гру́баго и неразу́мнаго сотворил еси, сосу́да испо́лнь разума и прему́дрости. И умно́жися на мне благода́ть Твоя́, и насытила есть алка́ние мое́, и жа́жду мою́ уста́вила есть, и просвети́ла есть омраче́ну мою́ мысль. И собрала́ есть по́мыслы моя́, и испо́лнила ест не́дра моя́. И ны́не кла́няютися и молю́тися припа́дая, и мил ся де́ю и испове́даю мою́ не́мощь, человеколю́бия ра́ди Твоего́. Оста́ви мне во́лны благода́ти Твоея́ и соблюди́ ми ю́ в скро́вищих Твои́х, да па́ки да́си ми ю́ в день Он стра́шный. И ны́не у́бо не прогне́вайся на мя Человеколю́бче Влады́ко: не терплю́ бо без нея́ бы́ти. И сего́ ра́ди молю́ Тя без сумне́ния, поне́же па́че ме́ры умно́жися на мне благода́ть Твоя́, и́ язы́к мой изнемо́же не дости́г ея́ изрещи́. Удиви́ся и ум мой, не терпя́ мно́жества волн ея́. Образе и Заре́ Благослове́наго Отца́, оста́ви ми зде от волн ея́, я́коже бо огнь пали́т у́ды моя́ и се́рдце мое́, да та́мо па́ки да́си ми ю́. И спаси́ мя Влады́ко, и досто́йна сотвори́ мя Ца́рствия Си, и не помяни́ беззако́ний мои́х, поне́же дерза́ю просит́и. Дай же ми проше́ния моя́, и сотвори́ оби́тель во мне со Благослове́нным Отце́м Твои́м в день явле́ния Твоего́, и да́руй ми Христе́ моли́тву мою́, я́ко Ты Еди́н Да́вец жи́зни еси́. Покры́й же и беззако́ния моя ́от всех зна́емых мене́. И приими́ сле́зы моя́ сия́, да прибли́жится к Тебе́ плачь мой. Помяни́ Го́споди, ка́ко пла́кахся со слеза́ми пред святы́ми Твои́ми сведе́тели, да уще́дриши мя во стра́шный Он час, и покры́еши мя под крило́ма Твои́ма. А́ще хощ́еши сотвори́ти со мно́ю по беззако́нию моему́, не постою́.

У́ лю́те мне окая́нному! Что ми бысть, Го́споди мой? Легео́н проси́ без слез у Тебе́ ста́да свиния́, и дасть ему́. Аз же с пла́чем и рыда́нием молю́ Тво́е человеколю́бие: изба́ви мя от беззако́ний мои́х, и да́руй ми Ца́рствие Твое́, и покажи́ на мне гре́шнем неизрече́нное Тво́е человеколю́бие, и сотвори́ мя соприча́стника разбо́йнику о́ному, и́же еди́нем сло́вом насле́дник бысть раю́. Ту мя введи́ Твое́ю благосты́нею, и скры́юся посреде́ кро́ва его́. И ви́жду Ада́ма на ме́сте иде́же сокры́ся: и со сла́вою и весе́лием. Иде́же рече́ ему́, где бе, ту поклоне́ние и сла́ву принесу́, я́ко услы́шал еси́ моли́тву мою́, и беззако́ния презре́л еси́. Положи́ Влады́ко мой сле́зы моя пред Собо́ю, я́ко во оби́тели Твое́й, да возврати́тся враг мой вспять, и убоя́вся да смяте́тся, егда́ ви́дит мя на ме́сте е́же угото́ваша щедро́ты Твоя́. Мнев бо враг мой ви́дети мя на ме́сте, е́же грех мой угото́ва ми, и у́зрит мя на ме́сте живо́тне, и омраче́н быв да смути́тся, я́ко во́ля его не бысть во мне, ни скве́рное его́ помышле́ние не соверши́ся во мне. Ей Влады́ко Человеколю́бче, Еди́ный без греха́, Еди́не Чи́стый, изле́й на мя неизрече́нное Твое́ человеколю́бие. Дай же ми да и аз и вси возлю́бльшии Тя, насле́дницы бу́дем Ца́рствию Твоему́. И ви́девше сла́ву Твою́, поклони́мся благосты́ни Твое́й, и рече́м единоду́шно, сподо́бившиися ви́дети ненасы́тимую добро́ту: Сла́ва Отцу́ и Сы́ну сотвори́вшему ны! Сла́ва Свято́му Ду́ху, обнови́вшему ны, в безконе́чныя ве́ки веко́в! Ами́нь».