Без лица́, ни́ще есть зерца́ло. А поне́же прии́мет, мо́жет и возда́ти. И а́ще укра́шено бу́дет, мо́жет и украси́ти. Та́ко и весь челове́к, без благода́ти нищ есть проси́тель. А́ще же сподо́бится благода́ти о́ной, про́чее от по́мощи ея́ испра́вит все. А́ще же па́ки облени́тся, прожене́т ю́, и обря́щется пуст и окая́нен, и вселя́тся вонь по́мыслы скве́рнии и зли, я́ко нощны́й вран на ны́рищи. Челове́ку же подоба́ет призыва́ти ю́, и взысќати ея́ с боле́знию: и благода́ти есть приити́ в заступле́ние его́. Без благода́ти бо не мо́жет по́мысл просвети́тися. Ви́десте ли бра́тия моя́, мно́го пе́строе благообра́зие бу́дущаго ве́ка? И а́ще не очи́стится се́рдце на́ше, благода́ть духо́вная не вни́дет в челове́ка. И а́ще прии́дет благода́ть вонь, вся́ку доброде́тель испра́вит. А́ще испра́вит все то, и помышля́ет то исправле́ние свое́: таковы́й себе́ прельща́ет, не све́дый своея́ не́мощи. За́висть бо сотвори́ себе́, таковый отгна́ от себе́ благода́ть. И а́ще кто исправль себе́, позна́ заступле́ние благода́тное, я́ко от си́лы ея́ укрепи́вся, испра́вил есть де́тели, да просла́вит Бо́га, и да рече́т: «Сла́ва Твоему́ человеколю́бию, я́ко недосто́йна и гре́шна сподо́бил еси́ досто́йна Твоея́ благода́ти. Я́ко восхоте́, испра́ви во мне Влады́ко, Своя́ уго́дная». Таковы́й разуме́в свою́ не́мощь, потща́лся есть себе́ хра́ма чи́ста благода́ти сотвори́ти. И бысть в нем благода́ть святи́тель и приноше́ние, и стена́ непоколе́блема, и веселя́щися весели́т, и ра́дующися в нем ра́дость твори́т, и храни́т и́ от вся́кого зла, до́ндеже преста́вит и́ в ве́чную жизнь, от сего ве́ка в бу́дущий век. Приклони́ у́хо твое́ люби́миче мой, и бу́ду ти сове́тник. А́ще хо́щеши у́ду своему́ да вни́дет в ве́чную жизнь, и жела́еши блаже́нства Го́спода своего́: рцы ми, почто́ умыва́еши лице́ свое́ водо́ю, вся́ко того́ ра́ди да бли́жникам свои́м уго́ден бу́деши, а не оплева́л ли еси́ плотски́я стра́сти, но в них порабоще́н еси? А́ще ли хо́щеши умы́ти лице́ свое́, умы́й е́ слеза́ми, и умы́й е́ плачем: да просвети́тся со сла́вою пред Бо́гом и святы́ми а́нгелы Его́. Лице́ бо умыва́емое слеза́ми, добро́та есть неувяда́емая. Но проти́ву сему́ рече́ши: Стыжу́ся скве́рны ра́ди лица́ моего́. Скве́рна лица́ твоего́ и ногу́ твое́ю с чи́стым се́рдцем, па́че со́лнца сия́ет посреде́ а́нгел Бо́жиих. Что смее́шися без сумне́ния? Плака́тися и рыда́ти, несть ли тебе́ рек Госпо́дь? Ты же оста́вль за́поведи Бо́га своего́, не бои́шижеся муки Его́. Си́це искуше́ние ны́не мо́жет наказа́ти неиску́сныя. И в ру́ки разбо́йнича впады́й, мо́жет пу́тники потверди́ти. И поне́же у́бо от ча́сти искуше́ние глаго́лю, сла́бости ра́ди моея́ глаго́лю: в час бо утверди́хся, уны́ние же и ле́ность моя́ на то́жде мя па́ки влече́т. Сего́ ра́ди у́бо и аз люби́миче мой хощу́ сове́тник бы́ти ти, ста́до избра́нное Спа́сово. Молю́ вы насле́дницы Бо́жии, блюди́теся да не плотски́я ра́ди страсти и жите́йския по́хоти лиши́теся сла́вы о́ноя и ра́дости, и изринове́ни бу́дете из черто́га о́ного, и́же испо́лнь весе́лия и ра́дости. Люби́мицы мои́, труд черне́чества на́шего я́ко сон есть, труду́ же на́шему поко́й неисповеди́мь есть. Внемли́ у́бо себе́, еда́ когда́ обря́щешися отпа́д от обою́ ча́стию, и от обою́ пи́ру лише́н. Та́кожде и отве́т возда́си. Но потщи́ся па́че соверше́ную де́тель стяжа́ти и укра́шен вся́чески я́коже лю́бит Бог. И сию́ а́ще стя́жеши, николи́же прогне́ваеши Бо́га, ни бли́жняго своего́ озло́биши. Сия́ же единове́щна де́тель нари́чется, иму́щи в себе́ добро́ту разли́чными де́тельми. Я́коже бо вене́ц ца́рский, без ка́мения честна́го и без драга́го би́сера исплете́н не мо́жет бы́ти, та́ко и сия́ единове́щная де́тель, без добро́ты разли́чных де́телий не состро́ится: у́бо уподо́билася есть ца́рску ве́нцу. Я́коже бо вене́ц, а́ще недоста́ток бу́дет еди́ного ка́мени или́ би́сера, на главе́ царе́ве сия́ти не мо́жет, та́ко и сей единове́щней де́тели, а́ще недоста́ток бу́дет еди́ныя доброде́тели, соверше́ная де́тель не имену́ется. Уподо́бися па́ки многоце́нным бра́шном сла́достным, во всех сла́достех избра́нных, и лише́ным бы́вшим со́ли: я́коже бо многоце́нная бра́шна без со́ли я́стися не мо́гут. Та́ко и единове́щная де́тель вся́кою добро́тою укра́шена многопе́стрыми де́тельми: ти́ а́ще лиши́тся от любве́ Бо́жия и бли́жняго си, всему́ ме́рзок есть. Подоб́но же па́ки кре́пку и вели́ку орлу́, каса́ющуся высота́х небе́сных, и́же ви́дев бра́шно в се́ти, а́бие кре́постию крилу́ свое́ю соше́д устреми́ся на не́. И, восто́ргнути хотя́ бра́шно, удержа́н бысть за коне́ц ногти́ в се́ти, и ма́лым сим всяк кре́пость его́ смири́тся . Все бо те́ло его́ вне се́ти есть, кре́пость же его́ вся вязи́т в ней. Та́кожде и единове́щная де́тель, а́ще привя́зана бу́дет земны́х веще́х, вся в ней вязи́т отню́д. Все бо те́ло соверше́ния ея́ кроме́ уз есть, кре́пость же вся ея́ на земли́ смиря́ется . И я́коже не мо́жет оре́л возлете́ти на высоту́ ае́рскую, но́готнаго де́ля вязе́ния, та́ко и единове́щная де́тель, а́ще не свободи́тся от земны́х веще́й, не мо́жет бы́ти соверше́на де́тель.

Кто есть не имы́й слез, да прии́дет и пла́чется? И не имы́й покая́ния, поразуме́в да воздохне́т? Да навы́кнет изве́стно исправля́ющых де́тель сию́, еда́ бо небесе́ до́йдет исправле́ние его́, и дошед до две́рий тех, возбране́но бысть ему́ вни́ти: до́ндеже Ца́рствия не до́йдет де́тели исправле́ние, не мо́жет вни́ти в не. Я́ко се что глаго́лю, люби́мицы мои́. Испра́виша не́цыи пре́жде рече́ную сию́ де́тель, украси́ша ю́ сопле́тше а́ки ца́рский вене́ц, и ве́щи ра́ди изможда́лы толи́ку де́тель нивочто́же низведо́ша, привяза́ бо их бысть по́мысл печа́льми земны́х веще́й, и приву́за сего́ ра́ди не мого́ша на не́бо взы́ти.

Блюди́ся у́бо люби́миче мой, да не привяза́в себе́, преда́си ся врагу́ своему́, ни разруши́ши ди́вныя де́тели, ю́же мно́гим трудо́м стяжа́. И не возбраня́й си в небе́сная врата́ вни́ти. И не поста́ви ея́ посра́млены пред Женихо́м о́нем, и не привяжи́ ея́ ве́щьми изможда́лыми, ниже́ пригвозди́ ея́ земли́, но даждь ей дерзнове́ние и глас высо́к, да веселя́щися с ра́достию в чертог вни́дет и со гла́сом высо́ким истя́жет мзду свою́.

О́ ди́вное чу́до! Я́ко се́, лев превели́к и зело́ кре́пок, струно́ю привя́зан смири́ся, та́ко и де́тель земны́х печа́лех привя́зана, льво́ви уподо́бися де́тель сия́: укра́шена вся́цем де́лом благи́м и смире́ным, земны́ми же ве́щьми я́ко струно́ю еди́ною привя́зана есть. Те́мже молю́ тя люби́миче мой, воспряни́ и подви́гни ру́це твои́, хотя́ прере́зати изможда́лу сию́ струну́: да не сме́ху бу́деши, я́ко и Сампсо́н кре́пкий, и́же свои́м по́двигом я́ко во еди́н час ты́сящу изби́ и две, и добро́те я́ко еди́ну страну́ прере́за. И себе́ от уз свободи́ и враги́ победи́в, побе́ду Бо́гови принесе́. И моли́тва по́двига его́, во исто́чник преложи́ся. Сей у́бо и сицева́я исправле́ния сотвори́в. Себе́ связа́в враго́м преда́сться, я́тием бо стру́нным смири́ся , и стра́шную о́ну и ди́вную кре́пость связа́. Внемли́ у́бо ны́не люби́миче мой ты себе́, еда́ ка́ко ди́вную де́тель ма́лых ра́ди печа́лий свя́жеши и смири́ши . Но свободи́ ю́ от всех врежду́ющых веще́й, и украси́в ю́, преди́ посли́ на не́бо. Си́це же свободи́ ю́, яце́м же о́бразом ловцы́ сходя́щии во глубину́: я́ко да обряще́т многоце́нный би́сер, его́же обре́т, а́бие со мно́гим трудо́м на высоту́ восхо́дит из воды́, все же те́ло его́ обнажа́ется от воды́, и вода́ же пребыва́ет на ме́сте, сей же с бога́тством мно́гим устреми́вся на су́хо изле́зе. Сим же об́разом и ты потщи́ся, свободи́ти де́тель от всех земны́х веще́й, и украси́вся соверше́ною де́телию облецы́ся я́ко и ри́зою. И трезви́ся люби́миче мой день и нощь, да ся ея́ не совлече́ши. Сея́ еди́ноя ве́щныя де́тели, никто́же мо́жет вреди́ти на земли́. Скорбь бо терпе́ние содева́ет, нищета́ же и нестяжа́ние земля́ есть де́лу е́я. От сего́ бо плодови́та быва́ет, плоды́ бо пра́ведны принося́щи. Ни неду́г же ея́ мо́жет вреди́ти: от него́же бо си́лою оде́ется, и похвала́ми к Бо́гу. Подо́бно же не мо́гут ея́ низложи́ти: от тоя́ же бо стя́жет похвалу́ и сла́ву и жизнь ве́чную. Гоне́ние же устраши́ти ея́ не мо́жет, от того́ бо плете́т вене́ц соверше́ния своего́ и Бо́гу сла́ву прино́сит. Но и нагота́ ей не мо́жет уны́ние наложи́ти, поне́же душе́вную от нея́ совпряде́ си оде́жду сла́вы. И глад же та́кожде ея́ не мо́жет в пренемога́ние устро́ити, от того́ бо трапе́зу гото́вит си в Ца́рстве небе́снем. Но и жа́жда не мо́жет ей печа́ли нанести́, от тоя́ бо гото́вит си весе́лие ра́йское. Нищета́ же не мо́жет ея́ ужаси́ти на бога́тство, то́ю бо насле́дствует блаже́нство Госпо́дне. Бде́ние же и плачь, венцы́ ей суть соверше́ны. Исто́чник же слез, очище́ние ей есть. И основа́нием со́здана. Смерть же не мо́жет ея́ умертви́ти, но ни гроб мо́жет ея́ разруши́ти. Ни ае́р удержа́ти ея́ мо́жет, ни небеса́ мо́гут врат затвори́ти пред де́тельною душе́ю, но ви́дяще ю́ с ра́достию отве́рзутся. Тмы тма́ми и ты́сящи ты́сящами а́нгел и арха́нгел, престо́ли и госпо́дьствии, и нача́ла же и вла́сти не мо́гут запрети́ти ей, но с ра́достию прие́млют ю́, и на рука́х свои́х взе́мше прино́сят ю́ ко престо́лу сла́вы. Ра́дуется о ней Оте́ц и Сын со Святы́м Ду́хом. Ра́дуетжеся о ней Дух Святы́й, я́ко бысть ему́ це́ркви свя́та и всели́ся в ню. Ра́дуетжеся о ней Единоча́дый Сын, я́ко Тому́ похоте́, и па́че Его́ ино́го не стяжа́. Ра́дуетжеся и Оте́ц, я́ко Того́ па́че всего́ возлюби́л есть. Ра́дуются о ней небеса́ с си́лами свои́ми, единоду́шно сла́вят Отца́ и Сы́на и Свята́го Ду́ха, ви́дяще де́тель укра́шену вся́кою добро́тою и пра́вдою. Ра́дуется о ней рай, я́ко жре́бий паде́ ему́ в достоя́ние. Сла́ва и велеле́пие Еди́ному Благо́му Бо́гу и Человеколю́бцу, подаю́щему нам Свое́ Ца́рствие благода́тию Си. Исцели́ мя Го́споди, исцели́ ю́, еди́ный Врачу́ Прему́дре и Милосе́рдый, молю́ Твою́ благосты́ню, исцели́ стру́пы души́ моея́, и просвети́ о́чи мо́и у́мнии, да разуме́ю Твое́ смотре́ние быва́емое на мне вы́ну. И поне́же увя́ла есть мысль моя́, и благода́ть Твоя́ со́лию и́стинною да раствори́т я́. И что реку́, Прове́дче, све́дый сердца́ и у́ды? Сам бо еди́н ве́си, я́ко земля́ безво́дная жа́ждет Тебе́ душа́ моя́ и жела́ет се́рдце любве́ Твоея́ благосты́ни, да насы́тится всегда́ ея́. И я́коже вы́ну послу́шал еси́ мене́ Влады́ко, и ны́не не пре́зри моле́ния моего́. Се бо я́ко пленни́ца есть мысль моя́, Теб́е Еди́наго Спа́са И́стиннаго и́щущи. Посли́ у́бо ны́не благода́ть Твою́ вско́ре, да прии́дет в по́мощь мою́, я́ко да насы́тится мое́ алка́ние и напои́т мою́ жа́жду: Тебе́ бо жела́ю моего́ Влады́ки ненасы́тимаго. Кто бо мо́жет насы́титися вои́стинну лю́бящых Тя и Тебе́ жела́ющых, Све́та и́стиннаго, и Пода́теля све́ту? Даждь ми проше́ния моя́, и да́руй ми моли́тву, и воскапи́ на се́рдце мое́ еди́ну ка́плю любве́ Твоея́, да разгори́тся в се́рдцы мое́м пла́мы любве́ Твоея́ я́ко в лу́зе, и да поя́ст те́рние, лука́выя по́мыслы, и даждь же ми изоби́льно и без ме́ры, я́ко Бог челове́ком. И да́руй ми я́ко Царь ца́рствующым. И умно́жи я́ко Благ из Бла́га Отца́. Испо́лнив водоно́сти ме́сто от благослове́ния Си. Да ся испо́лнит жа́жда моя́ от благода́ти Твоея́. Насы́тивый пять ты́сящь от пяти́ хлеб, насы́ти и алчбу́ мою́ от безчи́сленаго бога́тства Своего́ и благосты́ни, Человеколю́бче Благи́й. А́ще на хле́бы и на тре́бу всему́ наро́ду Твоя́ неиску́дная благода́ть излия́ся во вре́мя се, кольми́ па́че да́руеши проше́ния рабу́ Твоему моля́щутися. Се бо и ае́р све́тится, и пти́цы измену́ют гла́сы своя́, от мно́ги прему́дрости сла́вы Твоея́. Се бо уже́ и земля́ облачи́тся оде́ждею разли́чною, и пе́стрым цве́том, и́же пряде́тся не рука́ми челове́ческими. Ра́дуетжеся и пра́зднует двема́ пра́здникома: еди́нем у́бо я́ко за сын свой первозда́нный Ада́м я́ко ожи́т, други́м же за Влады́ку своего́, я́ко сшед и походи́ по ней.

Се и мо́ре умножа́ется от благода́ти Твоея́, и обогаща́ет пла́вающая по нему́. Го́споди мой, Го́споди, и мне же благода́ть твоя́ да даст дерзнове́ние глаго́лати к Тебе́. И жела́ние е́же и́мам к Тебе́, ну́дит мя. А́ще бо искони́ человекоуби́йца змий, во вре́мя се приходя́ отверза́ет уста́ своя́, кольми́ па́че подоба́ет отве́рсти уста́ рабу́ Твоему́, жела́ющему Тебе́, во сла́ву и похвалу́ благода́ти Твоея́. Прии́мый два пе́нязя вдовы́ о́ноя и похвали́в ю́, приими́ моле́ние раба́ Своего́, и возрасти́ моли́тву мою́ сию́. И да́руй ми проше́ния моя́, да бу́ду храм свят благода́ти Твоея́. И да всели́тся в мя, и научи́т мя, ка́ко угоди́ти ей, и да в гу́сли моя́ бря́кнет гла́сом испо́лнь покая́ния и весе́лия. Обузда́ет же мысль мою́ я́ко уздо́ю, да не прельще́н быв согрешу́ Ти и отринове́н бу́ду просвеще́ния о́ного. Послу́шай мене́ Го́споди, послу́шай, даждь ми да почи́ю во Ца́рствии Твое́м. Аз прельще́н быв, и со́бран бых. Нечи́ст же бы, и очи́стився. И несмы́слен бы, и умудре́н бых и потре́бен быв.

Го́споди мой, Го́споди, ста́до избра́нное Твое́ черне́ц всех святы́х Твои́х угоди́вшых Ти, в раи́ ра́дующыхся, и́же моли́твы творя́т за ны и мо́лят Тя, Еди́наго Блага́го Человеколю́бца. И Сам же Го́споди мой Го́споди, услы́ши моли́твы их, и моле́ньми их спаси́ мя гре́шнаго. Аз же у́бо те́ми Тебе́ сла́ву приношу́, я́ко тех моли́тв послу́шав, уще́дрил мя еси́ и не́си презре́л моли́твы их бы́вшых за мое́ смире́ние и спасе́ние.

Ты же Го́споди Бо́же мой, проро́ком Свои́м рекл еси́: «Отве́рзи уста́ своя́ и испо́лню я́ Ду́ха». Се уже́ ны́не отерзо́шася се́рдцем уста́ раба́ Твоего́, Го́споди мой Го́споди, испо́лнишася ему́ от благода́ти Твоея́, да всегда́ благословлю́ Тя, Го́споди и Спа́се мой. Напо́й по́мысл мой, Человеколю́бче Благи́й, росо́ю благослове́ния Твоего́: я́ко земля́ осе́яна не мо́жет воспита́ти о себе́ плодо́в без посеще́ния благосты́ни Твоея́, та́ко и се́рдце мое́ не мо́жет без благода́ти Твоея́, провещева́ти уго́днаго Твоего́, и плодови́та плода́ принести́ пра́ведна. Се уже́ дождь пита́ет плоды́, и дре́во венчава́ется пе́стрым цве́том. И роса́ благода́ти Твоея́, да просвети́т ми по́мысл, и да украси́т све́том покая́ния и смире́ния , любо́вию же и терпе́нием. И что реку́ еще́ Го́споди мой Го́споди? Моли́тва моя́ немощна́, а беззако́ния моя́ ве́лия и притра́на суть.

О́ лю́те мне! Греси́ мои́ стужают ми, и не́мощь моя́ ну́дит мя: да победи́т ю́ благода́ть Твоя́. Отве́рзый о́чи слепцу́, отве́рзи ми о́чи у́мнеи, да всегда́ разуме́ю добро́ту Твою́. И отве́рзый уста́ немо́му, отве́рзи уста́ моя́ во сла́ву и похвалу́ благода́ти Твоея́. Положи́вый преде́лы мо́рю сло́вом повеле́ния Твоего́, положи́ преде́л се́рдцу моему́ благода́тию Си: да не уклони́тся на де́сно, ни на шу́е от добро́ты Твоея́. Да́вый во́ду в пусты́ни лю́дем непокори́вым и проти́вящымся, даждь ми покая́ние всегда́, оч́има мои́ма сле́зы, да пла́чуся день и нощь со смире́ною му́дростию, и любо́вию и се́рдцем чи́стым. Да прибли́житжеся моли́тва моя́ Го́споди к Тебе́. И да́руй ми ю́ и́мени ра́ди свята́го Твоего́, да принесу́ Ти дра́хму испо́лнь покая́ния и реку: «Сла́ва да́вшему ми сла́ву, да Ему́ принесу́ и предложу́». Услы́ши Го́споди моли́тву мою́ раба́ Своего́, моли́твами всех святы́х, Сый над все́ми, благослове́н еси́ во ве́ки. Ами́нь.