Бра́те, а́ще сподо́бился еси́ свято́му облече́нию мни́шескому, не вознеси́ся терпе́нием на гряду́щее вре́мя. Не бо, е́же есть вознести́ся кому, бо́льшу де́тель мне́ти, но е́же терпе́ти до конца́. И да не ключи́т ти ся глаго́лати: Прии́м схи́му, изменю́ си ум. Но ны́не пону́дися па́че на до́брыя де́тели, да не сам себе́ отщети́ши. До ны́нешняго бо вре́мене, и ну́ждею старе́йшины твоего́, не си брегл о свое́м спасе́нии. До втора́го бо вне́шним смуще́нием, ны́не же вну́тренее вшел еси́. Да не лени́ся о себе́, да не погуби́ши мзды своея́, но да и наи́м восприи́меши. Отсе́ле бо ти ся явля́т безмо́лвие. Отсе́ле явля́ет ти ся терпе́ние. Отсе́ле явля́ет ти ся смире́ние. Отселе явля́ет ти ся кро́тость и чистота́. Отсе́ле явля́ет ти ся и́ночество и мир и устрое́ние. Отсе́ле явля́ет ти ся твое́ искуше́ние, а́ще лю́биши спасе́н бы́ти. Отсе́ле явля́ют ти ся твоя́ хоте́ния, и та́йных по́мысл сове́ти. Отсе́ле явля́ет ти ся боле́знь и тща́ние и чистота́ и утверже́ние. Отсе́ле явля́ет ти ся кото́раго пути́ жела́еши: широ́каго ли и простра́ннаго веду́щаго в па́губу, или́ те́снаго и ско́рбнаго, веду́щаго в жизнь ве́чную.
Пространный же путь есть злоу́мия и молвы́, многоядение, пиянство, блуд, проны́рство, за́висть, и я́рость, и надме́ние, ре́кше гнев, неустрое́ние, и подо́бная сим. Во след же их хо́дит неве́рство, и непокоре́ние, и неповинове́ние, последи́ же всех злых отча́яние. И в сих живы́й, прельсти́лся есть от пути́ и́стиннаго. Те́снаго же и приско́рбнаго пути́ суть сия́: безмо́лвие, воздержа́ние, целому́дрие, и подо́бная сим. Во след же их идет безсме́ртная жизнь.
Поразуме́й возлю́бленне, сокрове́нная на пути́ простра́ннем, и оста́нися сего́, да пости́гнеши жизнь ве́чную. А́ще бо от ю́ности твоея́ хо́диши путе́м пра́вым, то и исхо́д твой бу́дет ми́рен. А́ще ли же на́чнеши скита́тися отсе́ле, последи́ же изнемо́жеши зле го́рько. А́ще ли же ви́диши вся в безстра́шии Бо́жии ходя́ща, де́белы и здра́вы телесы́, не ревну́й делесе́м безбоя́зньства их. Что у́бо есть пита́тися на ма́ло дний, и хоте́ния плотска́я твори́ти, да сего́ ра́ди лише́ну быти жи́зни ве́чныя, не́жели поскорбе́ти ма́ло, и избежа́ти ве́чнаго мучен́ия, и насле́довати со Христо́м ве́чную жизнь? Соблюди́ся зело́ сам от де́рзости, еда́ ка́ко порабо́тив тя многосло́вию и безсту́дию, сотвори́т тя ра́дость бесово́м, и последи́ отри́нет тя и от бра́тии твоея́. Толи́цем бо и она́гри оскверня́ют пшени́цу, ели́цем же и де́рзость оскверня́ет труды́ и боле́зни мни́ху.
Препоя́ши у́бо себе́ гове́нием и смире́нием, и покоре́нием и послуша́нием. Накажи́ сам себе́ и моли́ся глаго́ля: А́ще бо и о́браз мни́шеский взях, но побе́дам несмь поучи́лся, и сего́ ра́ди пребу́дет в тебе́ смире́ние и мудрость. Седящу же ти в безмо́лвии в ке́лии свое́й, собери́ свой помысл, и рцы сердцу своему́: Челове́че, не си ли ми́ра оста́вил, и по плоти роди́телей, и дру́ги и бога́тство, Го́споду поспешествующу? Но кий успе́х, а́ще и зде прише́д на спасе́ние, и сопротивная де́лаеши, и согреша́еши пред Бо́гом, то́кмо в праздно имя обле́клся еси́, и блажи́мь еси́ зна́емыми твои́ми други. И реку́т ти: Блаже́н есть о́нсица, я́ко возненави́дел есть ми́ра сего, и сла́ву и пре́лесть его́, и ктому́ уже́ не пече́тся ничи́м же земны́ми, отше́л бо есть и бысть мних. И се ты зде не мни́шеское житие́ живе́ши. И ка́я срамота́ пости́гнет нас, а́ще блажа́щии нас зде, варя́т нас в Ца́рствии небе́снем? Коли́к у́бо страх и тре́пет сря́щет нас, а́ще блажа́щии нас ны́не, и кла́няющеся и глаго́люще, помоли́теся раби́ Христо́ви за ны гре́шныя, ти́и обрящутся в поко́и, мы же в тесноте́ прегреше́ния ра́ди на́шего.
Те́мже возлю́бленнии, воспряне́м ко Го́споду молю́ вы, я́ко вре́мя и́мамы. Да не глуми́мся преле́стным ве́ком сим, мир бо сей про́ходит и по́хоть и сла́ва его́, а творя́й во́лю Бо́жию пребывает во ве́ки. Вся́ку у́бо жите́йскую вещь мо́лвящую отве́ржем, и ум име́ем к Бо́гу. Кре́пость бо и добро́ту и красоту́, измену́ет ста́рость и болез́нь. Сла́ву же и бога́тство, разоря́ет смерть и тля, пра́вда же пребыва́ет во ве́ки. Подвиза́йся убо возлю́бленне до́бре, се бо ся отверза́ет Ца́рство всем, и Подвигода́вец ожида́ет. Глаго́лет бо апо́стол: Та́ко тецыте да пости́гнете. И всяк подвиза́яйся, от всего́ да воздержи́тся. И па́ки глаго́лет: Никто́же во́ин бывает обязаяйся ку́плями жите́йскими, да воево́де уго́ден бу́дет. А́ще и муку прии́мет не венча́ется, а́ще не зако́нно му́чен бу́дет. Бог же и Оте́ц Го́спода на́шего Иису́с Христа́, да даст вам Дух си́лы и прему́дрости и терпе́ния, рабо́тати Ему́ вся дни живота́ на́шего. Тому́ сла́ва во ве́ки. Ами́нь.