О де́встве и о свяще́нии душе́внем, глаго́лет Па́вел апо́стол, я́ко изя́щен сове́тник учи́т ны вся, и наипа́че сказу́ет число́ де́вственое вы́ше ми́ра: Име́яй бо жену́ рече́ апо́стол, тою́ и́мать печа́ль ка́ко угодити жене́. Живы́й же в де́встве, име́ет сию́ печа́ль е́же Христу́ угоди́ти. О́на бо печа́ль в му́ку веде́т, сия́ же печа́ль в жизнь ве́чную.
Блаже́н челове́к име́яй печа́ль е́же Го́сподеви угоди́ти, и соблюде́т чи́сто те́ло свое́, да бу́дет це́ркви непоро́чна и чи́ста, Пресвято́му и Вели́кому Царю́ Христу́. Бысть ли це́ркви Бо́жия во́лею о́ челове́че, внемли́ у́бо себе́ во дне и в нощи́, да не растли́ма бу́дет це́ркви, ю́же стяжа́ свое́ю вла́стию и свое́ю во́лею, и свои́м до́брым прилежа́нием. Бысть ли це́ркви Бо́жия не по ну́жди, но единоду́шием свои́м. Ве́си сам я́ве быва́яй це́ркви Бо́га Вы́шняго, я́ко Дух Бо́жий вселя́ется в це́рковь. А́ще еси́ чист и освяща́ет ю́, е́же есть похва́лен своему́ Влады́це.
Послу́шай что ти глаго́лю, бра́те мой при́сный. Напиши́ глаго́лы моя́ изможда́лыя на се́рдцы твое́м. Препоя́шися ве́рою твое́ю чи́стою, упова́нием и любо́вию, и ста́ни я́ко си́лен, храня́й це́рковь Бо́жию от вся́кия скве́рны нечи́стаго по́мысла. Бу́ди же весь сам вы́ну я́ко облюда́яся, ви́дя неприя́знены напа́сти. Напа́дающе при́сно искуше́нием неприя́зненым. Еда́ когда́ обря́щут сла́ба и глумя́щася, и растля́т тому́ окая́нному це́рковь теле́сную, и ктому́ не и́мать ся обрести́ похва́лен Влады́це. Внемли́ у́бо себе́, еда́ не когда́ обря́щешися сам лука́вому искуси́тель.
Разуме́еши ли о́ бра́те, кто суть искуси́тели лука́ваго уби́йцы? По́мыслы скве́рны, и по́хоти злы́я, уны́ния и мяте́жи, гнев и ре́вность, и и рабо́ты страсте́м. Си́и суть искуси́теле лука́ваго, безсту́днии и зли́и не престаю́ще никогда́ же, ниже́ насы́щшеся от лука́вства, и побежда́еми, при́сно возме́щут злы́я по́мыслы. Безсту́ден бо нари́чется ко́рень похоте́нию, а́ще и посека́емь быва́ет по вся дни, и па́ки прозяба́ет по вся часы́. Искорени́ бра́те ко́рень похоте́ния се́рдца твоего́, да не по вся часы́ прозяба́ет и предлага́ет зла́я. А́ще и мно́жицею посека́еши сугу́бо толи́ко прозяба́ет, а́ще ко́рень его́ не искорени́тся весь, подвиза́йся ча́сто да бу́деши храм Бо́жий непоро́чен и безскве́рнен. А́ще сий ухрани́ши храм свой Бо́гови, Сам Бог Святы́й пода́ст ти проти́ву возда́ние кра́сный рай в поко́й твой, побе́дою страсте́м и скве́рным по́мыслом содолел еси. Храни́ храм свой безскве́рнен, да бу́дет боголе́пен и богоприя́тен Бо́гови.
Внемли́ у́бо себе, да не в свята́го ме́сто и Пречи́стаго Влады́ки. Врага́ нечи́стаго введе́ши в свой храм, и растли́т ти храм безсту́дием. Ненави́дяй бо добра́ враг, безсра́мен бо есть и безсту́ден предложе́нием. Мно́жицею запреща́я вон его́ изго́ниши, то́йжде без студа́ ходя́ учаща́ет. А́ще его введе́ши в храм теле́сный, без вины́ есть Бог Пречи́стый: не Сам бо тебе́ отступи́, но ты прогне́вай, и введе́ нечи́стаго ко́рчемля. Свята́го Царя́ возненави́дев мучи́теля возлюби́л еси́. Исто́чник живота́ оста́вив. Скве́рнаго же возлюби́л еси́, и све́та отлучи́вся тме приобща́ешися. Сла́бости ра́ди твоея́, себе́ пре́дал еси́ врагу́ нечести́вому. Бог бо изво́ли жи́ти в тебе́, в хра́ме твое́м при́сно. Сам же оскорби́л еси́ Блага́го Влады́ку, жа́ждущаго тебе́ Христа́, и хотя́щаго ти да́ти Ца́рство небе́сное. Вы́шним при́сно и непоро́чным чу́вством. Всели́тся Бог в таково́ те́ло, а́ще Сам возлюби́л всели́ Бо́га в храм твой теле́сный вся дни твоя́, ели́ко поживе́ши на земли́. И Сам Святы́й Бог в рай во све́те непобеди́ме, и жи́зни безсме́ртней во ве́ки веко́м, с ра́достию вели́кою поко́ит тя та́мо. Сл́ышал ли еси́ у́бо, а́ще и чел ли еси́, я́ко еди́н день во све́те о́ном Ца́рствия Бо́жия па́че ты́сящь лет есть ве́ка сего́. Отве́рзи се́рдце свое́, и приими́ брате глаго́лы моя́, возлюби́ Бо́га все́ю душе́ю твое́ю, сла́дость бо и просвеще́ние. И ра́дость при́сно есть лю́бящым Бо́га. А́ще лю́биши его́ при́сно в тебе́ живе́т. Бог ревни́тель есть Пречи́стый и Святы́й, и живе́т в души́ боя́щагося Его́, и твори́т во́лю возлюби́вшых Его.
Хо́щеши ли бы́ти храм Бо́жий непоро́чен и свят, име́й о́браз Его в се́рдцы свое́м при́сно. Ико́ну Бо́жию пресла́вну, не ва́пом на досце́ образова́ну или́ на ино́м чесо́м, но ту ико́ну глаго́лю Бо́жию, быва́емую до́брыми де́тельми, посто́м и воздержа́нием, исправле́нии до́брыми, бдением и моли́твами, впису́й в безскве́рном се́рдцы вы́ну, о́бразом Небе́снаго Влады́ки. Исправле́ние же есть, и по́мысл чи́стит, обнажение земны́х веще́й, и чи́стым житие́м при́сно с кро́тостию, без по́двига бо никто́же венча́н быва́ет в житии́ беле́честем.
В черне́честве же па́ки, без по́двига никто́же улуча́ет све́тлаго венца́ и жи́зни ве́чныя. Бра́ни уподо́билося житие́ се при́сно. И подви́жницы соверше́нии свое́ю муже́ственою душе́ю, без боя́зни показу́ются в бра́ни. Страши́вии же и слаби́вии, свое́ю сла́бостию бе́гают по́двига. Подви́жницы же и соверше́нии и́ноцы, воздержа́нием пред очим́а и́муть кра́сный рай, ча́юще всегда́ наслади́тися в нем всего́ бла́га, и [в] све́те ве́чнем и жи́зни причасти́тися безсме́ртней.
Хо́щеши ли подвиза́тися и соверше́н бы́ти облецы́ся доброде́тельми я́ко и ри́зою при́сно. Подвиза́йся ча́сто, и не совлачи́ся ея́. Убо́йся вина́, еда́ ка́ко обличи́т тя, и обнаже́н бу́деши де́тельми, я́коже обнаже́н бысть пе́рвый пра́ведник. Разуме́ ли си́лу вину? А́ще ли не послу́шаеши я́же ти аз возвеща́ю вино́: Но́е, мужь пра́веден и преподо́бен, и благочести́в, в ро́де том растли́мем сый, и сподо́бися от Бо́га слы́шати глаго́лы и похвалы́ благочести́ваго, Бог бо ему́ рече́: Тебе́ еди́ного ви́дех пра́ведна в ро́де сем растли́мем.
Па́ки то́жде вино́, и Ло́та преподо́бнаго во сне укра́де. Укра́де бо от него́ дще́рьма зача́тие чрез естество́. Пра́веднаго и преподо́бнаго, вино́ не пощаде́. Тебе́ же не́мощну су́щу кольми́ паче соодоле́ти и́мать. Убо́йся в ю́ности от вина́, вино́ бо не пощади́т те́ла. Огнь возгнеща́я в нем по́мыслы злы́ми. Не разсла́бися те́ла на то раждеже́ние, да не восхище́н бу́деши от по́мысла зла́го и поуче́нием зло́бным. Безде́лен же нарече́ши я́ обще́ния теле́снаго, и возда́ниих причасти́шися злым поуче́нием, сте́нем и куми́рством гресе́ его́. А́ще пре́жде восхище́но бу́дет те́ло твое́ от куми́рства сего́, и стеня́ поуче́ния, бесе́дуя же всегда́, и ка́ешися творя́. Всегда́ же созиду́еши, и всегда́ разаря́еши. Куми́рску греху́ предстои́ши всегда́. Очи́ма помы́сленыма приви́димое виде́ние, умножает беседы, слади́т поуче́ние, разслабля́ет по́мысл. Победи́мое непобеди́мо согреша́ет по́мысл.
Всем же позара́таем ви́димо есть лице́ его́ испо́лнь гове́ния. Таковы́й же получи́т такову́ со́весть. Му́чимь есть внутрь при́сно, печа́луя ча́сто, ве́дый я́ко и́мать обличи́теля свою́ со́весть. Се сла́бость со́вести злы́я. Ку́пно сконча́л есть того́ греха́, и того́ стоп во след хо́дит печа́ль, о́бразом же у́бо показу́ет лице́ гове́ния. Внутрь же нарече́тся не име́я дерзнове́ния во всем к Бо́гу.
Кто у́бо не рыда́ет и кто не пла́чется, я́ко во еди́ном мгновении разслабе́ет по́мысл, и тогда́ во́лею согреши́т Бо́гови. И прожене́т от себе́ благода́ти духо́вныя, освяще́ны. Глаго́лю же и де́вственую похвалу́. Ели́ко же у́бо вре́мя есть. Свят и чист храм теле́сный, толи́ко Бог Вы́шний живе́т в хра́ме. А́ще ли же растли́тся храм теле́сный и оскверни́тся це́ркви, а́бие Святы́й и Пречи́стый Влады́ко, оста́вит це́рковь, и в небе́снаго све́та ме́сто, вни́де нечести́вый и всели́тся ту. И с ним вни́дет по́хоть зла́я оскверня́ющи всегда́.
Кто у́бо есть сицевы́й не име́яй слез и прии́мет сия́ вся на се́рдцы свое́м, я́ко Бог Святы́й отри́ну хра́мину, всели́жеся в ню по́хоть зла́я? И а́ще разуме́ет се кто, и зрит отку́ду и где есть отпа́л и кого́ отлучи́лся есть не насы́тится таковы́й пла́ча николи́же, со слеза́ми и воздыха́нием и я́ко кто в по́двизе побежден бу́дет сла́бостию. Егда́ же ви́дит ино́го в по́двизе сем победи́вша пре́лесть и победи́теля я́вльшася и венцы́ украша́ема, и вси похваля́юще победи́теля.
Егда́ ви́дит он бежа́вый по́двига, тогда́ обдержи́мь ка́знию лю́тою. И себе́ му́чит от печа́ли вели́ки. И глаго́лет в себе́, почто́ еди́нем мгнове́нием побежде́н бых по́мыслом, и бежах по́двига? И ны́не ви́жду победи́вшая подвиза́нием, и́же сла́вими вели́кими похвала́ми, сконча́вшая подвиза́ния.
Аз же со студо́м кры́юся, я́ко отбежа́в от того́ по́двига. Та́ко и в день возда́ния, егда́ ви́дят та́мо сла́бии гре́шницы пра́ведных светя́щася с ра́достию вели́кою: о́вы в раи́, о́вы в Ца́рствии. Друзи́и же во о́блацех летя́ща во свет ве́чный. Себе́ же окая́ннии во огни́ негаси́мем, и тме кроме́шней. Тогда́ обы́дет я́ казнь лю́то, и плачь неполе́зен.
Те́мже молю́ тя бра́те мой люби́мый, бу́ди при́сно подража́тель соверше́ных оте́ц, бы́вшых це́ркви свя́та и непоро́чна Пречи́стаго Влады́ки. Ходи́ по стопа́м святы́х оте́ц, ходи́вшых в де́встве и чистоте́, и в черне́честве све́тле и моли́тве и посте́.
Люби́ черне́чество, возлюби́ моли́тву, бесе́ду Влады́чню. Вся́ка бо моли́тва свя́та и чи́ста, Влады́чня нарече́тся. Моли́тва же соверше́ных возлюби́вшых Бо́га, с ра́достию и весе́лием и со дерзнове́нием на не́бо восхо́дит ча́сто, и ангели и арха́нгели ра́дуются о ней, и пред престо́лом святы́м и высоќим Влады́ки и Бо́га всех поставля́ют ю́. Тогда́ бо ра́дость есть святы́м а́нгелом, егда́ вво́дят пред Влады́ку моли́твы пра́ведных возлюби́вшых Бо́га.
Потщи́мся у́бо бра́тие, е́же бы́ти подо́бну жи́знем же и де́телем преподо́бных оте́ц, ходи́ти жите́йским путе́м их. Чернеч́ествуй я́коже и они́, черне́чествуй и ду́хови, черне́чествуй и те́лу. Черне́чествуй бра́шну, черне́чествуй язы́ку, черне́чествуй по́мыслу, черне́чествуй сме́ху, да пока́жешися во всех я́ко соверше́ный страда́лец.
Внемли́ у́бо себе́, да не ка́ко моля́ся глумни́к обря́щешися. Егда́ же предстои́ши Го́сподеви моля́ся, со стра́хом и тре́петом предстои́ Ему́. Отсецы́ от се́рдца своего́ по́мысл и печа́ль от всех земны́х. Бу́ди же весма́, я́ко а́нгел небе́сный в годи́ну моли́твеную. И та́ко подвиза́йся, да бу́дет ти моли́тва свя́та и чи́ста, безскве́рна и непоро́чна. Да ви́дят ю́ две́ри небе́сныя, и ра́дующеся отверза́ются. Да ви́девше ю́ ангели и арха́нгели вси, веселя́щеся сря́щут ю́, и пред пречи́стым и высо́ким Престо́лом Пречи́стаго Влады́ки, приведу́т ю́. Та́ко буд́и всегда́ в годи́ну моли́твеную, я́ко херувим и серафи́м. Приле́жно к Бо́гу поучи́ся бра́те в глаго́лех сих и воспо́й с любо́вию се́рдца. Бра́шна духо́вна вмеща́ют в ду́шу, и ослажда́ют от го́рести жития́ су́етнаго, и полегча́ют ей от тя́гости и печа́ли земны́х веще́й.
Вся ели́ко слы́шал еси́, потщи́ся бра́те соблюсти́. Име́й Бо́га во уме́ свое́м при́сно, яко да обря́щеши та́мо име́я дерзнове́ние, в годи́ну о́ну тре́петную и стра́шную, егда́ прии́дет Христо́с. Хотя́й возда́ти кому́ждо по дело́м его́. Ему́же подоба́ет вся́ка сла́ва честь и поклоне́ние, со Отце́м и со Святы́м Ду́хом, ны́не и при́сно и во ве́ки веко́в. Ами́нь.