Соше́дый Госпо́дь от я́дра О́тча, и быв нам путь спасе́ния, о покая́нии учи́т ны, блаже́ным и боже́ственым гла́сом, глаго́ля: «Не приидо́х призва́ти пра́ведных, но гре́шных на спасе́ние и покая́ние». И па́ки: «Не тре́буют здра́вии врача́, но боля́щии». А́ще аз есмь глаго́ляй, николи́же не послу́шай мене́. А́ще ли Сам Христо́с, то почто́ неради́ши леня́ся о животе́? А́ще ли же и́маши внутрью́ду стру́пы неисце́льны, от по́мысл и дея́ния, то почто́ неради́ши о та́йных стру́пех, не хотя показа́ Врачу́ стру́пов, да тя исцели́т? Доко́ле и́маши своего́ по́мысла ле́ность и нерадя́ о свое́м стру́пе, да вя́щше бу́дет согни́л без исцеле́ния?
Почто́ люби́миче, себе́ возненави́дел еси́, не хотя́ показа́ти та́йных твои́х стру́пов? Что ся бои́ши Врача́? Несть яр, ни нагл, ни безми́лостивен. Не тре́бует желе́за, ни боле́зненаго жже́ния, ни лю́таго чарова́ния: сло́вом бо еди́нем цели́т. А́ще хо́щеши, приступи́ к Нему́: бла́га испо́лнен есть и милосе́рдия. Тебе́ ра́ди от я́дра О́тча сни́де. Тебе́ ра́ди воплоти́ся, да к Нему́ присту́пиши без стра́ха и без сумне́ния. Тебе ра́ди вочелове́чился есть, да исцели́т тя от лю́тых стру́пов. Со мно́гою любо́вию и со мно́гою благосты́нею призыва́ет тя к Себе́. Приступи́, гре́шниче, удо́бь исцеле́й. Отверзи́ от себе́ грехо́вную тя́гость, и моли́тву принеси́, и сле́зы проле́й на твою́ гни́лость. Тако́в бо есть небе́сный Врачь, слеза́ми и воздыха́ньми исцели́т стру́пы. Приступи́ ко благо́му Врачу́, принося́ сле́зы до́браго врачева́ния. Та́ко бо хо́щет небе́сный Врачь исцели́ти, кого́ждо свои́ми слеза́ми. Ничто́же бо удо́бе есть е́же слеза́ми це́лу бы́ти. Си́ми бо врачева́нии, слеза́ми и воздыха́ньми, отваря́ется нам дверь покая́ния.
Потщи́ся гре́шниче, пре́жде да́же не затвори́тся. Не ждет бо се вре́мя твоея́ ле́ности надо́лзе, ни дверь же си[я́] зря́щи тебе́ лени́ва ждет, неражде́ния твоего́ де́лма. Почто́ возненави́дел еси́ живо́т твой, окая́нне? Что есть вы́ше души́ твоея́, челове́че? Ты же о́ гре́шниче, о сей неради́л еси́. Не ве́си ли люби́миче, в кий час повели́т небе́сный Врачь затвори́ти дверь покая́ния.
Приступи́, молю́ тя, потщи́ся цел бы́ти. Со́лнце пости́гло есть вече́рнюю годи́ну, но тебе́ ра́ди ожида́ет да пости́гнеши оби́тель. Доко́ле пребыва́еши нечи́стому си врагу́ и всегда́ соверша́я о́ного во́лю? А он хо́щет тя во огнь воврещи́: си́це бо тща́ние его́ есть, лю́бящым его́. Той бо бо́рется при́сно с челове́ки похотьми́ лука́выми. И той па́ки в неча́яние вво́дит, повину́ющаяся ему́, ужесточева́ет се́рдце, изсуша́ет сле́зы, да ся не пока́ет гре́шник. Бежи́ сего́ челове́че, да тебе́ не убие́т.
Послу́шай люби́миче, блаже́наго гла́са Влады́чня, глаго́люща всегда́: «Прииди́те ко Мне вси тружда́ющиися и обреме́ннии, и Аз поко́ю вас. И возми́те яре́м Мой на себе́, и уви́дете от Мене́ я́ко Кро́ток есмь и Смире́н се́рдцем. И обря́щете поко́й душа́м ва́шым». Поко́ити глаго́лет, и честь запове́дает.
Что ся лени́ши, о́ челове́че? Почто́ провожда́еши день за день? А Он тебе́ ожида́ет по вся дни. Приступи́, не бо́йся: Благ есть и Ми́лостив Влады́ка, не и́щет написа́ния всех твои́х грехо́в. Прибе́жище бо нари́чется, и всех злых стру́пов Цели́тель. И да́рует жизнь неоску́дную я́ко Благ, и прие́млет у́бо удо́бе к Нему́ припа́дающая. Поне́же Бог ве́лий и Прови́дец нари́чется, све́дый вся на́ша помышле́ния, и а́ще непрело́жен и благочести́в по́мысл и́мать приходя́й.
Сам Бог я́ко Благ и благосты́ни ра́ди, все́ми и́щущыми Его́ а́бие обрета́емь быва́ет, и пре́жде воззре́ния его́ к Нему́, глаго́лему ему́: «Се ту есмь». И пре́жде его́ приближе́ния отве́рзет сокро́вище пред и́щущыми Его́. И пре́жде пролия́ния слез, проли́тие щедро́ты. И пре́жде е́же ми́лу ся ему́ де́яти, уще́дрит и́. И пре́жде е́же помоли́тися ему́, получи́т ми́лость.
Любы́ Бо́жия та́ко жела́ет и хо́щет, вои́стину приходя́щых к Нему́, и не заме́длит послу́шати его́. Ниже́ па́ки вопраша́ет прише́дшаго нечести́ваго: «Почто́ сели́ко вре́мя рабо́тал еси́ врагу́, Мене́ же презре́л еси́?». Не и́щет бо до́лгаго вре́мени мимоше́дшаго, но то́кмо смире́ния и слез и воздыха́ния к Нему́ приходя́щых. Ожида́ет Влады́ка покая́ния, я́ко Прови́дец Бог наш, и в том часе́ отпу́стит вся беззако́ния и прегреше́ния, помы́сленая же и сотворе́ная, и оде́жду глаго́лет принести́ ему́, и пе́рстень на десну́ю ру́ку, и всем а́нгелом вели́т пора́доватсия о обре́тении сем, о души́ гре́шничи. Баже́ни есмы́ у́бо мы вси челове́цы, такова́го Влады́ку и́мамы: Сла́дка, Добра́, Ще́дра, не по́мняща зла, Бла́га, Милосе́рда, Долготерпели́ва, отпуща́юща всегда́ на́ша грехи́. Си́це бо ми́лует, а́ще мы хо́щем, долготерпи́т, и подае́т нам вся бла́гая в ве́це сем и та́мо, а́ще восхо́щем.
Прииди́те у́бо, умили́мся, до́ндеже вре́мя есть в житии́ сем, до́ндеже есмы́ мо́щни умоли́ти Бо́га, удо́бен бо есть иска́ти отпуще́ния. Пра́во есть нам толчи́ в две́ри милосе́рдия Его́. Изле́ем сле́зы, до́ндеже вре́мя есть прия́тие слеза́м, да не доше́дше, пла́чемся во ве́ки без по́льзы: та́цы бо сле́зы нивочто́же вменя́тся. Ели́ко у́бо мы хо́щем, толи́ко же и отпу́стит нам Бог Благи́й. Зде бо послу́шает нас моля́щыхся, и зде отпу́стит нам грехи́ моля́щымся нам Ему́. Зде потреби́т нам беззако́ния благоволе́нием. Зде моле́ние, та́мо же взыска́ние. Зде долготерпе́ние, та́мо же я́рость. Зде смотре́ние, та́може испыта́ние. Зде осла́ба, та́мо же туга́. Зде наслажде́ние, а та́мо страсть. Зде лихоима́ние, а та́мо муче́ние. Зде смех, а та́мо па́ки плачь. Зде несумне́ние, та́мо же му́ка. Зде неражде́ние, та́мо же огнь веч́ный. Зде красота́, та́мо же червь. Зде велича́ние, а та́мо смире́ние. Зде восхище́ние, та́мо же па́ки скре́жет зубо́м. Зде зла́ты пола́ты, а та́мо тма и мрак. Зде презре́ние, а та́мо све́дение вся́кому соблажне́нию. Све́дуще у́бо сия́ вся, бра́тие, почто́ неради́м о свое́м спасе́нии? Да не измени́тся бра́тие ум наш зде, да не услади́т нас любы́ земны́х веще́й, да не огорчи́тся у́бо плачь наш та́мо. Почто́ неради́м не хотя́ще исцели́тися, до́ндеже вре́мя есть, ма́лыми слеза́ми в ма́лое се вре́мя? Покая́ния ра́ди, отпу́стит Благи́й вся прегреше́ния на́ша. Пла́чися зде ма́ло, да не пла́чешися та́мо во ве́ки веко́м во тме кроме́шней. Благово́лен буд́и зде, да не та́мо вве́ржен бу́деши во огнь негаси́мый. И кто не и́мать пла́катися или́ не рыда́ти, яко́ возненави́девше жизнь смерть лю́бим. Поразуме́й сам бра́те мой люби́мый и бли́жний, избери́ у́нее и поле́зное души́ твое́й. Ка́я ти зло́ба есть, да зде пла́чеши грехо́в свои́х и зде мо́лишися Бо́гу, покая́нием благово́лен бы́ти, или́ та́мо воспла́чешися во огни́, ничто́же по́льзуя? Зде бо сле́зы нари́чутся оставле́ние, та́мо же сле́зы веду́т в му́ку, и преще́ния тму пе́нязь отдав. А́ще бо зде не хо́щеши отда́ти от мно́га ма́ло, та́мо и́маши да́ти со мно́гим муче́нием всю твою́ по́льзу.
Сия́ же глаго́лю ва́шей любви́ бра́тие боголю́бная, не я́ко досто́ин сый или́ что в житии́ пожи́в, но от мно́гия печа́ли и боле́зни се́рдца моего́ глаго́лю сия́. Ча́сто поразуме́в себе́, что нам лежи́т, и мы лени́мся. Аз бо бра́тие нечи́ст нари́чуся по́мыслы и де́лы, и не све́дый себе́ весма́, что благо есть.
Но сия́ глаго́лю ва́шему едине́нию, я́ко обдержи́т печа́ль се́рдце мое о хотя́щем бы́ти Суде́ Бо́жии стра́шнем. Поне́же вси есмы́ неради́ви при́сно, я́ко мня́щеся жи́ти в сие́м суе́тнем житии́ во ве́ки веко́м, а мир сей прехо́дит. А мы люби́мицы сло́во хо́щем возда́ти о всем сие́м, я́ко ве́дуще добро́, а твори́м зла́я. Зде нерадя́ще, та́мо му́чимся. Па́че любве́ Бо́жия и Ца́рства Его́, почто́хом зе́млю и я́же на ней. Зла́то и сребро́ не и́змет нас от стра́шнаго огня́. Ри́зы и пи́ща, на осужде́ние нам обря́щутся. Та́мо брат не изба́вит бра́та, ни оте́ц ча́до, но ко́ждо стоя́ бу́дет во свое́м чи́ну.
Мно́зи суть святи́и и пра́веднии и преподо́бнии, обнажи́вшеся жития́ сего́ и его́ веще́й, до́брым смы́слом их и благи́м упова́нием их, за́поведем Бо́жиим ве́ру е́мше, насладя́тся во благи́х Его́, в ра́йстей пи́щи. Христа́ жела́юще, и почто́ша И́ па́че всего́ тли́маго: те́мже и всегда́ с Бо́гом веселя́тся, о Ду́се Святе́м ра́дуются вы́ну. Свята́я Тро́ица ра́дуется о них, ра́дуются о них а́нгели и арха́нгели.
Во и́стину у́бо си́и суть ра́йская пи́ща. А́нгели и челове́цы блажа́т я́, я́ко почто́ша любо́вь Бо́жию па́че всего́. И Бог Святы́й и Пра́ведный и И́стинный, дарова́ им Свое́ Ца́рство. Еще́ бо́льшу сла́ву даст им, да зрят Его́ со святы́ми а́нгелы всегда́ с ра́достию.
Мно́жицею бо челове́цы зе́млю возлюби́ша, и я́же на ней тли́мая. Пригвожде́н бо есть ум их в тли́мая и ма́лая, я́ко ско́ти пита́юще телеса́ своя́ бра́шны, а́ки безсме́ртни су́ще. Что де́лаеши, о́ челове́че живы́й, а́ки скот неразу́мный свои́м невоздержа́нием? Разсуди́тельна сотвори́л тя есть Бог, не уподо́бися ското́м неразу́мным.
Воспряни́ о́ челове́че поне́ ма́ло, и прииди́ в себе́, и уве́ждь разу́мно, я́ко сни́де с небесе́ тебе́ ра́ди Бог Вы́шний, да от земли́ вознесе́т тя на не́бо. На брак зван еси́ небе́сным Женихо́м, почто́ неради́ши и озлобля́ешися? Ка́ко и́маши приити́ на бра́ки, оде́жды многоце́нныя не име́я, ни свещи́ держа́ща? И а́ще презре́в вни́деши, и услы́шиши пред все́ми стра́шный он глас: «Дру́же, ка́ко вшел еси́ се́мо, не име́я оде́жды бра́чныя, и о Мое́м Ца́рствии нерадя́ вшел еси́, да укоре́ние сотвори́ши твои́м обнаже́нием, Мои́м пи́ряном?». И глаго́лет Царь Свои́м слуга́м: «Связа́вше ему́ ру́це и но́зе, вве́рзите и в тму кроме́шную, я́ко да му́чится во ве́ки ту́».
Поне́же Аз Сам приидо́х от време́н дово́лен, и звах вы вся на бра́ки. И он и́же небреги́й о Мое́м зва́нии и нерадя́ о свое́м спасе́нии, не угото́ва себе́ оде́жды бра́чныя. Те́мже велю́ му́чити и́ окая́ннаго, я́ко презре́л есть Мое́ Ца́рство. Не бои́шилися у́бо Его́, о́ челове́че, не оцепне́еши ли про́чее и трепе́щеши, я́ко близ есть Жени́х на просия́ние? Не ве́си ли, я́ко вся на́га предстоя́т в годи́ну о́ну? А́ще себе́ не угото́виши до́ндеже вре́мя и́маши, что сотвори́ши? Но пригото́вися на годи́ну блаже́нства Бо́жия досто́ин бы́ти, я́ко блаже́нство досто́йным бу́дет. Труба́ небе́сная с небесе́ воструби́т, и рече́т: Воста́ните люби́мицы Христо́ви, се бо прии́де Царь Небе́сный, да́ти всем вам поко́й и ра́дость за труд черне́чества ва́шего. Воста́ните и ви́дите Христа́ Царя́ Безсме́ртнаго Жениха́, Его́же возлюби́сте. Того́ бо ра́ди бы́сте пресе́льницы на земли́. Воста́ните и ви́дите Его́ ле́поту и вели́кую сла́ву. Воста́ните, и ви́дите Его́ Ца́рство е́же угото́ва вам. Воста́ните, и ви́дите Христа́ жела́емаго. Воста́ните, и ви́дите сла́дкаго Бо́га, Его́же возлюби́сте и Его́же ра́ди поскорби́сте, Его́же ра́ди черне́честовасте и пострада́сте. Прииди́те ны́не и ви́дите жела́емаго во мно́зе дерзнове́нии, и пора́дуйтеся с Ним ра́достию неизглаго́ланною. И ра́дости ва́шея никто́же во́змет от вас. Прииди́те наслади́теся Его́же о́ко не ви́де, и у́хо не слы́ша, и на се́рдце челове́ку не взы́де, я́же да́рует вам Той жела́емый Госпо́дь. И восхище́ни бу́дут святи́и на о́блацех све́тлих, на сре́тение Его́. Каса́ютжеся досто́йнии пра́веднии о Бо́зе, высо́те возду́шней и в сла́ве непобеди́мей, зря́ще Благослове́наго Жениха́ и Безсме́ртнаго. Кто у́бо досто́ин есть обрести́ся в годи́ну о́ну, восхище́н бы́ти на о́блацех с ра́достию вели́кою во сре́тение Христо́во? Вси бо досто́йнии восхи́тятся во слав́е, вси же недосто́йнии и нечести́вии оста́нутся до́ле со студо́м вели́ким. И блаже́нство и ра́дость досто́йником Бо́жиим, му́ка же и студ ‐ гре́шником. Блаже́н той и́же потща́вся зде, да досто́ин обря́щется в годи́ну о́ну. Окая́н же той и́же себе́ недосто́йна сотвори́л есть в годи́ну о́ну.
О́блацы восхища́ют святы́я на не́бо, а нечести́выя восхища́ют па́ки а́нгели Бо́жии, воврещи́ хотя́ще в пещь негаси́маго огня́. Кто даст главе́ мое́й во́ду, и неизре́ченый очи́ма мои́ма исто́чник слез непреста́нен, до́ндеже вре́мя есть слеза́м и прия́тию, и пла́чуся день и нощь моля́ Бо́га, да досто́ин обря́щуся в годи́ну о́ну пришес́твия Его́, я́ко да бых не услы́шал стра́шного о́ного гла́са, Влады́це глаго́лющу: «Иди́ от Мене́, не ве́де тебе́, отку́ду еси́»?
Бо́же Вы́шний Еди́ный без греха́, в годи́ну о́ну мно́гия щедро́ты Твоя́ да́руй ми, да не яви́тся нече́стие мое́ или́ та́йная пред а́нгелы и арха́нгелы, проро́ки и апо́столы и пра́ведники святы́ми. Но спаси́ мя нечести́ваго благода́тию и щедро́тами, и введи́ мя в ра́йскую пи́щу с соверше́ными пра́ведники, и приими́ моли́тву раба́ Твоего́ Влады́ко, моли́твами святы́х от ве́ка угоди́вшых Ти, я́ко Твое́ есть Ца́рство и си́ла и сла́ва во ве́ки веко́в. Ами́нь.