Бра́те, внемли́ зело́, не погуби́ пра́ваго пути́, е́же не ходи́ти пути́ те́мными, еда́ когда́ на кончи́ну свою́ и к Бо́гу и к челове́ком стропотли́в обря́щешися. Го́ре бо отста́вльшым пути́ пра́выя, ходи́ти путе́м те́мным, веселя́щеся о злых, и ра́дующеся о совраще́нии зле, и́хже пути́ стро́потни и уляче́на коле́са их. Дале́че тя сотворя́т от пути́ пра́ваго, и чу́жда пра́ведныя мы́сли. Те́мже глаго́лет: Не пости́гнут их ле́та животу́. А́ще бо бы́ша ходи́ли в пути́ благи́я, обрета́ли у́бо бы́ша стези́ пра́ведных гла́дки. Бла́зи бу́дут жи́тели на земли́, незло́бивии же оста́нут на ней. И путие́ нечести́вых от земли́ поги́бнут, беззако́ннии же поползну́тся им. Ну́жно бо есть ходи́ти путе́м пра́вым, по глаго́лющему: Не уклони́ся на де́сно ни на шу́е, обрати́ е́же но́зе свои́ от пути́ непра́ведна. Пути десны́я весть Госпо́дь, и шу́их развраще́нныя пути́ свесть. Темже Бо́га бо́йся, и страх Его́ утверди́т тя. Соблюди́ за́поведи Его, и за́поведи Его́ наста́вят тя на и́стинный путь. Опла́зьство же и губи́тельство и за́висть и горды́ня, и подо́бная сим да не водворя́ется в не́дрех твои́х. Ме́рзость, многоре́чие, безсту́дие, буесло́вие, да не вно́сится в тебе́. Всяк бо ходя́й си́ми путьми́, пути́ и́стинна погреши́л есть, и прельсти́лся есть, сокруша́я себе́ в недоуме́нии.
Ходя́й же путе́м пра́вым, той введе́т и́ на поко́ище. Не погуби́м у́бо нелицеме́рнаго гове́ния люби́мый брате. Гове́ние же есть е́же отгреба́тися от вся́кия ве́щи неприя́знены. А́ще ли же ключи́тся нам поноше́ние прия́ти за добро́ де́ло, не срамля́емся поноше́нием челове́ческим без пра́вды нам наше́дшым и не сотвори́м неподо́бная.
Пи́шет бо: «Лю́дие мои́, поне́же и́мя мое́ в сердца́х ва́шых, не бо́йтеся поноше́ний челове́ческих и зло́бе их не покори́теся. Я́ко ри́за бо обетша́ет от вре́мене, и я́ко зе́рно пшени́чно снеде́но бу́дет. Пра́вда же твоя́ во ве́ки пребыва́ет». Те́мже а́ще и сла́ве их су́ще зде и вели́честву, не устраши́мся, ниже́ оста́вим пра́ваго пути́ по глаго́лющему: «А́ще ополчи́тся на мя полк, не убои́тся се́рдце мое́». И па́ки глаго́лет: «Мужа́йтеся и да крепи́тся се́рдце ва́ше и упова́йте на Го́спода». И не ревну́й сла́ве гре́шниче, не бо ве́си что есть житие́ его́. У́не бо есть вся твори́ти Бо́га ра́ди и хвали́тися о Го́споде, не́жели пожи́ти зле и име́ти ме́рзску сла́ву. Рече́ бо Госпо́дь: «Та́ко да просия́ет свет ваш пред челове́ки, я́ко да ви́дят ва́ша до́брая дела́, и просла́вят Отца́ ва́шего су́щаго на небесе́х». Не уклоня́йся у́бо в не́мощи от пути́ пра́ваго, еда́ когда́ [в] го́ры высо́ки ка́менны, и в пу́стая ме́ста впаде́ши, и обы́дут тя зве́рие ди́вии, и обдержа́ние вод мног. И тогда́ раска́ешися не моги́й себе́ помощи́. Кто бо изнемогае, не его́же ли обдержи́т зла́я? Человеколю́бец же Бог Благий, не хо́щет тва́ри Свое́й зла, по глаго́лющему: Не всели́тбося му́дрость в поги́бели живу́щых, пра́вда же, безсме́ртие есть. И други́йжды глаголет: Я́ко от Бо́га искуша́емь есмь, Бог бо неиску́сен злу есть. Не искуша́ет же никого́же, ки́йждо искуша́ется от своего́ похоте́ния, влеко́мь по́мыслы бесо́вскими. Пото́м похоте́ние прии́мши роди́т грех. Грех же соверши́вся, ражда́ет смерть. Похоте́ние, ма́ти есть гре́хови. Та изгна́ Е́ву из рая́. Та Ка́ина на уби́йцу соверши́. Та сотвори́ еги́птяныню неи́стовствовати, на целому́дренаго Ио́сифа. Ю́ноша же Бо́га боя́ся, ту низложи́. Та сотвори́ лю́дем возлещи́ в пусты́ни. Та разруши́ язык седмь в земли́ Ханаа́нстей, и́мже прогне́ваша Сотво́ршаго их: тем и потреби́шася. Та уклони́ сердца́ сыно́в Изра́илев от Зако́на В́ы́шняго, я́коже пи́шет: «Якоже ко́ни неи́стови бы́ша, ки́йждо на жену́ и́скреняго своего́ хрепета́ше». Та прельсти́ судия́ людски́я в Вавило́не. Похоте́ние зла ма́ти есть гре́хови. Та воздви́же бра́ни и мяте́жи на земли́. Та пригото́ва Иродиа́ду, испроси́ти главу́ Предте́чеву.
Ту возлюби́в Иуд́а, преда́сть Го́спода сла́вы в ру́ки беззако́нником: зла́та бо похоте́в, а живо́т погуби́. Те́мже бежи́м вся́кия по́хоти злы́я, люби́мая бра́тия. Ту отри́нем от серде́ц на́ших, не пощади́м ея́, неплодови́та бо есть, но прозябе́ние диа́воле есть. Несть бо неду́г плотски́й, но струп есть души́ и я́зва се́рдцу. Та отверза́ет ны от небе́сных, и землены́х привязу́ет.
Дре́во есть без плода́ ли́ствия его́ имы́й ча́сто, и в частота́х ли́ствия его́ ча́да ехи́днова суть. Посецы́ дре́во зло́бное, и всади́ в него́ мес́то в души́ твое́й дре́во живо́тное честны́й Крест, упова́ние Спа́сово, страх Его́ и любы́ Его́ да бу́дет в се́рдцы твое́м, я́ко стра́ждущии на мо́ри призыва́я в пучи́не, тружда́емыя корабля́ в приста́нище жи́зненое.
Подвиза́йся я́ко до́брый во́ин Христо́в, да получи́ши вене́ц Христо́в. Послу́шай глаго́лющаго: «Гове́йныя сотвори́ сы́ны Изра́илевы, егда́ зако́нно подви́гнутся».
Тогда́ уве́сть да́ры Царе́вы, тогда́ уве́сть изве́стно я́ко добро́ и поле́зно есть е́же терпе́ти Го́спода ра́ди и за́поведи Его́ храни́ти. Тогда́ очути́т боле́зни я́ко сном преше́дша. И бу́дут ти я́ко вене́ц ца́рский на главе́ твое́й, и бу́дет ти ра́дость и весе́лие. И ра́дости твоея никто́же не во́змет от тебе. Даждь же вам Бог обрести́ ми́лость пред Ним и в ны́нешний век и в бу́дущий, яко Тому́ подоба́ет сла́ва во ве́ки веко́в. Ами́нь.