Сие́ сло́во чте́тся на святы́х страсте́х Го́спода на́шего Иису́са Христа́, по́сле блаже́нны, и по́сле седма́го Ева́нгелия
Бою́ся глаго́лати язы́ком, и косну́тися стра́шней по́вести Спа́сове: стра́шно бо есть о сей глаго́лати. Бог наш днесь пре́дан бысть в ру́ки гре́шником и нечести́вым челове́ком. Что ра́ди у́бо пре́дан бысть святы́й и небе́сный Влады́ка, без греха́ Сый? Ничто́же бо согреши́в, пре́дан бысть днесь. Прии́дем и уве́дем, что ра́ди пре́дан бысть Христо́с Спас наш. Нас ра́ди нечести́вых пре́дан бысть Влады́ка. Кто ся у́бо не подиви́т и кто не сла́вит? Рабо́м согреши́вшим Влады́ка пре́дан бысть, да свободи́т от сме́рти рабы́ Своя́ согре́щша, сы́нове поги́бельнии и ча́да те́мная. Тмо́ю изы́дут гоня́щии со́лнце, попали́ти вся еди́нем часо́м. Ви́дев же Влады́ка дерзость их всех, и гне́вное погна́ние, с кро́тостию и вся́кою благосты́нею, Свое́ю во́лею Себе́ преда́сть в ру́ки нечести́вых. И связа́вше беззако́ннии Пречи́стаго Влады́ку, руга́хуся Ему́ подража́ющии, Связа́вшаго кре́пкаго у́зами неразреши́мыми, и Разреши́вшаго вся ны от уз грехо́вных. И сопле́тше вене́ц свои́м те́рнием, е́же плодови́т бысть виногра́д иуде́йск, руга́ющеся Ему́ и Царя́ И́ нари́чуще. И плю́нуша ти́и беззако́ннии на лице́ Пречи́стаго Влады́ки, Его́же от о́чию боя́тся ку́пно вся си́лы небе́сныя, не терпя́ще сла́вы Его́.
Се па́ки обдержи́т се́рдце мое́ печа́ль же и сле́зы, поразуме́вше Влады́ку та́ко содержи́ма, досажде́нием и укоре́нием, ра́нами и заплева́ньми от лю́дий беззако́нных. Прииди́те и уве́дите щедро́ты изря́дныя сла́дкаго Влады́ки, к рабо́м нево́льным. Раба́ име́яше благопотре́бна в ра́йстей пи́щи. Согреши́вшу же ему́, привя́зан бысть мучи́тели. Ви́дев же Благи́й пренемога́юща раба́, и милосе́рдовав о нем, Себе́ растяже́ бие́ну бы́ти им. Восхоте́х премолча́ти изря́дныя ра́ди у́жасти у́мныя, и па́ки убоя́хся, да ся не отве́ргу моего́ ра́ди молча́ния благода́ти Спа́совы.
Оба́че со стра́хом вам глаго́лю бра́тие. И трепе́щут ми ко́сти, егда́ помяну́, я́ко Госпо́дь наш Зижди́тель всех, пред Каиа́фою предстои́т днесь, я́ко еди́н от осужде́ных, и еди́н от слуг ударе́й в лани́ту: трепе́щет ми се́рдце, сия́ вся помышля́ющу. Раб седи́т, а Влады́ка предстои́т. Испо́лненый беззако́ния, отве́т дае́т на Безгре́шнаго. Небеса́ ужасо́шася, и основа́ния потрясо́шася. А́нгели и арха́нгели вси убоя́шася. Гаврии́л и Михаи́л ли́ца своя́ сокры́ша в кри́лех. Херуви́ми у престо́ла под коле́сы сокрыва́хуся. Серафи́ми крилы́ свои́ми соража́хуся в ту годи́ну, в ню́же слуга́ Каиа́фль уда́ри Влады́ку в лани́ту. Ка́ко у́бо стерпе́ша основа́ния земна́я, трус и тре́пет в годи́ну ту? Досажде́ния Влады́чня помышля́ю, и трепе́щу, и па́ки дерза́ю, зря долготерпе́ния Блага́го Влады́ки: се бо у́дове мои́ трепе́щут глаго́лющу ми. А́ще у́бо Соде́тель созда́вый челове́ка испе́рва, руко́ю от пе́рсти, зауше́н бысть Творе́ц, убои́мся бра́тие и слы́шим сия́ вся, Спас нас ра́ди претерпе́. Ра́бе окая́нный, рцы чего́ ра́ди зауши́л еси́ Влады́ку? Вся́ко бо раби́, егда́ свобо́дни быва́ют, зауша́еми быва́ют, да получа́т свобо́ду тли́мую. Ты же окая́нне, Свободи́теля всех Безгре́шнаго без зако́на зауши́л еси́. Каковы́ у́бо мзды ча́еши от Каиа́фы прия́ти в зауше́ния ме́сто? Поне́ у́бо не́си ли слы́шал и разуме́л, я́ко Сын есть небе́снаго Влады́ки? И зауши́вый Влады́ку всех, бысть раб рабо́м и поноше́ние и ме́рзость, и осужде́н еси́ при́сно огне́м негаси́мым.
Вели́ко чу́до бра́тие ви́дети кро́тость Христа́ Влады́ки Царя́! Зауше́н быв от раба́, разу́мно отвеща́ со вся́кою кро́тостию и гове́нием. Раб сурови́тся, Влады́ка ожида́ет. Раб гне́вается, Влады́ка блаже́нствует. Я́рости же Его́ и возмуще́нию в час гнев́у кто постои́т? Бог же наш все претерпе́ Свое́ю благосты́нею. Кто у́бо мо́жет изрещи́ Твое́ долготерпе́ние, о́ Влады́ко? Приступи́те жела́емии люби́мицы Христо́ви, иму́ще покая́ние и жела́ние Христо́во. Прииди́те у́бо ви́дим, что бысть днесь в Сио́не гра́де Дави́дове, се́мя Авраа́мле люби́мое и избра́нное. Что соде́ла днесь? Пречи́стаго Влады́ку сме́рти преда́ша во дне́шний день. Христо́с Спас наш, рука́ми беззако́нными на дре́ве кре́стнем обе́шен бысть без зако́на. Прии́дем ны́не вси мы, омы́ем те́ло слеза́ми и воздыха́нием, я́ко Госпо́дь наш Царь сла́вы, нас ра́ди нечести́вых сме́рти пре́дан бысть.
Кто ли внеза́пу слы́ша о возлю́бленем и бли́жнем уме́ршем? Или́ па́ки внеза́пу ви́дети того́ люби́маго ме́ртва внеза́пу лежа́ща, пред очи́ма его́ того́ люби́маго? Но и лица́ же не омрачи́ све́тлое виде́ние его́. Того́ бо ви́дев со́лнце све́тлое в вы́шних, досажде́ние небе́снаго Влады́ки на дре́ве кре́стнем, измени́ лице́, и скры лучи́ своя́ све́тлость, не терпя́ ви́дети досажде́ния Влады́чня, печа́лию и тмо́ю само́ ся разлия́. Па́ки Дух Святы́й сый в це́ркви на дре́ве кре́стнем, раздра́ заве́су церко́вныя све́тлыя красоты́, свы́ше и до до́лу, и виде́нием голуби́ным а́бие изы́де. Вся тварь бысть в стра́се и тре́пете, я́коже пострада́ Спас Небе́сный Царь. Мы же гре́шницы неради́м при́сно, поне́же пре́дан бысть Еди́н Безгре́шный. И смее́мся всегда́, слы́шаще стра́сти Спа́совы и досажде́ния. Пита́емся всегда́, иму́ще вся́ко тща́ние е́же одея́ние украси́ти.
Со́лнце на небеси́ досажде́ния ра́ди Влады́чня, свою́ све́тлость во тму преложи́, да мы ви́дяще подо́бни бу́дем. Влады́ка на Кресте́ тебе́ ра́ди досажде́ние прия́т, ты же окая́нне ри́зами ли украша́ешися? И не трепе́щет ли ти се́рдце и не ужаса́ет ли ти ся ум, сия́ стра́шная слы́ша? Еди́н Безгре́шный, тебе́ ра́ди нечести́ваго сме́рти пре́дан бысть, досажде́нием и поноше́нием. Ты же сам, глу́мно слы́ша сия́ вся. Подоба́ет же и слу́ху вся́кому и ста́ду слове́сному, да блюде́т всегда́ своего́ па́стыря, и жела́ет его́ при́сно, и срамля́ется его́.
Сего́ ра́ди страсть пострада́ Бзестра́стный Влады́ка: да не краси́теся ри́зами тли́мыми, ни́же па́ки пи́щею, ни бра́шны людски́ми, но черне́ческими и вся́кою чистото́ю угоди́ти Па́стыреви. Не бу́дем подо́бни иуде́ом, я́ко же́стоцы и непокори́ви, отме́щущеся всегда́ боже́ственых благ и до́браго де́лания Его́.
Госпо́дь Вы́шний Авраа́ма ра́ди и заве́та его́ де́лма, терпя́ше искони́ лю́дем стро́потная. Ма́нну с небесе́ дасть им я́сти, си́и же недосто́йни су́ще, но чеснови́таго лу́ку жела́ху, бра́шна злосмра́дна. Во́ду па́ки дасть им в пусты́ни, си́и же в того́ ме́сто о́цет Ему́ да́ша, обе́сивше И́ на дре́ве.
Потщи́мся у́бо бра́тие, да ся не обря́щем иуде́ом прича́стницы, распе́ншым своего́ Влады́ку и Соде́теля. Убои́мся всегда́ име́юще пред очи́ма страсть Спа́сову, поуча́ющеся пла́катися свои́х страсте́й: нас бо ра́ди пострада́ Безстра́стный и Еди́н Безгре́шный. Что же мы о сем возда́мы, бра́тие? Вне́млем же себе́, да не ка́ко отве́ржемся Его́ страсте́й.
Присту́пим вся чад́а церко́вная причасти́вшеся Кро́ви честне́й и святе́й Пречи́стаго Влады́ки. Прииди́те да поучи́мся Госпо́дним страсте́м, со слеза́ми и возыха́нием, разумева́юще в стра́се и поуча́ющеся в тре́пете, глаго́люще в себе́: «Христо́с Спас наш нас ра́ди нечести́вых пре́дан бысть».
Поучи́ся бра́те, что суть я́же слы́шиши: Бог Безгре́шный Сын Вы́шняго, тебе́ ра́ди пре́дан бысть. Отве́рзи се́рдце твое́, и уве́ждь испы́тно о стра́сти Его́. И глаго́ли в себе́: Бог Безгре́шный днесь пре́дан бысть, днесь пору́ган бысть, днесь бие́н бысть, днесь оплева́н бысть, днесь носи́л есть терно́в вене́ц, днесь ра́спят бысть небе́сный А́гнец. Да трепе́щет се́рдце твое́ и ужа́снется душа́ твоя́, и пла́чися всегда́ в поуче́нии сем стра́сти Влады́чни, сладя́т бо сле́зы и просвеща́ют ду́шу. Поуча́ющеся Христо́вым страсте́м всегда́, та́ко поуча́йся при́сно: сле́зы точа́ всегда́, похваля́юще Влады́ку о страсте́х Его́, я́же пострада́л есть тебе́ ра́ди, ‐ и в день прише́ствия Его́, бу́дут ти сле́зы, высота́ пред Суди́щем. Спостра́жди и ты, поуча́яся страсте́м Безстра́стнаго Влады́ки. Претерпи́ напа́сти, и в печа́лех похваля́й Бо́га.
Блаже́н бо есть челове́к, и́же име́ет пред очи́ма Влады́ку небе́снаго и стра́сти Его́, и распе́н себе́ от всех страсте́й земны́х и печа́лий, и бысть подража́тель своего́ Влады́ки. Се есть ра́зум всем боголю́бцем, егда́ подража́тели бу́дут Влады́це де́лы благи́ми. Ви́диши ли, о́ челове́че, Пречи́стаго Влады́ку на кресте́ ви́сима, и дерза́еши стыдя́ся, в пи́щи ли и в сме́се соверша́еши ле́та, я́же живе́ши на земли́? Или́ не ве́си окая́нне, я́ко сло́ва взы́щет распны́йся Госпо́дь о всем сем твое́м [не]ражде́нии ? Ны́не слы́ша, и лени́шися, пита́яся, и кормя́, и смея́ся непреста́нно.
Прии́дет же день он вели́кий и стра́шный, и́же есть отме́стен, и пла́катися и́маши непреста́нно, и возопие́ши во огни́ от не́мощи души́ твоея́. Кла́няютися Влады́ко. Благословлю́ Тя, Бла́же. Молю́ Тя, Святы́й. Припа́даю Ти, Человеколю́бче. Прославля́ю Тя, Пречи́сте, я́ко Ты Единоча́д еси́ Влады́ка всех, и Еди́н Безгре́шный, мене́ ра́ди гре́шнаго и недосто́йнаго сме́рти вкуси́л еси́ сме́рти же и распя́тия, да свободи́ши ду́шу гре́шничу от лю́тых беззако́ний. И что Ти возда́м о сем, Влады́ко?
Сла́ва Тебе́, Человеколю́бче, мно́гих ра́ди щедро́т и милосе́рдия ра́ди Твоего́! Сла́ва Тебе́, Ми́лостивый! Сла́ва Тебе́, Терпели́вый! Сла́ва Тебе́, Отпусти́телю всех прегреше́ний! Сла́ва Тебе́, Соше́дый спасти́ душ на́шых! Сла́ва Тебе́, Воплоти́выйся во утробу Девичу! Сла́ва Тебе́, Рожде́йся! Сла́ва Тебе́, я́тый беззако́нными! Сла́ва Тебе́, Оплева́нный! Сла́ва Тебе́, за лани́ту Ударе́нный! Сла́ва Тебе́, Распя́тый! Сла́ва Тебе, Погребе́нный! Сла́ва Тебе́, Воскресы́й! Сла́ва Тебе́, Пропове́давый! Сла́ва Тебе́, Уве́ривый ученики́ Своя́! Сла́ва Тебе́, Вознесы́йся на небеса́! Сла́ва Тебе́, седя́й со сла́вою и вели́чествием одесну́ю Отца́! И па́ки Гряды́й со святы́ми а́нгелы, суди́ти хотя́й вся́кой души́ отве́ргшейся святы́я Твоея́ стра́сти.
В годи́ну о́ну стра́шную и тре́петную, егда́ подви́жатся си́лы небе́сныя, егда́ прии́дут вку́пе а́нгели и арха́нгели, херуви́ми и серафи́ми: со стра́хом и тре́петом предстоя́т пред Суди́щем в годи́ну ону́. И да покры́ет мя благода́ть Твоя́ крылома свои́ма, и изба́вит ду́шу мою́ от стра́шнаго огня́ и скре́жета зу́бнаго, и тмы кроме́шния, и пла́ча ве́чнаго, да глаго́лю и благословлю́ Тя: Сла́ва Изво́лившему спасти́ гре́шники, мно́гими щедро́тами милосе́рдия Твоего́, ны́не и при́сно и во ве́ки веко́в. Ами́нь.