Блаже́н и́же возненави́дит житие́ се челове́ческое, и с Бо́гом еди́нем поуче́ние его́ бысть. Блаже́н и́же бысть на земли́ я́ко а́нгел небе́сный, подо́бен серафи́му, чист име́я всегда́ по́мысл. Блаже́н и́же име́яй во уме́ день хотя́щий бы́ти, и тща́ние приле́жно на исцеле́ние струп души́ его́ слеза́ми. Блаже́н и́же бысть весь свобо́ден о Го́споде от всех земны́х веще́й, и вре́менных жития́ сего́ су́етнаго. Блаже́н предспе́яй де́тельми и черне́чеством, воздержа́нием, упова́нием на Бо́га, ви́дети хотя́ небе́сное Ца́рство. Блаже́н име́яй повеле́ние стра́шное, и хране́ние полага́я устом свои́м е́же не отпа́сти за́поведи. Блаже́н ходя́й путе́м за́поведей Госпо́дних, жили́ща творя́ по вся дни чи́стым се́рдцем, ве́ры ра́ди и любве́. Блаже́н и́же не уподо́бится пра́здну сло́ву, но сло́ву стра́шну е́же не отпа́сти за́поведи. Блаже́н и́же возненави́дев ме́рзок сотвори́ть зло́бный грех, и Бо́га еди́наго лю́бит Милосе́рдаго Изба́вителя гре́шником. Блаже́н и́же бысть весь а́ки о́блак в слеза́х: погаси́т бо огнь пла́менный по́хотей теле́сных. Блаже́н ему́же бысть душа́ а́ки дре́во насажде́но, име́яй сле́зы при́сно к Бо́гу я́ко исто́чник водны́й. Блаже́н садя́й сады́ до́бры в души́ свое́й, де́тели и жития́ святы́х оте́ц соверша́я. Блаже́н напая́й сады́ своя́ слеза́ми и моля́ся да бу́дут са́дове его́ плодови́ты и уго́дны Го́сподеви. Блаже́н разжеги́йся любо́вию Госпо́днею я́ко о́гнем, и попали́ вся по́мыслы гну́сныя и скве́рну души́ своея́. Блаже́н, и́же бысть во́лею земля́ у́бо добра́ и бла́га, плодови́то се́мя сотвори́ши добро́, стори́цею и седмь и треми́десятьми. Блаже́н обреты́йся уго́дно се́мя добро́ предложе́нию, е́же все́я Влады́ка Христо́с Сам на селе́ Свое́м. Блаже́н и́же обре́т би́сера до́бра избра́нна небе́снаго и прода́в име́ния своя́ вся того́ еди́ного поразуме́. Блаже́н и́же обрете́ сокро́вище, сокрове́ное на се́лищи, ра́дуяжеся отри́ну вся́ческая, и того́ еди́ного стяжа́. Блаже́н и́же по́мнит всегда́ день Су́дный, и тщи́тся обрести́ся кроме́ стра́ха и боя́зни. Блаже́н и́же обре́те дерзнове́ния в день Су́дный и в час сме́ртный, егда́ же разлуча́ется со стра́хом и боя́знию: прии́дут бо а́нгели взя́ти ду́шу, и разлучи́ти от телесе́ хотя́ще сме́ртию, и поста́вити ю́ на Суди́щи стра́шнем.
Вели́к страх о́ бра́тие в годи́ну сме́рти разлуче́ния, егда́ душа́ разлуча́ется от телеси́ с во́плем и пла́чем. Предстоя́т бо души́ в годи́ну сме́рти дела́ своя́, я́же сотвори́ла есть во дне и в нощи́ до́брая же и зла́я. А́нгели бо подвиза́ются тща́ще ю́ извести́ от те́ла. Душа́ же ви́дящи дела́ своя́ я́же сотвори́ла есть бои́тся изы́ти.
Гре́шнику у́бо душа́ со стра́хом отлуча́ется от те́ла, и трепе́щущи и́дет хотя́щи предста́ти стра́шному Суди́щу. Ну́дима же душа́ изы́ти от те́ла, и ви́дящи дела своя́, глаго́лет им со стра́хом: «Дади́те ми час во еди́ном мгнове́нии да изы́ду». Отвеща́ют же души́ дела́ ея́ вся и глаго́лют: «Ты ны сотвори́ла еси́, с тобо́ю и мы и́дем к Бо́гу». Пра́веднаго же душа́ не устраша́ется на оше́ствие, но па́че дерза́ет и ра́дующися и́дет со а́нгелы к Бо́гу.
Возненави́дим у́бо жизнь су́етную и вре́менную, Христа́ же еди́наго возлю́бим свята́го Изба́вителя душ на́шых. Не ве́мы у́бо бра́тие, в кий час нам смерть бу́дет. Никто́же нас не весть дне ни годи́ны сме́ртныя. Внеза́пу ходя́щым нам в безпеча́лии и глумя́щымся нам на земли́, пости́же повеле́ние взя́ти ду́шу от те́ла, и и́дет гре́шник в годи́ну и день, во́ньже не начается, испо́лнь су́щи души́ его́ грехо́в и не иму́щи души́ его́ отве́та.
Сего́ ра́ди молю́ вы у́бо бра́тие, бу́дем свобо́дни, не иму́ще рабо́ты жи́зни сея́ су́етныя и вре́менныя: испо́лнь бо есть жизнь сия́ собла́зн и се́тей сме́ртных. Утверди́м же душа́ на́ша я́ко и ка́мень тве́рдый по вся дни, да избежи́м от сете́й. Неприя́знь бо кры́ет се́ти пред душа́ми на́шыми при́сно, да тем собла́зньши улови́т ны в му́ки ве́чныя. Посреде́ бо собла́зн и се́тей хо́дим люби́мицы. Вне́млем у́бо себе́, е́же не впа́сти в се́ти: сме́ртныя бо се́ти лука́вствия испо́лнь. Суть бо сла́достны се́ти сме́ртныя. Ни у́бо да не разслабе́ет душа́ на́ша се́ю сла́бостию лука́вою: сия́ бо есть сла́дость су́етная, печа́ль земны́х веще́й и бога́тства по́мысл, и дея́ний лука́вых. Не наслади́ себе́ о́ бра́те, сла́дости се́ти сме́ртныя. Не облени́ся и не влеко́мь бу́ди в поуче́ние по́мысла лука́ваго. А́ще бо обря́щет по́мысл лука́вый вход в ду́шу, и услади́т поуче́ние лука́вое да умертви́т ю́, и бу́дет по́мысл лука́вый я́ко сеть в души́, а́ще не прогна́н бу́дет моли́твою и посто́м, бде́нием же и слеза́ми. Бу́ди при́сно бодр, свободи́вся от всех земны́х да изба́вишися се́тей, и помы́сл, и дея́ний лука́вых. Не попусти́ у́бо еди́наго часа́ и годи́ны или в мгнове́нии о́ка твоего́, на уче́ние лука́ваго по́мысла. Ниже́ да уме́длит лука́вый по́мысл в души́ твое́й бра́те. Бежи́ при́сно к Бо́гу моли́твою и посто́м ко Влады́це со слеза́ми, да изба́вишися се́ти вра́жия, и собла́зн, и страсте́й. И не мни́ся многоле́тен жи́ти бра́те на земли́. И разсла́блен быв поуче́нием лукаваго по́мысла и дея́ния, и напра́сно прии́дет повеле́ние Господне, и обря́щет тя согреши́вша, не иму́ща вре́мени покая́нию, ктому́ ниже́ па́ки бу́дет отпуще́ния грехо́в. И что рече́ши смерти в годи́ну разлуче́ния о́ бра́те? Ключи́т бо ся повеле́ние Госпо́дне, непроще́ну бы́ти ни ма́л час на земли́. Мно́зи бо суть мня́щеся ле́та мно́га жи́ти на земли́. Прии́де внеза́пу смерть, обре́те му́жа гре́шна бога́та, чту́ща ле́та мно́га, жи́ти ему́ в поко́и мно́зе на земли́, держа́ща в пе́рстех чи́смя гла́вно, е́же и ли́хву разделя́юща на мно́га ле́та чи́сменем бога́тства своего́. И упразни́вся во еди́ном часе́ все вку́пе, чи́сла, и бога́тства, и печа́ль и по́мысла его́ су́етнаго. Прии́де же внеза́пу смерть, и обре́те му́жа пра́ведна и преподо́бна, собира́юща бога́тство добро́ небе́сное, моли́твою и посто́м.
Име́й при́сно смерть пред очи́ма возлю́бленый мой бра́те, и не бо́йся дерзнове́ния сме́рти и разлуче́ния телеси́. Та́ко у́бо чай всегда́ я́ко разу́мный духовни́к сме́ртно разлуче́ние, и предстоя́ние стра́шнаго Суди́ща. Гото́ву име́й всегда́ свещу́ твою́ я́ко мудр, и посеща́й у́бо па́ки ея́ по вся годи́ны слеза́ми и моли́твами. И ели́ко у́бо вре́мя и́маши поле́зно люби́миче мой, потщи́ся избежа́ти се́тей сих, испо́лнь бо суть неве́рствия и сла́бости, уны́ния же и же́стости. И не хо́щеши ли помы́слити су́щаго о стра́шнем Суди́щи? Гряде́т бо вре́мя испо́лнь сый у́жасти же и молвы́, хотя́щым бы́ти исчезе́нием, ре́кше суди́мым смуще́ние.
Внемли́те люби́мицы ка́ко вся лука́вая ю́ношествуют. И предспе́ют зло́бная, и измену́ют лука́вая. Кле́плют исчезнове́ние и скорбь вели́кую, хотя́щую наити́ на всю вселе́нную. Е́же де́лаем по вся дни. Сия́ вся бы́ша сла́дости ра́ди на́шея, и предспе́ют лука́вая на земли́. Но у́бо люби́мицы и боголю́бцы бу́дем борцы́ бо́дри на земли́, победи́м брань неприя́знену, я́ко соверше́нии раби́ Христо́ви. Навы́кнем у́бо обы́чай бра́ни, неви́дима бо есть. Обы́чай же суть бра́ни сея́, при́сно обнаже́ние земны́х веще́й: и а́ще ча́еши смерть пред очи́ма, не согреши́ши. Обнажи́вжеся земны́х веще́й, неуя́звен бу́деши в бра́ни, а́ще возненави́диши земна́я, нерадя́ о вре́менных. Любо́вь же возмо́жет я́ко изя́щен боре́ц, победи́вши вене́ц прияти, поне́же бо земна́я влеку́т пле́нника в зе́млю до́лу, и стра́сти омрача́ют очеса́ серде́чная: и сего́ ра́ди одолева́ет в бра́ни лукав́ый землены́м, испо́лнь су́щым печа́ли зе́мския страсте́м рабо́тающым.
Земна́я бо днесь вси вку́пе лю́бим, о́ бра́тие, и пригвожде́н есть ум наш на земли́ сла́бостию на́шею. День у́бо преклони́лся есть, и ве́чер уже́ вре́мени на́шего. Мы же неве́рствия ра́ди на́шего, мне́хом зау́тра есть. И се при две́рех Ца́рство небе́сное на просвеще́ние, мы же о сем не хо́щем николи́же послу́шати. Зна́мения и чудеса́, я́же рече́ Госпо́дь, сбы́шася: тру́си, гла́ди, и страши́лища на земли́, и язы́ком воста́ние - сия́ вся мня́тся нам а́ки сон. Друг дру́гу пове́дати, не слух ли сих всех [у]жаси́т ны? Но ни то само́ чу́до. Избра́нницы собира́ются пре́жде ско́рби, е́же не ви́дети исчезнове́ния и ско́рби, наити́ хотя́щая ми́ру без пра́вды: жа́тва у́бо прибли́жилася есть на жне́ние. Коне́ц и́мать век сей, и а́нгелы держа́ще серпы́ повеле́ния ждут.
Убои́мся люби́мицы, годи́на есть дне еди́на на́десяте, а пу́теви долгота́ мно́га есть. Потщи́мся обрести́ся во оби́телищи, и бо́дри бу́дем, и трезви́мся от сна непра́ведна: не ве́мы бо, в кий час Влады́ка до́му прии́дет в хра́мину свою́. Облегчи́мся от тя́гости печа́лей земны́х, е́же не пещи́ся ничи́мже отъину́дь на земли́. Рече́ бо Госпо́дь, е́же люби́ти вся вку́пе. Запове́да Госпо́дь о сем всем нам. Паче же мы любо́вь прогна́хом, и бежа́ от нас, и не обря́щеши на земли́ любве́ соверше́ны вои́стину на Бо́га: от всех прогна́на бысть, и от всех ненави́дима бысть. Па́че же вопль воцари́ся, ре́вность, смуще́ния, исчезнове́ния, непра́вды, и греси́ покры́ша всю зе́млю. Ки́йждо нас земны́х и́щем, а небе́сная презря́ще, и вре́менная па́че люби́ма суть. Лю́биши ли небесная, возненави́ди земна́я и ме́рзска сотвори́ я́. И черне́чествуй я́ко соверше́н, и вжеле́й Ца́рству небе́сному. И не помышля́й та́ко глаго́ля: «Мног труд есть черне́чества. Аз же худ есмь и не́мощен и не могу́ черне́чествовати».
Внуши́ глаго́лы до́браго сове́та и блага́го послу́шай что ти глаго́лю, христолюби́вый люби́миче мой бра́те. Восхоте́л ли еси отъити́ во страну́ дале́чу, от своего́ оте́чества? Не мо́жеши во еди́н день претещи́ пу́тнаго тече́ния, но чтый по́прища и ча́сты стопы́ вся дни хо́диши, и вре́менем и трудо́м, понужда́емь во страну́ ея́же ча́еши. Та́ко есть и Ца́рство небе́сное и пи́ща ра́йская, посто́м и бде́нием и воздержа́нием. И кого́ждо пости́гнет тамо, воздержа́ние, и сле́зы, и моли́твы, и любо́вь: се суть жили́ща, веду́щая на не́бо к Бо́гу.
Не бо́йся нача́ла прия́ти до́браго пути́, веду́щаго в жизнь ве́чную: то́кмо восхощи́ ходи́ти по нему́, и обря́щешися а́бие иноду́шен. И в том часе́ напра́влен бу́дет путь твой пред нога́ма твои́ма. И тако веселя́ся, ходи́ти и́маши во вся дни, и жили́ща мно́жайша мо́гут стопы́ души́ твоея́ сотвори́ти. И на оби́телищи ко́емждо, не и́маши обрести́ стро́потнаго пути́ веду́щым тя в жизнь.
Влады́ка Христо́с Спас Путь живо́тный Собо́ю бысть хотя́щым приходи́ти с ра́достию ко Отцу́ све́та. Бысть ми Христе́ Спа́се Ты Путь живо́тный веды́й ко Отцу́. Нача́ло Ты, и Свет, и Ра́дость и Коне́ц, Ты в Ца́рство небе́сное бысть ми путь живо́тный.
О́ Влады́ко Сы́не Бо́жий, и Исто́чник жи́зни и просвеще́нию. И почерпо́х Им жела́ние исто́чника благода́тнаго. Бысть благода́ть Твоя́ в се́рдцы раба́ Твоего, свет и ра́дость, и сладча́йша па́че медве́нейша со́та усто́м мои́м. Бысть благода́ть Твоя рабу́ Твоему́, а́ки сокро́вище обогаща́я нищету́ мою́. Бысть благода́ть Твоя́ рабу́ Твоему́ прибе́жище и си́ла, заступле́ние и похвала́ испо́лнь жи́зни ве́чныя.
Ка́ко премолч́ит раб Твой Влады́ко от мно́гия сла́дости, благода́ть Твою́ и любо́вь Твою́, или отве́рзет уста́ своя́ изможда́лая? Или́ ка́ко претерпи́т язы́к мой сицеву́ю по́льзу, не́жели па́че воспое́т и сла́вит всегда́ Да́теля благи́м? И ка́ко па́ки затворю́ во́лны благода́тий Твои́х, истека́ющых в мое́м по́мысле, испо́лнь су́ща сла́дости? И во мно́гих благода́тех, вопию́ и сла́влю Влады́ку, с небеси́ да́вшему Своему́ уго́днику, благода́ти небе́сныя мно́гими да́рми. Велича́ю благода́ть Твою́, Спа́се мой. Е́же бо велича́ю Тя Го́споди, сам ся велича́ю. И не престае́т язы́к мой песносло́вя благода́ть Твою́ о́ Влады́ко, не умо́лкнут гу́сли моя́ поюща пе́сни духо́вныя, поне́же любы́ Твоя́ влече́т мя к Тебе́ Спа́се. Похвалю́ живота́ моего́, благода́ть Твоя́ влече́т мя на просвеще́ние разу́мное. Бу́ди Ти се́рдце мое́ земля́ бла́га, прие́млющи се́мя добро́. И да ороси́т благода́ть Твоя́ верху́ мене́, ро́су жи́зни ве́чныя. Да пожене́т рука́ моя́, рукоя́ть добру́ от земли́ се́рдца моего́, покая́ние, поклоне́ние, освяще́ние, и уго́дная Ти всегда́ творит́и. Возврати́ ду́шу мою́ во огра́ду рая́, со овча́тем обре́тшимся, да обря́щется душа́ моя́ во све́те Твое́м.
О́но бо овча́ обре́тшееся поне́сл еси́ на ра́му Свое́ю. Сию́ же мою́ недосто́йную ду́шу благода́тию Свое́ю приведи́, и принеси́ о́бе вку́пе Отцу́ Си Стра́шному и Пречи́стому, пред а́нгелы и арха́нгелы, херуви́ми и серафи́ми, да глаго́лю во красне́м раю́ со все́ми святы́ми: Сла́ва Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.