Стяжи́ безмо́лвие, бра́те, я́ко сте́ну тве́рду. Безмо́лвие бо вы́шша тя сотвори́т страсте́й. Ты бо свы́ше бо́решися, се же до́ле. Стяжи́ у́бо стра́хом Бо́жиим безмо́лвие, и не и́мут тебе́ вреди́ти вся стре́лы вра́жия. Безмо́лвие бо стра́се Бо́жии причта́но есть, колесни́ца о́гнена есть, возводя́щая на небеса́ стяжа́вшему е́. И препри́т тя Илия́ проро́к, возлюби́вый безмо́лвие и страх Бо́жий, и возне́сся до небе́с.

О безмо́лвие, ле́ствице небе́сная! О безмо́лвие, пути́ Ца́рствию небе́сному! О безмо́лвие, покая́нию ма́ти! О безмо́лвие, зерца́ло грехо́м, показу́яй челове́ку грехи́ его́! О безмо́лвие, слез не соблажня́я! О безмо́лвие, кро́тости роди́тельнице! О безмо́лвие, смире́ныя му́дрости сожи́телю! О безмо́лвие, стра́се Бо́жии при́чтано и мы́слем просвеще́ние! О безмо́лвие, по́мыслом рассмотре́ние и разсужде́нию сболе́зненице! О безмо́лвие, всему́ бла́гу роди́тельнице, посту́ утвержде́ние, и чре́ву объяде́нию возбрани́телю! О безмо́лвие, пра́зднуяй к моли́тве и чте́нию! О безмо́лвие, ти́хость помысло́м, и приста́нище до́брое! О безмо́лвие, безпеча́лие души́! О безмо́лвие, яре́м благи́й и бре́мя легкое, покая́ние нося́ стяжа́вшаго тя! О безмо́лвие, безче́стию прогони́телю и безсту́дию вра́же! О безмо́лвие, гове́нию ма́ти! О безмо́лвие, соу́з страсте́м! О безмо́лвие, весе́лие души́ и се́рдцу! О безмо́лвие, вся́кой доброде́тели споспе́шниче! О безмо́лвие, нестуже́нию хода́таю! О безмо́лвие, ни́ва Христо́ва плодоно́сна, плоды́ принося́щи бла́ги! О безмо́лвие, стра́се Бо́жии причта́но, стена́ и твердь хотя́щим подвиза́тися Ца́рствия ра́ди небе́снаго!

Ей, бра́те мой, си́ю стяжи́ до́брую часть, ю́же избра́ Мари́я. Сия́ бо Мари́я бысть о́браз безмо́лвию, седе́вшая при ногу́ Ии́сусову, и Тому́ то́кмо прилепи́вшися. Те́мже и похвали́ ю́ Госпо́дь глаго́ля: Мари́я бла́гую часть избра́, я́же не отъи́мется от нея́.

Ви́диши ли, бра́те, ка́ко ти безмо́лвие я́ко Сам Госпо́дь похваля́ет стяжа́вшаго е́. Стяжи́, бра́те мой, и наслади́ся, седя́ при ногу́ Го́спода своего́, и Тому́ то́кмо прилепи́ся, да и ты со дерзнове́нием глаго́леши: Прильпе́ душа́ моя́ по Тебе́, ме́не же прия́т десни́ца Твоя́. Сего́ ра́ди я́ко ту́ка и ма́сти испо́лнися душа́ моя́.

Ей, бра́те, стяжи́ сла́ждьше ме́ду. У́не бо хлеб я́сти без со́ли со безмо́лвием и безпеча́лием, не́жели поставле́ние бра́шен мно́гих в мо́лвах и печа́лех.

Послу́шай глаго́лющаго: Прииди́те ко Мне вси тружда́ющиися и обремене́ннии, и Аз поко́ю вы. Поко́ити бо тя хо́щет от печа́ли, от я́рости, от мо́лвы и от ско́рби ве́ка сего́. И без печа́ли вели́т ти бы́ти от плинфотворе́ния еги́петскаго, и извести́ тя хо́щет в пусты́ню, е́же есть безмо́лвие, я́ко да просвети́т пути́ твоя́ столпо́м боже́ственным, и ухле́бит тя ма́нною. Глаго́лю же: хле́бом безмо́лвия и безпеча́лия, я́ко да насле́диши зе́млю бла́гу, глаго́лю же: вы́шний Иерусали́м.

Ей, бра́те, си́е стяжи́, я́ко да наслади́шися в пути́ сведе́нии Бо́жии, я́ко о вся́ком бога́тстве. Ей, бра́те, стяжи́ безмо́лвие со стра́хом Бо́жиим, и Бог ми́ра да есть с тобо́ю, Ему́же сла́ва подоба́ет во ве́ки веко́м. Ами́нь.