Молю́ вы у́бо, бра́тия моя́, Бо́гом возлю́бленная, е́же тща́тися по вся дни се́му па́мять твори́ти. Глаго́лю же: ве́ре, и упова́нию, и любви́. Смире́ною же му́дростию знаменова́ти всегда́ моли́твы Бо́жия, и поуче́нием боже́ственных книг Писа́ний, безмо́лвием и про́чими де́тельми. Сия́ бо вам су́щая и мно́жащаяся в вас, не пра́здна, ниже́ безпло́дна вам устро́ятся, на ра́зум Го́спода на́шего Иису́са Христа́. Мних бо, и́же не стя́жет сего́, но лени́тся о свое́м спасе́нии, слеп есть очи́ма. Забы́т прии́м о дре́вних гресе́х, и ключи́тся ему́ и́стинная при́тча: пес обрати́вся на своя́ блево́тины, и свиния́ омы́вшися в ка́ле скверна́ве. О́ви бо, рече́, отбежа́вше скве́рны ми́ра сего́, уве́деша Го́спода на́шего Иису́са Христа́, и си́ми па́ки обяза́вшеся, побежде́ни бы́ша, и бы́ша им после́дняя го́рьша пе́рвых. У́не бо бе им не позна́ти и́стиннаго пути́, не́жели позна́вше вспя́ть па́ки возврати́тися.

Не́смы ли, люби́мицы, ве́рнии раби́, избра́ннии во́ини Христо́ви, мни́си? Возме́м вся ору́жия, пре́жде рече́нная, в се́рдцых на́ших, всегда́ непрело́жну па́мять им творя́ще, я́ко да возмо́жем подвиза́тися до́брым по́двигом, и попра́ти всю си́лу вра́жию, да изба́вимся от гне́ва гряду́щаго на сы́ны непокори́выя, и да обря́щем ми́лость и ра́дость в день он стра́шный, пред пра́ведным Судие́ю, отдаю́щему кому́ждо по дело́м его́, Ему́же сла́ва подоба́ет со Отце́м и со Святы́м Ду́хом, ны́не и при́сно и во ве́ки. Ами́нь.