А́ще ключи́тся кото́рому бра́ту приити́ во мни́шеское житие́, от не́кия то́кмо вины́, и а́ще не воспря́нет ско́ро, а́бие поглоти́т его́ диа́вол, и на́чнет его́ пострека́ти на сицева́я, и рече́т, что хо́щеши тружда́тися отсе́ле, и любе́зно прилежа́ти на до́брыя де́тели, не су́щу ти возда́нию? Еда́ свое́ю во́лею прише́л еси́ на и́ночество? Ни, но по ну́жди еси́ прише́л, а́ще не бы́ти ключи́лася сицева́ вещь бы́ти, не бы прише́л еси́. Не восхощи́ у́бо отсе́ле страда́ти всу́е, не и́мать бо ти Бог благода́ти о сем да́ти. Сия́ вложи́т во ум бра́ту, ненави́дяй добра́ де́мон, хотя́ воврещи́ его́ в поги́бель неча́яния. Тогда́ про́чее брат не разсуди́в в себе́ де́ла Госпо́дня, даст ся в неча́яние, и тогда́ на́чнет нераде́нием жи́ти, в безбоя́зньстве Бо́жии. Проти́ву же глаго́лати ма́лым и вели́ким, и несы́таго сна тре́буя. И а́ще что бла́го когда́ сотвори́л есть игу́мен ему, то я́ко тщету́ мнит. Мно́жицею же ропща́ и рыда́я, и уже́ а́бие спро́ста, поги́бели сам ся предае́т. И в доброде́тели ме́сто, уже́ и́злиха на́чнет любе́зно зла́я де́лати. Не помышля́я благода́ти Госпо́дня в того́ ме́сто е́же глаго́лати в себе, о́ душе́, коли́ко их сподо́бишася в сию́ жизнь приити́? Мно́гим посто́м и моли́твами, аз же в ле́ности пожи́х дни моя, и ка́ко Госпо́дь сподо́бил мя есть в сицево́ предспе́яние приити́, в чи́стое и безмо́лвное житие́. Не помяну́в Госпо́дь грехо́в моих мно́гих. Те́мже и мы убо потщи́мся о душе́, досто́йна дела́ сотвори́ти покая́нием, да не сугу́бу му́ку обря́щем о сих, я́ко благода́ти Бо́жия отмета́вшеся. Послу́шай же и при́тчи к сим.
Бога́т бе не́кто во стране́ не́коей, и купи́ себе́ се́ла, об он пол реки́, и призва́ рабы́ своя́, и отпусти́ их а́бие, раздели́в им се́ла, пода́в кому́ждо, я́коже восхоте́, и рече́ им: Да идет ко́ждо вас в свою́ часть, и да де́лает в ней, до́ндеже прише́д ви́жу ва́ше де́ло. Не́цыи же обрето́шася от них благово́льни и владыколю́бцы, и не преслу́шашася за́поведи влады́ки своего́, но а́бие преше́дше реку́, де́лаху на селе господи́на своего́. Друзи́и же от них непослушли́ви су́ще и жестосе́рди, сопроти́в реко́ша господи́ну своему́, глаго́люще: Мы гла́са твоего́ не послу́шаем, и реки́ не пре́йдем, и на селе твоем не де́лаем. О всех же сих не прогне́вася господи́н их, но угото́ва пи́во рабо́м свои́м, и упои́в непослушли́выя рабы́, и повеле́в други́м рабо́м превести́ их реку́. И превезо́ша их реку́, и положи́ша их коего́ждо их на ча́сти их, ю́же бе дал им господи́н их. И воспряну́в еди́н от них, обре́теся об он пол реки́, лежа́ на ча́сти свое́й, ю́же бе дал ему́ господи́н его́, и диви́ся о сем, и рече́ в себе́: А́ще та́ко возлюби́л мя есть господи́н мой, отмета́вшуся мне и не прогне́вася на мя, но преве́л мя есть долготерпе́нием вели́кую реку́ сию́, и ну́жную, я́ко во сне преве́л мя есть, и на ча́сти мое́й положи́л мя есть, те́мже у́бо и аз потружда́юся до́бре на селе́ его́, не забыва́я благи́х его́ дея́ний. И нача́т де́лати приле́жно, я́коже и пости́гнути ему́ и пре́дния. Посе́м же воспряну́в и други́й раб, обре́теся и той об он пол реки́, на селе́ господи́на своего́. Лука́в же сый и лени́в, рече́ в себе́: Се рече́ реку́ сию́ вели́кую и ну́жную, я́ко во сне преве́л мя есть, аз же пуст есмь оста́вил виногра́д его́: и узрю́ что хо́щет ми сотвори́ти. И па́ки возле́г и у́спе. Спящу же ему взы́де те́рние, и ди́вия ляди́на покры́ его́. Не по мно́зе же вре́мени прии́де господи́н раб тех, ви́дети коего́ждо дело, и ви́дев де́ло пре́жде наче́нших, и благослови́ их. И па́ки пото́м прии́де к рабу́ тому́, его́же бе сам во сне преве́зл, и ви́дев де́ло его́ возвесели́ся о нем, и благослови́ его́. Посе́м же прии́де ви́дети лени́ваго раба́ и де́ло его́, и прише́д обре́те его́ спя́ща, те́рнием же и ляди́ною покрове́на, и призва́в его́ с преще́нием рече́: Ра́бе лука́вый, почто́ пуст еси́ оста́вил виногра́д мой? Или́ не ве́си, ка́ко тя превезо́х реку́ во сне, и на твое́й ча́сти положи́х тя, и не помяну́х зло́бы твоея́, о пе́рвем ти непоко́рстве? Не бе ли тебе́ подоба́ло уподо́битися клевре́том свои́м и́мже о́бразом и тех превезо́х реку́? То не те́мже ли тя уподо́бих. Тогда́ ни еди́наго отве́та обря́щет раб он в день стра́шный. Тогда́ господи́н их, сотвори́т кому́ждо по дело́м их.
Глаго́лют у́бо бога́таго, Влады́ку Христа́. Село́ же, ве́ру. Пия́нство же, молву́. Ну́жную же реку́, пре́лесть и бога́тство ве́ка сего́. Приле́жныя же рабы́, пра́ведники. А от пия́нства воспряну́вшаго и де́лавша, му́жа гре́шна и ну́ждею и иску́сом воспряну́вша, и прите́кша к Бо́гу и сотво́рша во́лю Госпо́дню. Лени́вый же раб, челове́к отверги́й благода́ть Госпо́дню, и не ради́в о спасе́нии свое́м. О всех же сих воспомяни́ Са́вла, ка́ко взем еписто́лию от архиере́й, и идя́ше в Дама́ск гони́ти ве́ровавших во Христа́, и шед искази́ти ве́ру, и обре́теся пропове́дник ве́ре. Мно́ги бо щедро́ты Госпо́дни на всех призыва́ющих Его́ вои́стину. Тому́ сла́ва, во ве́ки. Ами́нь.