Яце́м же о́бразом мечь жи́лы пресека́ет ко́неви, и вса́дника низлага́ет, та́ко и злообы́чная мысль, пресека́ет просте́ртие душе́вное, и ско́рби предае́т. Ско́рбь же растле́ет ю́, впада́ющая в ню.
Не́кто у́бо не́когда хотя вни́ти в град, отстоя́ вда́ле ста́дий три́десяти. Преше́дше же два́десять и де́вять, еди́ноя же не сотво́рь, глаго́ля я́ко постиго́х, ре́кше доидо́х. Сей бо от свои́х изше́д и во граж не вни́де. Я́коже бо и прише́дый в единонадеся́тый час, испо́лнь мзду прия́т. Та́ко и де́лавый до единоя на́десяте годи́ны, о вторей же на́десяте годи́не на́чнет опровраща́ти и всажде́нная востерза́ти, и мзды не прии́мет. Го́споду и Спа́су на́шему Иису́с Христу́ ре́кшу: Претерпе́вый до конца́, той спасе́тся. И па́ки: Никто́же возложи́в руки́ своея́ на ра́ло, и обра́щься вспять, благоиспра́влен бу́дет в Ца́рствии небе́снем. Жена́ бо Ло́това обря́щшися вспять, бысть столп слан.
Те́мже и апо́стол за́дняя забы́в, пре́дняя стяжа́. И тый у́бо люби́миче терпи́, мир бо сей мимохо́дит и похоте́ния его́. Творя́й же во́лю Бо́жию, пребыва́ет в ве́ки. Стра́нни бо есмы́ и прише́льцы в жи́зни сей. И еще́ же егда́ вре́мя и́мамы, де́лаем в нем уго́дная Бо́гови, и мзду прии́мем. Стяжи́ у́бо терпе́ние люби́миче. Пи́шет бо: В терпе́нии ва́шем стяжи́те душа́ ва́ша. Ено́х две́сте лет угоди́ Бо́гови, по рожде́нии его́ Мафусала́мове. А мы в ма́лое се вре́мя пренемога́им. Супроти́в ста́ни люби́миче скве́рным помысло́м. И се рек со глаго́лющим: Христу́ сраспя́хся. Жив же ктому́ несмь аз, живе́т же во мне Христо́с. Кая бо по́льза есть челове́ку, аще мир весь приобря́щет, ду́шу же свою́ отщети́т? Уклони́теся от мене лука́вии, и испыта́ю за́поведи Бога моего́. Глаго́лет бо Екклисиа́ст, ре́кше Церко́вник. Суета́ суета́м вся суета́. По толи́це бога́тстве и сла́ве, ктому́ суете́ не принесе́м трудо́в, да не по мое́м исходе ре́кше по сме́рти, ини́и насле́дствуют, аз же отвеща́ю прю: но да принесу́ труды́ моя́ Благо́му и Ми́лостивому Бо́гу, подаю́щему по сме́рти жизнь, и гото́вящему лю́бящим Его́, его́же о́ко не ви́де, ни у́хо слы́ша, ни на се́рдце челове́ку не взы́де.
Ей, люби́миче, мужа́йся, и да крепи́тся се́рдце твой, и потерпи́ Го́спода, и бу́дет в ми́ре исхо́д твой, и та́мо у́зриши пра́ведники ра́дующася о твое́м спасе́нии. И та́мо водвори́шися на ло́не Авраа́мли с Ла́зарем. Нищету́ бо избра́, скорбь претерпе́л еси́, поноше́ние прия́л еси́, и укоре́ния не возненави́дел еси́. Сего́ ра́ди прии́мут тя в весе́лии в вечныя кровы, иде́же отбеже́ боле́знь и скорбь, и воздыха́ния несть тамо. Узриши же живо́т и сове́т и́стинный, упова́ние всея́ тва́ри Изба́вителя душ на́ших, Иису́с Христа́ Царя́ сла́вы, и ра́дости твоея́ никто́же не во́змет от теб́е́. Сам же Госпо́дь наш да сохрани́т ны непоро́чны душе́ю и те́лом. А́ще наказа́ние о по́льзах мни́шескаго жития́ храни́м все́ю душе́ю, возлю́бленый бра́те, а́ще отве́ргся жития́ бу́деши мних – трезви́ся, я́ко мно́га ла́яния вра́жия суть. Еда́ ка́ко обре́т ме́сто, поусти́т тя и рече́т: Что по́льзовал еси́? Не се ли уже́ и зве́рие безмо́лвят на ло́жах свои́х? Ты убо запрети́ ему́ глаго́ля: Госпо́дь да проклене́т тя диа́воле, я́ко челове́ка его́же сотвори́ Бог по Своему́ о́бразу, зве́реви уподо́бил еси́. И не преста́еши развраща́я пути́ Госпо́дни пра́выя.
О по́льзе же послу́шай. Пе́рвое и́же хотя́й бы́ти мних, отве́ржется ми́ра, и отве́ржется свои́х воль. И во́змет крест свой, и во след и́дет Спа́са на́шего Иису́с Христа́. Не пререку́ет, ни проклина́ет. Не роти́тся, не злосло́вит. Не поучается словесе́м ложным, глаго́лющим блу́дныя му́дрости. Воздержи́ся, не злопита́ет себе́. Дру́ги и́мать поле́зны, врага́ же диа́вола. Не оскорбля́ет де́лателя, не восхища́ет у ни́щаго, не наси́лует вдови́цы, не возбраня́ет си́ру, не мяте́тся о бога́тстве, дово́лен сый су́щим. Не пече́тся до́мом, или́ ка́ко угоди́ти жене́, не пече́тся во́инством, или́ ка́ко нарещи́ свои́х сыно́в, или́ ка́ко вдасть дще́ри за мужь. Ни привя́зуется напа́стех, но праз́днствует свои́м спасе́нием. Не возно́сится, но смиреному́дрствует, блажи́т, послу́шает, пое́т и не козлогласу́ет. Мо́лится и не глуми́тся. Не ми́рски бо́рется в жите́йских ве́щех, не печа́луется тем, е́же сотвори́ти себе сла́ву на земли́. В пища́ли ме́сто и тимпа́на и мусики́и, пое́т и мо́лится, рыда́ет и слези́т во вну́трених хра́минах до́му своего́, и души́ оставле́ния грехо́в прося́. Мо́лится же ся ку́пно и за весь мир. Не предлага́ет су́етных виде́ний, но святы́х мужь, в коры́сти ме́сто и погубля́ющих до́мы и души́ веселя́щихся и́ми. Ру́це про́стрет на поле́зная, на дела́ и на чте́ния боже́ственых книг. Не пече́тся родо́м, ни вещьми́ земны́ми. Помяне́т за́поведи Спа́совы, и ражже́т дух свой в них, и скорбь прожене́т. А́ще прии́дет плотска́я боле́знь, ра́дуется я́ко близ есть вене́ц. Прии́дет уны́ние, прие́млет от Бо́га терпе́ние. Прии́дет тщета́ земна́я, помяне́т день коне́чный, я́ко вся зде оста́нут. Сту́жено бысть ему́ от злостра́стия, помяне́т го́ресть му́чную. Прии́дет клевета́, помяне́т я́ко близ есть оправда́яй его́, и терпи́т. Прии́дет досажде́ние и муки, помяне́т стра́сти Спа́совы. Прии́дет высокому́дрие, помяне́т я́ко огне́м хотя́т вся искуше́на быти. Си́и да́рове благода́ти быва́ют, праве рабо́тающим Го́сподеви, и ели́ко подоба́ет святы́м. Тебе́ же диа́воле безде́льна обрати́т Госпо́дь Бог.
Си́це люби́миче послу́шай глаго́лющаго: Супроти́ву ста́ните диа́волу, и отбежи́т от вас. Прибли́житеся Бо́зе, и прибли́жится вас. Моля́щеся ку́пно и за мя окая́ннаго, я́ко беззако́ния моя́ превзыдо́ша главу́ мою́, я́ко да Госпо́дь Бог я́ко Благ да поми́лует и сохрани́т, и спасе́т вся в Ца́рствии Свое́м и во сла́ве, я́ко Того́ есть сла́ва и си́ла и Ца́рствие, Отца́ и Сы́на, и Свята́го Ду́ха, ны́не и при́сно и во ве́ки веко́в. Ами́нь.