Све́тло житие́ пра́ведных. Ка́ко же свети́тся, не терпе́нием ли? Се возлюби́ о́ мни́ше, е́же есть му́жеству ма́ти. Проро́к бо во псалме́ наказу́ет глаго́ля: Потерпи́ Го́спода и сохрани пути́ Его́. Па́вел же учи́т: Я́ко да стя́жете де́тели. И глаго́лет: Я́ко скорбь терпе́ние содева́ет, и сим гряды́й путе́м, обря́щеши исто́чник благо́е упова́ние. Упова́ние же не посрами́т. Покори́ся убо Бо́гови и моли́ся Ему́, и обря́щеши от сего е́же и дасть ти проше́ние се́рдца твоего́. Что сего́ блаже́нее? Е́же стяжа́ти Ца́рство. Си́це слы́шание ми́лостивно. Кто не хо́щет отве́рсту име́ти слу́ху, и слы́шати гла́са ми́лостивна от Судии́: Прииде́те вси благослове́нии Отца́ Моего́.

Де́латель нарече́шися де́тели, бра́те. Ная́л тя есть Христо́с в виногра́д Свой, да доне́лиже вре́мя и́маши де́лай благо́е. Послу́шай Па́вла глаго́люща: Е́же что се́ет челове́к, то и по́жнет. Се́яй в дух, да по́жнеши жизнь ве́чную. Се́яй же в те́ло рече́, от пло́ти по́жнет тлю. Послу́шай до́браго наказа́ния, и наказа́теля глаго́люща: Се́йте себе́ в пра́вду, да объе́млете плод живо́тен. Не пренемага́й в труде́ презря́ упова́ния. Иде́же бо по́двизи, ту и воздая́ния. А иде́же побе́ды, ту и че́сти. А иде́же брань, ту и вене́ц. На сия́ взира́я, пома́жи себе́ терпе́нием, возглаша́й себе́ всегда́ со святы́ми, мужа́йся и да крепи́тся се́рдце твое́, и потерпи́ Го́спода. Гото́вай на исхо́д дела твоя́, и пригото́вайся в виногра́д. Виногра́д бо есть житие́ се, и приими́ ры́льце росоха́тое, но́вый и ве́тхий заве́т. Оплети́ тяжа́ние свое́ терпе́нием, посто́м и моли́твою и уче́нием. И а́ще и́маши опло́т, не вни́дет зверь е́же есть диа́вол, и я́ко виногра́д добр де́лай си ду́шу. Я́коже бо виногра́д блюду́щеи, пле́щут рука́ми и вопию́т гла́сом, и та́ко клица́нием прогоня́ют помышля́ющая на виногра́д. Та́ко и ты возопи́ моли́твою, и пе́нием воскли́кни, и отжене́ши лука́ваго зве́ря, и лиси́цу е́же есть сатана́. О не́йже глаго́лаху кни́ги: Ими́те себе́ лиси́цы ма́лыя и про́чая.

Смотри́ всегда́ врага́, а́ще устрели́т ти се́рдце на похоте́ние лука́во, или́ а́ще ка́менем пра́щным порази́т ти ду́шу, скве́рныя вложи́в ей по́мыслы, супроти́в стани, щит веры приими́, шлем упова́ния, возми́ же и мечь духо́вный, е́же есть глаго́л Бо́жий. И та́ко вооружи́вся на врага́ потерпи́, и не пренемага́й к бра́ни, но крепи́ся на всех и глаго́ли: не бо у́бо мы́сли или́ его́ не свем. Ра́дуйжеся всегда́ я́коже пи́шет: Смотрели́вое вам да разу́мно бу́дет всем челове́ком, страх Бо́жий да утверди́тся в се́рдцы твое́м. И не бу́ди страшли́в и лени́в де́латель, и не бе́гай венца́, житие́ бо ма́ло, а суд долг. На сия́ взира́я о́ мни́ше, си́це рцы ку́пно со святы́м Дави́дом, и глаго́ли: Мужа́йся, и да крепи́тся се́рдце твое́, и потерпи́ Го́спода.

Подо́бися Дави́дови. И́же еди́нем верже́нием ка́мени низложи́ борца́, стоя́т а́нгели позора́таи жи́зни твоея́. Позо́ру бо рече́ бы́хом всему́ ми́ру а́нгелом и челове́ком. И а́ще тя ви́дят побежда́юща, ра́дуются о исправле́нии твое́м. А́ще ли же побежда́ема, отхо́дят уны́ли, не терпя́т бо. Смею́тжеся бе́си. Извлецы́ убо во ору́жия ме́сто страх Бо́жий. Страх бо Госпо́день я́ко мечь обою́ду остр. Есть бо посека́я вся́ка помышле́ния неприя́знена. Прие́мли у́бо всегда́ страх Бо́жий в се́рдцы свое́м, помина́я после́дний день, егда́ небеса́ раздира́ема разлива́ются, стихи́я же пали́мы иста́ют, земля́ же и я́же на ней дела́ попаля́ются. Егда́ же зве́зды яко ли́ствие спаду́т, со́лнце же и ме́сяц поме́ркнета, и не да́ста све́та своего́. Егда же яви́тся Сын Бо́жий с небесе́ на землю, и си́лы небе́сныя поколе́блются. Егда́ же а́нгелом риста́ние, и гла́сом тру́бным исхожде́ние. Огнь пред ним паля́, о́крест теки́й вселе́ныя. И о́крест его бу́ря ве́лия, тру́си и стра́си и треска́ния, и́же не быша никогда́ же. Ни бу́дут до дне того́, яко и саме́м си́лам небе́сным тре́петом ве́лиим одержи́мым бы́ти. То каце́м у́бо подоба́ет быти нам се слы́шаще, бра́тие моя́? Кий страх и тре́пет прии́мет ны? Разуме́ ли Изра́иля, я́ко не мо́же терпе́ти примра́ка и примраче́ния, и гла́са глаго́лющаго Бо́га испосреды́ огня́, но тща́хуся е́же ктому́ не прибли́житися им сло́ва, не терпя́ху бо пои́стине сле́маго. Иде́же не с я́ростию сше́дшу, ни с гне́вом глаго́лющу к ним, но со утеше́нием известву́я им, я́ко с ни́ми есть.

Послу́шайте бра́тия моя́, а́ще со утеше́нием не мого́х понести́ прише́ствия его́, егда́ же ни небеса́ раздира́ема разлия́шася, ни земля́ и я́же на ней дела́ попали́шася, ни трубя́щеи воструби́ша, я́коже хо́щет труба́ о́на вопи́ти, и убуди́ти от ве́ка спя́щая, ни огня́ попаляющаго вселе́ныя, ни ино́го чего́ хотя́щаго бы́ти стра́ха не бысть, и что сотвори́м, егда́ с я́ростию и со гне́вом непостоя́ным прии́дет, и ся́дет на престо́ле сла́вы Своея́, и призове́т зе́млю от восто́ка и до за́пада, и от всех коне́ц свои́х, су́дит лю́дем Свои́м, и возда́ст кому́ждо по дело́м его́?

У́ лю́те мне! Каце́м подоба́ет бы́ти нам, егда́ предста́нем на́зи и обличе́ни, хотя́ще введе́ни бы́ти на стра́шное суди́ще? У́ лю́те мне! У́ лю́те мне! Где тогда́ безо́чив и студа́ не име́я? Где тогда́ му́жество плотско́е? Где же добро́та ло́жная и неуспе́шная? Где тогда́ сла́дкое явле́ние челове́ком? Где тогда́ де́рзость неопаси́вая и безсту́дная? Где тогда́ красота́ ри́зам? Где тогда́ жела́ние грехо́вное нечи́стое и ме́рзское вои́стину? Где тогда́ веду́щеися на похоте́ние моты́льных де́телий, ре́кше чре́ву рабо́тавшеи? Где тогда́ и́же с тимпа́ны и мусики́ею вино́ пию́щеи? Где тогда́ презре́вшеи убо́гия, и в безстрашии жи́вшая? Где тогда́ пи́щи и вели́кия ко́рмли вся преидо́ша и яко слаб дождь разыдо́шася? Где тогда́ сребролю́бие и любе́зное стяжа́ние, и от него немилосе́рдие? Где тогда́ горды́ни челове́ческая, я́же всем ме́рзска есть и сама́ мни́тся сущи не́что? Где тогда́ тща́я и су́етная челове́ческая сла́ва, и предспе́яние? Где тогда́ могу́тство и мучи́тельство? Где князь и воево́да? Где облада́ющеи? Где и́же хвали́вшеися о мно́жестве бога́тства, а убо́гаго презре́вшеи? Тогда́ ви́девшеи та́ко диви́шася, и смято́шася, подвижа́шася, тре́пет прия́т я́. Ту боле́знь я́ко ражда́ющей, ду́хом бу́рным сокруши́т я́. Где же тогда́ су́етная их кова́рствия? Го́ре им, я́ко возмято́шася и восколеба́шася а́ки пия́ни, и вся му́дрость их поглощена́ бысть. Где тогда́ прему́дрии кни́гчия, и совопро́сник ве́ка сего́ су́етнаго?

Бра́те мой помы́сли, каце́м подоба́ет нам бы́ти, даю́щим сло́во о том е́же сотвори́хом, или велико или ма́ло. И до пра́здна бо словеси́ отве́т да́мы пра́ведному Судии́. Каце́м у́бо подоба́ет бы́ти нам в годи́ну ону, а́ще обря́щем ра́дость пред Ним. Ка́я же ра́дость прии́мет ны, егда́ отлуча́емы одесну́ю Царя́. Каце́м же подоба́ет бы́ти нам, егда́ целу́ют ны вси святи́и та́мо, целу́ет ны Авраа́м, Исаа́к, Иа́ков, Моиси́й, Но́е, И́ов, Дави́д, и святи́и проро́цы, и апо́столи, и му́ченицы, и вси пра́веднии угоди́вшеи Бо́гови в животе́ их пло́тию. Ели́ко же их слы́шиши зде и диви́шися житию́ их, и хотел́ еси́ ны́не сих ви́дети. И та́мо прииду́т к тебе́, и объи́мше целу́ют тя ра́дующеся о спас́ении твое́м.

Каце́м подоба́ет нам бы́ти тогда́, и какову́ ра́дость име́ти неизглаго́ланну, егда́ рече́ Царь су́щим одесну́ю, с ти́хостию глаго́ля: Прииде́те благослове́нии Отца́ Моего́, насле́дуйте угото́ваное вам Ца́рство от сложе́ния ми́ру. Тогда́ бра́те мой прии́меши Ца́рствие ле́поты, и вене́ц красоты́ от руки́ Госпо́дни. И уже́ сца́рствуеши Христо́ви. Тогда́ насле́дуеши блага́я о́на, я́же угото́ва Бог лю́бящим Его́. И тогда́ уже́ без печа́ли еси́, ктому́ не бо́йся ни еди́ного паде́ния.

Помы́сли бра́те мой е́же есть ца́рствовати на небесе́х я́коже пре́жде ре́хом, прия́ти вене́ц от руки́ Госпо́дни, и сца́рствуеши в про́чая со Христо́м. Помы́сли бра́те мой е́же есть Бо́жия лица́, зрет́и выну, е́же есть име́ти Его́ свети́ла. Тогда́ бо несть ти ктому́ со́лнца во свет дневны́й, я́коже Иса́ия рече́, ни восто́к ме́сячный не све́тит но́щию, но есть ти Госпо́дь Свет и́стинный, и Бог сла́ва твоя́. Се бра́те, какова́ ти ра́дость предлежи́т боя́щимся Бо́га, и храня́щим за́поведи Его́.

Помы́сли же по сих и гре́шных поги́бель, егда́ введе́ни бу́дут на суди́ще стра́шное. Ка́ко в студ прии́мет их пред пра́ведным Судие́ю, не иму́щим сло́ва отве́тна. И ка́ко в срам прии́мет, отлуча́емыя ошу́юю Царя́. Какова́ тма нападе́т на ня, егда́ возглаго́лет к ним гне́вом Свои́м, и я́ростию Свое́ю смути́т я́, глаго́ля: Иде́те от мене про́клятии во огнь ве́чный, угото́ваный диа́волу и а́нгелом его.

У́ лю́те мне! У́ лю́те мне! Какову́ скорбь и тугу́ прии́мет дух их, егда́ будет вопль всем глаго́лющь, да возвратя́тся гре́шницы во ад, и вси язы́цы забыва́ющеи Бо́га. У́ лю́те мне! Какову́ песнь воспою́т бию́щеся и рыда́юще, ведо́ми му́читися го́рце в безконе́чныя ве́ки. У́ лю́те мне! Каково́ есть ме́сто то, иде́же есть плачь и скре́жет зубо́м. Нарица́емая гроза, ея́же и сам сатана́ трепе́щет. У́ лю́те мне! Каково есть та́мо родство́ огня́ негаси́маго, и неусыпающаго и ядови́таго че́рви. У́ лю́те мне! Ка́ко люта́ есть тма кромешная вечная, при́сно пребыва́ющая. У́ лю́те мне! Ка́цы суть а́нгели над му́ками немилосе́рдии, и неми́лостивии, поно́сят бо и притужают лю́те. Тогда́ возопию́т му́чимии ко Го́споду, и неуслышит их. Тогда́ уве́дят я́ко су́етне изы́де житие́ их, и яже непщеваху зде сла́дка су́ща, же́лчи я́да горча́йша обря́щутся вся. Где тогда́ лжеимени́тое жела́ние грехо́вное? И́но бо жела́ние несть, е́же боя́тися Го́спода. Вои́стину жела́ние есть, вои́стину я́ко ту́ка и ма́сти насы́тит ду́шу. Тогда́ уве́дят себе́ и дела́ своя́, я́же сотвори́ша. Тогда́ испове́дят глаго́люще, я́ко пра́веден суд Бо́жий. Слы́шахом бо и не хоте́хом обрати́тися от лука́вых на́ших дея́ний. И тогда́ ничто́же получа́т глаго́люще.

У́ лют́е мне! Во гресе́х неподо́бных держи́му су́щу. Па́че числа́ песка́ морска́го согреши́х, и превожу́ся от них я́ко от мно́гих уз желе́зных. Несть бо ми дерзнове́ния возре́ти на высоту́ небе́сную.

К кому́ у́бо прибе́гну, но к Тебе́ Человеколю́бче, к Тебе́ Незло́биве. Поми́луй мя Бо́же по вели́цей ми́лости Твое́й, и по мно́гим щедро́там Твои́м очи́сти беззако́ния. К Тебе́ бо прибега́ю мно́гия ра́ди благосты́ни и милосе́рдия. Тебе́ прогне́вах, и к Тебе́ прибега́ю, мно́гаго ра́ди Твоего́ беззло́бия. Тебе отверго́хся, и к Тебе́ прибега́ю, мно́гаго ра́ди Твоего́ человеколю́бия. И моля́ся вопию́: Отврати́ лице́ Твое́ от грех мои́х, и вся беззако́ния моя́ очи́сти. Се́рдцы чи́сто сози́жди во мне Бо́же, и дух прав обнови́ во утро́бе мое́й, и́мени ра́ди Твоего то́кмо. Не и́мам бо ничто́же добра́ принести́ Ти, ни дея́ния бла́га, ни се́рдца чи́ста, но надеяся на щедро́ты Твоя́ припа́даю, да сози́ждеши во мне покая́ние, да не впаду́ па́ки удо́бь во грех. Но отсе́ле да послужу́ Тебе́ в преподо́бии и пра́вде вся дни живота́ моего́, я́ко Твое́ есть Ца́рствие и честь и держа́ва во ве́ки веко́м. Ами́нь.