Уве́дим гре́шницы милосе́рдие Бо́жие. Ка́ко, бе лихои́мец, навы́кните ки́им о́бразом поми́лован бысть. Отпу́стим бра́тие друг дру́гу с ми́ром отпуще́ние, по́лно су́ще вся́каго человеколю́бия, пре́жде возможе́ния вра́жия, я́же возвеще́на ми бы́ша Святы́м Ду́хом. Вся подоба́ет ми сказа́ти, и а́ще аз несмы́слен есмь, и ничто́же не сохрани́х е́же навыко́х, но ин слы́шав от вас не́кто, сохрани́т, то́кмо от мене́ сло́во да неме́ртво бу́дет, и да не пребу́дет без плода́. Да не скры́ем тала́нта ца́рскаго, но ку́плю твори́ти им се́менем испо́лнь живота́ су́щим.
Не внемли́ мне учениче́. А́ще и прельща́имь есмь от пути́, и ви́диши мя согреша́юща, во след мене́ не ходи́. Но Бо́га зри и боже́ственых писа́ний. И сия́ ти бу́дут пи́ща я́же тя и уча́т. Та́ко потщи́ся ходи́ти в за́поведех Его, и я́ко науче́н еси, та́ко пребыва́й. Учи́тельству аз жела́ю, не по́хотех бо наказа́нию. Бою́ся я́ко беззако́ния испо́лнь есмь. Сам ся облича́ю и тщу́ся потреби́ти хотя́, пле́вел су́щии во мне упова́ния ча́я.
Не воздыха́й учениче́. Ку́пно бо егда́ тя бие́т учи́тель твой. Что ча́до изнемага́еши не́мощию неполе́зною? Та́кожде же что рыда́еши рыда́нием прибы́тка не иму́щим? Неприя́знь ти при́сно раждиза́ет по́мысл, я́ко да бу́деши часть насле́дию его́. Сатана́ бо тщи́тся мно́гих хотя́ оскорби́ти, и прия́тия и в гео́ну воврещи́ неча́янием. Окра́дено ли ти бысть сокро́вище? Но и еще́ ти настои́т путь отве́рст до́брыя ку́пли. Поне́же есть вре́мя, собери́ па́ки сокро́вище твое́. То́кмо не отча́й себе́, но потщи́ся собра́ти е́. А́ще и стрела́ тя есть уязви́ла, то крепи́ся, и не пади́ себе́ весь до сме́рти убоявся я́звы. И покажи́ свою́ страсть в я́зве сый, да сплете́т ти ся вене́ц све́тлым плете́нием от сла́вы. А́ще и разбо́йник совлече́т я́, не уныва́й путе́м гряды́й. Бра́ни ли ключи́ло ти ся есть бы́ти и убие́ну бы́ти? Терпи́. А́ще и сла́на побие́т се́тву твою́, потщи́ся двокра́ты и трикра́ты де́лая зе́млю, и без ле́ности потщи́ся се́яти се́мя.
Ны́не ра́дуются о́блацы и дожди́т не́бо, и не сре́ет тебе́ тать. Пути́ не бо́йся. Вре́мя свое́ взем, ходи́ вы́ну ца́рским путе́м. На бра́ни на не́йже уяз́вен бысть, на тойжде возмози́ прия́ти побе́ду. На ме́сте иде́же пре́жде укра́дено бысть сокро́вище, на том возмози́ па́ки сего́ сокро́вища собра́ти. Иде́же бо пролия́ царь Аха́в кровь Науфе́ову, ту пси полиза́ша кровь нечести́ваго Аха́ва, я́коже пи́шет: Науфе́я кроме́ своего́ виногра́да уби́ Езаве́ль, и тебе́ грех хо́щет отри́нути за́поведий Госпо́дних. О́бразу сатанину́ уподо́бися Аха́в, и о́бразу беззако́нну уподо́бися Езаве́ль. Вку́пе кро́ви твоея́ жела́ют, я́ко кро́ви Науфе́овы беззако́ный Аха́в. Я́коже бо уби́ ле́стию пра́веднаго, та́ко и суд прия́т от Судия́ пра́веднаго, и я́коже скор мсти́тель Бог яви́ся пра́веднику.
И ны́не брань неви́дима нари́чется, я́коже рече́ апо́стол: Несть на́ша брань к кро́ви и пло́ти, но ко власте́м, к духово́м зло́бы рече́. Сатана́ с челове́ки тай ле́стию бо́рется. Христо́с же прого́нит весь сове́т его́. Брань твоя́ бра́те, несть проста́, ни сме́ха досто́йна, но и вси а́нгели и сих Влады́ка, зрит твоея́ бра́ни ю́же и́маши ко врагу́. И егда́ у́бо победи́тель бу́деши на врага́, лику́ют а́нгели и ра́дующеся просла́вят Бо́га, тебе́ да́вшаго кре́пость победи́ти лука́ваго.
Те́мже и брань мно́жайши быва́ет, да потре́бен бу́деши. И Бог прославля́ется, и челове́цы подража́тели ти бу́дут. И я́коже у́бо пре́жде ре́хом, а́ще стрела́ тя уя́звит лука́ваго врага́, весь не пади́ себе́ неча́янием, но ели́жды побежде́н бу́деши. Не пребыва́й в побежде́нии, но а́бие воста́в победи́ся ко врагу́. Гото́в бо есть твой подвигода́вец да́ти ти десну́ю руку, я́коже воздви́гнути тя от паде́ния твоего́. Егда́ у́бо ты пе́рвое воздви́гнеши десни́цу свою́, и Сам Свою́ десни́цу ти пода́ст, я́коже тя воста́вити.
Вся́ко тща́ние есть нечи́стаго врага́, яко да в неча́яние тя приведе́т егда́ согреши́ши. Ты же у́бо люби́миче не повини́ся ему́, но а́ще и седми́жды паде́шися на день, ско́ро воста́ни и покая́нием умоли́ Бо́га. Кто ме́дница не взем, ба́ню без ве́сти поста́ви. Или́ кото́рый купе́ц мно́гая погуби́в, и про́чая собра́в в мо́ре вве́ржет? Егда́ пове́рг ору́жие си е́же ти есть дал Христо́с, и плещи́ да́си врагу́, на уко́р Влады́це своему.
Дам ли ти наказа́ние изве́стно и умудре́но, страда́лец ми́рный? Глаго́лю же су́етнаго сего́ жития́. А́ще и зело́ бие́н бу́дет, бежи́т по́двига. И получи́в други́й день, победи́т и́ па́ки. И не полага́й дру́же день за день, е́же обрати́тися к Бо́гу. Еда́ когда́ на́йдет на тя внеза́пу отве́т стра́шнаго Судия́, зовы́й тя к Себе́, я́коже ти возда́ти Ему́ ку́плю, ю́же еси́ сотвори́л тала́нтом Его́. Егда́ в похвалы́ ме́сто свя́зан бу́деши по ру́це и по но́зе, и осу́жденик бу́деши во тме кроме́шней.
Но потщи́ся до́ндеже вре́мя и́маши, и припади́ к Судии́, я́коже ти очи́ститися всех грех, да и мы пора́дуемся с тобо́ю бра́те, и Бог просла́вится, Ему́же сла́ва в ве́ки веко́в. Ами́нь.