Прииде́те люби́мицы, прииде́те отцы́ и бра́тия моя́ избра́нное ста́до О́тче, зна́менании во́ини Христо́ви. Прииде́те ча́да, послу́шайте словеси́ спасе́наго о душа́х на́ших. Прииде́те ку́плю твори́м, до́ндеже торжество́ стои́т. Прииде́те прии́мем жизнь ве́чную. Прииде́те ку́пим спасение душа́м на́шим. Испо́лните очеса́ ва́ша слез, и а́бие отве́рзутся очеса ва́ша у́мная. Прииде́те вси единоду́шно, бога́тии и ни́щии, кня́зи и владу́щеи, ста́рцы с ю́нотами, сы́нове и дще́ри, и всяк во́зраст хотя́щеи ве́чнаго муче́ния изба́витися, и небе́снаго Ца́рствия насле́дницы бы́ти и ра́йстии жи́телие. Приидете со святым Давидом мо́лим Ми́лостиваго Бо́га и Человеколю́бца глаго́люще: Откры́й о́чи мои́, разуме́ю чудеса́ Твоя́. Просвети́ о́чи мо́и, да не когда́ усну́ в смерть. Возопие́м я́коже возопи́ слепы́й: Поми́луй мя Го́споди, Сы́не Бо́га Вы́шняго. И а́ще не́цыи возбраня́ют или́ запреща́ют молча́ти, мы же бо́льшими возопие́м, и не преста́нем вопию́ще, до́ндеже отве́рзет у́мнеи на́ши о́чи, Светода́вец Иису́с.
Приступи́те к Нему́ и просвети́теся, и ли́ца ва́ша не постыдя́тся. Прииме́те ум добрый, и жела́ние о Ца́рствии и о раи́. И а́бие неради́ти и́мате о ве́щех ве́ка сего́. Подвиза́йтеся во еди́ну на́десяте годи́ну. Ско́ро убо́йтеся, да́же не затворя́тся вам две́ри. Ве́чер у́бо прибли́жился есть, и Мздода́вец гряде́т со сла́вою мно́гою, да возда́ст кому́ждо по дело́м его́.
Пока́имся бра́тие, до́ндеже вре́мя и́мамы. Послу́шаим, что глаго́лет: Ра́дость быва́ет на небесе́х о еди́ном гре́шнице ка́ющемся.
Что уныва́еши, гре́шниче? Что отча́еши себе́, а́ще на небеси́ ра́дость быва́ет ка́ющутися? А́нгели ра́дуются, а ты уныва́еши. Арха́нгели веселя́тся о покая́нии твое́м, а ты бои́шися. Пречи́стая и Неразлучи́мая Тро́ица, кла́няема быва́ет от всех сил, и призыва́ет тя, а ты дре́млеши.
Да не услади́тся нам печа́ль мира сего́. Да не го́рек нам бу́дет ве́чный огнь, и червь не усыпа́яй. Пла́чемся зде ма́ло, да не пла́чемся та́мо ве́чно му́чими. Блюди́теся, да никто́же вас облени́т себе́, я́ко да внезапу я́ко мо́лнии стр́ашна прише́ствие Госпо́дне бу́дет. Не бои́телися, я́ко ко́ждо по дело́м свои́м прии́мет в годи́ну о́ну, и ко́ждо свое́ бре́мя понесе́т? Ко́ждо бо по́жнет, я́коже се́ял есть. И вси на́зи предста́нем на Суди́щи Христо́ве. И ко́ждо нас о свое́м де́ле сло́во возда́ст Судии́ в годи́ну они. И никто́же никому́же помощи́ не мо́жет, ни друг дру́гу, ни брат бра́ту, ни роди́тели ча́дом, ни мужь жене́. Но ко́ждо бу́дет во стра́се и в тре́пете, ча́я Бо́жия ответа слы́шати хотя́. Что ся лени́м и не пригото́ваим себе́? И почто́ не пече́мся отве́том, егда́ вре́мя и́мамы? Почто́ пр́езрим святы́я кни́ги и глаго́лы Христовы? Или́ мни́тся вам, я́ко словеса́ Его́ и святы́х Его́ проро́к же и апо́стол не осу́дят ли вас в день он на стра́шнем Суди́ще, а́ще не сохрани́м я́коже запове́даша нам?
Что глаго́лет Госпо́дь ученико́м? Слу́шаяй вас, Мене́ слу́шает. А отмета́яйся вас, Мене́ отмета́ется и Отца́ Моего́. И друго́е па́ки: Отмета́яйся Ме́не и не приемляй глаго́л Мои́х, Аз не сужду́ ему́, но и́мать судя́щаго ему́, сло́во е́же глаго́лах, то су́дит ему́ в после́дний день. Кое сло́во у́бо бу́дущее хо́щет суди́ти нам в после́дний день? Свято́е Ева́нгелие и про́чая кни́ги святы́х проро́к же и апо́стол.
Сего́ ра́ди молю́ вас бра́тия моя́, не пре́зрим пи́саных. Не́бо и земля́ пре́йдет, словеса́ же Госпо́дня не пре́йдут.
Те́мже припаде́м люби́мицы пре́жде прише́ствия дне о́ного стра́шнаго, и вве́рзем себе́ в пучи́ну щедрот Бо́жиих. Сам бо Бог побежда́ет и призыва́ет вся глаго́ля: Прииде́те ко Мне вси тружда́ющеися и обреме́нннии, и Аз поко́ю вы вся. Призыва́ет Человеколю́бец, Беззло́бивый Влады́ка, Милосе́рдый и Долготерпели́вый, хотя́й вся челове́ки спасти́. Не побежда́ет ктому́ свои́х, но и призыва́ет: Прииде́те ко Мне вси: лю́бо бога́т, лю́бо нищь, я́ко гряду́щаго ко Мне не иждену́ вон.
Кто же есть гряды́й ко Мне? Всяк любя́й Мя и име́яй за́поведи Моя́ и соблюда́яй, и послу́шаяй сло́ва Моего́, и ве́руяй посла́вшему Мя. Блаже́н послу́шаяй сло́ва Моего́ и храня́ е́. Окая́н же ослу́шавыйся, я́ко он́о сло́во су́дит ему́ в после́дний день, я́коже пи́шет: Стра́шно есть впа́сти в ру́це Боѓа жи́ва. Пока́йся бра́те и не страши́ себе́. Пока́йся гре́шниче. Дерза́й взира́я на неизрече́нное и на неизсле́димое человеколю́бие Христо́во, ре́кшаго: Не приидо́х пра́ведники призва́ти, но гре́шники на покая́ние. Пока́йся, да не постыди́ши себе́ на стра́шнем Суди́щи, иде́же со стра́хом предстоя́т ты́сящами а́нгел и арха́нгел. Егда́ же разве́рзутся кни́ги, и тогда́ разлуча́тся друг от дру́га, я́коже овца́ от ко́злищь.
О́ ве́ле стра́шна годи́на и тре́петна! Я́ко пра́ведный Суди́й стр́ашно прети́т. Кто не убои́тся? Кто ли не ужасне́тся годи́ны о́ноя? И́мже Суди́й зело́ кре́пок есть и суди́ще не умоля́емо. И дела́ на́ша пред очи́ма на́шима стоя́т. И река́ о́гнена пред суди́щем. И песнь пра́ведных со а́нгелы согла́сна. Рыда́ние же гре́шных нестерпи́мо, и сле́зы неполез́ны. Тогда́ сокро́вища отве́рзутся и пра́веднии насладя́тся. Го́ре же насы́тившимся зде, я́ко та́мо вза́лчут и вжа́ждут. Блаже́ни рыда́вшеи и пла́кавшеися зде, я́ко та́мо восмею́тся и уте́шатся. Го́ре же смея́вшимся зде, я́ко та́мо пла́кати и рыда́ти и́мут безпреста́ни. Блаже́ни ми́лостивии, я́ко та́мо поми́ловани и́мут бы́ти. Го́ре же непоми́ловавшим.
Слы́шал ли еси́, ка́ко блажи́ми суть подвиза́ющеися, и ка́ко ока́еми суть леня́щеися? Сия́ вся поразуме́й о спасе́нии, и не зри леня́щихся. Не бо, но я́ко зе́лие зла́ка ско́ро отпа́днут. И не возлюби́ ве́ка сего́: за́пнет бо лю́бящим и́. Весели́т бо в час, и на́ги посыла́ет во он век. Послу́шай и внемли́ святы́я кни́ги, и не и́маши прельще́н бы́ти су́етным и лука́вым ми́ром сим.
Послу́шайте, что глаго́лет Иоа́нн Богосло́в: Не люби́те ми́ра, ни я́же в ми́ре, я́ко вся я́же в мире, похоть плотьска́я и по́хоть о́чная. И мир сопрехо́дит. А творя́й во́лю Бо́жию пребыва́ет в ве́ки. Послу́шай Го́спода глаго́люща: Ка́я по́льза есть челове́ку, а́ще весь мир приобря́щет, а ду́шу свою́ отщети́т. Внемле́те изве́стно со стра́хом сло́во его́, я́ко сло́во е́же глаго́ла, и емуж́е научи́, то су́дит ему́ в после́дний день. Еда́ ложь есть Бог? Да не бу́дет. Сам бо есть и́стина, и словеса́ Его́ нело́жна.
Что лени́шися окая́нничае? И что ча́еши? Что не помышляеши, я́ко кто за тя отвеща́ет? Не ве́си ли яко ко́ждо за ся сло́во воздаст Богови? Не ве́си ли я́ко ко́ждо по́жнет е́же все́ял есть? И ко́ждо свое́ бре́мя понесе́т. Я́ко егда время и́маши, расточи бре́мя грехо́в свои́х. Призыва́ет бо Человеколю́бец глаголя: Прииде́те ко Мне вси обремене́ннии, и никто́же да не отча́ет себе́, никто́же да рече́т яко не согреши́х. Глаго́ляй бо не согреши́х, слеп есть очи́ма и окая́н от всех челове́к. Рече́ бо Иоа́нн Евангели́ст: А́ще рече́м я́ко греха́ не и́мамы, лжем и не твори́м и́стины. И себе́ прельща́ем, и Бо́га лжа твори́м. Никтоже бо чист от скве́рны. Что у́бо не слеза́м ли потре́ба есть, да скве́рну отмы́ем? Пою́ще со святы́м Дави́дом: Омы́еши мя, и па́че сне́га убелю́ся. И па́ки: Измы́ю на вся́ку нощь ло́же мое́, и слеза́ми посте́лю мою́ омочу́. Он во еди́ну нощь согреши́в, и по вся но́щи пла́кашеся слеза́ми. Сего́ ра́ди блаже́н яви́ся. Прозря́ше бо проро́к ре́кшаго: Блаже́ни пла́чущеися.
Ничему́же у́бо ве́ка сего́ мимогряду́щаго похощи́. И не краси́ся жите́йскими красота́ми. Не похощи́ бога́тьству ми́ра сего́, и возненави́ди ри́зы мя́гкия и мирска́я приодея́ния. Возненави́ди бляде́ния пе́страя словеса́, молву́, краше́ния, и бесо́вская их пе́ния, гу́сли и свире́ли, и ли́ки, пляса́ние и рука́ма плеска́ние, и безчи́нныя и неподо́бныя гла́сы. Или́ не ве́си окая́нне, я́ко сия́ вся диа́воля суть дея́ния? Сия́ вся язы́цы мирсти́и творя́т, в ни́хже ни есть наде́жда спасе́ния. Не уподо́бимся стопа́м их, да не осужде́ни бу́дем с ни́ми.
Послу́шайте апо́стола глаго́люща: Се у́бо глаго́лю, и свиде́тельствую о Го́споде. Николи́же ходи́ти вам я́коже и про́чии язы́цы хо́дят. В суете́ ума́ их омраче́ни по́мыслом. Оста́вльше у́бо язы́ческая дела́, да не возврати́мся па́ки вспять. И се же де́лаем отыну́дь, е́же отве́рглся еси́ сотоны́ и дел его́. И обеща́лся еси́ Христо́ви пред мно́гими по́слухи. Блюди́ же кому́ обеща́лся еси́, и не пре́зри. Се же веждь я́ко в годину о́ну, а́нгели гласы твоя́ и обеща́ния твоя и отрече́ния твоя написа́ша, и на небесе́ храня́т се до дне Су́днаго. И не бои́шилися, не трепещеши ли в день Су́дный? Принесу́т бо а́нгели рукописа́ние твое, и глаго́лы уст твои́х пред стра́шное Суди́ще, иде́же а́нгели со стра́хом предстоя́т. И тогда́ услы́шати и́маши от Судии́ лю́тый он глас: Я́ко усты́ твои́ми сужду́ ти ра́бе лукав́ый. Та́ко бо тогда́ воздохне́ши и пла́чешися со слеза́ми в годи́ну о́ну, и ничто́же по́льзуеши.
Поми́луйся сам, и не возненави́ди душа́ своея́. Отве́рзи си о́чи у́мныя, и виждь ка́ко подвиза́ются мно́зи, и ка́ко тща́тся спасе́ни бы́ти. Ка́ко ну́дятся на вся́ко де́ло бла́го, ка́ко храня́тся от за́висти, от клеветы́, от не́нависти, от сме́ха, от блуда́, от пи́ща, от сва́ра. Ка́коже те́сный путь возлюби́ша, а́лчуще и бдя́ще. Ка́коже свеща́ угото́ваша све́тлы. Ка́ко уста́ их всегда́ пою́т, и сла́вят безсме́ртнаго Жениха́. О́чи бо их поразуме́ста добро́ту Его́, и душа́ их ра́дуются.
Разуме́й и виждь, я́ко уже́ не заме́длит. Гряде́т бо, да возвесели́т лю́бящая Его́. Гряде́т, да уте́шит рыдающая и пла́чущаяся. Не мертвеца́, ниже́ вре́менна име́ния или тще́ты, но за удо́бный грех. И за небе́сное Ца́рствие, емуже несть конца́, и блаже́ныя ра́ди пи́ща ра́йския, отню́ду же изринове́ни бы́хом преступле́ния ра́ди за́поведи Бо́жия, и а́може па́ки вхо́дят рыда́ющеи и пла́чущеися. Гряде́т, да венча́ет зако́нно пострада́вшая. И те́сным и ско́рбным путе́м ходи́вшая. Гряде́т, да возвесели́т обнища́вшая Его́ ра́ди. Гряде́т, да поми́лует ми́лостивыя. Гряде́т, да насы́тит благ, алка́вшая и жада́вшая Его́ ра́ди. Гряде́т просвети́ти сокро́вищь те́мных, и яви́ти сове́т серде́чных. И что препро́сть глаго́лю: Гряде́т возда́ти кому́ждо по дело́м его́. Гряде́т уже́ не от зе́мли я́коже прежде, но небесе́ с си́лою и со сла́вою мно́гою.
Тогда́ трубы́ вострубя́т с небесе́, и си́лы его́ подви́жатся. Земля́ же вся я́ко вода́ морска́я вострепещет от сла́вы Его́. И река́ о́гненая тече́т пред Ним, очища́ющи зе́млю от беззако́ний. И пото́м внеза́пу бу́дет глас: Се Жени́х гряде́т. Се чаемая ра́дость гряде́т. Се гряде́т пра́ведным похвала́, пра́ведное Со́лнце. Се гряде́т Царь ца́рствующим, его́же Ца́рству несть конца́. Се гряде́т пра́ведный Суди́й. Се гряде́т, изыде́те на сре́тение ему́. Тогда́ изы́дут с ра́достию иму́ще свеща́ своя́ све́тлы и оде́жду чи́сту. И услы́шат глас Жениха́ глаго́люща к ним: Прииде́те благослове́нии Отца́ моего́, насле́дуйте угото́ваное вам Ца́рствие от сложе́ния ми́ру. Всю́ду же бывшу гла́су тому, изы́дут на сре́тение Ему́, иму́ще свеща́ свет́́лы со мно́гим дерзнове́нием ра́дующеся и наде́ющеся, я́ко свеща́ их не угасо́ша. Ты же ви́дев себе́ во мно́зе ско́рби и лю́тей беде́, и печа́ли неутеши́мей, и зря свеща́ своя́ уга́сша, со студо́м вели́ким глаго́леши: бра́тие, подади́те ми ма́ло ма́сла, я́ко свеща́ моя́ угасе́. И отвеща́вше глаго́лют ти: Еда́ когда́ не доста́нет вам и нам, но иде́те к продаю́щим и купи́те. И и́деши со ско́рбию и боле́знию, и воздыха́нием и го́рькими слеза́ми, и ника́коже обря́щеши купи́ти, поне́же разсы́пася живота́ на́шего торжество́, и вся земля́ вострепе́щет я́ко вода́ морска́я.
Приидо́ша бо вра́тницы це́рквах приседя́ще и ни́щии продаю́щеи масло оно, всю́ду же у́бо воздыха́я и недоуме́яся глаго́леши, плачася и рыда́я: Иду́ и толкну́ в милосе́рдие Христо́во, и кто весть отве́рзет ли? И прише́д, толкне́ши, и несть никого́же отвеща́ющаго ти. И пребу́деши па́ки толки́й. И отвеща́ет ти Жени́х внутрь глаго́ля: Ами́нь глаго́лю ти, не ве́де тебе́, отыди́ от Мене́ де́лателю беззако́ния. Не поми́ловав, не поми́лован и́маши быт́и. Не́си послу́шал гла́са ни́щаго, ни Аз послу́шаю гла́са твоего́. Святы́я Моя́ кни́ги слы́шав, и смея́шеся. Сего́ ра́ди у́бо не отпущу́ ти вни́ти. Раздруши́л еси́ небреже́нием проро́ки моя́ и апо́столы, и сего́ ра́ди сло́во Мое́ е́же глаго́лах, оно ти су́дит в после́дний сей день. Отыди́ от Мене́, не прие́млет бо тебе́ те́сная си дверь. Пита́л еси́ плоть свою́, ду́шу же свою́ погуби́л еси́. Ка́ко хо́щеши зде вни́ти, и оскверни́ти Ца́рствие Мое́? Пло́ти твоея́ оскверни́л еси́ оде́жду, и уста́ твоя́ клеветы́ испо́лнил еси́, сотвори́л еси́ во́лю диа́волю, Мою́ же во́лю отве́ргл еси́. И ны́не мо́лиши вни́ти, иде́же ничто́же преди́ посла́л еси́, иде́же ничто́же и́маши лежа́ща: ни по́ста, ни бде́ния, ни терпе́ния? Ничто́же от сих преди́ посла́в. Что у́бо зде и́щеши? И в сем жили́щи живу́т обнища́вшеи Мене́ ра́ди. Се Ца́рствие моли́твы их есть. Се поко́й и весе́лие рыда́вших есть. Си ра́дость пока́явшихся есть. Се поко́й бде́вших есть и пости́вшихся. Си жизнь вдо́вих и си́рых есть. Зде же алка́вшеи и жада́вшеи веселя́тся в ве́ки.
И сия́ слы́шав, ста́неши стыдя́ся. Стоя́щу же ти ту, прии́де во у́ши твой глас ра́дости и весе́лия, и позна́еши глас еди́наго ко́ждо дружи́ны своея́. И тогда́ воздохне́ши го́рце глаго́ля: У лю́те мне окая́нному. Ка́ко лиши́хся сла́вы сея и отлуче́н бых от дружи́ны? Вся ле́та живота́ моего́ с ни́ми бех, ны́не же отлуче́н бых от них. Пои́стине пра́веден Суд Божий. Пои́стине пра́ведно впадо́х в стра́сти. Они бо воздержа́хуся, аз же обе́ды и ве́чери гоня́х. Они́ поя́ху, аз же молча́х. Они моля́хуся, аз же глумля́хся. Они́ смиря́хуся, аз же горде́нием возвыша́хся. Сего́ ра́ди они́ ра́дуются, аз же рыда́ю. Они́ веселя́тся, аз же пла́чуся. Они́ ца́рствуют со Христо́м в непроходи́мых ве́цех, аз же со анти́христом посыла́емь есмь в ве́чный огнь.
У́ лю́те мне окая́нному! Что ми бысть? Коли́ка бла́га отщети́хся, да в ма́лое вре́мя во́лю диа́волю сотвори́х? Ны́не разуме́х, я́ко ко́ждо по дело́м свои́м прии́мет. Ны́не разуме́х я́ко пору́ган бых, и запя́л ми есть су́етный мир. О́ коли́ка бла́га лиши́хся! Я́ко зло себе́ наложи́х. Си, и сицева́я рыда́я глаго́леши, и ничто́же по́льзуеши. Не бо есть та́мо по́льза покая́нию.
Сего́ ра́ди запове́дают и засведе́тельствуют нам боже́ственыя кни́ги святы́х апо́стол и проро́к, я́ко блага́я я́же угото́ва Бог лю́бящим Его́, егоже о́ко не ви́де и у́хо не слы́ша, и на се́рдце челове́ку гре́шну не на́йде. Слы́шасте ли па́ки Го́спода глаго́люще: Не убо́йтеся от убива́ющих те́ло. И и́нде па́ки: блаже́ни изгна́ни пра́вды ра́ди. Сего́ ра́ди и апо́стол глаголет: Не льсти себе́, Бог не подража́ется. Челове́к бо е́же а́ще что все́ет, то и по́жнет. Се́яй в плоть свою́, от пло́ти по́жнет тлю. Се́яй же в дух, от Ду́ха по́жнет жизнь ве́чную. Я́коже се́явшеи в слеза́х зде, та́мо в ра́дости по́жнут.
Внемле́те бра́тия моя́, и помяни́те пи́саное. Изы́де се́яй се́яти се́мени своего́. Кто изше́дый и се́явый? До́брый наш Домови́тец Госпо́дь наш Иису́с Христос. Что же се́яв? Сло́во Ева́нгельское, и святы́я Своя́ за́поведи. Где же се́я? В кото́рой же земли? В се́рдцых челове́ческих и во всех концы́х мира. Но не вси послу́шают Ева́нгелия, ниже́ вси творя́т повинова́ние. Да пад се́мя Госпо́дне на земли́ бла́зе, и сотвори́т плод. Но в ляди́не и в те́рнии ле́стных прие́млют сло́во, и в печа́лех и в бога́тствиих, и в по́хотех жите́йских ходя́ще, подавля́ют се́мя Госпо́дне, и плода́ не творя́.
Вы же люби́мицы, напра́вите сердца́ ва́ша на прия́тие Ева́нгельское, да не пода́вит ума́ ва́шего мн́огая печа́ль жите́йская. О потре́бе то́кмо пеце́м, а не о пи́щи. А́ще дово́льно сочта́ете, много не труди́теся. А́ще ли пи́щу поженете́, то и лихоима́ние и труд мног, и пот непостоя́нен, и скорбь без конца́, и житие́ мно́го печа́льно. Еди́наго же есть потре́ба братие, я́коже рече́ Госпо́дь Свои́ми усты́: Разве́ си потре́ба есть твори́ти разли́чно, беды́ ра́ди теле́сныя. Сия́ же безпреста́ни твори́ти па́ки, спасе́ния ра́ди душе́внаго.
Ничто́же бо вы́ше душа́ есть. О сей бра́тие теце́м, и угото́ваем тече́ние по вся дни. Не расточи́м всего́ вре́мене н́ашего о теле́сней печа́ли. Но егда́ вза́лчет те́ло, и пи́ща взы́щет, и ты помы́сли, я́ко душа́ требует своея́ пи́ща. И я́коже те́ло, а́ще не прии́мет, жи́во бы́ти не мо́жет, та́ко и душа́, а́ще не прии́мет пи́ща своея́, мертва́ есть. И́бо челове́к сугу́бь есть, от душа́ и от те́ла. И сего́ ра́ди глаго́лаше Спас: не о хле́бе еди́ном жив бу́дет челове́к. Ты у́бо я́ко до́брый смотри́тель дождь душе́вная бра́шна души́, а теле́сная телеси́. Не то́кмо те́ло свое́ пита́я, ду́шу же оста́виши пу́сту, гла́дом истаява́ему. Но у́бо да не оста́виши своея́ душа́ умерщве́ны бы́ти, но питай ю́ боже́ствеными словесы́, во псалме́х и пе́ниих и пе́снех духо́вных, в прочита́нии боже́ственых писа́ний, в постех, в бде́ниих, в моли́твах и в слеза́х, во упова́ниих, и в поуче́ниих бу́дущих благ. Сия́ и подо́бная сим, пи́ща и жизнь есть души́.
Блюди́теся бра́тие, еда́ кто вас без плода́ обря́щется. Се́яй бо в плоть свою́ наслажде́ние мирско́е, питает и растача́ет, и объе́дся уты́, от пло́ти пожина́ет тлю. Се́явый же в дух, моли́твою и посто́м и бде́нием, от Ду́ха по́жнет жизнь ве́чную.
Поразуме́йте и ви́дите, я́ко ника́коже похваля́еми бывают пита́ющеися и глумя́щеися, и смею́щеися. Сия́ бо язы́цы творя́́т. Нашь же христиа́неск зако́н сице́в есть: Блаже́ни ни́щии духом. Блаже́ни пла́чущеися. Блаже́ни ми́лостиви. Блаже́ни изгна́ни. Блаже́ни уничиже́ни. Блаже́ни чи́стии се́рдцем. Блаже́ни воздержа́щеися. Блаже́ни соблю́дшеи телеса́ своя́ чи́ста. Блаже́ни отве́ргшеися ми́ра Христа́ ра́ди. Блаже́на телеса́ де́вственых. Блаже́ни иму́щеи жены яко не иму́щеи. Блаже́ни бдя́щеи и моля́щеся при́сно. Блаже́ни прови́дящеи гряду́щаго суди́ти живы́м и ме́ртвым. Блаже́ни слезя́щеи в моли́твах. Си́и боже́ственых книг правове́рных суть.
Ќое же писа́ние блажи́т игра́ющая и свиря́юща или́ смею́щаяся или́ пита́ющаяся и упива́ющася или́ пле́щущая и пля́шущая или́ лю́бящая мир и я́же в ми́ре? Сего́ нашь зако́н не сове́тует. Сему́ Госпо́дь нашь не нанучи́л есть, но и ока́ял есть глаго́ля: го́ре вам смею́щимся, я́ко пла́катися и́мате и рыда́ти. Го́ре вам насы́тившимся зде, я́ко вза́лчете. Го́ре вам бога́тым. И па́ки проро́ком глаго́лет: Го́ре глаго́лющему зл́ое добро́, и до́брое зло. И полага́ющим свет во тму, и тму во свет. И полага́ющим го́рькое в сла́дко, и сла́дкое в го́рько. Го́ре оправда́ющим нечести́ваго мзды ра́ди, и пра́вду пра́ведника взе́млющим от него́. Го́ре востаю́щим зау́тра и сике́ру гоня́щим, и пребыва́ющи допо́зда. Вино́ бо их сожже́т я́. С гу́сльми бо и тимпа́ны и со свире́льми вино́ пию́т, дел же Госпо́дних не ве́дят, и дел рук свои́х не сматря́ют. Си́и и подо́бная сим миролю́бных челове́к и плотолюби́вых, а не христолюби́вых. Ма́ло послу́́шай ходя́щих те́сным путе́м, я́коже глаго́лет апо́стол: Во всем стоя́щеся бра́тие, я́ко Бо́жия слуги́, в терпе́нии мно́зе, в ско́рбех и в беда́х, в туга́х, в ра́нах, в темни́цах, и во сме́ртех мно́жицею, в труде́х и в бден́иих, во алка́нии и про́чая. И паќи Госпо́дь: Воста́вше моли́теся, да не вни́дете в напа́сть.
Что у́бо потре́ба сотвори́ти бра́тие? Се у́бо слы́шасте, ка́ко блажи́ми суть ходи́вшеи те́сным и ско́рбным путе́м, и ка́ко ока́еми суть, ходи́вшеи простра́нным и широ́ким путе́м, веду́щим в поги́бель.
Потруди́мся бра́тие в ма́лое се вре́мя, да ца́рствуем в непроходи́мыя ве́ки. И име́им всегда́ пред очи́ма смерть, и гряду́щаго суди́ти живы́м и ме́ртвым. И при́сно помина́ем ве́чную му́ку, и безсме́ртное Ца́рство и жизнь. И е́же со Христо́м житие́. Помы́слим я́ко ничто́же есть житие́ се, но то́кмо сле́зы и боле́зни, и клеветы́ и уны́ния, и труды́ и ста́рость, и неду́ги и грех и смерть. Не возлю́бим ми́ра, ниже́ да весели́т тебе́ мир сей, и за́пнет ти, и на́га тя по́слет во он век.
Помина́й глаго́лющаго: Безпреста́ни моли́теся, и не весели́ся ско́рым мимотече́нием жития́ сего. Псало́м во усте́х твои́х да пребыва́ет. Бог бо имену́емь прого́нит бе́сы. Или́ на де́ло про́стреши ру́це твои́, язы́к твой подае́т и ум твой да мо́лится. А́ще хо́щеши муче́ния изба́витися, ни еди́наго никогда́же оклевещи́.
Го́ре беззако́ннику, я́ко егда́ вси просветя́тся, а он омрачи́тся. Го́ре ху́льнику, свя́жет бо ся язы́к его́, и отвеща́ти Судии́ не мо́жет. Го́ре лихои́мцу, я́ко бога́тство бежи́т от него́, и огнь прие́млет и́. Горе уныва́ющему, взы́щет бо вре́мени е́же зле расточи́л есть, и не обря́щет. Горе блудолю́бцу, я́ко оскверня́ет оде́жду Женихо́ву, и от ца́рскаго бра́ка изводи́мь быва́ет со студо́м. Го́ре клеветнику́ и с ним пия́нице, яко сии со уби́йцами растя́жени бу́дут, и с прелюбоде́и му́чатся. Горе пита́ющемуся в ма́лое се вре́мя, я́ко бо ове́н пита́ется на заколе́ние. Го́ре лицеме́ру, па́стырь бо его́ отме́щется, и волк расхища́ет и́.
Блаже́н ходя́й те́сным и ско́рбным путе́м: вене́ц бо нося́ на не́бо восхо́дит. Блаже́н име́яй житие́ высо́ко, а смире́ну му́дрость: сей бо Христу́ подо́бится. Блаже́н творя́й добро́ мно́гим: мно́ги бо обря́щет помо́щники. Блаже́н расточа́яй зла́я я́же бес собра́л: сей со дерзнове́нием Судии́ предста́нет в стра́шный день. Блаже́н пону́дивый себе́ на все Бо́га ра́ди, я́ко ну́жницы восхища́ют Ца́рство небе́сное.
Пону́дим себе́ бра́тие на вся́ко де́ло бла́го. Помо́лимся друг дру́гу, и нака́жем себе. О еди́ном суде́ бесе́да на́ша да бу́дет, и о отве́те нашем. Лю́бо а́ще де́ло творите́, или́ на путь хо́дите, лю́бо на обе́де, или́ на ло́жих ва́ших, или́ и́но что творите́, всегда́ о Суде́ и о прише́ствии правди́ваго Судии́ пеце́теся. И помышля́йте на се́рдцых ва́ших, и глаго́лите к себе́: Какова́ си у́бо кроме́шняя тма, и како́в си у́бо есть негаси́мый огнь и червь не усыпа́яй. Како́в си у́бо и скре́жет зу́бный. Сия́ к себе́ бесе́дуйте день и нощь, како тече́т о́гненая река́, и потребля́ет зе́млю. Ка́ко свие́тся небо я́ко и кни́ги. Ка́ко зве́зды спа́днут, я́ко и ли́ствие со я́годичия. Ка́ко изче́знет со́лнце и ме́сяц. Ка́ко небеса́ раздира́ются повеле́нием Влады́чним. Ка́ко молну́яся с небеси́ Суди́й схо́дит. Ка́ко трепе́щуще си́лы небе́сныя преди теку́т. Како готовится стра́шный престо́л. Ка́ко коле́блется земля́, ча́ющи Судиина́ прише́ствия. Ка́ко вопию́т трубы́, и ка́ко отверза́ются гро́би. Ка́ко истряса́ются жа́лия. Ка́ко от ве́ка усо́пшии востаю́т. Ка́ко па́ки теку́т душа́ к телесе́м. Ка́ко на сре́тение досто́йнии теку́т. Ка́ко ра́дуется Жени́х. Ка́ко гото́вятся вход гото́вии. Како от презре́вших Жени́х затваря́ется.
Сим поуча́тися добро́ есть. По́мняй бо при́сно смерть, не согреша́ет никогда́ же. Не все вре́мя живота́ на́шего о чре́ве теце́м и о оде́жди. Сия́ бо вся язы́цы творя́т, не иму́щеи наде́жды жи́зни ве́чныя. Не убо́йтеся, ни уподо́битеся у́бо им, но послу́шайте Го́спода глаго́люща: Проси́те Ца́рствия небе́снаго, сия́ вся приложа́тся вам.
Про́сим бра́тие того́ Ца́рствия, не иму́щаго конца́. Про́сим тоя́ ра́дости, су́щая в непроходи́мыя ве́ки. Помо́лимся бра́тие с боле́знию се́рдца и со слеза́ми, да не лиши́мся блаже́ныя о́ноя жи́зни. Оста́немся су́щая зде пи́ща, да не лиши́мся ве́чнаго наслажде́ния. Пла́чемся зде ма́ло, да не пла́чемся та́мо мно́го. А́лчем зде, та́мо насы́тимся. Поми́луем, да та́мо поми́ловани бу́дем. Вни́дете те́сными две́рьми и ско́рбным путе́м, да не я́ко зде, широ́ким путе́м ходи́вше, та́мо в поги́бель и́дем. Мно́гим бо запя́ло есть житие́ се су́етное, и мн́огим поруга́лося есть, и мно́гих ослепи́, лесть ми́ра сего.
Мы же бра́тие вне́млем себе́ и услы́шим Го́спода глаго́люща: Гряде́те во след Мене́. Оста́вим всю ра́дость ми́ра сего́ и отве́рзем. Руга́етбося любя́щим его́. И потщи́мся прия́ти ве́чную жизнь со а́нгельскими ли́ки, со Христо́м живу́щих, я́ко Тому́ сла́ва в ве́ки веко́в. Ами́нь.