Молю́ вы у́бо бра́тие сих ча́ющих, потщи́теся чи́сти и непоро́чни обрести́ся ми́ром, да егда́ на́йдет ти лука́вый по́мысл бра́те, извлецы́ си мечь е́же есть страх Бо́жий, и посече́ши всю си́лу вра́жию. В трубы́ же ме́сто име́й боже́ственая писа́ния. Яце́м же о́бразом труба́ вопиющи собира́ет во́ины, та́ко и боже́ственая писа́ния вопию́ща к нам, собира́ют ны по́мыслы на страх Бо́жий. И́бо суть по́мысли на́ши сосу́д во́инствен, борю́щеися со враги́ Царе́вы. И па́ки: Яце́м же о́бразом труба́ вопию́щи во вре́мя бра́ни, воставля́ет и но́ваго неве́гласа прилежа́нием на супроти́вныя, та́ко и боже́ственая писа́ния воста́вят ти прилежа́ние на благое́, и укрепя́т тя на стра́сти.
Те́мже бра́те мой, ели́ко мо́жеши понужда́й себе́, ча́сто почита́я боже́ственая писа́ния, я́ко да соберу́т ти по́мыслы, я́же растача́ет враг свои́м злоко́зньством, влага́я лука́выя по́мыслы, или́ ско́рби мно́жицею принося́ мно́ги, или́ бла́го житие́ и простра́нство подая́. Сия́ бо содева́ет свои́м кова́рством и ле́стию, я́ко да отчужди́т от Бо́га челове́ка. Его́же бо мно́жицею не возмо́жет по́мыслом искуси́ти и низложи́ти, тогда́ уже́ принесе́т ему́ ско́рби, я́ко да омрачи́т ему́ ум, и обря́щет в нем про́чее все́яти хотя́, е́же хо́щет. И на́чнет влага́ти мни́ху сицевы́ по́мысл, и глаго́лати с кля́твою, я́ко отне́лиже нача́х де́лати благо́е, злы дни ви́дех. Сотворю́ у́бо зла́я, да ми прииду́т блага́я. И а́ще тогда́ не обря́щется кто трезвя́ себе́, поглоти́т и́, а́ки ад жи́ва. А́ще же и в сих не возмо́жет его́ искуси́ти, тогда́ нанесе́т ему́ простра́нство, и вознесе́т и́, и лесть мно́гу пода́ст ему́ люте́йшу, и го́рьшу вся́цех страсте́й. Сия́ же есть го́рда и несмы́слен творя́щия челове́ка. Сия́ во глубину́ низво́дит ума́. Сия́ небеса́ твори́т глаго́лати ху́льная. Пи́шет бо: И положи́ша на небеси́ уста́ своя́. Сия́ твори́т челове́ка не ве́дети Бо́га. Сия́ твори́т ни поне́ ви́дети своея́ не́мощи, ниже́ помышля́ти дне сме́ртнаго. Сия́ же есть вещь всего́ зле́йши. Сим путе́м любя́й ходи́ти, во хра́мины сме́ртныя обря́щется каса́яся. Се есть путь и́же рече́ Госпо́дь, простра́нный и широ́кий, веды́й в поги́бель. Се уже́ слы́ша бра́те мой, почто́ нано́сит ти враг овогда́ простра́нство, овогда́ скорбь, к нему́ же бо искуша́ет заве́т челове́ку, належа́щи проти́ву тому́, и сам вою́ет пра́вдами ополча́тися.
Те́мже бра́те мой воспряни́ изве́сто, и потщи́ся пр́исно чте́нию прилепа́тися, да тя научи́т ка́ко избежа́ти подоба́ет се́тей вра́жиих. И пости́гнути жизнь ве́чную. Составля́ет бо почита́ние боже́ственых писа́ний, ума́ прельще́на, и да́рует ему́ ра́зум к Бо́гу. Пи́шет бо: Упраздни́теся и разумей́́те, я́ко Аз есмь Бог.
Слы́шиши ли бра́те мой, я́ко ра́зум Бо́жий прие́млет, пра́зднуяй в боже́ственых писа́нии и́стинным се́рдцем. Те́мже не лени́ся бра́те о души́ свое́й, но пра́зднуй чте́нием и моли́твами, я́ко да просвети́тся по́мысл твой, и я́ко да бу́деши соверше́н весь цел, и ни в че́мже сый недоста́точен, и ни да хва́лятся речьми́ е́же бесе́довати пред боля́ры, кня́зи же и цари́. Ты же хвали́ся пред а́нгелы Бо́жиими, бесе́дуя Святы́м Ду́хом и боже́ствеными писа́ньми. Дух бо Святы́й глаго́ляй и́ми есть. Потщи́ся убо бесе́довати боже́ственых книг писа́ния, и терпели́во потерпи́ в моли́твах, ели́ко у́бо бесе́дущеи Бо́гови и́ми, толи́ко освяща́еттися душа́ и те́ло и ум.
Се у́бо веждь бра́те, я́ко внегда́ же а́ще бесе́дуеши боже́ственых книг писа́нии, освяща́ешися. Потщи́ся ча́сто бесе́довати в них. А́ще и не пра́зднуета ру́це, то моли́ся па́ки по́мыслом. И́бо блаже́ная А́нна ма́ти проро́ка Самуи́ля моля́шеся и устне́ ея́ то́кмо гыба́стеся, а моли́тва ея́ во у́ши Бо́гу Савао́фу вни́де. И пода́сться ей проше́ние ея́.
Те́мже бра́те мой, а́ще не пра́зднуета ру́це, но по́мыслом моли́ся. И́бо и молча́щих Бог послу́шает. А́ще и не ве́си боже́ственых писа́ний чести́, прилепи́ся иде́же есть слы́шати и по́льзоватися. Пи́шет бо: А́ще ви́диши му́жа разу́мична, у́тренюй к нему́, и степе́ньми две́ри его́ да вхо́дит нога́ твоя́. Се бо влага́ет бра́те мой враг нашь, не то́кмо не ве́дущим е́же не чести́, но и ве́дущим. Мно́зи бо суть чту́щеи, и не ве́дуще я́же чтут. Блюди́ся убо мни́ше, и не лени́ся о свое́м си да́ре, да́нем ти дарова́нием Христо́вым, но пецы́ся и взыщи́, ка́ко угоди́ши Бо́гови, да получи́ши блаже́нство святы́х. Пи́шет бо: Блаже́ни испыта́ющеи сведе́ния Его́, и всем се́рдцем взы́щут Его́.
Блюди́ся, да тебе́ не прельсти́т враг, егда́ хо́щеши чести́, нанося́ ти уны́ние и влага́я в напа́сти, глаго́ля: сотвори́ сие́ де́ло, поне́же ма́ло есть, и та́ко без печа́ли чте́ши. Внегда́ же бо вложи́т ти сия́, и прилежа́ние пода́ст на де́ло ручно́е, сия́ вся вложи́т ти, да тя упра́зднит от чте́ния. Егда́ бо ви́дит бра́та приле́жно чту́ща и по́льзующа, си́ми вина́ми и ине́ми мно́жайшими повели́т ему́, собла́зна и ему́ и́ща.
Ты же у́бо не ве́руй ему́, но бу́ди я́коже еле́нь жа́ждай, жела́я приити́ на исто́чники во́дныя, я́ко да испи́еши от них, и уга́сят ти жа́жду, распаля́ющу тя страстьми́. И испи́еши от них су́щую ти по́льзу. Я́коже се что глаго́лю: Да егда́ Госпо́дь да́рует ти разуме́ти сло́во от них, да тебе́ не пре́йдет, но да навы́кнеши в по́мысле си и да напи́шеши в се́рдцы свое́м, и па́мять его́ сохрани́ши без поги́бели.
Пи́шет бо: В оправда́ниих Твои́х поучу́ся. И па́ки глаго́лет: В се́рдцы мое́м скрых словеса́ Твоя́, да не согрешу́ Тебе́. И па́ки: О чем испра́вит ю́ный путь свой? Кто бо, помяну́в сло́во Твое́, не испра́вися? Не ве́де, а́ще есть не́кто непотре́бен и окая́н, сице́вый бо никто́же по́мнит в себе́, но и я́же мни́тся по́мня, то и та забы́л есть.
Таково́му у́бо челове́ку глаго́лет Бог: Вску́ю ты пове́даеши оправда́ния Моя́, и прие́млеши заве́т Мой усты́ твои́ми? Повели́т бо взя́ти от него́, е́же мни́тся имы́й. Сице́вый бо мни́тся ве́ру имы́й, и́бо и христиа́нина себе́ нарица́ет, де́лы же отме́щется. И есть неве́рнаго горе́е.
Те́мже повели́т от него́ взя́ти Дух Святы́й, И́же прия́т в день избавле́ния, я́же мня́ся имы́й, и бу́дет сице́вый челове́к я́ко сосу́д, зда́н вину́, и распа́лину сотвори́л, и то́ю погуби́л вино́. Его́же мы вси зря́ще мне́хом по́лна су́ща, и не ве́дуще бы́вшаго в нем. И егда́ же испыта́н бу́дет, тогда́ яви́тся всем, я́ко тще есть лежа́щее.
Егда́ бо сице́вый челове́к где в день су́дный испыта́емь бу́дет, тощь обря́щется, и тогда́ бу́дет я́ве всем я́же нань. Сице́вии суть глаго́люще и Царе́ви в день он: Го́споди, Го́споди, не в Твое́ ли и́мя прореко́хом, и Твои́м и́менем си́лы мно́ги сотвори́хом? И отвеща́в Царь рече́т им: Ами́нь глаго́лю вам, не ве́де вас. Не ви́диши ли, бра́те, я́ко ничто́же ве́сьма и́мать таковы́й?
Ты же у́бо по́мни сло́во, е́же слы́шиши, и испра́ви путь свой. Блюди́ся, не оста́ви забы́тию наити́, и восхи́щену бы́ти от се́рдца твоего́. Блюди́ся, не оста́ви птиц сни́ти, и поя́сти се́мя Сы́на Бо́жия. Сам бо рече́, я́ко се́мя есть сло́во, е́же слы́шасте, сокры́й се́мя в боце́ земли́, и́же есть скрый сло́во посреде́ се́рдца твоего́, я́ко да плодоно́сен обря́щешися Бо́гови в стра́се.
Егда́ же чте́ши, с прилежа́нием и боле́знию чти, во мно́зе устрое́нии, не мимоходя́ стихи́, и не тщи́ся то́кмо листо́в минова́ти, но а́ще есть потре́ба, не лени́ся, но и два́жды, и три́жды, и мно́жицею стих проиди́, я́ко да разуме́еши си́лу его́. И егда́ же хо́щеши почести́ или́ чту́щаго послу́шати, пре́жде помоли́ся Бо́гу, глаго́ля: Го́споди Иису́се Христе́, отве́рзи ми у́ши и о́чи се́рдца моего́, е́же слы́шати ми сло́во Твое́ и разуме́ти е́. И сотвори́ти во́лю Твою́, я́ко пресе́льник аз есмь на земли́. Го́споди, не скрый от мене́ за́поведий Твои́х, но откры́й о́чи мои́, и уве́м чудеса́ Твоя́ от зако́на Твоего́. На Тя бо упова́ю, Бо́же мой, да Ты ми просвети́ши се́рдце мое́.
Ей, бра́те мой, молю́ тя. Та́ко всегда́ моли́ся Бо́гови, я́ко да просвети́т ти ум, и возвести́т ти си́лу сло́ва Своего́. Мно́зи бо прельсти́шася, наде́ющеся [в] разу́ме свое́м, и наричу́щеся прему́дри. Обуя́ша, неразуме́юще пи́саных, и впадо́ша в власфими́ю, ре́кше в хулу́, и поги́боша.
А́ще же у́бо внегда́ начне́ши чести́, и обря́щеши сло́во дворазу́мно, блюди́ся, да тебе́ не нау́чит лука́вый глаго́лати в себе́, я́ко не та́ко есть, я́коже глаго́лет сло́во сие́, ка́ко мо́жет си́це бы́ти и сицева́я? Не ве́руеши ли Бо́гови? Ве́руй словесе́м Его́, и глаго́ли лука́вому: Иди́ за мя, сатано́, аз ве́де, словеса́ Бо́жия словеса́ пречи́ста суть, и я́ко сребро́ раждеже́но и иску́шено земли́, и очи́щено седмери́цею, и ничто́же в них развраще́нна, ни стропо́тна, но вся бла́га суть пред разумева́ющим пра́ве, и обрета́ющими ве́дение. Аз же неразу́мен есмь и не све́де, и ве́рую у́бо, я́ко духо́вна суть писа́ния. Глаго́лет бо апо́стол: Я́ко зако́н духо́вен есть. А́ще ли то, и та́ко возри́ на не́бо и рцы: Го́споди, ве́рую словесе́м Твои́м, и не прекосло́влю. Но наде́юся словесе́х Свята́го Ти Ду́ха. Ты у́бо, Го́споди, спаси́ мя, я́ко да обря́щу благода́ть пред Тобо́ю. Аз бо ино́го не ищу́, но то́кмо спасе́ния, я́ко да получу́ ми́лость Твою́ и милосе́рдие, я́ко Твое́ есть Ца́рствие и держа́ва, ны́не и во ве́ки. Ами́нь.